1. (1) ¿Kasa alataka nümüin Pedro soʼu chajachin nia chaa palaanain? (Piirakaa sümüin tü ayaakuaakat.) (2) ¿Jamüshi nimerolo nimerolo nümaka Pedro?

EESHIMAA yaawa wanee wayuu Pedro nünülia, chajaittaalamaʼinka chaa palaanain namaa na nuwalayuukana. Anuwaluʼujana naya, napanapajüinjeseʼe wanee jouktai katchinshaatasü maʼin, shiasaʼa wanaa maʼin sümaa tia, neʼrüin Jesuu napanapajee waraittataalashi sooʼopünaa tü palaakat. Nusouktakalaka Pedro nümüin Jesuu: «Senyotkalee, müleka shiimainreje piain weʼrüin, anakaja peenaküle taya süpüla tantajachin pünainmüin sooʼopünaa tü palaakat. ‹Anakaja, jalaichi pümaala›, nümakalaka Jesuu nümüin [...]. Nüshakatakalaka joo Pedro suluʼujee tü anuakat sünain waraittüin sooʼopünaa tü palaakat nünainmüin Jesús». Nuʼttakalaka sünain nimerolo nimerolo nümüin shirokumüin tü palaakat süka sotojooin naaʼin tü wawaikat. Achuntüshijeseʼe kaaliinwaa Pedro nümüin Jesuu, niyurulüin nütüna Jesuu sünain naapaain nia. «Pia matsüinkai anoula, ¿jamüsü nnojotkaʼa püchecherüin paaʼin sünain anoujaa tanain?, nümakalaka Jesuu nümüin» (Mat. 14:24-32).

2. ¿Kasa wekirajaajeetka anain jooluʼu?

² Wekirajaa sünain tü alatakat nümüin Pedro. ¿Kasa naaʼinraka sutuma niʼitaain naaʼin nünain Jeʼwaa? ¿Jamüsü sümatsüinjaaka nunoula suʼunnaa waraittüin nia sooʼopünaa tü palaakat? ¿Kasa akatsüinraaka atuma naaʼin sünain anoujaa soʼu tia? Jülüjüle waaʼin tia apünüinsükat kasa, katsüinjeerü wanoula sutuma (1 Cor. 16:13).

3. (1) ¿Jamüshi nnojoikaʼa mmoluin Pedro sünain waraittaa sooʼopünaa tü palaakat? (2) ¿Kasa waaʼinrajatka wayakana aʼyataakana nümüin Jeʼwaa?

³ Wanaa sümaa «jalaichi pümaala» nümüin Jesuu nümüin Pedro, oʼunüshi nia nünainmüin sünain waraittüin nia sooʼopünaa tü palaakat. Naainjain tia Pedro süka kanoulain nia nünain Jeʼwaa. Wayakana aʼyataakana nümüin Jeʼwaa maaʼulu yaa, waapüin waaʼin nümüin jee woutiisashii waya süka weʼitaain waaʼin sünain nükaaliinjeenain waya suulia tü kasa mojusü alatakat wamüin (Juan 14:1; paashajeʼera 1 Pedro 2:21).

4, 5. ¿Kasa weʼreetka müleka kanourale waya?

⁴ Kanourale wanee wayuu, nnojoleerü kasain isain nüchiki (Mat. 21:21, 22). Jamüshijaʼa Pedro, waraittüshi sooʼopünaa tü palaakat süka kanoulain nia. Eeshii woʼutku wayakana anoukteʼerüinnapaka wakuwaʼipa süka nükaaliinjain waya Jeʼwaa. Wountüin tia süka alin nia wapüla (paashajeʼera Colosas 3:5-10). Makaʼa aleewain waya nümaa Jeʼwaa maaʼulu yaa, shia süka weʼitaain waaʼin nünain jee süka waʼyataain nümüin. Nnojotsüjee wountüin tia müleka nnojoliire waya nükaaliinjain (Éf. 2:8-9).

