La Biblia heʼi: “Opa mbaʼe porã ha rregálo hekopeguáva ou yvatégui, omeʼẽgui ñandéve Ñandejára haʼéva umi mbaʼerendy yvagapegua Túva” (Santiago 1:17). Ko téxto ohechauka ñandéve mbaʼeichaitépa Ñandejára Jehová ipojera. Haʼe ningo omeʼẽ ñandéve heta rregálo, péro umíva apytépe oĩ peteĩ rregálo iporãvéva. ¿Mbaʼépa hína upéva? Juan 3:16-pe Jesús omombeʼu ñandéve: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva”.

Añetehápe ningo Ñandejára omeʼẽvo Itaʼýra peteĩete ñanderehehápe, omeʼẽ ñandéve pe rregálo iporãvéva ikatúva jarresivi. Upéva mediánte jajelivráta pekádo ha ñemanógui, ha ndajasufrimoʼãvéima ñandeeda rupi jahávo (Salmo 51:5; Juan 8:34). Ñandejehegui reínte ningo ni ñañehaʼãvérõ ndaikatumoʼãi jajelivra umívagui. Péro Ñandejára ñanderayhueterei ha ojapo tekotevẽva guive ñandesalva hag̃ua. Jehová omeʼẽ Itaʼýra Jesucrístope orreskata hag̃ua yvyporakuérape. Péicha omeʼẽ oportunida umi iñeʼẽrendúvape oikove hag̃ua opa árare. Péro, ¿mbaʼépa hína pe rreskáte? ¿Mbaʼérepa ñaikotevẽte kuri upéva? ¿Ha mbaʼépa jajapo vaʼerã ñañevenefisia hag̃ua pe rreskátegui?

Peteĩ rreskáte haʼe pe présio ojepagáva ojerrekupera hag̃ua peteĩ mbaʼe ojeperde vaʼekue térã ojelivera hag̃ua peteĩ persónape. La Biblia omombeʼu Ñandejára ojapo hague perfékto ñande tuakuéra ypykuépe, hérava Adán ha Eva, ha upévare hikuái ikatu kuri oiko pára siémpre peteĩ paraísope ko yvy ape ári ifamiliakuéra ndive (Génesis 1:26-28). Ñambyasýramo jepe, haʼekuéra operde upe oportunida porãite odesidírõ guare naiñeʼẽrendumoʼãiha Ñandejárape ha ou opeka. ¿Mbaʼépa oiko upe haguére? La Biblia heʼi: “Peteĩ kuimbaʼe rupive pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro kuimbaʼépe, enterovéva opeka rupi” (Romanos 5:12). Ombohasa rangue ifamiliarépe pe perfeksión, Adán ombohasa chupekuéra pe pekádo ha upéva rapykuéri avei pe ñemano.

Ojerrekupera hag̃ua peteĩ mbaʼe ojeperde vaʼekue, ojepaga vaʼerã el mísmo présio kómo rreskáte. Adán tuichaiterei opeka vaʼekue odesovedesérõ guare Ñandejárape, ha upéva káusare operde pe vída perfékta oreko vaʼekue. La Biblia heʼi Adán káusare yvyporakuéra oĩha pekádo ha ñemano poguýpe. Ikatu hag̃uáicha jajelivera upévagui, tekotevẽ vaʼekue avei oñemeʼẽ kómo rreskáte peteĩ persóna perfékta, ha upéva hína Jesús (Romanos 5:19; Efesios 1:7). Ñandejára ningo imbaʼeporãiterei ha opaga ñanderehe ñanderreskata hag̃ua. Haʼe ndojapóirire upéva ndajarekomoʼãi kuri esperánsa jaikovévo opa árare peteĩ paraísope. Ndaikatumoʼãi kuri jarrekupera Adán ha Eva operde vaʼekue (Apocalipsis 21:3-5).

