MBAʼÉICHAPA umi hénte opilláta mávapa pe Mesías? Ñandejára voi oikuaauka chupekuéra umi profesía rupive. Ohasávo 400 áño ojehaipa rire Evréo Kuatiañeʼẽ (térã Antiguo Testamento) peteĩ ánhel hérava Gabriel ou peteĩ kuñataĩ rendápe oikóva Galiléape, táva Nazarétpe. Ko kuñataĩ héra María. Gabriel heʼi chupe imembytaha peteĩ mitãkuimbaʼe. Jepe haʼe ndoikói gueteri kuimbaʼéndi hyeguasúta Ñandejára espíritu sánto rupive. Upe mitã haʼéta hína pe Rréi oisãmbyhýtava opa ára g̃uarã. Upearã Ñandejára oguerováta itaʼýra rekove yvágagui María retepýpe.

María heʼi pe ánhelpe ojapotaha Jehová oipotáva. Haʼe upérõ omendapota peteĩ karpintérore hérava José. Ñandejára ombou hiʼánhel heʼi hag̃ua Josépe mbaʼépa la oikóva, ha upéi haʼe omenda Maríare. Péro pe Mesías onasevaʼerã Belénpe heʼi haguéicha Ñandejára proféta (Miqueas 5:2). Mbaʼéichapa oikóta upéva Nazaret opytárõ 140 kilómetro Beléngui?

Upe riremi pe mburuvicha Romaygua ojapouka peteĩ sénso ha heʼi enterove ohovaʼerãha ivállepe oñanota hag̃ua. José ha María ningo Belengua ha oviahámante hikuái jepe María imembypotaitéma (Lucas 2:3). Jesús onase mymba okehápe ha oñemoñeno chupe peteĩ kanékape. Ag̃ui upégui una partída kuimbaʼe oñangarekohína ijovechakuérare ha ou hendapekuéra peteĩ ánhel. Ko ánhel heʼi umi kuimbaʼépe onase ramoiteha pe Mesías térã Ñandejára Remimbou oñeprometevaʼekue.

Oĩ avei ambue tapicha oikuaaukáva Jesús haʼeha pe Mesías. Proféta Isaías heʼivaʼekue oĩtaha peteĩ ombohapéva chupe ojapo hag̃ua hembiapo ko yvy ape ári (Isaías 40:3). Upéva hína Juan Bautista. Peteĩ jey ohechávo Jesús ouha hendápe haʼe heʼi: ‘Kóva hína Ñandejára Ovecharaʼy oipeʼáva yvyporakuéra pekádo’. Upepete heta omoirũva Juánpe oñepyrũ omoirũ Jesúspe. Peteĩva heʼi voi: “Oime rojuhu pe Mesíaspe” (Juan 1:​29, BNP, 36, 41).

Péro upéi oiko peteĩ mbaʼe ohechauka porãvéva Jesús haʼeha pe Mesías. Juan ovautisárõ guare chupe, Jehová voi heʼi yvága guive: “Kóva haʼe che raʼy ahayhuetéva, che aiporavovaʼekue” (Mateo 3:​16, 17). Péina og̃uahẽma pe Mesías oñeprometevaʼekue!

Arakaʼépa oiko upéva? Áño 29-pe, oñekumplívo umi 483 áño heʼivaʼekue proféta Daniel. Péicha sapyʼaitépe jahecha heta mbaʼe ohechaukáva Jesús haʼeha pe Mesías oñeprometevaʼekue. Koʼág̃a jahechami mbaʼe marandúpa omeʼẽ Jesús oĩ aja ko yvy ape ári.

(Oñeguenohẽ Mateo kapítulo 1-3; Marcos kapítulo 1; Lucas kapítulo 2; ha Juan kapítulo 1-gui.)