Mateo 23:1-39
23 Upéi Jesús oñeʼẽ umi héntepe ha idisipulokuérape, ha heʼi:
2 “Umi mboʼehára leipegua ha fariseokuéra, haʼekuéra voi oñenombra ojapo hag̃ua pe tembiapo Moisés ojapo vaʼekue.
3 Upévare, entéro mbaʼe heʼíva peẽme, pejapo vaʼerã. Péro ani pejapo la ojapóva hikuái, pórke haʼekuéra heʼi peteĩ mbaʼe, péro ndojapói la heʼíva.+
4 Haʼekuéra oprepara umi kárga pohýi ha omoĩ hapichakuéra atiʼy ári,+ péro haʼekuéra noñanimái ni ikuãʼíme omomýi.+
5 Entéro mbaʼe ojapo hikuái ojechauka hag̃uánte.+ Upévare ombotuichave umi kahaʼi* omoĩva isyváre ha ijyváre.+ Avei ombopuku pukuve umi fléko oĩva ijaóre.+
6 Oho jave karu guasuhápe oipota umi lugár iñimportantevéva. Ha umi sinagógape oguapyse umi lugár iporãvévape.*+
7 Oipota ojesaluda chupekuéra umi merkádorupi,* ha oipota avei enterove ohenói chupekuéra mboʼehára.*
8 Peẽ katu ani peheja avave penerenói mboʼehára.* Pene Mboʼehára ningo peteĩnte,+ ha peẽ enterovéva oñoermáno.
9 Ha ani peje, ore ru* avavépe ko yvy ape ári. Pórke peteĩnte hína pende Ru,+ upe oĩva yvágape.
10 Ani avei peheja avave heʼi peẽme líder. Pórke pende Líder peteĩnte, upéva hína Cristo.
11 Ha pe iñimportantevéva pende apytépe, oiko vaʼerã pene sirviénteramo.+
12 Ojeapoʼíta pe oikóvape oñembotuicha,+ ha oñembotuicháta pe iñumíldevape.+
13 Peẽ mboʼehára leipegua ha fariseokuéra rovamokõi, oho vaíta peẽme. Pórke peẽ pemboty umi héntegui pe Rréino yvagapegua rokẽ. Peẽ voi ndapeikéi, ha ndapehejái oike umi oikeséva.+
14 * ——
15 Peẽ mboʼehára leipegua ha fariseokuéra rovamokõi,+ oho vaíta peẽme. Peẽ pehasa pe mar ha pekorre mombyrymbyry peheka hag̃ua peteĩ jepe pende disipulorã.* Ha pemboʼe rire chupe katu iñañavéma pendehegui, ha upévare koʼýte omerese oho Gehénape.*
16 Peẽ ningo peneresatũ, ha upéicharõ jepe pegiase umi héntepe.+ Oho vaíta peẽme. Peẽ ningo peje: ‘Oĩrõ ohuráva pe témplore upéva ndahaʼéi mbaʼeve, péro oĩrõ ohuráva pe óro templopegua rehe, upéva katu okumplímante vaʼerã iñeʼẽ’.+
17 ¡Peẽ ningo peneresatũ ha pendevýro! Pe témplo rupive pe óro isagrádo, upéicharõ, ¿mbaʼépa iñimportanteve, pe óro térãpa pe témplo?
18 Peje avei: ‘Oĩrõ ohuráva pe altár rehe, upe huraménto ndahaʼéi mbaʼeve, péro oĩrõ ohuráva pe ofrénda oĩvare pe altár ári, upéva katu okumplímante vaʼerã iñeʼẽ’.
19 ¡Peẽ tekove resatũ! Pe altár rupive pe ofrénda isagrádo, upéicharõ, ¿mbaʼépa iñimportanteve, pe ofrénda térãpa pe altár?
