1, 2. (1) ¿Kasa wayuu tü niʼitaakat Jeʼwaa suluʼu waaʼin? (2) ¿Jamüsü anaka maʼin tia niʼitaakat Jeʼwaa suluʼu waaʼin?

NUUʼULAAIN waya Jeʼwaa waneʼewai wakua süpüla waneeküinjatüin süka waaʼin wamüiwaʼa tü anakat saaʼin wamüin. Niʼitaain suluʼu waaʼin wanee kasa anasü, sükajee tia makat wayaawata aaʼu anale wanee kasa süpüla waaʼinrüinjatüin jee mojule shia (paashajeʼera «Pütchi pütüjaainjatka aaʼu»). Müleka wulere tü waaʼinkat shieerü waaʼinraka sümüiwaʼa tü kasa anasükat. Aishii waya nüpüla Jeʼwaa, müsüjeseʼe naapüin wamüin tia kasa anasükat. Shia keeʼireeka naaʼin Jeʼwaa anainjanain waya.

² Eeshi wayuu aaʼinrakai süka naaʼin nümüiwaʼa tü kasa anasükat ooʼulaka niyouktajaa amaalü tü kasa mojusükat mayaasüjeʼe nnojoluin nütüjaain aaʼu tü pütchi suluʼukat tü Wiwüliakat (paashajeʼera Roma 2:14, 15). Niʼitaain Jeʼwaa suluʼu saaʼin wayuu süpüshuaʼa sütüjüinjatüin süpüleerua ayaawataa saaʼu tü anakat süpüla aaʼinnaa ooʼulaka tü mojukat süpüla aaʼinnaa. Keemaleeseje maʼin tü mmapaʼakat nnojorüleje suluʼuin saaʼin wayuu tia makat. Talatüsü waaʼin sutuma niʼitaain Jeʼwaa suluʼu waaʼin tia.

3. ¿Kasa anasü weʼreetka wulere waaʼin?

 ³ Wayouktüinjatü tü kasa mojusükat jee waaʼinrüinjatü tü kasa anasükat. Ekirajaainjanapajaʼa waya palajana sünain tü Wiwüliakat ooʼulaka weʼitaainjatü suluʼu wakuwaʼipa tü wekirajaakalü anain. Kojutüinjatü wamüin tü pütchi suluʼukat tü Wiwüliakat süka jalouijeerüin shia wamüin. «Taluwataain pia sünain tüü, süka tacheküin süpüleerua aijiraain napülajiraa na anoujashiikana napüshua chakana chaʼaya. Nounteerü naaʼinrüin tia müleka wulere naaʼin, müleka natüjaale saaʼu tü naaʼinrakat sünain anasüin nuʼupala Maleiwa», müsü nünüiki Pablo (1 Tim. 1:5). Wulere waaʼin, wakaaliinjeena na wawalayuukana süpüla aijiraainjanain naya. Aijeechi Jeʼwaa wapüla ooʼulaka katchinjeerü wanoula nünain. Waainjüle tia, jaʼyeerü waaʼu sünain wulein waaʼin.

4. ¿Kasa waaʼinrüinjatka süpüla wuleinjatüin waaʼin?

⁴ Süpüla wuleinjatüin waaʼin, acheküshii wekirajaainjanain sünain tü Wiwüliakat weinshi ooʼulaka jülüjüinjatü waaʼin tü wekirajaakat anain. Wachunta kaaliinwaa nümüin Jeʼwaa süpüla weʼitaain suluʼu wakuwaʼipa tü wekirajaakalü anain suluʼu tü Wiwüliakat. Makaʼa wekirajaain sünain tü Wiwüliakat shia süpüla weʼraajüinjachin maʼin Jeʼwaa otta süpüla wayaawatüinjatüin saaʼu tü kasa anakat nümüin jee tü kasa mojukat nümüin. Oushikajaajeena waya süchiirua nukuwaʼipa Jeʼwaa waaʼinrüle tia makat.

5. ¿Kasa wekirajaajeetka anain sünain ekirajaayakat tüü?

⁵ Eeshiijaʼa süpüla wasakiijiraain suluʼu wekii wamüiwaʼa sünain maa: «¿Jamüshi taneekeechika kasa anasü wulere taaʼin? ¿Kasa taaʼinrüinjatka süpüla kojutüin tamüin tü jülüjakat naaʼin na tawalayuukana? ¿Jamüshi taainjeechika kasa anasü wulere taaʼin?». Sünain ekirajaayakat tüü, wekirajaainjatü anain apünüinsü kasa. Wulere waaʼin, aneerü süneekia watuma tü wepinaseinjatkat, aneerü süneekia watuma tü washaittüinjatkat, tü wanajüinjatkat ooʼulaka yalayaleerü waaʼin sünain aküjaa tü wanoujakalü anain.