Ñapensáramo mbaʼe mbaʼépa jahupyty Jehová ñanderreskata rupi, jaʼekuaa omeʼẽ hague ñandéve “pe rregálo iporãvéva”. Pe ótro artíkulope jahecha kuri mbaʼe mbaʼépa jareko vaʼerã enkuénta ikatu hag̃uáicha ñameʼẽ peteĩ rregálo ombovyʼa ha ideprovéchotava peteĩ persónape. Upévare, ñantende hag̃ua mbaʼérepa ndaijojahái pe rregálo Ñandejára omeʼẽ vaʼekue ñandéve, jahechamíta mbaʼéichapa haʼe orekopaite kuri enkuénta umi mbaʼe ñaanalisa vaʼekue.

 Omeʼẽ ñandéve pe jaipotavéva. Enterovénte ningo jaikovese opa árare (Eclesiastés 3:11). Péro ñandejehegui rei ni mbaʼevéicharõ ndajahupytymoʼãi kuri upéva, pe rreskáte rupive añoite ikatu jahupyty. La Biblia heʼi: “Pekádo káusare ñamano. Péro Ñandejára orregala jeikove opaveʼỹva ñande Ruvicha Cristo Jesús rupive” (Romanos 6:23).

Omeʼẽ ñandéve pe ñaikotevẽva. Ndaipóri ningo ni peteĩ persóna ikatúva opaga pe rreskáte. La Biblia heʼi voi avave ndaikatuiha opaga upéva ni iplatavéramo jepe (Salmo 49:8). Ñaikotevẽterei kuri Ñandejára ñanepytyvõ jajelivera hag̃ua pekádo ha ñemanógui. Jesús rupive Ñandejára opaga ñanderehe ñanderreskata hag̃ua ha upéicha omeʼẽ ñandéve pe ñaikotevẽte vaʼekue (Romanos 3:23, 24).

Omeʼẽ ñandéve itiempoitépe. La Biblia heʼi Cristo omano hague “ñanderehehápe ñande pekadór aja gueteri” (Romanos 5:8). Upéva ohechauka ñandéve mbaʼeichaitépa Ñandejára ñanderayhu ñaneimperféktoramo jepe. Añetehápe ningo koʼag̃aite peve jahasa gueteri heta mbaʼe ijetuʼúva pe pekádo káusare, péro pe rreskáte rupive jareko peteĩ esperánsa iporãitereíva ha vyʼápe ñahaʼarõ oñekumpli upéva.

Ipyʼaite guive omeʼẽ ñandéve. La Biblia omombeʼu mbaʼérepa Ñandejára omeʼẽ Itaʼýra ñanderreskata hag̃ua: “Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove. Pe mborayhu ndeʼiséi ñande jahayhu hague Ñandejárape, síno haʼe la ñanderayhu vaʼekue ha ombou Itaʼýrape oñemeʼẽ hag̃ua sakrifísioramo” (1 Juan 4:9, 10).

¿Mbaʼépa rejapo vaʼerã rehechauka hag̃ua remombaʼeha pe rregálo iporãvéva omeʼẽ vaʼekue ñandéve Ñandejára? Nemanduʼa vaʼerã Jesús heʼi vaʼekuére Juan 3:16-pe. Upépe haʼe heʼi “opaite umi hese ojeroviáva” ojesalvataha. La Biblia heʼi pe persóna ojeroviáva oĩha segúro “oikotaha katuete” umi mbaʼe ohaʼarõva (Hebreos 11:1). Ikatu hag̃uáicha péicha jajerovia, tekotevẽ jaikuaa porã la Biblia omboʼéva. Upévare romokyreʼỹ eñemotiémpo hag̃ua reikuaave hag̃ua Ñandejárape. Haʼe ningo omeʼẽ vaʼekue ñandéve pe “rregálo iporãvéva”. Eñehaʼã eaprende mbaʼépa rejapo vaʼerã ikatu hag̃uáicha rehupyty pe vída etérna oñemeʼẽtava ñandéve Jesús omano rupi ñanderehehápe.

Reaprendeve hag̃ua ikatu rehecha umi informasión bíblica oĩva www.ps8318.com-pe. Umi testígo de Jehová ovyʼaitereíta ikatúramo nepytyvõ reaprendeve hag̃ua ko rregálo iporãitévagui ha umi mbaʼe porã jahupytýtavagui upéva rupive. Reaprendévo umi mbaʼe, katuete eréta avei: “¡Aagradese Ñandejárape, ñande Ruvicha Jesucristo rupive!” (Romanos 7:25).