Éxodo 11:1-10
11 Upéi Jehová heʼi Moiséspe: “Agueruvéta peteĩ mbaʼe vai ombohasa asýtava faraónpe ha umi egípciope. Upe rire haʼe opoíta pendehegui,+ péro ndahaʼéi upévante, penemosẽmbáta voi katu koʼágui.+
2 Ha ere umi israelítape, umi kuña ha kuimbaʼépe, ojerure hag̃ua umi kósa de pláta ha de óro ivesinokuéra egípciope”.+
3 Jehová omomýi umi egípciope imbaʼeporã hag̃ua hendivekuéra. Ha upérõ Moiséspe ojeapresiaiterei vaʼekue Egíptope, oguerohory chupe faraón siervokuéra ha enterove umi egipcio.
4 Upéi Moisés heʼi: “Péicha heʼi Jehová: ‘Ko pyharepytépe ahasáta hína Egíptorupi,+
5 ha ajukáta enterove pende raʼy ypykue oĩva Egíptope. Ajukáta faraón raʼy ypykuépe,*+ ha ajukáta avei pe eskláva* memby ypykuépe, ha entéro umi animál raʼy ypykuépe jepe ajukáta.+
6 Egipto tuichakue javeve oĩta ojaheʼóva. Péicha núnka ndoikóiva gueteri Egíptope ha ndoikomoʼãvéima avei.+
7 Péro umi israelita ni hymbakuérape ndojehumoʼãi mbaʼeve, ni jagua noñarõmoʼãi hesekuéra. Péicha peẽ peikuaáta Jehová oseparaha umi israelítape umi egípciogui, ha ikatuha oñangareko isiervokuérare’”.+
8 Ha Moisés heʼi avei: “Oiko rire koʼã mbaʼe, nde siervokuéra oúta oñesũ che renondépe heʼívo: ‘Tereho katu koʼágui, ha tohopaite avei nendive umi israelita’.+ Ha upépe ae che asẽta aha”. Upe rire Moisés ha Aarón ojerretira faraón oĩhágui, ha ipochyeterei ohóvo hikuái.
9 Upémarõ Jehová heʼi Moiséspe: “Faraón nopenamoʼãi hína penderehe,+ ha upéicha rupi ajapóta hetave milágro Egíptope”.+
10 Moisés ha Aarón ojapopaite koʼã milágro faraón renondépe,+ péro Jehová oheja faraónpe osegi oñembopyʼahatã ha ndopoíri umi israelítagui.+
Nóta
^ Térã: “Ajukáta faraón raʼy ypykuépe, upe oguapýva pe trónope raʼýpe”.
^ Térã: “pe eskláva omolináva”.