6. ¿Jara aneeküinjachika tü wepinaseinjatkat ayuuire waya?

⁶ Saashin tü Wiwüliakat, wayouktajaainjatü amaa tü mojeetkalü atuma wakuwaʼipa, nnojoishii waya koʼutünainjanain sünain ekawaa jee sünain asawaa (Prov. 23:20; 2 Cor. 7:1). Sutuma weʼitaain suluʼu wakuwaʼipa tü sümakat tü Wiwüliakat, nnojoishii waya ayuulin maʼin. Ayuuire waya soʼu wanee kaʼi, wayainjana aneekaka wamüiwaʼa tü wepinaseinjatkat. Wainma na wawalayuu aluwataakana karaloukta chaa Weteetmüin süpüla nasakirüin kasain anain süpüla nepinaseinjatüin.

7. ¿Kasa akaaliinjeenaka waya suulia weʼiteʼerüin isha wanain?

⁷ Na wawalayuu chakana Weteet ooʼulaka na laülaashiikana nnojoishii nayainjanain aneeküin tü wepinaseinjatkat (Gal. 6:5). Eeinjaʼa süpüla naküjüin wamüin na laülaashiikana tü anakat saashin tü Wiwüliakat. Jamüsüjaʼa saashin tü Wiwüliakat, nnojotsü weküinjatüin tü ishakat jee nnojotsü weʼiteʼerüinjatüin shia wanainyaʼasaʼa (Aluw. 15:29). Akaʼaya shia, nnojotsü weʼiteʼerüinjatüin wanain tü ayuʼnnakat sünainjee tü ishakat. Niiyajaainjachire wanee wawala süka tü ayuʼnnakat sünainjee Glóbulos rojos, Glóbulos blancos, Plaquetas jee Plasma shiale, nia aneeküinjachika tia nümüiwaʼa. Eeshii na wawalayuu eiyajaakana süka tia, eeshii na nnojoliikana eiyajaain süka. * ¿Jarat tü wanee pütchi suluʼukat tü Wiwüliakat akaaliinjeenaka waya süpüla waneeküin tü wepinaseinjatkat?

8. ¿Kasa waaʼinrüinjatka waneeküinjanale wanee wepinase saashin Filipos 4:5?

 ⁸ Eesü ayuulii mepikat. «Kepisü tamaʼana türa ayuulii pünainkat» sümüle wayuu wamüin, nnojoishii waya oonooinjanain sümaa sünüiki. Saashin tü Wiwüliakat, chi wayuu eekai kekiin maʼin jülüjüsü naaʼin tü naaʼinrajatkat (Prov. 14:15). Naashin Pablo, naainjüinjachire wanee anoujashi wanee kasa, niyaawatüinjatü aaʼu palajana tü naaʼinrajatkat (Filip. 4:5, TNM). Waaʼinrüle tia, nnojoleerü shiain kapülain waaʼin wakuwaʼipa neʼe wamüiwaʼa (Filip. 2:4). Eeshii süpüla ayuuijaain waya soʼu wanee kaʼi, nnojoluinjatpejeʼe shiain waaʼinmaain maʼin tia suulia tü waʼyataainkat nümüin Jeʼwaa (paashajeʼera Filipos 1:10).

9. (1) Jülüjüle waaʼin tü sümakat Roma 14:13, 19, ¿jamüsü aneetka süneekia watuma tü wepinaseinjatkat? (2) ¿Kaseerü alataka nnojorüle waaʼinrüin tü nümakat Pablo?

