TÜ MANOULAKALÜ ATUMA WAYUU: Wainma wayuu anoujaka nünain chi Maleiwakai, akaisaʼa müin wattakai naaʼin noulia. Eesü wanee wayuu Christina sünülia, chejeʼewat Irlanda, wayuu anoujüsü shia, müsü sünüiki: «Tatüjaa aaʼu nukumajalain Maleiwa kasa süpüshuaʼa, akaisaʼa nnojolin teʼraajüin nia. Müshi wattakai naaʼin toulia».

TÜ SHIKIRAJAKALÜ ANAIN TÜ WIWÜLIAKAT: Eeshijaʼa süpüla müin wattakai naaʼin Maleiwa woulia. Pejepajaʼa nia wanain. Naaʼinmajüin waya naashin Jesuu, anuujeseʼe nünüiki: «Wane wayuu jaʼaka, müleka kamüʼünüinre nia poloo shikii anneerü je machikitaarüle waneesia sünainjee, nüpüteerü tü süpüshikat, tü mekietsatkat shikii mekietsalümüin, chaa saaʼu tü namünakat süpüla oʼunaa sünain achajawaa süchiki tü machikisatkat». ¿Jamaluʼulu tia? «Müsia nukuaippa chi Jüshikai Maleiwa chakai iipünaa, nnojotsü nücheküin süpüleerua maaʼawain nuulia waneesükaijeʼe tü anoujasükalüirua tanain, na makana saaʼin tepichi.» (Mateo 18:12-14.)

Kojutüshii nümüin Maleiwa na wayuukana waneʼewai nakua. ¿Kasa naainjaka süpüla nüchajaain tü anneerü machikisatkat? Maʼaka wekirajaain suʼttaiwaʼaya pütchikat tüü, neenaküin shia.

Nia Maleiwa eenakaka na wayuu anoujeekana nünain. Jamüsüjaʼa soʼu nakalia na nikirajüinkana Jesuu, aluwataanüshi Felipe nutuma Maleiwa nünainmüin wanee wayuu chejeʼewai Etiopía, nüküjüinjatü nümüin jamaluʼuluin tü pütchi naashajeʼerakat (Aluwataaushikana 8:26-39). Nuluwataainjaʼa Pedro nipialuʼumüin Cornelio, chi sülaülakai surulaat. Aashajaʼalaashi paala nia nümaa Maleiwa sümaa nuchuntüin niʼyataweein nümüin (Aluwataaushikana 10:1-48). Akaʼaya Pablo, aluwataanüshi nia namaa na nümaajanakana chaa Filiposmüin. Shiasaʼa chamüin, neʼraaja namüsia Lidia, wanee wayuu kojutüshi Maleiwa sümüin. «Nütanatkalaka [chi Maleiwakai] saaʼin süpüla kacheʼeinjatüin süpüla tü nüküjakat Pablo.» (Aluwataaushikana 16:9-15.)

Nüchajaain Jeʼwaa sukuwaʼipa süpüla niʼraajünüinjachin natuma naya wayuukana. Maaʼulu yaa, nuluwataain Jeʼwaa na aküjüliikana pütchi nüchiki süpüla naküjüin pütchi sümüin wayuu chaa shipialuʼu otta kaayeruʼu. Püsakireʼera joo paaʼin: «¿Nüneeküinche taya Jeʼwaa nakajee naya wayuukana?». Puchunta nümüin Maleiwa pücheküinjatüin pürütkaain nünainmüin. *