1, 2. ¿Mbaʼéichapa apóstol Pablo ohechauka oagradeseha Jehová mbaʼeporã ijojahaʼỹva?

APÓSTOL Pablo heʼi vaʼekue: “Ñandejára imbaʼeporãiterei rupi [...] ajapo heta mbaʼe porã” (elee 1 Corintios 15:9, 10). Pablo ningo oikuaa porã nomereseiha Ñandejára imbaʼeporã hendive, pórke heta opersegi vaʼekue umi kristiánope.

² Pablo omano mboyvemi, oskrivi vaʼekue Timotéope: “Aagradeseterei ñande Ruvicha Cristo Jesúspe, haʼe omeʼẽ chéve podér ha ojerovia rupi cherehe oheja che kárgope ajapo hag̃ua peteĩ tembiapo” (1 Tim. 1:12-14). ¿Mbaʼe tembiapópa raʼe upéva? Pablo heʼi vaʼekue umi ansiáno Efesoguápe: “Nacherakateʼỹi che rekovére, ikatúma guive adipara ko karréra ipahaite peve ha amohuʼã pe tembiapo ñande Ruvicha Jesús omeʼẽ vaʼekue chéve, aikuaauka hag̃ua hekoitépe umi marandu porã oñeʼẽva Ñandejára mbaʼeporã ijojahaʼỹvare” (Hech. 20:24).

3. ¿Mbaʼeichagua tembiapópa Jesús onkarga vaʼekue Páblope? (Ehecha pe taʼanga oĩva iñepyrũme.)

 ³ ¿Mbaʼépa hína “umi marandu porã” Pablo opredika vaʼekue? ¿Ha mbaʼérepa jaʼekuaa umi notísia porã ohechaukaha Jehová mbaʼeporã ijojahaʼỹva? Pablo heʼi vaʼekue umi kristiáno Efesoguápe: “Peẽ katuete pehendúne raʼe Ñandejára chemoĩ hague poipytyvõ hag̃ua, ikatu hag̃uáicha pehupyty Ñandejára mbaʼeporã ijojahaʼỹva” (Efes. 3:1, 2). Jesús onkarga vaʼekue Páblope omombeʼu hag̃ua pe marandu porã umi persóna ndahaʼéivape hudío. ¿Mbaʼeichagua mensáhepa oraha chupekuéra? Heʼi haʼekuéra ikatutaha ogoverna pe Mesías ndive (elee Efesios 3:5-8). Pablo opredika kyreʼỹ vaʼekue, ha péicha omoĩ ñandéve ehémplo porã. Umi mbaʼe haʼe ojapóva, ohechauka oagradeseha Ñandejárape imbaʼeporãiterei haguére hendive.

4, 5. ¿Mbaʼérepa ikatu jaʼe umi “marandu porã” ha “Ñandejára mbaʼeporã ijojahaʼỹva” haʼeha la mísma kósa?

⁴ Koʼã ára pahápe, Jehová onkarga ñandéve ñamombeʼu hag̃ua umi “marandu porã” oñeʼẽva Irréinore “oparupiete ko yvy ape ári” (Mat. 24:14). “Umi marandu porã oñeʼẽva Ñandejára Rréinore” ha “Ñandejára mbaʼeporã ijojahaʼỹva” ningo la mísma kósa. ¿Mbaʼérepa jaʼe upéva? Pórke entéro umi mbaʼe porã oguerútava Ñandejára Rréino, ojehupytýta Jehová imbaʼeporãiterei rupínte (Efes. 1:3). Pablo ohechauka vaʼekue oagradeseha Ñandejárape imbaʼeporãiterei haguére, upévare kyreʼỹme opredika vaʼekue. Ha ñande, ¿jasegípa avei Pablo ehémplo? (elee Romanos 1:14-16.)

⁵ Pe artíkulo ohasa vaʼekuépe, jahecha kuri ikatuha jahupyty heta vendisión Ñandejára imbaʼeporã rupi ñanendive, ñaneimperféktoramo jepe. Upévare ñamombeʼu vaʼerã ñande rapichakuérape Jehová ñanderayhuetereiha, ha avei ñamboʼe vaʼerã chupekuéra mbaʼépa ojapokuaa ikatu hag̃uáicha ohupyty heta mbaʼe porã. ¿Mbaʼéichapa ikatu ñaipytyvõ ñande rapichápe oagradese hag̃ua Ñandejárape imbaʼeporãiterei haguére?

6, 7. Ñañeʼẽ jave umi héntepe Jesús sakrifísiore, ¿mbaʼéichapa ikatu jaikuaauka chupekuéra Jehová mbaʼeporã ijojahaʼỹva?