⁹ Sümaiwa paala, eeshii wawalayuu mojushiikana amüin tü nekakat na wanee anoujashiikana jee tü miʼiraa noʼunakalü anain. Sutumajee tia, nnojoishii paaʼinwain na wawalayuu chajanakana chaa Roma. Anuujeseʼe nünüiki Pablo namüin saaliijee tia: «Eeshii jaʼaka eekai kojutüin atüma nakalia na judíokana, tü naʼwaajakat oʼu Maleiwa. Otta wanee, nnojotsü kojutüin natüma. Tamüshii paala jia jüpüshua: Anakaja müleka jiyaawatüle saaʼu tü jünoujakat anain» (paashajeʼera Roma 14:5, 13, 15, 19, 20). Tü shikirajakalü anain waya tia shia kojutüinjatüin wamüin tü naneekakat na wawalayuukana waneʼewai nakua. Nnojorüle jülüjüin waaʼin tü nümakat Pablo, aijeerü namüin na wawalayuukana wayoujüle naya jee nnojoleena paaʼinwain naya namaa na waneeinnua. Suluʼu wanee mma watta, eeshi wanee wawala sümaa nuʼwayuuse aluwanaajaka na wanee wawalayuukana süpüla nayaʼlajüinjanain wanee wunuʼu katsüinjatka atuma naaʼin. Eeshii na ayaʼlajakana shia, eeshii na nnojoliikana ayaʼlajüin shia. Eeyaai neʼe anain nakuwaʼipa na wawalayuukana sutuma tia wunuʼukat, jashichijaashii naya süka naʼalainpalaanüin. Mojusü tü naainjakat chi wawalakai otta tü nuʼwayuusekat, süka jamüin, mojujiraain na wawalayuukana natuma.

10. ¿Jamüsü kojutüinjatka wamüin tü nüneekakat wanee wawala? (Piirakaa sümüin tü ayaakuaa suluʼukat süpana 13.)

¹⁰ Eesü nnojorüle anain saaʼin wamüin tü wunuʼu nüneekakat wanee wawala süpüla nipinaseinjatüin. Nnojoishii waya ekeroluinjanain sünainpünaa nukuwaʼipa chia wawalakai, nnaweerüjaʼa nukuwaʼipa nutuma nümüiwaʼa. Nnojoishi wayoujüinjachin niayaʼasa saaliijee wanee kasa. Eesüjaʼa nnojoyürüle niyaawatüin aaʼu tü aneetka atuma nukuwaʼipa (1 Cor. 8:11, 12). Eeshii wayale neʼe nnojoliin ayaawatüin saaʼu tü wakuwaʼipat. Waaʼinrüinjanale wanee kasa, waya aneeküinjanaka tia waneʼewai wakua.

11, 12. ¿Jamüsü aneetka süneekia watuma tü wemiʼijaainjatkat anain waaʼinrüle tü sümakat Eclesiastés 3:4 otta Galacia 5:19-21?

¹¹ Tü nukumajakalü aaliijee Jeʼwaa na wayuukana shia süpüla talatüinjanain naya jee anainjatüin naaʼin sümaa tü akumajünakat yaa mmapaʼa (Ecl. 3:4). Wemiʼijaainjanale, anainjatü süneekia watuma jee nnojoishii kamaʼashaatainjanain waya sünain tia. ¿Jamüsü aneetka sukuwaʼipa watuma tia müleka wulere waaʼin?

¹² Saashin tü Wiwüliakat, nnojoishii waya aʼluwajiraainjanain wakuwaʼipa sümaa wanee jierü otta wanee jierü nümaa wanee toolo, nnojoishii waya kamaleiwaseyaainjanain, nnojoishii waya eeʼirajirüinjanain ouutsü, nnojoishii peʼipaajiraainjanain waya sümaa wayuu, nnojoishii waya emiʼijaainjanain sünain maaʼin waaʼin, nnojoishii waya epeʼrüinjanain. Chi eekai aaʼinrüin kasa eekai müin aka tia, nnojoleechi ekeroluin suluʼu nuluwataaya Maleiwa naashin Pablo (Gal. 5:19-21, TNM). Wasakireʼerüinjatü suluʼu wekii wamüiwaʼa sünain tü makat yaa: «¿Jamüsü kamalainka tamüin emiʼijaa? ¿Shiache neʼe süpüla tayoujiraainjachin namaa na suluʼujeejanakana wanee mma naatajatü? ¿Emiʼijaashiche neʼe taya süka tatkaweein? Tanajüle telewisoot, ¿kamalainsüche tamüin anajaa naaʼu na aʼluwajiraakana akuwaʼipa, na epeʼrakana jee shiale tü ouutsükalüirua?».

13. ¿Jamüsü aneetka süneekia watuma tü wemiʼijaainjatkalü anain waaʼinrüle tü sümakat 1 Timoteo 4:8 otta Proverbios 13:20?

¹³ Saashin tü Wiwüliakat, katchinjeechi wanee wayuu müleka naainjüle ejercicio (1 Tim. 4:8, TNM). Nnojotpajaʼa anain waainjüle ejercicio sümaa wayuu manoujainsat. «Kekiijeechi maʼin wanee wayuu naʼaleewajaale nümaa chi wayuu kekiikai maʼin. Mojeerü nukuwaʼipa wanee wayuu naʼaleewajaale nümaa chi wayuu eekai mojulaain», müsü tü Wiwüliakat (Prov. 13:20, TNM). Acheküsü waaʼinrüinjatüin tü sümakat tü Wiwüliakat müleka aneere wakuwaʼipa sünain tü wemiʼijaainjatkalü anain otta tü wanajüinjatkat.