20 Pe persóna ohuráva pe altár rehe, ohura hína hese ha entéro mbaʼe oĩvare hiʼári.
21 Ha pe persóna ohuráva pe témplore, ohura hína hese ha Ñandejárare, oikóva upépe.+
22 Ha pe persóna ohuráva yvágare, ohura hína Ñandejára trónore ha Ñandejárare, oguapýva upépe.
23 Peẽ mboʼehára leipegua ha peẽ fariséo rovamokõi, oho vaíta peẽme. Peẽ ningo pemeʼẽ pe 10 por ciento pe ménta, enéldo ha komínogui.+ Péro napekumplíri umi mbaʼe iñimportantevéva oĩva pe léipe, umíva hína: hustísia,+ poriahuvereko+ ha jerovia. Tekotevẽ kuri añete pemeʼẽ pe 10 por ciento, péro ndahaʼéi upe haguére ikatúva pemboyke umi mbaʼe iñimportantevéva.+
24 ¡Peẽ mboʼehára resatũ!+ Peẽ ningo peiko peipeʼa pe ñatiʼũ+ pe kópagui, péro pemokõ pe kaméllo.+
25 Peẽ mboʼehára leipegua ha fariseokuéra rovamokõi, oho vaíta peẽme. Peẽ pejogua umi kópa ha pláto ijapénte ipotĩvape,+ péro ikyʼáva hyepýpe, pórke pene korasõ henyhẽ mbaʼe kyʼágui, peẽ peipotaiterei mbaʼe ahéno*+ ha pemeʼẽ gústo pendejupe.+
26 Peẽ fariséo resatũ, pemopotĩ raẽna pe kópa ha pe pláto hyepýguio, upéicharõ pe ijape ipotĩta avei.
27 Peẽ mboʼehára leipegua ha fariseokuéra rovamokõi,+ oho vaíta peẽme. Peẽ ningo pejogua umi panteón oñepintávape,*+ pe ijape haʼete la iporãitereíva, péro hyepýpe katu henyhẽte omanóva kanguekuégui ha opaichagua mbaʼe kyʼágui.
28 Peẽ avei upéicha, haʼetévaicha pendehústova pende rapichakuéra renondépe, péro pene korasõ henyhẽ japu ha mbaʼe vaígui.+
29 Peẽ mboʼehára leipegua ha fariseokuéra rovamokõi,+ oho vaíta peẽme. Peẽ ningo pearregla umi profetakuéra panteón, ha pemoporã umi persóna ihústova sepultúra,+
30 ha peje: ‘Roikórire ore tuakuéra ypykue tiémpope, noroipytyvõi vaʼerãmoʼã chupekuéra ojuka hag̃ua umi profétape’.
31 Ha péicha peẽ voi peñekondena, pórke pemombeʼu pende tuakuéra ypykue ojuka hague umi profétape.+
32 Upéicharõ, pembotuichave katu pe pekádo omoñepyrũ vaʼekue pende tuakuéra ypykue.
33 Peẽ mbói familiare,+ ¿mbaʼéicha piko pepensa ikatutaha pejesalva ani hag̃ua pejekastiga Gehénape?*+
34 Upévare, amondo pene rendápe profetakuéra,+ umi kuimbaʼe iñarandúva ha mboʼeharakuéra.+ Umívape peẽ pejukáta+ ha peklaváta* yvyráre. Ótrope katu pembyepotíta+ umi sinagogahárupi ha pepersegíta chupekuéra+ enterove umi siudárupi.
35 Ha péicha pende ári opytáta entéro umi ihústova ruguy oñeñohẽ vaʼekue ko yvy ape ári, Abel+ guive Zacarías peve, haʼéva hína Baraquías raʼy. Zacaríaspe pejuka vaʼekue pe témplo ha pe altár paʼũme.+
36 Añetehápe haʼe peẽme: ko kastígo oúta ko henerasión ári.
37 Jerusalén, Jerusalén, nde rejuka umi profétape ha rejapi itápe+ umi mensahéro Ñandejára omboúva, péicha rejuka chupekuéra. ¡Hetaite vése añehaʼã ambyaty ne membykuérape, pe ryguasu ombyatyháicha imembykuéra ipepo guýpe! Péro nde ndereipotái.+
38 Koʼág̃a Ñandejára oheja reíma pene témplo.*+
39 Che haʼe peẽme: ni mbaʼevéicharõ ndaikatumoʼãvéima pecherecha og̃uahẽ meve pe día peje hag̃ua: ‘¡Toñevendesi pe oúva Jehová* rérape!’”.+
Nóta
^ Kahaʼi orekóva párte Ñandejára Ñeʼẽgui. Umi kuimbaʼe judío oipuru vaʼekue koʼãva amulétoicha oñangareko hag̃ua hesekuéra.
^ Griégope: “tenondetépe”.
^ Térã: “plásarupi”.
^ Griégope: “rabí”.
^ Griégope: “rabí”.
^ Koʼápe Jesús oñeʼẽ umi título oñemoĩvare umi rrelihión omoakãvape, por ehémplo “Pádre”.
^ Griégope: “prosélito”.
^ Térã: “pendetaryrýi”.
^ Térã: “oñemomorotĩvape, oñepintáva kálpe”.
^ Térã: “pemosaingóta”.
^ Griégope: “pende róga”.
