El 24 de febrero de 2022, Rusia oike Ucrániape. Upévare koʼág̃a ipeligrosoiterei upe sónape, ha oĩ voi oñehaʼãva hína osẽ upégui. a

 Natalia heʼi: “Umi vómba umíva okapupa, ha che akyhyjeterei kuri. Ndaikuaái mbaʼéichapa aexplikáta la añandu vaʼekue upe moméntope, reĩmante vaʼerã upépe rentende hag̃ua. Ojeʼérõ g̃uare oréve oĩtaha tren ikatúva orenohẽ, rodesidi rosẽ. Ha ndaikatúi kuri rogueraha heta mbaʼe, pórke sólamente oñepermiti peteĩ mochíla por persóna. Upévare sólamente rokarga pype ore dokuménto, pohã, y, ha álgo roʼumi vaʼerã. Rohejapaite ningo la rorekomi vaʼekue, ha roho pe estasión de trénpe hoʼa aja umi vómba” (Járkov, Ucrania).

 Nadia heʼi: “Ore noropensaiete kuri ikatutaha oiko peteĩ gérra, péro upéi ja rohendúma oĩha ombokapúva ótro lugárupi, ha umi ore ventanakuéra oryryipaite. Upévare rojagarra la ore kosakuerami ha rosẽ ore rógagui pyhareve las 8. Rojagarra peteĩ tren oregueraháva Lviv peve, ha upéi rojagarra peteĩ kolektívo oregueraháva Polonia peve” (Járkov, Ucrania).

Ko artíkulope rehecháta:

•  ¿Mbaʼéicha rupípa oiko hína koʼã provléma?

•  ¿Mbaʼépa ikatu omeʼẽ esperánsa umi oheja vaʼekuépe hóga?

•  ¿Mbaʼéichapa la Biblia ikatu oipytyvõ koʼã persónape?

 ¿Mbaʼéicha rupípa oiko hína koʼã provléma?

 Koʼã provléma oikóva Ucrániape oñepyrũ pórke Rusia oike upépe ijehérsito reheve. ¿Upévantepa la provléma? No, la Biblia omombeʼu avei hetave mbaʼe ohechaukáva mbaʼérepa oiko hína koʼã mbaʼe:

•   Umi goviérno oĩva ko múndope ndaikatúi omeʼẽ la héntepe opa mbaʼe oikotevẽva, upévape ofalla hikuái. Ha pyʼỹinte umi omanda guasúva oipuru pe autorida orekóva ombohasa asy hag̃ua la héntepe (Eclesiastés 4:1; 8:9).

•   Satanás, “pe ogovernáva ko múndo”, iñañaiterei. Ha oreko rupi la héntepe ipoguýpe, la Biblia heʼi ‘ko múndo kompletoite oĩha pe aña poguýpe’ (Juan 14:30; 1 Juan 5:19).

•   Ymaite guive voínte oĩ heta provléma ko múndope, péro koʼýte koʼág̃a ‘ijetuʼu ha ipeligróso’, pórke jaiko hína umi ‘ára pahápe’ heʼiháicha la Biblia (2 Timoteo 3:1). La Biblia omombeʼu avei koʼã tiémpope oĩtaha gérra, torménta vai, ñembyahýi ha opaichagua mbaʼasy. Koʼã situasión káusare, oĩ hénte tekotevẽva ohejámante la hóga (Lucas 21:10, 11).

 ¿Mbaʼépa ikatu omeʼẽ esperánsa umi oheja vaʼekuépe hóga?

 La Biblia omombeʼu ñande Apohare Jehová b ohayhuha enterovévape. Haʼe ningo ombyasyeterei umi oheja vaʼekuépe la hóga (Deuteronomio 10:18). Haʼe opromete opataha umi provléma koʼág̃a ombosufríva chupekuéra. Upearã Ñandejára omoĩta igoviérno ko yvy ape ári, umi ótro goviérno rendaguépe. La Biblia heʼi ko goviérno heraha Ñandejára Rréino (Daniel 2:44; Mateo 6:10). Ko goviérno rupive, Ñandejára ohundietéta Satanáspe (Romanos 16:20). Koʼẽrõitéma Ñandejára añoite ogovernáta ko yvy tuichakuére, ha ág̃a upérõ ndaiporimoʼãvéima frontéra ni mbaʼeveichagua provléma. Enterovéva ojoayhúta peteĩ famíliaicha. Ha ndaiporimoʼãvéima avei oheja reíva la hóga, pórke Ñandejára opromete ñandéve Miqueas 4:4-pe: “Umi hénte oguapýta iparrál máta guýpe ha hiʼígo máta guýpe, avave nomongyhyjemoʼãi chupekuéra. Jehová, umi ehérsito yvagapegua ruvicha heʼíma oikotaha koʼã mbaʼe”.

 Ñandejára Rréino añoite la ikatúva osolusiona umi provléma orekóva umi oheja vaʼekue la hóga. Jehová ndohejamoʼãvéima oiko umi mbaʼe ombyapura vaipáva la héntepe oheja hag̃ua la hóga. Por ehémplo ndaiporimoʼãvéima:

•   Gérra: “Ndaiporimoʼãvéima ni peteĩ gérra ko yvy ape ári” (Salmo 46:9). Reikuaa hag̃ua mbaʼéichapa oikóta upéva, ehechamína pe artíkulo hérava “¿Cómo llegará a haber paz en la Tierra?”.

•   Ombohasa asýva hapichápe: ‘Heta hénte osufri umi governánte iñañáva poguýpe, péro Jehová osalváta chupekuéra’ (Salmo 72:14). Reikuaa hag̃ua mbaʼéichapa peteĩ persóna ikatu okambiaite ivuéno hag̃ua, ehechamína ko informasión hérava “¡Nde ikatu ndepuʼaka pe ódiore!”.

•   Imboriahúva: ‘Umi imboriahúva ningo ojerure asy ajúda, ha Jehová katuete osalváta chupekuéra’. Reikuaa hag̃ua mbaʼépa Ñandejára ojapóta anivéma hag̃ua oĩ imboriahúva, ehechamína pe artíkulo hérava “¿Es realista esperar un sistema económico justo?”.

•   Iñembyahýiva: “Ko yvy oprodusi porãitereíta” (Salmo 72:16). Reikuaa hag̃ua mbaʼépa ojapóta Ñandejára anivéma hag̃ua oĩ ohasáva ñembyahýi, ikatu relee pe artíkulo hérava “¿Un mundo sin hambre?”.

 ¿Mbaʼéichapa la Biblia ikatu oipytyvõ koʼã persónape?

 La Biblia omeʼẽ esperánsa umi oheja vaʼekuépe la hóga, péro avei omeʼẽ chupekuéra heta konsého porã oaguanta hag̃ua pe situasión ohasáva hína.

 Konsého: “Ani pejepyʼapyeterei mbaʼevére, síno oimeraẽ situasiónpe pejerure Ñandejárape penepytyvõ hag̃ua, peñemboʼe ha pejerure asývo chupe, ha peagradese avei chupe. Ha Ñandejára pyʼaguapy tuichavéva entéro mbaʼe yvyporakuéra ikatúvagui ontende, oñangarekóta pene korasõre ha umi mbaʼe pepensávare” (Filipenses 4:6, 7).

 Mbaʼe ñanemboʼe ko téxto: Tahaʼe haʼéva la rehasáva, ejerurékena Ñandejárape tanembopyʼaguapy. Ehechamína pe artíkulo hérava: “Filipenses 4:6, 7 | ‘No se inquieten por nada’”.