Péicha heʼi vaʼekue peteĩ mitãkuña de 13 áño ojerregalárõ guare chupe peteĩ jaguaʼi. Peteĩ empresária katu heʼi pe komputadóra itúa orregala vaʼekue chupe oikeha tiémpope koléhiope okambiaite hague la hekove. Peteĩ kuimbaʼe ndaʼareguasúiva omenda hague heʼi pe rregálo iporãvéva orresivi vaʼekue haʼeha pe tarhéta hembireko ojapo vaʼekue ha orregala chupe okumplírõ guare hikuái un áño omenda hague.

Káda áño heta hénte oipuru heta tiémpo oheka ha ojogua hag̃ua pe rregálo “iporãvéva” ikatu hag̃uáicha omeʼẽ iñamígo térã ihéntepe peteĩ okasión espesiálpe. Enterovénte oipota ojeʼe irregálo rehe pe jalee vaʼekue yvate. ¿Ndévepa hiʼã avei emeʼẽ térã erresivi peichagua rregálo?

Oiméne katuete hiʼã ndéve upéva pórke igústo jarresivi peteĩ rregálo ha igustoiterei avei ñameʼẽ. La Biblia heʼi voi: “Javyʼaiteve ñameʼẽvo, ñandéve oñemeʼẽ rangue” (Hechos 20:35). Ha koʼýte javyʼa jahechávo pe persóna omombaʼetereiha ñande rregálo.

¿Mbaʼépa ikatu jajapo jaikuaa hag̃ua mbaʼe rregálopa ombovyʼáta ñande rapichápe ha ñandéve avei ñameʼẽvo chupekuéra? Oiméramo ndaikatumoʼãi ñameʼẽ pe rregálo “iporãvéva”, ¿mbaʼépa jajapo vaʼerã jaikuaa hag̃ua mbaʼeichagua rregálopa omombaʼéta peteĩ persóna?