PETEĨ kuñataĩ orekóva 25 áño ohai: “Che syanga omano cáncer-gui 1981-pe. Upéva orereja vai chéve ha che ermánope, ndahaʼéirõ jepe avei isy tee. Che areko 17 áño upérõ, ha che ermáno 11. Ahechagaʼueterei chupe. Ojeʼe rupi chéve ohohague yvágape, che ajejukase aha hag̃ua hendápe. Haʼevaʼekue che amíga ahayhuvéva”.

Ajépa ivaiete omano umi jahayhúva ha noĩvéi ñanendive! Ha ñapensáramo ndaikatuveimaha ñañemongeta, japuka hendive ha ñaañuã chupe, haʼete ndajaropuʼakamoʼãiva pe ñañandúva. Ha ojeʼéramo jepe ñandéve pe omanóva ohohague yvágape, ñambyasyeterei jeýnte.

Péro la Biblia ndeʼíri ñandéve oikotaha upéva. Jahechamahaguéicha, la Biblia ohechauka koʼẽrõitéma ikatutaha ñaime jey umi jahayhúva omanovaʼekuéndi, péro ndahaʼéi peteĩ yvága jaikuaaʼỹvape, síno ko yvy ape ári, oĩtaháme tekojoja ha pyʼaguapy. Ha upérõ g̃uarã yvyporakuéra hesãimbaitéta, perféktota ha nomanomoʼãvéima arakaʼeve. Ikatu oĩ opensáva ‘péva ningo ojeʼe reínte’.

Mbaʼéichapa ikatu reguerovia ojeikove jeytaha katuete? Jaguerovia hag̃ua peteĩ mbaʼe oikotaha katuete jaikuaa porã vaʼerã pe oprometéva ikatuha ojapo ha ojaposeha voi pe heʼíva. Mávapa pe heʼíva umi omanovaʼekue oikove jeytaha?

Pe primavéra áño 31-pe Jesús oprometevaʼekue: “Pe Túva omopuʼãháicha omanovaʼekue ha omoingove jey, pe Taʼýra avei omoingove umi haʼe omoingovesévape. [...] Aníketei pehecharamo kóva, og̃uahẽvaʼerã gueteri ára ha umi omanóva oĩva oñeñotỹhaguépe, ohenduvaʼerã avei iporohenói [Jesús], ha osẽvaʼerã” (Juan 5:​21, 28, 29, VP). Upeichaite, Jesús oprometevaʼekue hetaiterei omanóva oikove jeytaha ha ikatutaha opyta opa ára g̃uarã ko Yvy ape ári, pyʼaguapýpe peteĩ paraísope (Lucas 23:43; Juan 3:16; 17:3; embojoja Salmo 37:29 ha Mateo 5:5 rehe). Jesús opromete rupi ko mbaʼe, jaikuaa katuete okumpliseha pe heʼíva. Péro, ikatúnepa ojapo?

Dos áño mboyvemi heʼihaguépe upéva, Jesús ohechauka porã ojaposeha ha ikatuha omoingove jey umi omanovaʼekuépe.

Tuicha mbaʼe pe oikovaʼekue upérõ. Lázaro hasyete ha iñermanakuéra Marta ha María heʼiuka Jesúspe, oĩva upérõ pe rrío Jordán mboypýri: “Ne irũ rehayhuetéva niko hasyhína” (Juan 11:3). Haʼekuéra oikuaa Jesús ohayhuha Lázarope. Ndohechasemoʼãi piko Jesús iñamígo hasývape? Upéicharamo jepe, opuʼãrangue upepete voi oho Betániape, Jesús hiʼareve pe oĩháme dos día (Juan 11:​5, 6).

Heʼiuka riremi hikuái Jesúspe hasyhague, Lázaro omano. Jesús oikuaáma Lázaro omanohague ha ojapose peteĩ mbaʼe. Og̃uahẽ Betániape, cuatro día omanohaguépe Lázaro, iñirũ ohayhuetéva (Juan 11:​17, 39). Ikatúnepa Jesús omoingove jey peteĩ omanómava cuatro día?

