1, 2. ¿Kasa tü natüjaakalü aaʼu na aluwataaushiikana süpülapünaa nuʼunüin Jesuu Jerusalénmüin?

NEʼRÜIN na wijilantekana chaa Jerusalén niʼipachon chi Kashikai. Aküjünüsü süchiki tia namüin na suluʼukana tü kanüliakat Sanedrín otta naküjaka suʼttüin tü kashikat nisán. Na pütchimaajanakana naʼwalakajüin süchiki tia. Natüjaa aaʼu na aluwataaushiikana sülüʼülaain sükalia tü Pascuakat. Natüjaa aaʼu nuʼuneein Jesuu chaa Jerusalénmüin süpülapünaa tü Pascuakat.

² Soʼu kaʼikat tia, chajachi Jesuu Perea namaa na aluwataaushiikana, chaa waneemüin saʼata tü süchikat Jordán (Mat. 19:1; 20:17, 29; Mar. 10:1, 32, 46). Poloo apünüinmüin kaʼi süchikijee suʼttüin tü palajatkat kaʼi nisán, ekeraajünüsü tü Pascuakat soʼu kaʼika 14 nisán, nikerotapa chi Kaʼikai.

3. ¿Jamüsü kojutüinjatka wamüin tü kaʼi shikeraajünakalü oʼu tü Ekawaa Aipaʼajatkat nutuma chi Senyotkai?

³ ¿Kasoʼuleerü shikeraajünaka tü Ekawaa Aipaʼajatkat nutuma chi Senyotkai soʼu juyaka 2014? Ekeraajüneerü aaʼuriiroʼu 14, nikerotapa chi Kaʼikai. Kojutüsü maʼin wamüin tia kaʼikat otta namüin na aainjeekana tü nüchekakat Maleiwa. ¿Jamüsü kojutüka shia wamüin? Sutuma tü nuluwataakalü anain waya Jesuu. Müsü 1 Corinto 11:23-25: «Soʼu tü ai aapünüinjatkat oʼu nikii chi Wasenyotsekai Jesucristo süpüla nuʼutinnajachin aaʼin, nakotchajaakalaka na nikirajüinkana süpüla neküinjanain nümaa. Naapaakalaka chi Senyotkai wane pan sünain naapüin analuʼut nümüin Maleiwa. Nüshaletakalaka tü pankat sünain nümüin namüin: ‹Maa aka taapüin jooluʼu jümüin tü pankat, meechia taya aapajiraain tekii jaaʼu. Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya›, müshi nia namüin. Akaajaa tü naaʼinrakat süka tü iitakat kaluʼukot wiino».

4. (1) ¿Kasa wasakirüinjatka anain waaʼin süchiki tü Outkajawaakat eere Sotuin Waaʼin Ouktüin Jesuu? (2) ¿Jamüsü süpüla sütüjaanüin aaʼu kasoʼuluinjatüin tü Outkajawaakat eere Sotuin Waaʼin Ouktüin Jesuu? (Paashajeʼera tü pütchikat: «Outkajawaa eere Sotuin Waaʼin Ouktüin Jesuu 2014».)

⁴ Waainjüinjatü uatua süpüla juyakat tü Outkajawaakat  eere Sotuin Waaʼin Ouktüin Jesuu. Eesü jülüjüle waaʼin woʼunüinjanain sünain tia outkajawaakat. Makalaka anain püsakireʼerüle paaʼin: «¿Kasa taaʼinrajatka süpüla yapainjachin taya? ¿Kasa alatinnajatka sünain? ¿Kasa aainjünajatka sünain? ¿Jamüsü kojutüinjatka tamüin tia outkajawaakat otta tü kasa alatinnajatkat sünain?».

5. ¿Kasa nuluwataaka anain Jesuu na aluwataaushiikana süpüla nekeraajüinjatüin tü Pascuakat?

⁵ Nuluwataain Jesuu na aluwataaushiikana sünain achajawaa tü paü nekaainjatkalü aluʼu tü Pascuakat. Akatsaʼa nnojoluin nüküjüin namüin neʼitaainjatüin suluʼu tia paükat mainma korolo kojutüsü. Shia neʼe wuleinjatüin tü paükat otta keraainjatüin shia namaa na antajanakana sünain tia ekawaakat (paashajeʼera Marcos 14:12-16). Nachajaainjatü neʼe pan maʼakasat soolojia sümaa wanee wiino yuuleematüsü. Süchikijee nekaain sünain tü Pascuakat, aashajaashi Jesuu süchiki tü pankat otta tü wiinokot. Shiainjatü alatinnakat tia soʼu tü Outkajawaakat eere Sotuin Waaʼin Ouktüin Jesuu.

