“Che jára, ¿arakaʼe peve piko asapukáita ndéve chepytyvõ hag̃ua ha nacherendumoʼãi? ¿arakaʼe peve piko asapukáita oĩgui jejuka ha nderejumoʼãi orepeʼa jejopy vaígui?” (Habacuc 1:2, 3, SBP). Koʼã mbaʼe ningo heʼi vaʼekue Habacuc, peteĩ kuimbaʼe ivuenoitereíva ha Ñandejára oguerohorýva. ¿Ohechaukápa ko porandu haʼe ndojeroviái hague? Nahániri. Ñandejára oasegura kuri Habacúcpe haʼe orekomaha peteĩ fécha oipeʼapa hag̃ua umi sufrimiénto (Habacuc 2:2, 3).

Jasufri jave ñande térã peteĩ persóna jahayhúva, ifásil jaʼe hag̃ua Ñandejára imbegueha, ha ñapensa: ¿Mbaʼére piko ndojapóima álgo ñanepytyvõ hag̃ua koʼág̃a? Péro la Biblia heʼi: “Jehová naimbeguéi hína okumpli hag̃ua ipromésa, oĩháicha opensáva. Péro haʼe ipasiénsia penderehe ndoipotáigui avave oñehundi; oipota guei enterove oñarrepenti” (2 Pedro 3:9).

Ñandejára koʼẽrõitéma oipeʼáta pe sufrimiénto. Jesús heʼi vaʼekue “umi hénte oikóva ko tiémpope” ohechataha heta mbaʼe oikóva ha ohechaukáva ko múndo ára pahaite oñemoag̃uimaha (Mateo 24:3-42). Ko profesía oñekumpli hína koʼág̃a, upéva ohechauka Ñandejára koʼẽrõitéma ojapotaha tekotevẽva guive okambia hag̃ua la situasión ko múndope. *

¿Mbaʼéichapa Ñandejára oipeʼáta umi mbaʼe ñanembosufríva? Jesús oĩrõ guare ko yvy ape ári ohechauka vaʼekue Ñandejára orekoha podér oipeʼa hag̃ua umi mbaʼe ñanembosufríva. Epensamína koʼã ehémplore:

Desástre Naturál: Jesús ha ijapostolkuéra oĩrõ guare pe mar de Galiléape, peteĩ torménta vai haimete omoñapymi ivarkokuéra. Péro Jesús ohechauka vaʼekue haʼe ha Itúa orekoha podér okontrola hag̃ua pe naturalésa (Colosenses 1:15, 16). Jesús heʼínte vaʼekue: “‘¡Epytaitéke! ¡Ekirirĩetéke!’. Ha pe yvytu opyta ha pe torménta ohasaite” (Marcos 4:35-39).

Mbaʼasy: Jesúspe ojekuaa porã vaʼekue oreko haguére podér omonguera hag̃ua umi isiégovape ha ikarẽvape. Omonguera vaʼekue avei umi orekóvape epilépsia, lépra ha oimehaichagua mbaʼasy. Jesús omonguera vaʼekue “opavave hasývape” (Mateo 4:23, 24; 8:16; 11:2-5).

Ñembyahýi: Ñandejára omeʼẽ vaʼekue Jesúspe podér ha upévare haʼe ojapo mbovymi tembiʼúgui heta tembiʼu. La Biblia heʼi Jesús opredikaha tiémpope, dos vése ojapo hague upéicha omongaru hag̃ua hetaiterei persónape (Mateo 14:14-21; 15:32-38).

Ñemano: La Biblia omombeʼu Jesús omoingove jey hague mbohapy persóna omano vaʼekuépe, umíva apytépe peteĩva 4 díarema omano kuri. Upéva ohechauka porã Jehová orekoha podér oipeʼaite hag̃ua pe ñemano (Marcos 5:35-42; Lucas 7:11-16; Juan 11:3-44).