Ohendúvo Jesús ouha, Marta, peteĩ kuña ikyreʼỹva, pyaʼe oho ohuvaitĩ chupe (Embojoja Lucas 10:​38-42 rehe). Ombyasyetereígui chupe Jesús heʼi: “Nde kyvy oikove jeýta”. Marta heʼi oroviaha og̃uahẽtaha pe ára iñermáno oikove jeývo. Upémarõ Jesús heʼi porãmandi chupe: “Che hína pe aporomoingovéva, ha aporomoingove jeýva. Cherehe ojeroviáva omanóramo jepe oikovéta” (Juan 11:​20-25).

Og̃uahẽvo pe Lázaro oĩháme, Jesús heʼi ojepeʼa hag̃ua pe ita ombotýva pe oĩha. Upéi oñemboʼe ha heʼi hatã porã: “Lázaro, esẽ upégui” (Juan 11:​38-43).

Opavave omaña pe Lázaro oĩháme. Peichaháguinte pe pytũmbýgui osẽ peteĩ ipo ha ipy ojejokuapáva, ha oñakãhoʼĩva peteĩ páñope. Jesús heʼi: “Pejora ha peheja toho”. Ojepeʼapávo chugui upe ojahoʼipáva chupe ohechakuaa hikuáihaʼeha Lázaro, pe omanovaʼekue ojapóma cuatro día (Juan 11:44).

Juan heʼivaʼekue Lázaro añetehápe oñemoingove jey hague. Oñemombeʼu porãiterei pe oikovaʼekue, upévare ndaikatúi jaʼe ojeʼe reinteha. Jaʼéramo upéva ndoikoihague, jaʼe avei ndoikoihague umi ótro milágro oĩva la Bíbliape, ijapytépe Jesúspe oñemoingove jey hague. Ha upéicha jahechauka ndajajeroviaiha Jesúsre ha opa mbaʼe omboʼevaʼekuére (1 Corintios 15:​13-15).

Añetehápe, regueroviáramo oĩha Ñandejára, ndahasyivaʼerã ndéve reguerovia oĩtaha pe ñemoingove jey. Pór ehémplo, peteĩ karai ikatu ograva peteĩ vidéope mbaʼépa oipota ojejapo umi mbaʼe ohejávagui omano rire, testaménto oñehenóiva. Ha upéi omano rire, ihénte ha iñamigokuéra ikatu ohecha pe vidéope haʼete voi omombeʼúrõ mbaʼépa oipota ojejapo. Ymave mbaʼe ojeʼérire péva ojejapoha avave ndogueroviaivaʼerãmoʼã. Koʼág̃a jepe heta henda rupi umi mombyryhápe, heta tapicha ndoikuaáivape g̃uarã pe vidéo, ohecháramo ikatu oimoʼã haʼeha peteĩ milágro. Upéicha jahecha mbaʼéichapa yvyporakuéra ojapo koʼã mbaʼe, ha upearã oiporu umi mbaʼe omoĩvaʼekue ñande Apohare. Ndaikatumoʼãi piko Ñandejára ojapo hetave mbaʼe? Ndaikatuichéne piko pe ojapovaʼekue opa oikovéva ojapo jeýnte pe omanovaʼekuépe?

Lázaro oikove jey haguére tapichakuéra ojeroviave Jesús rehe ha pe ñemoingove jeýre (Juan 11:​41, 42; 12:​9-11, 17-19). Avei omyesakã porãiterei mbaʼeichaitépa Jehová ha Itaʼýra omoingovese jey umi omanovaʼekuépe.

Pe ojapovaʼekue Jesús omanórõ guare Lázaro ohechauka mbaʼeichaitépa oporohayhu. Avei ohechauka porãiterei mbaʼeichaitépa haʼe omoingovese jey umi omanovaʼekuépe. La Biblia heʼi: “María, og̃uahẽvo Jesús oĩháme ha ohechávo chupe, oñesũ henondépe ha heʼi: ‘Karai, reimérire koʼápe, che ermáno nomanoivaʼerãmoʼã’. Jesús ohechávo mbaʼéichapa haʼe ha umi hudío ouvaʼekue hendive ojaheʼojoa, ipyahẽ ha oñeñandu vaieterei; ha heʼi: ‘Moõ piko pemoĩraʼe?’, heʼi hikuái chupe: ‘Karai, ejúna ehecha’. Upévo Jesús hasẽ. Upévare umi hudío heʼi: Pemaʼẽmína mbaʼeichaitépa ohayhúraʼe chupe!’” (Juan 11:​32-36, NM).

