1. ¿Mbaʼépa enterovévante jaipota?

¿MBAʼÉICHAPA reñeñandúta peteĩ persóna reikuaáva ha rerrespetáva hesaráiramo nde réragui? Ivaiveha katu, ¿mbaʼéicha reñeñandúta ni naimanduʼáirõ nderehe? Katuete ningo nandegustamoʼãi upéva, pórke enterovéva jaipota ótro ñandeguerohory. Péro ñande ndajaipotái ñande rapichakuéra imanduʼa ñande rérarente, síno jaipota oikuaa hikuái mbaʼeichagua persónapa ñande ha umi mbaʼe jajapómava (Núm. 11:16; Job 31:6).

2, 3. ¿Mbaʼépa ikatu oiko jaipotaitereíramo ótro ñandeguerohory? (Ehecha pe taʼanga oĩva iñepyrũme).

² Péro naiporãi hína jaipotaiterei umi ótro ñandeguerohory, upévare ñañatende vaʼerã. Satanás múndo ikatu ñanemomýi ñanefamóso ha ñaneimportantese hag̃ua. Oikóramo upéva ndajaadoramoʼãi Jehovápe haʼe omereseháicha (Apoc. 4:11).

³ Upéva oiko vaʼekue Jesús tiémpope unos kuánto líder rrelihiósore. Haʼe heʼi porã vaʼekue idisipulokuérape: “Peñeñangarekóke umi mboʼehára leipeguágui. Haʼekuéra oikose  okorre opárupi ao puku reheve, oipota ojesaluda chupekuéra umi plasahárupi, oguapyse tenondetépe umi sinagógape ha umi karu guasuhárupi oguapyse umi lugár iñimportantevévape”. Upéi heʼi avei: “Koʼãvape ojekastiga vaivéta hína” (Luc. 20:46, 47). Péro Jesús oñeʼẽ porã peteĩ viúda mboriahumíre. Pe kuñakarai ningo okontrivui mokõi monéda saʼieterei ovaléva, ha posívlemente umi hénte ni nomombaʼéi la ojapóva (Luc. 21:1-4). Umi mbaʼe Jesús ohecháva ha oguerohorýva umi persónare, idiferénte vaʼekue umi ótro ohechávagui. Ko artíkulo ñanepytyvõta ñantende porã hag̃ua mbaʼéichapa opensa Jehová, ha mbaʼéichapa ñande avei ikatu ñapensa haʼéicha.

4. ¿Mávapa iñimportanteve ñandeguerohory, ha mbaʼérepa?

⁴ ¿Mbaʼérepa reipota umi ótro ndeguerohory? ¿Reipotápa umi hénte nemombaʼe nde estúdio porã haguére, nde traváho porã rupi térã nefamóso haguére? Pablo oñeʼẽ vaʼekue peteĩ mbaʼe iporãvévare ikatúva jahupyty. Haʼe heʼi: “Koʼág̃a peikuaa Ñandejárape térã, jaʼe porãsérõ g̃uarã, haʼe pendekuaáma. ¿Mbaʼéicha piko upéicharõ pejevyse jey umi vyrorei ko mundopeguápe ndovaléiva mbaʼeverã, ha peservise umívape tembiguáiramo?” (Gál. 4:9). Ñandejára ñandekuaáramo jahupyty hína pe mbaʼe iñimportantevéva, pórke pe Mburuvicha tuichavéva oĩva ko univérsope la ñandeguerohorýva. Jehová ningo ñandekuaa, ñanderayhu ha oipota jaiko iñamígoramo. Haʼe ñandeapo vaʼekue ñañemoag̃ui hag̃ua hese (Ecl. 12:13, 14).

5. ¿Mbaʼépa jajapo vaʼerã Jehová ñandereko hag̃ua iñamígoramo?

⁵ Jaikuaaháicha, Moisés haʼe vaʼekue Jehová amígo. Upévare, ojerure asýrõ guare oikuaauka hag̃ua chupe hape, Jehová heʼi Moiséspe: “Ajapóta avei ko mbaʼe rejeruréva chéve, pórke roguerohory ha roikuaa porãiterei” (Éx. 33:12-17). Jehová ikatu avei ñandekuaa káda únope. ¿Péro mbaʼépa jajapo vaʼerã oiko hag̃ua ñandehegui iñamígo? Jahayhu ha jaservi vaʼerã chupe ñande pyʼaite guive (elee 1 Corintios 8:3).

6, 7. ¿Mbaʼéichapa ikatu japerde ñane amista Jehovándi?

⁶ Ñande ningo ñanerakateʼỹ vaʼerã pe amista jarekóvare ñande Ru yvagapeguándi. Umi kristiáno Galaciagua ojapo haguéicha, jajehekýi vaʼerã avei “umi vyrorei” oĩvagui ko múndope “ndovaléiva mbaʼeverã”. Péva heʼise ndajahekái vaʼerãha ko múndo ñanemombaʼe (Gál. 4:9). Umi ermáno Galaciagua oikuaáma vaʼekue Ñandejárape ha haʼe oikuaa avei chupekuéra. Péro Pablo heʼi hesekuéra ojevy jeyha umi vyroreípe. Haʼete heʼíva umi kristiánope: “¿Mbaʼére piko la peho porã kuri hese ha peju jey pejapo vyrorei?”.