14. ¿Kasa naainjaka waneeinnua wawalayuu süpüla neʼitaain suluʼu nakuwaʼipa tü sümakat Roma 14:2-4?

¹⁴ Christian ooʼulaka Daniela, kachonshii piamashii majayünnüü. Anuu nünüiki Christian: «Soʼu tü ai taʼwaajakalü oʼu Maleiwa sümaa tapüshi, aashajaashii waya süchiki tü miʼiraa anakat süpüla woʼunüin anain otta tü mojukat süpüla woʼunüin anain, aashajaashii waya nachiki na wayuu waʼaleewajaainjanakana amaa.  Anuu sünüiki wanee tachon: ‹Eeshii wawalayuu aainjaka wanee kasa chaa koleejialuʼu nnojotka anain saaʼin tamüin, taainjeepajaʼa shia wanaa namaa süka anain shia namüin›, müsü. Anuujeseʼe wanüiki sümüin: ‹Nnojo paainjain tü kasa saainjakat wayuu yalapünaa, shia paainja tü anakat saashin tü Wiwüliakat›» (paashajeʼera Roma 14:2-4).

15. ¿Kasa palajanainjatka watuma saashin Mateo 6:33?

¹⁵ ¿Kasa paaʼinmaaka maʼin palajana? ¿Shia tü outkajawaakat, shia tü aküjaakat pütchi, shia tü ekirajawaakat sünain tü Wiwüliakat, shiataapa tü ashaittajawaakat? ¿Jeʼrainjatche wamaʼa sünain ashaittajawaa? Anuu nünüiki Jesuu: «Ayata jüchajaain palajana tü nuluwataayakat Maleiwa otta tü lotookalü akuwaʼipaa. Shiasaʼa süpüshuaʼa tü wanee kasakalüirua, aapüneerü jümüin» (Mat. 6:33, TNM). Waneeküinjanapa tü waaʼinrajatkat palajana, acheküsü jülüjüin waaʼin tü nünüikikat Jesuu.

16. ¿Kaseerü waaʼinraka wulere waaʼin?

¹⁶ Wulere tü waaʼinkat, wayoukteerü tü mojusükat jee waaʼinreerü tü anasükat maʼaka saaʼin tü aküjaakat pütchi nüchiki Jeʼwaa. Aküjeena waya pütchi sainküin piichi ooʼulaka eepünaale waraittüin waya. Akaʼaya Pablo shia naaʼinmaaka maʼin tü aküjaakat pütchi (1 Cor. 9:16). Jimateerü waaʼin müleka waküjüle pütchi nüchiki Maleiwa, eesü süpüla suʼwanajaain naaʼin na wayuu waküjakana amüin pütchi (2 Cor. 4:2).

17. ¿Kasa saainjaka wanee wawala sutuma wulein tü saaʼinkat?

¹⁷ Eesü wanee wawala Jacqueline sünülia, 16 suuyase, kamalainsü sümüin tü ekirajünakat anain shia chaa koleejialuʼu. Soʼu wanee kaʼi, ekirajaashii naya chaa koleejialuʼu süchiki tü evolución münakat, nnojotsü shia aashajaain maʼin süchiki tia süka alawaain neʼe tü ekirajünakat süchiki tia. Süküjüin nümüin chi profesootkai niain Maleiwa kakumalain wayuu süpüshuaʼa. Nnojoishi jashichin chi profesootkai saaliijee tia. «Paashajaa süchiki tia namüin na pukonpanyeetsekana», nümaka sümüin. Ayatüsüjaʼa saainjain shia. Maaʼulu yaa, talatashaatasü saaʼin Jacqueline süka süküjüin tü sümakat tü Wiwüliakat. Jama piakai, ¿paainjüirü tia?

18. ¿Jamüsü wuleinjatka watuma tü waaʼinkat?

¹⁸ Wekirajaale sünain tü Wiwüliakat sümaa waainjain tü sümakat, wuleerü watuma tü waaʼinkat. Waainjüinjatü tia süpüla waaʼinrüin tü nümakat Jeʼwaa wamüin. Shiaʼaya maʼin waainjeeka amüin tia wapüshuaʼa wayakana anoujashiikana.