KAPÍTULO 16

¿Amombeʼu vaʼerãpa ajapórõ peteĩ mbaʼe vai kañyháme?

□ Haʼu rasa aikóvo vevída

□ Chejúnta vai

□ Ahendu músika ivaíva

□ Aha fiésta oĩháme ofarreáva itarovávaicha

□ Ajegusta kañyháme

□ Ahecha pelíkula ha ahuga videohuégo iviolénto térã itieʼỹva

□ Chejurutieʼỹ

 EMAÑAMÍNA pe lísta oĩvare oñepyrũvo ko kapítulo. ¿Oĩpa peteĩ mbaʼe umíva apytégui rejapóva reikóvo ñemiháme nde tuakuéragui? Oiméramo upéicha, katuete reikuaa voi pe rejapóva oĩ vaiha, ha ikatu voi upévare nemolesta hína ne konsiénsia (Romanos 2:15). Reikuaa remombeʼu vaʼerãha nde tuakuérape, péro rekyhyje haʼekuéra ipochýramo g̃uarã. Upévare, reguerokirirĩnte ha repensa iporãvetaha haʼekuéra ndoikuaáiramo ani hag̃ua oñekevranta. Péro eñeporandumína: “¿Iporãtapa asegi amokañy la ajapóva? ¿Mbaʼéicha rupípa oiméne añepyrũ raʼe ajapo koʼã mbaʼe?”.

Redesidise ndejeheguíntema

La Biblia heʼi: “Pe kuimbaʼe ohejáta itúa ha isýpe” (Génesis 2:24). Ha jaʼekuaa upeichanteha avei umi kuña kásope. Heta mitãrusu ndoipotái avave heʼi chupekuéra mbaʼépa ojapo vaʼerã, opensa tuichamaha ha ikatuha odesidi ijeheguínte. Upévare, ituakuéra oproivíramo chuguikuéra ojapo peteĩ mbaʼe oikuaágui operhudikataha chupe, oĩ heta mitãrusu ha mitãkuña opuʼãva hesekuéra.

Heta vése umi mitãrusu opensa ituakuéra ojopyetereimaha hendivekuéra. Por ehémplo, peteĩ mitãkuña hérava Kim heʼi: “Che tuakuérape ningo ndogustái voi ni peteĩ pelíkula, ha ndoipotái voi rohecha. Che túa katu oproivi orehegui rohendu haimete opaichagua músika”. Heta vése umi mitãrusu openságui ituakuéra ojopyetereimaha hendivekuéra, oñepyrũ oenvidia umi ótro mitãrusúpe oimoʼãgui ovyʼaveha hikuái ojapógui ojaposéva.

Peteĩ mitãkuña hérava Tammy oexplika oĩha ojapóva heta mbaʼe kañyháme ndoipotáigui umi ótro omboyke chupekuéra. Ha upéva la oiko vaʼekue hese, haʼe omombeʼu: “Primeroite añepyrũ chejuruguasu che kompañerokuéraicha, pórke apensa upéicha cheaseptataha hikuái. Upéi añepyrũma apita ha haʼu rasa vevída. Che tuakuéra katu ndoipotái vaʼekue areko nóvio, ha upévare añepyrũ ajegusta heta mitãrusúre ñemiháme”.

 Peteĩ mitãrusu hérava Peter okakuaa vaʼekue peteĩ família haʼévape testígo de Jehová, omombeʼu: “Che ningo ndaipotaieterei vaʼekue che kompañerokuéra chemboyke, ha aipotaiterei kuri haʼekuéra cheguerohory. Upévare oporandu jave chéve hikuái mbaʼérepa ndarresivíri rregálo umi fiésta rrelihiósa jave, ainventa oimeraẽ mbaʼe ndapytavaiséigui hendivekuéra”. Primerorã ningo Peter ojapo umi mbaʼe haʼetévaicha la naiñimportanteguasúiva, péro upéi oñepyrũma avei ojapo heta mbaʼe ivaivéva.