⁶ Heta héntepe ningo nomolestái ikonsiénsia opeka haguére. Upévare nontendéi hikuái mbaʼérepa ñaikotevẽterei Jesús sakrifísiore. Ótro katu ojapóramo jepe ojaposéva, oñemeʼẽ enkuénta ndovyʼaiha. Péro heta hénte oñeʼẽ rire umi testígo de Jehovándi, ohechakuaa mbaʼépa hína pe pekádo, mbaʼéichapa operhudika chupekuéra ha mbaʼépa ojapo vaʼerã ojei hag̃ua ipoguýgui. Ha ipyʼaporãramo hikuái katu, oagradeseterei oaprende haguére Ñandejára ombou hague Itaʼýrape ñandepeʼa hag̃ua pekádo ha ñemano poguýgui. Avei oaprende hikuái Jehová ojapo hague upéva ñanderayhuetereígui ha imbaʼeporã haguére ñanendive, nañamereséiramo jepe (1 Juan 4:9, 10).

⁷ Jahechamína mbaʼépa heʼi vaʼekue Pablo Jesúsre: “Jesús opaga ñanderehe huguy rupive ha upéva omeʼẽ ñandéve liverta. Upéicha rupi ñane rembiapo vai ikatu oñeperdona, Ñandejára imbaʼeporãiterei haguére” (Efes. 1:7). Pe sakrifísio Jesús ojapo vaʼekue haʼe hína pe pruéva tuichavéva ohechaukáva Ñandejára ñanderayhuha. Avei pe sakrifísio rupive Jehová ohechauka ñandéve mbaʼeichaitépa imbaʼeporã ñanendive, nañamereséiramo jepe. Tuicha ningo ñanekonsola jaikuaávo ikatuha  oñeperdona ñande pekádo ha japyta konsiénsia potĩ reheve, jajeroviáramo Jesús sakrifísiore (Heb. 9:14). ¡Ajépa ñanembovyʼaite upéva! Katuete ningo ñamombeʼuse ñande rapichakuérape koʼã mbaʼe.

8. ¿Mbaʼérepa yvyporakuéra tekotevẽ oiko porã jey Ñandejárandi?

⁸ Umi hénte ndojeroviáiramo Jesús sakrifísiore, Ñandejára okonsidera chupekuéra iñenemígo. Upévare, ñande jareko pe rresponsavilida ñamombeʼúvo umi héntepe ikatuha oiko chuguikuéra Ñandejára amígo. Apóstol Juan oskrivi vaʼekue: “Ojeroviáva pe Taʼýrare ohupytýta jeikove opaveʼỹva, pe naiñeʼẽrendúiva pe Taʼýrape katu ndohupytymoʼãi jeikove opaveʼỹva, ha Ñandejára pochy rendy opytáta hiʼári” (Juan 3:36). Javyʼaiterei ningo jaikuaávo Jesús sakrifísio rupive ikatuha jaiko Jehová amígoramo. Pablo oexplika vaʼekue upéva heʼívo: “Añetehápe yma peẽ haʼe vaʼekue Ñandejára enemígo ha peime mombyry chugui, pepensa memégui tembiapo vaíre. Koʼág̃a Ñandejára penemoingo porã jey hendive Itaʼýra osakrifika rupi hekove” (Col. 1:21, 22).

9, 10. a) ¿Mbaʼe rresponsavilidápa Jesús omeʼẽ umi unhídope? b) ¿Mbaʼéichapa umi “ambue ovechakuéra” oipytyvõ umi unhídope?

⁹ Jesús onkarga umi unhídope ikatu hag̃uáicha oipytyvõ “ótrope oiko porã jey hag̃ua” Ñandejárandi. Pablo heʼi vaʼekue: “Opa mbaʼe ou Ñandejáragui, haʼe voi ñanepytyvõ jaiko porã jey hag̃ua hendive Cristo rupive, ha ñanemondo ñaipytyvõ hag̃ua ótrope oiko porã jey hag̃ua hendive. Péva heʼise Ñandejára ojevaleha Crístore omoĩ porã jey hag̃ua hendive ko múndo, ha oheja rei hag̃ua chupekuéra hembiapo vaikue. Haʼe ñanemondo ñamombeʼu hag̃ua umi héntepe ikatuha oñemoĩ porã jey Ñandejára ndive. Ñande hína upéicharõ Ñandejára rembijokuái, ha jajapo upéva Cristo vése. Ñandejára ojevale ñanderehe, Cristo vése jajerure asy hag̃ua umi héntepe: ‘Peiko porã jeýna Ñandejára ndive’” (2 Cor. 5:18-20).