⁷ ¿Ikatúpa oiko avei ñanderehe upéva? Si ikatu. Pablo ojapo haguéicha, jaikuaa mboyve pe añetegua ikatu oime jaheja raʼe peteĩ mbaʼe ko múndope oñemombaʼetereíva (elee Filipenses 3:7, 8). Por ehémplo, ikatu oime jareko kuri oportunida jastudia hag̃ua universidápe, ñande puésto porãve hag̃ua ñande traváhope térã ñagana porãve hag̃ua. Oiméramo ñandekatupyry algún depórtepe térã músikape, ikatu voi ñanderríko ha ñanefamóso kuri. Péro ñande ñamboykepaite koʼã mbaʼe (Heb. 11:24-27). ¿Mbaʼépa ñapensa la jadesidi vaʼekuére? ¿Ñambyasýpa ha ñaimoʼã jaheja rei hague ohasa peteĩ oportunida? Péicha jajapóramo ningo tuichaiterei jajavy hína, ha la ivaiveha, ikatu voi ñañepyrũ jaheka “umi vyrorei”  ñamboykéma vaʼekue ha “ndovaléiva mbaʼeverã”. *

8. ¿Mbaʼépa ñanepytyvõta Ñandejára ñandeguerohory hag̃ua?

⁸ Ñande ningo jaipota Ñandejára ñandeguerohory, ndahaʼéi jahekáva ko múndo ñandeguerohory. ¿Mbaʼépa ñanepytyvõta upearã? Ñanemanduʼa vaʼerã mokõi mbaʼére. Primero, Jehová siémpre ohechaukaha omombaʼeha umi ifiélvape chupe (elee Hebreos 6:10; 11:6). Haʼe ovaloraiterei isiervokuéra iñeʼẽrendúvape, upévare haʼetéta chupe iñinhústova ndorekóiramo chupekuéra enkuénta. Jehová oikuaa ha oguerohory “umi imbaʼévape” (2 Tim. 2:19). Haʼe “oikuaa mbaʼéichapa oiko umi ihústova” ha mbaʼéichapa osalváta chupekuéra (Sal. 1:6; 2 Ped. 2:9).

9. ¿Mbaʼéicha javépa Jehová ohechauka vaʼekue oguerohoryha ipuévlope?

⁹ Sapyʼánte ñanesorprende mbaʼéichapa Jehová ohechauka omombaʼeha ipuévlope (2 Crón. 20:20, 29). Por ehémplo, haʼe osalva kuri umi israelítape mar Rójope, faraón ha ijehérsito ipoderosoitéva opersegírõ guare chupekuéra (Éx. 14:21-30; Sal. 106:9-11). Tuichaiterei mbaʼe ningo la oiko vaʼekue upérõ, péicha rupi umi hénte umirupigua osegi oñeʼẽ hese 40 áño rire jepe (Jos. 2:9-11). Koʼág̃a avei saʼietereíma ofalta Gog de Magog oataka hag̃ua Ñandejára siervokuérape. Upévare ñanemombarete ñanemanduʼávo mbaʼéichapa Jehová ohechauka vaʼekue ipodér ha ohayhuha ipuévlope ymaite guive (Ezeq. 38:8-12). Og̃uahẽ vove upe tiémpo, javyʼaitereíta pórke jahechakuaáta nañañehaʼãreíri hague Ñandejára ñandeguerohory hag̃ua.

10. ¿Mbaʼérehepa ñanemanduʼa vaʼerã avei?

¹⁰ Segundo, ñanemanduʼa vaʼerã avei Jehová ohechaukaha omombaʼeha isiervokuérape ñaimoʼãʼỹháicha. Péro haʼe ndoguerohorymoʼãi umi ojapóvape mbaʼe porã oipotáguinte ótro oguerohory chupe. ¿Mbaʼérepa? Pórke Jesús heʼi haguéicha, upévante la orresivítava umichagua (elee Mateo 6:1-5). Heta vése ndojerahái enkuénta ni ndojehechái umi mbaʼe porã jajapóva ótro rehehápe. Péro Jehová ohechapaite ha ñanerrekompensáta, sapyʼánte ñahaʼarõʼỹháicha voi. Jahechamína umi ehémplo ohechaukáva upéva.

11. ¿Mbaʼéichapa Jehová ohechauka oguerohoryha Maríape?

¹¹ Jehová ningo oiporavo vaʼekue peteĩ mitãkuña vírhen imboriahúvape hérava María. Haʼe ojevale hese onase hag̃ua Itaʼýra. María oiko vaʼekue peteĩ puevloʼi héravape Nazaret. Pe lugár opyta mombyry Jerusaléngui, oĩhápe pe témplo iporãitéva (elee Lucas 1:26-33). ¿Mbaʼérepa Jehová oiporavo vaʼekue Maríape? Ánhel Gabriel heʼi kuri Maríape Ñandejára oguerohoryha chupe. Ko mitãkuña haʼe vaʼekue peteĩ persóna ijespirituálva, ha jaʼekuaa upeichaha umi mbaʼe oñemongetávare ipariénte Elisabet ndive (Luc. 1:46-55). Jehová oikuaa vaʼekue Maríape ha ohechakuaa ojeroviaha hese, upévare haʼe ovendesi chupe oñehaʼarõʼỹháicha.

