Aashajaapuʼushi Maleiwa sümaa wayuu sümaiwa paala. Niʼitaain Maleiwa nünüiki suluʼu nekii na wayuu ashajakana tü Wiwüliakat, naainjain tia nükajee chi naaʼinkai. (2 Pedro 1:20, 21.) Watüjaweerü aaʼu tü shiimainkat nüchiki chi Maleiwakai, waashajeʼerüle tü Wiwüliakat. (Paashajeʼera Juan 17:17; 2 Timoteo 3:16.)

Wainma tü kasa nüshajirakat Maleiwa süchiki nukuwaʼipa suluʼu tü Wiwüliakat. Nüküjüin wamüin jamüin nukumajaka tü wayuukalüirua, kasain keeʼireein naaʼin süpüleerua wayuu otta nüküjüin wamüin kateein woʼu nutuma. (Aluwataaushikana 17:24-27.) Keeʼireesü naaʼin Maleiwa watüjaainjatüin saaʼu tü shiimainkat nüchiki. (Paashajeʼera 1 Timoteo 2:3, 4.)

Nia Maleiwa kanainjeejachika tü shiimainsükat, nuluwataain chi Nüchonkai süpüla nikirajüin wayuu sünain tü shiimainkat. Chi eekai kachiiruain aaʼin tü shiimainkat, nia aapakai nünüiki Jesuu. (Juan 18:37.) Shia keeʼireeka naaʼin Maleiwa müinjatüin nakuwaʼipa na aʼwaajakana nia. (Paashajeʼera Juan 4:23, 24.)

Akayalaashii na wayuukana nuulia Maleiwa süka nüküjüin Satanaa perulaa nüchiki Maleiwa. (2 Corinto 4:3, 4.) Na wayuu keejiakana amüin tü kasa mojusükat naya jookana süpüla nimeejüin Satanaa sükajee alawaa. (Roma 1:25.) Watta maʼin naalii na wayuu anamiakana ekirajaakana sünain tü shiimainkat nüchiki Maleiwa. (Paashajeʼera Aluwataaushikana 17:11.)