Jesús ombyasy ipyʼaite guive. Upéva ohechauka péicha: “ipyahẽ”, “oñeñandu vaieterei” ha “hasẽ”. Koʼã ñeʼẽ ojeporuvaʼekue pe idióma ojehaihaguépe ko oikovaʼekue ohechauka oguapyhague Jesús rehe iñamígo Lázaro omanohague ha ohechahaguére iñermána hasẽ; upévare hasẽhague avei. a

Pe jahecharamovéva ningo Jesús upérõ omoingove jeýma vaʼekue mokõi tapichápe, ha upéicha avei ojapóta Lázaro rehe; upéicharamo jepe haʼe “hasẽ” (Juan 11:​11, 23, 25). Upévare jahecha omoingove jeývo peteĩ tapichápe ndahaʼeiha peteĩ tembiapónte Jesúspe  g̃uarã. Pe mborayhu ohechaukavaʼekue omoingove jeývo Lázarope ohechauka mbaʼeichaitépa haʼe omyatyrõse umi mbaʼe vai oguerúva pe ñemano.

Jesús haʼégui ‘peteĩchaite Ñandejára ndive’, ikatu ñahaʼarõ peichaite avei ojaposeha ñande Ru yvagapegua (Hebreos 1:3). Job heʼivaʼekue mbaʼépa oñandu Jehová pe ñemoingove jeýre: ‘Peteĩ kuimbaʼe ománoramo, oikove jeýnepa? [...] Nde cherenóita ha che rombohováita. Pe ne rembiapokue reipotaitereíta’ (Job 14:​14, 15, NM). Pe ñeʼẽ ojetradusíva ‘reipotaitereíta’ heʼisevaʼekue pe idióma ojehaihaguépe, Ñandejára ojaposetereiha ipyʼaite guive (Génesis 31:30; Salmo 84:2). Jahecha porã Jehová ohaʼarõmaha pe tiémpo oporomoingove jey hag̃ua.

Ikatúpa añetehápe jaguerovia oĩtaha pe ñemoingove jey? Ikatu, jahecha porãgui Jehová ha Itaʼýra ojaposeha upéva ha ndahaʼéi ojaposénteva, ikatu voi ojapo. Mbaʼépa heʼise upéva ndéve g̃uarã? Ikatutaha reime jey ko Yvy ape ári umi rehayhúva omanovaʼekue ndive, péro ndahaʼevéima koʼág̃a jaikoháicha!

Ñandejára Jehová, ojapovaʼekue yvyporakuérape peteĩ hardín neporãvape, heʼi ojapo jeytaha ko Yvýgui peteĩ Paraíso. Ojapóta upéva pe Rréino yvagapegua rupive; upe Rréino oĩ Jesucristo poguýpe (Génesis 2:​7-9; Mateo 6:10; Lucas 23:​42, 43). Upe Paraísope yvyporakuéra ikatúta oiko opa ára g̃uarã ombyaiʼỹre chupekuéra mbaʼeveichagua mbaʼasy (Revelación 21:​1-4; embojoja Job 33:25-re; Isaías 35:​5-7). Ndaiporimoʼãvéima umi ndochaʼéiva hapicháre, oapoʼíva umi ipire kolór diferéntevape, umi ñorairõ ha umi provléma oĩva ofaltágui pláta. Ñandejára Jehová omoingove jeýta Jesucristo rupive umi omanovaʼekuépe oiko hag̃ua peteĩ Yvy potĩme.

Péva ohaʼarõ pe kuñakarai oñeʼẽvaʼekue oñepyrũvo ko párte. Are omano rire isy, umi Testigo de Jehová oipytyvõ chupe ohesaʼỹijo hag̃ua la Biblia. Haʼe imanduʼa: “Aikuaávo oñemoingove jeytaha umi omanovaʼekuépe, cherasẽ. Tuichaiterei mbaʼe ningo aikuaa ahecha jeytaha che sýpe”.

Nde avei rehechaséramo nde pyʼaite guive peteĩ rehayhúva omanovaʼekuépe, umi Testigo de Jehová nepytyvõta rehaʼarõ hag̃ua avei ko mbaʼe oikótava katuete. Ikatu retopa hesekuéra pe ijatyhápe hikuái hiʼag̃uivéva ndehegui térã rehaikuaa peteĩ direksión oĩvape páhina 32-pe.