6. (1) Süchikijee nikeraajüin Jesuu tü Pascuakat, ¿jamüsü nünüiki süchiki tü pankat? (2) ¿Kasa pan alatinnajatka sünain tü Outkajawaakat eere Sotuin Waaʼin Ouktüin Jesuu?

⁶ Müshi chi aluwataaushikai Mateo süchiki tia: «Naapaakalaka Jesús wane pan sünain naapüin analuʼut nümüin Maleiwa saaʼu. Nüshaletakalaka shiʼipawalin shia namüin na nikirajüinkana, sünain nümüin namüin: ‹Jaapaa jikaiwa tü pankat› » (Mat. 26:26). Tia «pankat», maʼakasat soolojia. Müsü aka saaʼin tü pan ekaanapuʼukat sünain tü Pascuakat (Éx. 12:8; Deut. 16:3). Aainjuushi süka trigo sümaa wüin. Maʼakasat soolojia otta ichii. Süka moolojiain tü pankat, lakayaainjatü otta shaleshaleinjatü. Maaʼulu yaa, eeshii nuluwataanüle wanee wawala natuma na laülaashiikana süpüla naainjüinjatüin tia pankat süka trigo asirujuushi otta wüin (eesü süpüla shiain tü kanüliakat integral). Aʼajaanajatü suluʼu wanee aʼajaaya pan shiishitüsü. (Nnojorüle trigo, eesü süpüla saainjünüin süka roo asirujuushi, cebada otta maiki.) Eesü süpüla sülatinnüin tü pan naainjakat na judíokana, tü kanüliakat matzá. Akatsaʼa maʼakainjatüin shia malta, kaliinashuku otta sewooya.

7. ¿Kasa tü wiino eejatkat nutuma Jesuu? ¿Jarat tü wiino walatirüinjatkat sünain tü Outkajawaakat eere Sotuin Waaʼin Ouktüin Jesuu?

⁷ Müshi Mateo nüchiki Jesuu: «Naapaakalaka joo Jesús wane iita kaluʼusü wiino sünain naapüin analuʼut nümüin Maleiwa saaʼu. Naapakalaka shia namüin na nikirajüinkana sünain nümüin namüin: ‹Anakaja müleka jüsüle jüpüshua waneʼewai jukua süpüshi tü asüüshikat› » (Mat. 26:27, 28). Tü wiino naapakat Jesuu, shia wanee wiino yuuleematüsü  (nnojotsü shirain neʼe uuwa. Süka jamüin, kakaliairü atpajünüin tü uuwakat). Mayaapejeʼe nnojoluin süsünüin wiino sünain tü Pascuakat chaa Egipto, nnojotsü nüküjüin Jesuu mojuin asaa wiino sünain tü Pascuakat. Eejatü wiino nutuma Jesuu soʼu tü Ekawaa Aipaʼajatkat nutuma chi Senyotkai. Makalaka walatirüin wiino maaʼulu sünain tü Outkajawaakat eere Sotuin Waaʼin ouktüin Jesuu. ¿Jarat tü wiino anakat süpüla walatirüin? Shiainjatü wanee wiino maʼakaka brandy otta especias. Süka jamüin, shiyaakuasü tü nüsha Jesuu amülakat. Eesü süpüla shiain tü wiino aainjünakat piichipaʼa jee shiale tü oikkaanakat maʼaka saaʼin tü kanüliakat: beaujolais, borgoña jee quianti. Yuuleematüinjatü otta nnojoluinjatü kasain ejitünüin saʼaka.

8. ¿Jamüsü kojutüka maʼin wamüin tü pankat sümaa tü wiinokot?

⁸ Naashin Pablo wekeraajüinjatü tü Ekawaa Aipaʼajatkat nutuma chi Senyotkai, nnojoishii nayainjanain neʼe na aluwataaushiikana. Müshi nia namüin na anoujüshii chajanakana Corinto: «Tasoʼireerü jooluʼu jaaʼin sünain tü tekirajapüʼükat anain paalainka. Anakaja jülüjale jaaʼin shia, süka niain kaküjalain shia tamüin chi Senyotkai. [...] Naapaakalaka chi Senyotkai wane pan sünain naapüin analuʼut nümüin Maleiwa. Nüshaletakalaka tü pankat sünain nümüin namüin: ‹Maa aka taapüin jooluʼu jümüin tü pankat, meechia taya aapajiraain tekii jaaʼu. Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya› » (1 Cor. 11:23, 24). Sutuma tia, waainjüin maaʼulu juyawai tü Outkajawaakat eere Sotuin Waaʼin Ouktüin Jesuu. Kojutüsü maʼin wamüin tü pankat sümaa tü wiinokot.

