LEKSIÓN 01
¿Mbaʼéichapa la Biblia ikatu nepytyvõ?
Enterovéva ningo jaikuaase maʼerãpa jaexisti, mbaʼérepa oĩ sufrimiénto, mbaʼérepa ñamano ha avei mbaʼépa oikóta amo gotyove. Hetápe ñandepyʼapy avei mbaʼéichapa ikatu jakuvri ñane nesesida káda diagua, ha mbaʼéichapa ikatu javyʼa ñane famíliape. La Biblia oipytyvõma hetaiterei héntepe ombohovái hag̃ua umi porandu iñimportantevéva, ha avei osolusiona hag̃ua umi provléma káda día oñepresentáva. ¿Ndépa repensa la Biblia ikatuha avei nepytyvõ ndéve?
1. ¿Ikatúpa la Biblia okontesta ñandéve umi mbaʼe jaikuaaséva?
La Biblia okontesta ñandéve koʼã porandu iñimportantetereíva: “¿Mbaʼéichapa oñepyrũ vaʼekue la vída? ¿Mbaʼérepa ñaime koʼápe? ¿Mbaʼérepa osufri umi hénte inosénte? ¿Mbaʼépa oiko ñandehegui ñamano rire? ¿Mbaʼérepa oĩ hetaite gérra enterovéva jaikoséramo jepe pyʼaguapýpe? ¿Mbaʼépa oikóta ko ñane planétagui? ¿Oñehundítapa?”. La Biblia ñanemokyreʼỹ ikatu hag̃uáicha ñainvestiga koʼã mbaʼe. Ha hetaiterei persóna otopáma umi rrespuésta okonvenséva chupekuéra.
2. ¿Mbaʼéichapa la Biblia ñanepytyvõ javyʼa hag̃ua koʼág̃ama voi?
La Bíbliape ikatu jatopa umi konsého iporãvéva. Por ehémplo, ñanemboʼe mbaʼéichapa ikatu javyʼa ñane famíliape, omombeʼu avei ñandéve mbaʼépa ikatu jajapo pono ñañekevrantaiterei, ha mbaʼéichapa ikatu jadisfruta pe traváho otokávagui ñandéve jajapo. Ko puvlikasiónpe ñaaprendéta mbaʼépa heʼi la Biblia umi témare, ha hetave mbaʼére. Amedída ke restudia rehechakuaáta siertoiteha la heʼíva 2 Timoteo 3:16: “Entéro mbaʼe oĩva Ñandejára Ñeʼẽme [...] ideprovécho”.
Ko puvlikasión ndahaʼéi iñimportantevéva la Bíbliagui, síno ñanepytyvõnte ñantende hag̃ua la heʼíva pype. Upévare romokyreʼỹ reheka hag̃ua rehóvo umi téxto oĩva káda leksiónpe, ha rehecha hag̃ua mbaʼéichapa umíva omopyenda entéro mbaʼe reaprendéva.
EJEPYʼAMONGETAMÍNA
Jahechamína mbaʼéichapa la Biblia oipytyvõma heta héntepe, mbaʼéichapa ikatu redisfruta nde lektúragui, ha mbaʼérepa iñimportánte álgien nepytyvõ rentende hag̃ua la omboʼéva.
3. La Biblia ikatu ñandegia porã
La Biblia ningo ojogua peteĩ lintérna ohesape porãvape, pórke ohechauka ñandéve mbaʼéichapa ikatu jadesidi porã ha omombeʼu mbaʼe mbaʼépa oikóta amo gotyove.
Elee Salmo 119:105, ha upéi erresponde koʼã porandu:
-
¿Mbaʼépa opensa la Bíbliare pe oskrivi vaʼekue ko salmo?
-
¿Mbaʼépa nde repensa la Bíbliare?
4. La Biblia ikatu orresponde umi mbaʼe jaikuaaséva
Ehechamína mbaʼéichapa la Biblia oipytyvõ peteĩ kuñakaraípe ombohovái hag̃ua umi porandu hetaiterei tiémpore oikuaase vaʼekue. Ehecha pe VIDÉO, ha upéi erresponde koʼã porandu:
-
Según pe vidéo, ¿mbaʼe mbaʼépa oikuaase raʼe pe kuñakarai?
