PÜTCHI SÜNAINKA SÜTA TÜ REWIISÜTAKAT
¿Shiimainchejeʼe eein chi Yolujaakai?
«Anoujüshi taya nünain Maleiwa jintüliiwaʼaya taya, alawaapejeʼe tamüin sünain eein chi Yolujaakai», müsü nünüiki Rogelio, chejeʼewai nia El Salvador. «Shiimolojopuʼuin taya tü teikat süka eʼrüipuʼuin taya wayumüin, ‹ojuʼiteerü Yolujaa püpüla› mapuʼusü tamüin. ‹Sujuʼita neʼe toulia›, maa müshijaʼa taya sümüin.»
¿Jaratche shiimainka saaʼin pümüin sünainjee pütchikalüirua tüü?:
-
«Alawaa neʼe sünain eein chi Yolujaakai», eeshii wayuu eekai namüin. Tü Yolujaa münakat naashin, shia neʼe süpüshuaʼa tü kasa mojusükat.
-
Eeshii eekai nanoujüin sünain shiimain eein chi Yolujaakai, nnojoipejeʼe nia ekerotuin sünainpünaa wayuu naashin.
-
Eeshii eekai nanoujüin sünain meʼrujuin chi Yolujaakai sümaa pülain maʼin nia otta nüchajaain sukuwaʼipa süpüla naainjüinjachin wayuu kasa mojusü.
Wainmayaa müsü neʼe tü sunoujakalü anain wayuu süchiki tia. ¿Jaratche shiimainka paajüin? ¿Choʼujaasüche maʼin pütüjaainjatüin saaʼu tia? Nnojorülejeʼe shiimain eein chi Yolujaakai, amülajaʼa neʼe sunoujüin wayuu sünain eein nia. Nnojoirejeʼe nikerotüin chi Yolujaakai sünainpünaa wayuu, ¿jamakaʼa mmotka wayuu neema? ¿Jama shiimainrejeʼe naainjireein waya kasa mojusü? Acheküsü eejüin waaʼin nuulia.
¿Shiimainchejeʼe eein chi Yolujaakai? ¿Shiataapa neʼe Yolujaa münüin süpüshuaʼa tü kasa mojusükat? Müleka shiimainre eein nia, acheküsü eejüin paaʼin nuulia. ¿Kasakaʼa paainjüinjatüin süpüla eejüin paaʼin nuulia? Watüjaajeerü aaʼu tia wekirajaale sünain tü sümakat tü Wiwüliakat.