9. ¿Jamüsü nanüiki noʼutku na wayuukana süchiki tü pan naapakat Jesuu namüin na aluwataaushiikana?

⁹ «Tüü shia tü teʼirukukat», müshi Jesuu naashin noʼutku na wayuukana. Naashin nayakana, eeʼiranajaasü niʼirukuin Jesuu tü pankat. Nnojotsü alatüin tia. * ¿Jamüsü watüjaaka saaʼu? Wanaa sümaa naapüin Jesuu tü pankat namüin na aluwataaushiikana, yalajachia nia naʼütpaʼa. Akaʼaya tü pankat,  nnojotsü eeʼiranajaain. Tü nümakat Jesuu, shiyaakua neʼe nutuma naapajiraainjachin nikii. Mainmatua kayaakuayaain nutuma Jesuu wanee kasa wanaa sümaa nikirajüin (Juan 2:19-21; 4:13, 14; 10:7; 15:1).

10. ¿Kasa kayaakuayaaka tü pan alatinnakat sünain tü Ekawaa Aipaʼajatkat nutuma chi Senyotkai?

¹⁰ Tü pan nekakat na aluwataaushiikana shiyaakuayaa naapajiraainjachin nikii Jesuu. Naaʼinruʼu na anoujüshiikana, nayayaa kayaakuayaaka tü pankat na chainjanakana iipünaa. ¿Jamüsü makaʼa nanüiki? Süka nüshaletüin Jesuu tü pankat otta süküjünüin paala nnojoluinjatüin süshataanüin tü niipüsekat (Éf. 4:12, NM; Roma 12:4, 5, NM; 1 Cor. 10:16, 17; 12:27, NM). Shiasaʼa mapa nayaawata aaʼu na anoujüshiikana shiyaakuayaain naapajiraainjachin nikii Jesuu tü pankat. Müliasü maʼin naaʼin Jesuu otta akachennüshi nia sünain wanee wunuʼu. Tü pan alatinnakat sünain tü Ekawaa Aipaʼajatkat nutuma chi Senyotkai, shiyaakuayaa naapajiraainjachin nikii Jesuu saaʼu waainjala (1 Ped. 2:21-24, NM; 4:1; Juan 19:33-36; Heb. 10:5-7).

11, 12. (1) ¿Jamüsü nünüiki Jesuu süchiki tü wiinokot? (2) ¿Kasa kayaakuayaaka tü wiino alatinnakat sünain tü Ekawaa Aipaʼajatkat nutuma chi Senyotkai?

¹¹ Süka watüjaaitpain saaʼu kasain kayaakuayaain tü pankat, watüjaweerü aaʼu kasain kayaakuayaain tü nümakat Jesuu süchiki tü wiinokot. Müsü tü pütchikat: «Akaajaa tü naaʼinrakat süka tü iitakat kaluʼukot wiino. Süchikijee nekaain, naapaakalaka shia sünain nümüin namüin: ‹Asüüshikat tüü, anuu jüsüitpain jooluʼu, müsü aka sukuaippa tü tasha amülainjatkat süpüla nikeraajüinjatüin chi Maleiwakai tü pütchi jeket pansaatüjütkalia nütüma› » (1 Cor. 11:25). Mainma Wiwülia maka anüiki maʼaka saaʼin tü sümakat tü Wiwüliakat Reina-Valera. Müsü shia: «Tü iita kaluʼukot wiino shia tü pütchi jeket pansaatüjütkalia saaʼu amülainjatüin tasha» (yuuisü watuma türa pütchikat). Wanaa sümaa iita nümüin Jesuu, aashajaashi nia süchiki tü wiino suluʼujatkat. ¿Shiache tü pütchi jeketü pansaatüjütkalia tü wiinokot? Nnojo Shiyaakuayaasü tü nüsha Jesuu amülainjatkat.

¹² Müshi Jesuu suluʼu tü karalouktakat Marcos: «Asüüshikat tüü, müsü aka sukuaippa tü tasha amülainjatkat süpüla nikeraajüinjatüin chi Maleiwakai tü pütchi jeket pansaatüjütkalia nütüma» (Mar. 14:24). Amülasü nüsha Jesuu «süpüla sülatinnajatüin saainjala wayuu süpüshua» (Mat. 26:28). Tü wiino yuuleematakat shiyaakuayaasü tü nüsha Jesuu amülakat. Sükajee amülain nüsha Jesuu, taasheena waya nutuma Maleiwa saaʼu «nülatirüin waainjala woulia» (paashajeʼera Éfeso 1:7).

