YMA ningo Israélpe peteĩ kariaʼy oñekompromete jave peteĩ kuñataĩndi, opaga vaʼerã pe nóvia famíliape peteĩ présio. Ikatu opaga upéva, por ehémplo omeʼẽvo chupekuéra pláta, algún animál térã álgo ivaliósova, ha sapyʼánte ikatu avei opaga upéva traváhope. Péicha oiko vaʼekue Jacob kásope, haʼe ombaʼapo vaʼekue Raquel túape g̃uarã ikatu hag̃uáicha omenda hese upéi (Gén. 29:17, 18, 20). ¿Mbaʼérepa ojepokuaa vaʼekue hikuái ojapo upéicha?

Peteĩ expérta hérava Carol Meyers heʼi: “Yma ningo oĩ vaʼekue umi família orekóva kokue, ha pe kuñataĩ ojepokuaámi vaʼekue avei ombaʼapo umichahárupi, péro koʼág̃a haʼe omendáta rupi ndaikatumoʼãvéima hembiapo upépe. Upévare pe nóvio opagámante vaʼerã hese omyengovia hag̃ua ihentekuérape la operdéva hína”. Upéva oipytyvõ vaʼekue avei ikatu hag̃uáicha umi mokõi família oñeuni ha péicha oñopytyvõta hikuái ojecha vai jave. Avei pe nóvio opagávo pe kuñataĩre ohechauka oñekomprometemaha hendive ha haʼehaitéma oñangarekotaha hese ha ndahaʼemoʼãvéima itúa.

Ojepaga jave pe nóviare, upéva ndeʼiséi ojejoguaha hína pe kuñataĩme haʼeramoguáicha peteĩ kósa ikatúva ojejogua o oñevende. Peteĩ lívro heʼi: “Umi israelita ningo yma si o si opaga vaʼerã kuri pe nóviare, ha upévare haʼetévaicha ojejoguáva hína pe kuñataĩme. Péro upéva ndaupéichai hína, en rrealida upéva ojejapo ikatu hag̃uáicha oñemyengovia pe famíliape la haʼekuéra operdéva hína” (Instituciones del Antiguo Testamento).

Koʼág̃arupi ningo unos kuánto paíspe ojesegi gueteri ko tradisión. Upévare umi tuakuéra odesidi jave mboýpa oñemeʼẽta la ifamíliare, ‘noñemohatãi vaʼerã la haʼekuéra heʼívapente’ (Filip. 4:5; 1 Cor. 10:32, 33). Upévare ndovaléi ojerureterei la nóviope, pórke osino upéva heʼiséta hína haʼekuéra iplatapotaha (2 Tim. 3:2). Avei oimérõ hepyetereíma opaga vaʼerã pe nóviare, pe mitãkariaʼy ohaʼarõ vaʼerã hetaiterei tiémpo omenda hag̃ua la kuñataĩre, ombyatypa peve la présio opaga vaʼerã hese. Ha avei la présio ndahaʼéirõ la ijyvatetereíva, oipytyvõta avei pe nóviope ani hag̃ua oheja por ehémplo iprekursorádo umía ombaʼaposevégui ikatu hag̃uáicha opagapa la inóviare.

Oĩ umi país orekóva voi umi léi ohechaukáva mbaʼéichapa ojepaga vaʼerã pe nóviare. Ha umi lugár rupi umi túa orrespeta vaʼerã koʼãichagua léi. ¿Mbaʼérepa? Pórke heʼiháicha la Biblia entéro kristiáno “ojapo vaʼerã umi autorida omandáva”, umíva noñemoĩrima guive Jehová heʼívare (Rom. 13:1; Hech. 5:29).