⁵ Ichere wanoula nünain Jeʼwaa, wayouktamaateerü tü kasa mojusü niʼitaakat chi Yolujaakai wapüleerua (Éf. 6:16). Kanourale waya, eejiraajeena waya sümaa tü kasachiki oʼotokat wanain. Naapeerü wamüin Jeʼwaa süpüshuaʼa tü kasa choʼujaakat wamüin müleka niale waʼyataain amüin (Mat. 6:30-34). Kanourale waya nünain Jeʼwaa, kateerü woʼu süpüla kaʼikat süpüshuaʼa suluʼu tü Paʼaraiisükat (Juan 3:16, TNM).

6, 7. (1) ¿Jamüsü meematkaʼa wakuwaʼipa maʼaka saaʼin tü alatakat nümüin Pedro? (2) ¿Kasa eeka süpüla sümatsüinjaain atuma wanoula?

⁶ Emerolo emerolo müshi Pedro süka sümatsüinjaain nunoula, shia sotojooka neʼe naaʼin tü wawaikat, nnojoijaashi nia eirakaain nümüin Jesuu (Mat. 14:30). Tia wawai niʼrakat Pedro meematsü aka saaʼin tü kasachiki eejiraainjanakalü amaa waya maaʼulu yaa. Shiimainshaata nükaaliinjeenain waya Jeʼwaa süpüla wojuʼitüin suluʼujee tia kasachikikat. Jülüjüle neʼe waaʼin tü kasachiki alatakat wamüin, nnojoleerü weʼitaain waaʼin sünain nükaaliinjeenain waya Jeʼwaa.

⁷ Eesü süpüla sümatsüinjaain wanoula waneʼewai wakua. Saashin tü Wiwüliakat, ooʼulaainjana waya «suulia waainjala ooʼulaka suulia tü kasa eekai eein isakat atüma wachiki woonooin sümaa nünüiki Maleiwa» (Heb. 12:1). Shiale jülüjakuʼu müin waaʼin tü kasachiki alatakat wamüin, amatsüinjaajeerü wanoula maʼaka naaʼin Pedro. ¿Jamüsü süpüla watüjaain saaʼu sümatsüinjaale wanoula? Watüjaajeerü aaʼu tia wekirajaale sünain jaʼraisü kasa, jooʼu wekirajaai sünain.

8. ¿Kasa moteetka waaʼin shiale waaʼinmaain ashaittaa?

⁸ ¿Ayatüsüche piʼitaain paaʼin sünain tü naaʼinreetkat Jeʼwaa? Alüʼütshaatasü tü kaʼi najaʼttirüinjatkalü oʼu Jeʼwaa süpüshuaʼa tü kasa mojusü nuluwataakalü aaʼu Satanaa. Müleka shiale neʼe waaʼinmaain ashaittaa, anajaa telewisoot, apasiajawaa, moteerü waaʼin tü kaʼi najaʼttirüinjatkalü oʼu Jeʼwaa tü kasa mojusükat (Hab. 2:3). Anuutaajaʼa joo waneʼeya: nülanaain Jeʼwaa saainjala wayuu süpüshuaʼa, süka jamüin, naapajiraashinkain nikii Jesuu süpüla ouktaa saaʼu saainjala wayuu süpüshuaʼa. «¿Shiimainchejeʼe nülanaain Jeʼwaa tü taainjalakat toulia?», müleka wamajakuʼu wamüle, müsü nnojotkai saaʼin wanoujayaain nünüiki Jeʼwaa (Aluw. 3:19). Jülüjüle waaʼin tia, amatsüinjaajeerü wanoula jee ojoʼloojeena waya suulia aʼyatawaa nümüin Jeʼwaa süka süpüshuaʼa waaʼin.

9. ¿Kaseerü alataka wamüin waaʼinmaale wanee aʼyatawaa eekai walaain maʼin suulia aʼyatawaa nümüin Jeʼwaa?

⁹ ¿Ayatayüi pia aʼyataain nümüin Jeʼwaa süka süpüshuaʼa paaʼin? Waʼyataale süka süpüshuaʼa waaʼin nümüin Jeʼwaa, nnojoleerü  motuin waaʼin katüinjatüin woʼu süpüla kaʼikat süpüshuaʼa. ¿Kaseerü alataka wamüin waaʼinmaale wanee aʼyatawaa eekai walaain maʼin suulia aʼyatawaa nümüin Jeʼwaa? Amatsüinjaajeerü wanoula, süka jamüin, nnojoleenain waya aʼyataain süka süpüshuaʼa waaʼin nümüin Jeʼwaa sutuma (Heb. 6:10-12).