Nemanduʼa vaʼerã oĩha nderecháva

Ymaite guive oĩ omokañýva umi mbaʼe vai ojapóva. Por ehémplo, la Biblia heʼi umi israelita ojapo hague upéicha. Upévare, proféta Isaías oavisa chupekuéra: “Oĩ ningo umi ohóva mombyry oplanea hag̃ua umi mbaʼe vai ndoipotáigui Jehová ohecha chupekuéra. Ojapo ivaíva pytũmbýpe, ha heʼi hikuái: ‘Avave ningo nañanderechái. ¿Máva piko oikuaáta la jajapóva hína?’. Koʼãichagua hénte heta ohasa asýta” (Isaías 29:15). Umi israelita hesarái Ñandejára ohechapaiteha ojapóva hikuái ha itiempoitépe ojechataha hendive umi mbaʼe vai ojapóvare.

Ñane tiémpope upeichaite avei. Ikatu oime rembotavy nde tuakuérape, péro Jehová ohechapaite la rejapóva. Hebreos 4:13 heʼi voi: “Ndaipóri mbaʼeve ni avave okañýva Ñandejáragui, síno haʼe ohecha ha oikuaa entéro mbaʼe, ha haʼe ñandehusgáta ñane rembiapokuére”. Nereganamoʼãi mbaʼeve remokañýramo peteĩ mbaʼe vai rejapóva. Ha reñehaʼãrõ jepe ndeguápo kongregasiónpe, nerembotavymoʼãi Jehovápe. Haʼe oikuaa peteĩ persóna  omombaʼéramo chupe ijurúpente, péro ikorasõ oĩ mombyry chugui (Marcos 7:6).

¿Repensámavapa mbaʼéichapa oñeñandu Jehová ohecha vove rejapoha peteĩ mbaʼe vai kañyháme? Chupe ningo hasyeterei upéva. ¿Mbaʼérepa ikatu jaʼe upeichaha? Heta vése ningo umi israelita naiñeʼẽrendúi vaʼekue Ñandejárape, ha la Biblia heʼi mbaʼépa oiko upéicha jave: “Haʼekuéra [...] omoñeñandu vai Israel Járape” (Salmo 78:41). Upévare, jaʼekuaa Jehová oñeñandu vaietereiha ohechávo umi mitãrusu ha mitãkuña michĩete guive oikuaáva la Biblia heʼíva, lomímonte odesidiha ojapo ivaíva kañyháme (Efesios 6:4).

Emombeʼu la rejapóva

Remombeʼu vaʼerã la rejapóva ñemiháme, pórke upéicha rehechaukáta rerrespetaha Ñandejárape ha nde tuakuérape. Ikatu ningo oime retĩ remombeʼu hag̃ua umi mbaʼe vai rejapo vaʼekue térã rekyhyje rejekorrehírõ g̃uarã (Hebreos 12:11). Por ehémplo, remombeʼu rire nde tuakuérape umi mbaʼe rejapo vaʼekue ñemiháme ikatu nokonfiavéi nderehe hikuái, ha ikatu voi koʼág̃a oproivi ndéve hetave mbaʼe. Upéicharõ jepe, rehecháta revyʼavetaha ne konsiénsia ipotĩramo. ¿Mbaʼérepa jaʼe upéva?

 Ñamoĩmi chupe rehoha nde tuakuérandi rekorre peteĩ kaʼaguýre. Haʼekuéra heʼi ndéve ani hag̃ua reñemomombyry chuguikuéra, péro nomañái jave nderehe hikuái reho ótro ládo ha rekañy. Peichaháguinte reʼa peteĩ karuguápe ha reñepyrũ reñapymi pype. ¿Retĩtapa rejerure hag̃ua chupekuéra tanepytyvõ? ¿Repensátapa iporãvetaha rekirirĩnte ani hag̃ua upéi ndejaʼo hikuái? ¡Ni mbaʼevéicharõ! Katuete resapukáita ikatúva entéro rejerure hag̃ua chupekuéra tanepytyvõ.