-
¿Mbaʼéichapa ijestúdio de la Biblia oipytyvõ chupe?
La Biblia ohechauka iporãha ñaporandu umi mbaʼe jaikuaaséva. Elee Mateo 7:7, ha upéi erresponde ko porandu:
-
¿Mbaʼe mbaʼépa nde reipota la Biblia orresponde ndéve?
5. Nde ikatu redisfruta releévo la Biblia
Ehecha mbaʼéichapa oĩ heta odisfrutáva oleévo la Biblia, ha mbaʼéichapa ideprovécho chupekuéra upéva. Ehecha pe VIDÉO, ha upéi erresponde koʼã porandu:
-
Según pe vidéo, ¿mbaʼépa opensa umi mitãrusu ha mitãkuña pe lektúrare?
-
La majoríape ndogustáiramo jepe la lektúra, ¿mbaʼérepa idiferénte chupekuéra g̃uarã la Biblia?
La Biblia ningo ikatu ñandegia, ñanekonsola ha omeʼẽ ñandéve esperánsa. Elee Romanos 15:4, ha upéi erresponde ko porandu:
-
¿Reikuaasépa mbaʼéichapa la Biblia ñanekonsola ha omeʼẽ ñandéve esperánsa?
6. Ejerure álgienpe tanepytyvõ rentende hag̃ua la Biblia
Iporãiterei ningo jalee la Biblia ñaneañoháme. Péro oĩ heta ohechakuaáva álgien oipytyvõramo chupe, ifasilveha ontende hag̃ua la oĩva pype. Elee Hechos 8:26-31, ha upéi erresponde ko porandu:
-
¿Mbaʼéichapa ikatu ñantende la Biblia heʼíva? (Ehecha jey versíkulo 30 ha 31).
Pe kuimbaʼe Etiopiagua oikotevẽ kuri álgien oipytyvõ chupe ontende hag̃ua la oleéva. Ñane tiémpope avei oĩ heta ohechakuaáva álgien oipytyvõramo chupe, ifasilveha ontende hag̃ua la Biblia
OĨRAMO HEʼÍVA: “Naikuéntai restudia la Biblia, reperde rei ne tiémpo”.
-
¿Mbaʼépa errespondéne chupe? ¿Ha mbaʼérepa?
RRESÚMEN
Umi konsého oĩva la Bíbliape ñanepytyvõ koʼág̃ama voi, ombohovái ñandéve umi pregúnta iñimportantevéva, ha omeʼẽ ñandéve konsuélo ha esperánsa.
Rrepáso
-
¿Mbaʼeichagua konséhopa ikatu jatopa la Bíbliape?
-
¿Mbaʼeichagua pregúntapa orresponde la Biblia?
-
¿Mbaʼe mbaʼépa nde reikuaase la Bíbliagui?
EINVESTIGA HAG̃UA
Ehecha mbaʼéichapa umi konsého oĩva la Bíbliape ideprovéchoiti koʼág̃a peve.
“Umi konsého oĩva la Bíbliape siémpre ideprovécho” (Ñemañaha número 1 de 2018)
Ehecha mbaʼéichapa la Biblia oipytyvõ peteĩ karaípe osupera hag̃ua umi tráuma oguereko vaʼekue imitã guive.
Emañami umi konsého porãite orekóvare la Biblia umi famíliape g̃uarã.
“12 konsého umi família ovyʼa hag̃ua” (¡Pepáyke! Número 2 de 2018)
Ehecha mbaʼéichapa la Biblia omyesakã porã mávapa añetehápe odomina ko múndo.
Koʼã téma ikatu ndegusta avei
OÑEPORANDU MEMÉVA
¿Mbaʼéichapa umi testígo de Jehová ojapo peteĩ kúrso bíblico?
Ko kúrso bíblico oofresévape ndéve umi testígo de Jehová eipurukuaa pe traduksión bíblica ndegustavéva. Ndojekovrái mbaʼevete. Ikatu einvita ne família térã ne amigokuérape oĩ hag̃ua.