10. ¿Kasa waainjüinjatka süpüla motuin naaʼin Jeʼwaa waainjala?

¹⁰ ¿Kapüleesüche pümüin motuin paaʼin saainjala wayuu pümüin? Manüire pia nümüin wanee wayuu airuʼutkai anüiki pümüin, shiajaʼa neʼe kapülaka paaʼin pukuwaʼipa pümüiwaʼa. Moto paaʼin naainjala chi kaainjalakai puulia, paainjüle shia, piʼitaajeerü paaʼin nünain Jeʼwaa jee moteerü naaʼin Jeʼwaa paainjalaya (Luc. 11:4). Talateerü naaʼin Jeʼwaa wamaa müle sukuwaʼipa watuma tia. Anaʼleesia maʼin tia suulia süsalajüin wayuu watuma saaʼu saainjala. «Müleka naaʼinrüle chi puwalakai kasa mojusü pümüin», anakajaʼa motule paaʼin naainjala, müshi Jesuu namüin na nikirajüinkana. «Anakaja müleka pukaaliijüle waya süpüla kooʼomüinjatüin sütsüin tü wanoulakat», namakalaka na nikirajüinkana Jesuu nümüin (Luc. 17:1-5).

11. ¿Kasa nnojoluinjatka jülüjüin waaʼin nüchiaapa waya wanee wawala?

¹¹ ¿Aisü pümüin püchiaanüle? Müleka wachiaanüle saaʼu wanee kasa, waapaainjatü amaa tia aküjünakat wamüin. «Taa mapuʼukai naainjala. Mayaasü neʼe nünüiki süka üttüin naaʼin tanain», nnojoishii müinjanain waya nümüin chi wawalakai. Jamüshiijaʼa müleka nnojoliire waapaain sümaa tü münakat wamüin, ayateenaʼaya neʼe waya macheʼein süchiirua tü kasa mojusükat (Prov. 19:20). Shia anaka aluʼu waapaale sümaa tü pütchikat, nieechikalaka Maleiwa washatüin akuwaʼipa waaʼinrüle shia.

12. ¿Kasa jaʼyeetka waaʼu wayoujüle na laülaashiikana napüleerua na wawalayuukana?

¹² ¿Piyoujüin na laülaashii oʼunirakana nakuwaʼipa na wawalayuukana? Eeshii 10 wayuu eimolojoka na israeliitakana süpüla nnojoluin nashutüin saaʼu tü wayuu chajatkat chaa Canaán, ayounnalaashii na israeliitakana nümüin Moisés ooʼulaka Aarón saaʼujee tia namakat naya wayuukana. Anuujeseʼe nünüiki Jeʼwaa nümüin Moisés: «Kakaliaichi mojutüin taya sümüin wayuukoluirua tüü, ¿aashin anoujayaainjanain naya sümaa tanüiki? Arülayaai neʼe kasa pülasü taainjaka napüleerua süpüla müinjatüin neʼe nakuwaʼipa» (Núm. 14:2-4, 11, TNM). Ayounnalaashii na israeliitakana süka nnojoluin anain nakuwaʼipa nutuma Moisés ooʼulaka Aarón naküjainruʼu. Manoulasalii na israeliitakana nünain Jeʼwaa. Akaataajaʼa neʼe maaʼulu yaa, müleka wayoujüle na laülaashiikana napüleerua na wawalayuukana, shiimainjaʼa mata jaʼyain waaʼu manoulain waya nünain Jeʼwaa.

13. ¿Mojuinjatche waaʼin sümatsüinraale wanoula?

¹³ Sutuma wekirajaaitpain sünain tia jaʼraisükat kasa, eesüjaʼa süpüla wayaawatüin saaʼu sünain sümatsüinjaain wanoula. Nnojo mojuin paaʼin müle pukuwaʼipa, eesü süpüla sükatsüinraain süchikuaʼa punoula maʼaka naaʼin Pedro. Nükaaliinjain Jesuu na aluwataaushiikana süpüla katsüinjatüin nanoula (Mat. 16:8). Mayaapejeʼe sümatsüinjaain nunoula Pedro, nüchajaain sukuwaʼipa mapa süpüla sükatsüinraain süchikuaʼa. Eesü wanee kasa watüjaka sünainjee tü alatakat nümüin Pedro.