Upéicha avei, reheja hag̃ua peteĩ mbaʼe vai rejapóva reikóvo kañyháme, reikotevẽta katuete álgien nepytyvõ. Umi mbaʼe rejapo vaʼekue ningo ndaikatuvéima rekambia, péro si ikatu reñehaʼã koʼág̃a guive rejapo iporãva. Añetehápe péva ndahaʼéi peteĩ mbaʼe ifásilva, péro nderejeruréiramo álgienpe nepytyvõ hag̃ua rejeperhudikáta nde voi ha rembosufríta ne famíliape. Péro reñarrepentíramo  nde pyʼaite guive, Jehová katuete imbaʼeporãta nendive ha neperdonáta (Isaías 1:18; Lucas 6:36).

Upévare, emombeʼúkena nde tuakuérape la rejapóva. Eñehaʼã entende mbaʼéichapa oñeñandu hikuái ha easepta ndekorrehi vove. Rejapóramo upéicha katuete rembovyʼáta chupekuéra ha avei Jehovápe. Avei, nde voi ikatúta reiko trankílo ne konsiénsia ipotĩ rupi (Proverbios 27:11; 2 Corintios 4:2).

MBAʼÉPA JAHECHÁTA PE ÓTRO KAPÍTULOPE

Ikatu oĩ heta ne kompañéro ikalidaitereíva nendive ha rejogueraha porã hendivekuéra. Péro, ¿mbaʼépa iporãta ereko enkuénta reiporavótarõ ne amigorã ijapytepekuéra?

TÉXTO OĨVA LA BÍBLIAPE

“Pe persóna oñomíva hembiapo vai, nosẽporãmoʼãi, péro oñeperdonáta upe omombeʼúvape ipekádo ha ohejaitévape hembiapo vai” (Proverbios 28:13).

PETEĨ KONSÉHO

Ndovaléi remomichĩ umi mbaʼe vai rejapóva, péro ani avei repensa nanepohãveimaha. Nemanduʼa vaʼerã Jehová oĩha neperdona hag̃uáicha (Salmo 86:5).

¿REIKUAÁPA RAʼE?

Ñane konsiénsia ñanemolestáramo jajapo jave ivaíva, heʼise ombaʼapo porãha ha ikatu ñanepytyvõ jaheja hag̃ua ñanerembiapo vai. Péro nañapenáiramo hese, nañandeavisamoʼãvéima mbaʼeve pórke haʼete oñemarkáva ha opytáva iperepa (1 Timoteo 4:2).

UMI MBAʼE AJAPÓTAVA

¿Mávapepa ikatu amombeʼu ajapóramo aikóvo peteĩ mbaʼe vai kañyháme? ․․․․․

¿Mbaʼépa chepytyvõta ikatu hag̃uáicha aasepta ajekorrehi vove? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa oĩ heta mitãrusu ha mitãkuña ojapóva ivaíva kañyháme?

● ¿Mbaʼéichapa ndeperhudikáta rejapóramo reikóvo ivaíva ha neremombeʼúi avavépe?

● ¿Mbaʼe iporãvapa rehupytýta remombeʼúramo la rejapóva ha rehejaite upéva?

[Komentário oĩva páhina 140-pe]

“Chéverõ g̃uarã ensegídama voi ñamombeʼu vaʼerã ñande ñamombaʼeha la Biblia heʼíva. Péicha ifasilvétama ñandéve ñañeʼẽ hag̃ua umi mbaʼe jagueroviávare” (Linda).

[Taʼanga oĩva páhina 141-pe]

Oimérõ rejapo ivaíva ñemiháme, ani retĩ rejerure hag̃ua álgienpe tanepytyvõ