13. ¿Kasa aainjünajatka sünain tü Outkajawaakat eere Sotuin Waaʼin Ouktüin Jesuu?

¹³ Piiwaʼaire oʼunaa sünain tü Outkajawaakat eere Sotuin Waaʼin Ouktüin Jesuu, nnojoleerü piʼrüin eʼitaanüin kasa eekai kojutüin maʼin. Nnojoleerü müin süpülajatkat saaʼin wanee miʼiraa. Shieerü piʼraka wulein maʼin otta anain maʼin eeinjatüle saainjünüin. Eesüjaʼa süpüla piʼrüin eʼitaanüin süsii wunuʼu. Piʼreechi ekirajüin wanee laülaashi suluʼu tü outkajaaleekat. Nüküjeerü tü sümakat tü Wiwüliakat süchiki tü Ekawaa Aipaʼajatkat nutuma chi Senyotkai. Mapüleejeerü shikirajia nutuma. Nakaaliinjeena na jutkatüshiikana süpüla natüjaainjatüin saaʼu otta kojutüinjatüin namüin tü kasa eekat sutuma ouktüin Jesuu waaʼu: katüinjatüin woʼu waneepia (paashajeʼera Roma 5:8-10). Nüküjeerü süchiki piamasü kasa naʼatapajaka na anoujüshiikana saashin tü Wiwüliakat.

14. ¿Jarat tü piamasü kasa aküjüneetkat sünain tü Outkajawaakat eere Sotuin Waaʼin Ouktüin Jesuu?

¹⁴ ¿Jarat tü piamasü kasa aküjüneetkat sünain tia outkajawaakat? Tü palajatkat shia eeinjanain na anoujüshii aluwataainjanakana nümaa Kürisüto chaa iipünaa. Palitchon na aneekünakana maʼaka palitchon namaiwa na aluwataaushiikana (Luc. 12:32; 22:19, 20; Alat. Map. 14:1). Tü wanee shia eeinjanain na anoujüshii katüinjanakana oʼu waneepia saaʼu tü mmakat paʼaraiisüpa shia. Süka müinjatüin nakuwaʼipa, aainjüneerü tü keeʼireekat naaʼin Maleiwa yaa saaʼu tü Mmakat maʼaka saainjünüin chaa iipünaa. Kakaliainna na anoujüshiikana sünain achuntaa tia (Mat. 6:10). Süküjüin tü Wiwüliakat jamüinjatüin sukuwaʼipa wayuu suluʼu tü paʼaraiisükat (Is. 11:6-9; 35:5, 6; 65:21-23).

15, 16. ¿Kasa aainjünajatka süka tü pan alatinnajatkat sünain tü Outkajawaakat eere Sotuin Waaʼin Ouktüin Jesuu?

 ¹⁵ Sülüʼütpa süpüla sujutaain tü outkajawaakat, aküjüneerü saainjünajatüin tü nuluwataakalü anain Jesuu na aluwataaushiikana. Alatinneerü wanee pan maʼakasat soolojia otta wanee wiino yuuleematüsü. Eʼitaaneerü shia saaʼu wanee meesa nüʼütpaʼa chi wawala ekirajüinjachikai. Naashajeʼereerü chi wawalakai tü nümakat Jesuu otta tü naaʼinrakat wanaa sümaa naainjüin tia outkajawaakat. Aainjüneerü tü nüshajakalü achiki Mateo, tü makat: «Naapaakalaka Jesús wane pan sünain naapüin analuʼut nümüin Maleiwa saaʼu. Nüshaletakalaka shiʼipawalin shia namüin na nikirajüinkana, sünain nümüin namüin: ‹Jaapaa jikaiwa tü pankat. Maa aka taapüin jooluʼu jümüin tü pankat, meechia taya sünain aapajiraain tekii jaaʼu jiakana› » (Mat. 26:26). Nüshaletüin Jesuu tü pankat jee nülatiraka shia namüin na aluwataaushiikana. Sünain tü outkajawaa eeinjatkat aaʼuriiroʼu 14, piʼreerü wanee pülaatachein kaluʼuka pan maʼakasat soolojia. Ashaletuushinjatü tia pankat.