14, 15. (1) ¿Kasa naainjaka Pedro wanaa sümaa nimerojooin? (2) Mayaapejeʼe nnojoluin weʼrüin Jesuu maaʼulu yaa, ¿kasa eeka süpüla waainjain?

¹⁴ Wanaa sümaa nimerojooin Pedro, jülüjamaatüshi naaʼin Jesuu, achuntamaatüshi nia kaaliinwaa nümüin. Waneere wayuu nia, katünashijee shirokupünaa tü palaakat süpüla nüleʼejüin nüchikuaʼa eejatüle tü anuakat (Juan 21:7). Sümatsüinjaale wanoula, acheküsü washatüinjatüin nukuwaʼipa Pedro, ¿suluʼu jamüin shia?

 ¹⁵ Jülüjamaatüshi naaʼin Pedro Jesuu, akaʼaya wayakana, jülüjüinjachi waaʼin Jesuu (paashajeʼera Hebreokana 12:2, 3, TNM). (Paashajeʼera «Pütchi pütüjaainjatka aaʼu».) Mayaapejeʼe nnojoluin weʼrüin Jesuu maaʼulu yaa, eesü süpüla wekirajaain sünain tü kasa naaʼinrakat, oushikajaainjana waya süchiirua nukuwaʼipaya. Waainjüle tia, akatsüinjaajeerü wanoula süchikuaʼa. Wekirajaa sünain waneeirua kasa eeka süpüla washatüin sünainjee nukuwaʼipa Jesuu.

16. ¿Kasa waaʼinrüinjatka süpüla katsüinjatüin wanoula sutuma tü Wiwüliakat?

¹⁶ Piʼitaa paaʼin sünain tü sümakat tü Wiwüliakat. Nütüjaa aaʼu Jesuu nünüikin Jeʼwaa tü pütchi ashajünakat suluʼu tü Wiwüliakat sümaa jaloulin shia sümüin wayuu (Juan 17:17). Süpüla icheinjatüin wanoula maʼaka naaʼin Jesuu, acheküshii waashajeʼerüin tü Wiwüliakat weinshi, ekirajaainjana waya sünain jee sotuinjatü waaʼin tü wekirajaakalü anain. Wainmajüle paaʼin saaʼu wanee kasa, püchajaa sukuwaʼipa süpüla pütüjaain saaʼu. ¿Alüʼütsüche süpüla sajaʼttüin kasakat süpüshuaʼa? Pütüjaweere saaʼu tia, pikirajaa sünain tü kasa alatajatkat maaʼulu saashin tü Wiwüliakat. ¿Nikettaajeetche Jeʼwaa süpüshuaʼa tü naaʼinrajatkat naashin? Pütüjaweere saaʼu tia, pikirajaa sünain tü kasa nikettaajakat Maleiwa sümaiwa paala. ¿Aneetche nukuwaʼipa wanee wayuu niʼitaale suluʼu nukuwaʼipa tü sümakat tü Wiwüliakat? Pütüjaweere saaʼu tia, paashajeʼera nachiki na wawalayuu anouktaakana akuwaʼipa sutuma tü sümakat tü Wiwüliakat. Paainjüle tia, akatsüinraajeerü punoula (1 Tes. 2:13). *

17. (1) ¿Kasa akaaliinjaka Jesuu süpüla eejiraain nia sümaa wainma kasa? (2) ¿Kasa waaʼinrajatka süpüla woushikajaainjanain süchiirua nukuwaʼipa Jesuu?

¹⁷ Jülüja waaʼin tü nüpansaajakat Jeʼwaa wamüin. Jülüjüsü naaʼin Jesuu tü kasa nüpansaajakat Jeʼwaa nümüin. Sutuma tia, eejiraashi Jesuu sümaa wainma kasa (Heb. 12:2, TNM).  Nnojotsü shiain naaʼinmaain Jesuu tü aainjünakat yaa mmapaʼa (Mat. 4:8-10). ¿Kasa paaʼinrajatka süpüla puushikajaainjachin süchiirua nukuwaʼipa Jesuu? Jülüjeesü paaʼin jameerüin pukuwaʼipa suluʼupa pia tü Paʼaraiisükat, eesü süpüla püshajüin suluʼu wanee karaloukta tü kasa paainjeekalü amüin suluʼu tü Paʼaraiisükat, eesü süpüla püdibujaajüin shiaʼaya. Eesü süpüla püshajüin nanülia na wayuu paashajaweekana amaa nasoʼireʼennapa aaʼin. Piʼitaa paaʼin sünain nikettaajeerüin Jeʼwaa süpüshuaʼa tü nüpansaajakat pümüin.