¹⁰ Umi “ambue ovechakuéra” ningo oreko tuicha priviléhio ikatu haguére oapoja umi unhídope ojapo hag̃ua pe tembiapo iñimportantetéva (Juan 10:16). Umi “ambue ovechakuéra” opredika umi unhídondi. Haʼekuéra hetaiteve rupi, tuicha oipytyvõ omboʼe hag̃ua umi héntepe la Biblia, ikatu hag̃uáicha oñemoag̃ui hikuái Ñandejárare. Koʼã mbaʼe ningo haʼe avei “umi marandu porã oñeʼẽva Ñandejára mbaʼeporã ijojahaʼỹvare”.

11, 12. ¿Mbaʼérepa umi hénte ovyʼaiterei oikuaávo ikatuha oñemboʼe Jehovápe?

¹¹ Heta persóna oñemboʼe oñeñandu porãve hag̃uánte, péro añetehápe ndoroviái hikuái Ñandejára ohenduha umi orasión. Upévare, haʼekuéra tekotevẽ oikuaa Jehová ñanerenduha ñañemboʼe jave chupe. Peteĩ purahéipe David heʼi vaʼekue Jehovápe: “Ñandejára, nde ningo rehendu umi hénte ñemboʼe, ne rendápe oúta opaichagua persóna. Añeñandu vaieterei ningo pórke ajapo ivaíva, péro nde Ñandejára reperdona ore pekádo” (Sal. 65:2, 3, TNM).

¹² Jesús heʼi vaʼekue idisipulokuérape: “Pejeruréramo oimeraẽ mbaʼe che rérape, ajapóta” (Juan 14:14). ¿Mbaʼépa ontendekase raʼe heʼírõ guare upéva? Ñande ikatuha jajerure Jehovápe oimeraẽ mbaʼe haʼe oguerohorýtava. Juan heʼi vaʼekue: “Jajeroviakuaa ko mbaʼére: oimeraẽ mbaʼe jajeruréva Ñandejárape, oĩ porãramo hembipotándi,  haʼe ñanerendúta” (1 Juan 5:14). Ajépa javyʼaite ikatu haguére ñaipytyvõ umi héntepe ontende hag̃ua mbaʼeichaitépa ideprovécho pe orasión. Upéva ndahaʼéi hína peteĩ mbaʼe jajapóva ñañeñandu porã hag̃uánte, síno ikatu hag̃uáicha “ñañemoag̃ui Ñandejára trónore, haʼe imbaʼeporãiterei rupi” (Heb. 4:16). Ñande ningo ñaipytyvõ vaʼerã umi héntepe oikuaa hag̃ua mbaʼéichapa oñemboʼe vaʼerã, mávapepa ojedirihi vaʼerã, ha mbaʼépa ikatu ojerure iñorasiónpe. Péicha oikóta avei chuguikuéra Jehová amígo, ha haʼe okonsoláta chupekuéra ohasa asy jave (Sal. 4:1; 145:18).

13, 14. a) ¿Mbaʼe priviléhiopa orresivíta umi unhído? b) ¿Mbaʼépa ojapóta umi unhído yvyporakuéra rehehápe?

¹³ Ko múndo aña oñehundi rire, Jehová osegíta imbaʼeporã enterovévandi. Por ehémplo, omeʼẽta tuicha priviléhio umi 144.000 ogovernátavape Crístondi yvágape. ¿Mbaʼépa hína upe priviléhio? Pablo oexplika vaʼekue upéva heʼívo: “Ñandejára ñandeporiahuverekoiterei ha ñanderayhueterei rupi ñanemoingove Cristo ndive, jepe ñande ñamanóma ñane rembiapo vaikue káusare (haʼe imbaʼeporãiterei rupi peẽ pejesalva). Avei Ñandejára ñanemopuʼã ha ñanemboguapy yvágape, ñande haʼégui Cristo Jesús disípulo. Ñandejára ojapo upéva ikatu hag̃uáicha ohechauka imbaʼeporãitereiha pe múndo pyahu oútavape. Upearã ojapóta hetaiterei mbaʼe porã ñanderehehápe, ñande haʼégui Cristo Jesús disípulo” (Efes. 2:4-7).

¹⁴ Ndaikatumoʼãi voi ningo ñañeimahinamba umi mbaʼe porãita Jehová omeʼẽtava umi unhídope ogoverna vove Crístondi yvágape (Luc. 22:28-30; Filip. 3:20, 21; 1 Juan 3:2). Jehová “ojapóta hetaiterei mbaʼe porã” umi unhído rehehápe. Chuguikuéra oikóta “Jerusalén Pyahu” ha Cristo “nóvia” (Apoc. 3:12; 17:14; 21:2, 9, 10). Haʼekuéra ombaʼapóta Jesús ndive ikatu hag̃uáicha “omonguera umi tetãnguérape”. Upéva heʼise umi unhído oipytyvõtaha yvyporakuérape ojei hag̃ua pekádo ha ñemano poguýgui, ha ohupyty hag̃ua perfeksión (elee Apocalipsis 22:1, 2, 17).