¹⁶ Eejeerü kojuyasü pülaatachein süpüla nnojoliinjanain kamaʼain maʼin na wawalayuukana sünain alatiraa namüin na jutkatüshiikana. Nnojoleerü mainmain maʼin kasa aainjünajatkat süpülapünaa sülatinnüin tü pankat. Oʼuraajeechi palajana wanee wawala. Süchikijee, alatinneerü tü pülaatachein kaluʼukat pan sümaa anain sukuwaʼipa atumawaa. Eejeena na ekakana otta na nnojoliikana eküin tü pankat maʼaka sülatüin sünain tü outkajawaa eejatkat soʼu juyaka 2013.

17. ¿Kaseerü aainjünaka süpülapünaa sülatinnüin tü wiinokot?

¹⁷ Süchikijee tia, aainjüneerü tü nüshajakalü achiki Mateo, tü makat: «Naapaakalaka joo Jesús wane iita kaluʼusü wiino sünain naapüin analuʼut nümüin Maleiwa saaʼu. Naapakalaka shia namüin na nikirajüinkana sünain nümüin namüin: ‹Anakaja müleka jüsüle jüpüshua waneʼewai jukua süpüshi tü asüüshikat. Asüüshikat tüü, müsü aka sukuaippa tü tasha amülainjatkat süpüla nikeraajüinjatüin chi Maleiwakai tü pütchi jeket pansaatüjütkalia nütüma je süpüla sülatinnajatüin saainjala wayuu süpüshua› » (Mat. 26:27, 28). Süpülapünaa sülatinnüin tü wiinokot, oʼuraajeechi wanee wawala. Süchikijee alatinneerü namüin na jutkatüshiikana tü iita kaluʼukot wiino.

18. Chainjanale jee nnojorüle chainjanain waya iipünaa, ¿jamüshii woʼunüinjanaka sünain tü Outkajawaakat eere Sotuin Waaʼin Ouktüin Jesuu?

¹⁸ Naashin Jesuu, na eküinjanakana tü pankat otta na asüinjanakana tü wiinokot, nayainjana na aluwataainjanakana iipünaa nümaa (paashajeʼera Lucas 22:28-30; 2 Tim. 4:18). Na nnojoliikana eküin tü pankat otta asüin tü wiinokot, kojutüinjatü namüin noʼunüin sünain tia outkajawaakat. Süka naainjüin tia, neeʼiyatüin kojutüin namüin naapajiraain nikii Jesuu naaʼu. Eesü süpüla jülüjüin naaʼin tü kasa anasü eeinjatkat sünainjee ouktüin Jesuu naaʼu. Eeshii süpüla nalatüin süchikumüin tü müliaa müleʼu antajatkat. Kasuujeerü nasheʼin süka alaʼajaaushin naainjala noulia sütüma tü nüshakat chi Anneetchonkai (Alat. Map. 7:9, 14-17).

19. ¿Kasa waaʼinrajatka süpüla yapainjanain waya süpülapünaa tü Outkajawaakat eere Sotuin Waaʼin Ouktüin Jesuu? ¿Kasa waaʼinrajatka süpüla wayaawatüinjatüin saaʼu tü pütchi aashajeʼennajatkat?

¹⁹ Wayakana aküjüliikana pütchi nüchiki Jeʼwaa, eekana sainküin mmaka, yapashii waya süpülapünaa tü Outkajawaakat eere Sotuin Waaʼin Ouktüin Jesuu. Maʼaka jeʼra semaana süpülapünaa tia, wounejaain na wayuukana napüshuaʼa süpüla noʼunüinjanain sünain tü outkajawaakat. Waashajeʼerüin tü sümakat tü Wiwüliakat süchiki tü naaʼinrakat otta tü alatakat nümüin Jesuu süpülapünaa tü Ekawaa Aipaʼajatkat nutuma. Wachajaainjatü wakuwaʼipa süpüla woʼunüin sünain tia outkajawaakat. Antajana waya süpülapünaa shiiʼirajünüin tü jayeechikat otta süpülapünaa nuʼuraajüin chi wawalakai. Müle shia watuma, wasakeena na wayuu antakana otta watüjaajeerü aaʼu tü aküjünajatkat. Wayaawateerü aaʼu tü pütchi naashajeʼerakat chi wawalakai müleka jülüjüle waaʼin shia suluʼujee tü Wiwüliakat. Sükajee woʼunüin sünain tia outkajawaakat, weeʼiyateerü kojutüin maʼin wamüin naapajiraain nikii Jesuu waaʼu otta weeʼiyateerü woonooin sümaa tü nuluwataakalü anain waya. Müshi nia: «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (1 Cor. 11:24).