18. ¿Kasa waaʼinrajatka süpüla katchin wanoula?

¹⁸ «Pükatchinra tanoula» maa nümüin Jeʼwaa. Nikirajüin Jesuu na nikirajüinkana nachuntajanain nümüin Maleiwa tü nütchinkat (Luc. 11:9, 13). Waainjüle tia, katchinjeerü wanoula nutuma chi nütchinkai Maleiwa, eesü süpüla wachuntüin kaaliinwaa nümüin Jeʼwaa süpüla eejiraain waya sümaa tü amatsüinjakat wanoula. Motuinjatü waaʼin naainjala na wawalayuukana, wachunta kaaliinwaa nümüin Jeʼwaa süpüla wountüin tia.

19. ¿Jaraliinjana waʼaleewajaainjanaka amaa?

¹⁹ Paʼaleewajaa nümaa chi katchinkai anoula. Naya naʼaleewajaakana amaa Jesuu na aluwataaushiikana süka waneepiain naya nümaa jee süka noonooin sümaa nünüiki (paashajeʼera Juan 15:14, 15). Naya waʼaleewajaainjanakana amaa na ichekana anoula ooʼulaka na oonookana sümaa nünüiki Jesuu. Nüchiaale pia wanee paʼaleewain, nnojotsü alinjatüin pümüin nünüiki, akaʼaya neʼe niakai, müinjatia neʼe nukuwaʼipa püchiaapa nia (Prov. 27:9).

20. ¿Jamüshii wakaaliinjüinjanaka na wayuukana süpüla katchinjatüin nanoula?

²⁰ Wakatchinra nanoula na wayuukana. Watta saaliin tü kasa naainjakat Jesuu süpüla nükatchinrüin nanoula na nikirajüinkana (Mar. 11:20-24). Akaataajaʼa neʼe wayakana, wakaaliinjüinjatü tü wayuukalüirua süpüla wachecherüin nanoula, müle shia watuma, katchinjeerü wanoula wayakanaʼaya (Prov. 11:25). Müleka wachechereere naaʼin na wayuukana, wekirajüinjana naya sünain shiimain eein chi Maleiwa, waküja namüin jülüjain waya naaʼin Maleiwa, waküja namüin niain kanüikin Maleiwa tü Wiwüliakat. Eeshii süpüla wachecherüin nanoula na wawalayuukana, jamüshijaʼa eere wanee wawala mojuka anüiki nachiki na laülaashii oʼunirakana nakuwaʼipa na wawalayuukana, nnojoishii waya manülinjanain nuulia chia wawalakai ooʼulaka nnojotsü mojuinjatüin wanüiki nüchikiyaʼasaʼa. Wakaaliinja nia süpüla icheinjatüin nunoula, wakaaliinja nia süpüla kojutüinjanain nümüin na wawalayuukana (Jud. 22, 23). Nikirajüle chi profesootkai sünain tü evolución münakat, pikiraja na koleejiakana pümaa niain Maleiwa kakumalain süpüshuaʼa tü kasakalüirua. Nnojo mmoluin pia, eeshii na aapaajeenakana sümaa pünüiki.

21. ¿Kasa nükaaliinjeenaka anain waya Jeʼwaa waneʼewai wakua?

²¹ Katchinsü nunoula Pedro süka nükaaliinjünüin nutuma Jeʼwaa nümaa Jesuu. Maaʼulu yaa, washatüin nukuwaʼipa Pedro süka icheshaatain nunoula. Naashin Jeʼwaa, nükaaliinjeena waya süpüla katchin wanoula waneʼewai wakua (paashajeʼera 1 Pedro 5:9, 10). Wounteerü tia, jaʼitasü kapüleein shia.