15, 16. ¿Mbaʼéichapa Jehová ohechaukáta amo gotyove imbaʼeporã ijojahaʼỹva umi ambue ovechakuérape?

¹⁵ Efesios 2:7-pe heʼi Ñandejára ohechaukataha imbaʼeporãitereiha “pe múndo pyahu oútavape”. Upérõ, entéro umi oikóva ko yvy ápe ári ohupytýta “hetaiterei mbaʼe porã” (Luc. 18:29, 30). Jehová ohechaukáta imbaʼeporãitereiha, por ehémplo pe rresurreksión rupive (Job 14:13-15; Juan 5:28, 29). ¿Mávapa umi orresusitátava? Umíva apytépe oĩta umi Ñandejára siérvo omano vaʼekue Cristo omano mboyve. Avei oĩta umi “ambue ovechakuéra” omanóva koʼã ára pahápe. Enterovéva oikove jeýta ha osegíta oservi Jehovápe.

¹⁶ Péro Jehová avei omoingove jeýta heta persóna omano vaʼekuépe oikuaaʼỹre chupe. Juan oskrivi kuri: “Ahecha umi omanóvape, tuicháva ha michĩva, oñemboʼyha pe tróno renondépe ha ojavri umi lívro. Péro ojavri ótro lívro, péva hína pe lívro jeikove rehegua. Ha ojeporu umi mbaʼe ojehaíva umi lívrope ojehusga hag̃ua umi omanóvape hembiapokuére. Pe mar omeʼẽ umi omanóva oĩva ipype, ha pe ñemano ha pe Sepultúra omeʼẽ umi omanóva oĩva ipypekuéra ha káda únope ojehusga hembiapokuére” (Apoc. 20:12, 13). Umi oikove jeýva orekóta oportunida oikuaávo Jehovápe ha oaseptávo chupe Igovernánteramo. Haʼekuéra okumpli vaʼerã la Biblia heʼíva ha umi instruksión jarresivítava “umi lívro”  pyahúpe. Koʼã instruksión pyahu rupive, Jehová ohechaukáta avei imbaʼeporã ijojahaʼỹva.

17. ¿Mbaʼérehepa ñanemanduʼa vaʼerã japredika jave umi héntepe?

¹⁷ Pe fin ningo hiʼag̃uimbaitéma. Upévare, koʼytevéntema koʼág̃a japredika vaʼerã “pe marandu porã” oñeʼẽva Ñandejára Rréinore (Mar. 13:10). Ñanemanduʼákena siémpre ñambotuicha vaʼerãha Jehovápe japredika jave. ¿Mbaʼéichapa ikatu jajapo upéva? Ñamombeʼúvo ñande rapichakuérape Ñandejára imbaʼeporã rupínte jahupytytaha heta mbaʼe porã pe Paraísope.

18, 19. ¿Mbaʼéichapa ñambotuicha Ñandejára mbaʼeporã ijojahaʼỹva?

¹⁸ Japredika jave, ikatu jaexplika umi héntepe mbaʼépa oikóta Cristo ogoverna vove ko yvy ape ári. Upe tiémpope, yvyporakuéra ohupytypaitéta umi mbaʼe porã oguerúva Cristo sakrifísio, ha mbeguekatúpe iperféktota hikuái. La Biblia heʼi hesekuéra “hembiapokue ojeitaha ñehundi poguýgui ha ohupytýta Ñandejára raʼykuéra liverta ijojahaʼỹva” (Rom. 8:21). Koʼã mbaʼe ojehupytýta Jehová imbaʼeporã rupínte.

¹⁹ ¡Ajépa tuichaite mbaʼe ikatu haguére ñamombeʼu umi héntepe pe promésa porãite oĩva Apocalipsis 21:4, 5-pe! Upépe heʼi mbaʼépa koʼẽrõite Jehová ojapóta yvyporakuéra rehehápe: “Haʼe omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma”. Ha Pe oguapýva pe trónope heʼi: “¡Péina! Ambopyahu hína opa mbaʼe”. Heʼi avei: “Ehaíkena koʼã mbaʼe. Koʼã ñeʼẽ ningo añetegua ha ikatu pejerovia hese”. Upéicharõ, japredikákena kyreʼỹme koʼã marandu porã, ha péicha ñambotuicha Ñandejára mbaʼeporã ijojahaʼỹva.