12, 13. ¿Mbaʼéichapa Jehová ohechauka oguerohoryha Jesúspe onase riremi ha ojeguerahárõ guare chupe témplope?

¹² Jesús onasérõ guare, Jehová  ohechauka oguerohoryha Itaʼýrape. ¿Mávapepa omombeʼu Jesús onase hague? Haʼe ndeʼíri umi ofisiál iñimportántevape ni umi ogovernávape Jerusalén térã Belén. Upéva rangue, omondo umi ánhelpe omeʼẽ hag̃ua pe notísia unos kuánto pastór mboriahumíme oñangarekóva hína ijovechakuérare Belén okárare (Luc. 2:8-14). Upémarõ umi pastór oho ovisita pe mitã onase ramóvape (Luc. 2:15-17). Katuete ningo María ha José ohecharamoiterei kuri peichaite peve ojeguerohory haguére pe mitãme. Jahechaháicha, Jehová oporoguerohory lája idiferénte Satanás ojapo lájagui. Ñanemanduʼa Satanás omondórõ guare umi astrólogope ovisita hag̃ua Jesús ha ihentekuérape, enterovéva Jerusalénpe oikuaa la oiko vaʼekue ha upéva ogueru heta provléma (Mat. 2:3). Por ehémplo, ojejuka kuri heta mitã inoséntepe (Mat. 2:16).

¹³ Pe Léi Jehová omeʼẽ vaʼekue Israélpe heʼi peteĩ sy omeʼẽ vaʼerãha Jehovápe peteĩ ofrénda 40 día imemby rire. Upévare María, José ha pe mitã oviaha Beléngui Jerusalén témplo peve, opytáva amo 9 kilometrohápe (Luc. 2:22-24). Oviaha aja hikuái, oiméne María oñeporandu raʼe ojapótapa álgo espesiál pe saserdóte oĩva pe témplope ombotuicha hag̃ua Jesúspe. Añetehápe upérõ ojeguerohory kuri pe mitãme, péro amalisia ndahaʼéi María ohaʼarõ haguéicha. Jehová ojevale Simeónre, peteĩ kuimbaʼe “hekojoja ha [okyhyjéva] Ñandejáragui”. Avei ojevale peteĩ profetísa héravare Ana, haʼéva viúda ha orekóva 84 áño. Haʼekuéra oprofetisa pe mitã haʼetaha pe Cristo térã Mesías oñepromete vaʼekue (Luc. 2:25-38).

14. ¿Mbaʼéichapa Jehová orrekompensa Maríape?

¹⁴ ¿Mbaʼépa oiko upe rire Maríagui? Jehová osegi oguerohory chupe oñangareko haguére Jesúsre ha omongakuaa porã rupi chupe. Por ehémplo, omoĩka la Bíbliape unas kuánta kósa María heʼi ha ojapo vaʼekue. Amalisia María ndoviahái kuri Jesúsndi umi 3 áño imédio haʼe opredikárõ guare. ¿Mbaʼérepa? Ikatu oime haʼe rupi viúda ha tekotevẽ kuri opyta Nazarétpe. Upéicharire, María ndohasái kuri heta mbaʼe porã Jesús ndive, péro oĩ ijykére omanórõ guare (Juan 19:26). Avei María oĩ kuri Jerusalénpe Jesús disipulokuérandi oñemeʼẽ mboyve chupekuéra espíritu sánto Pentekostéspe (Hech. 1:13, 14). Oiméramo upéicha, haʼe orresivi avei espíritu sánto umi ótro disípuloicha. Upéva heʼise oñemeʼẽ hague avei chupe oportunida oĩ hag̃ua yvágape Jesúsndi opa árare. ¡Ajépa tuichaite oñepremia Maríape ifiél haguére!

15. ¿Mbaʼéichapa Jehová oikuaauka oguerohoryha Jesúspe oĩrõ guare ko yvy ape ári?

¹⁵ Jesús ndoipotái kuri oguerohory chupe umi líder rrelihióso ni umi líder polítiko. Haʼe oipota Jehová ovyʼa heseve. Upévare katuete ikyreʼỹetereíne raʼe opytávo Jehová voi oñeʼẽrõ guare 3 vése yvága guive ohechauka hag̃ua ohayhuha chupe. Ojevautisa riremi rrío Jordánpe, Jehová heʼi: “Kóva hína che Raʼy ahayhuetéva ha aguerohorýva” (Mat. 3:17). Amalisia Jesús ha Juan el Bautista añónte la ohendúva upéva. Un áñorupi Jesús omano mboyve, mbohapy ijapóstol ohendu avei Jehovápe heʼírõ guare: “Kóva hína che Raʼy ahayhuetéva ha aguerohorýva, pehendúke chupe” (Mat. 17:5). Upéi, unos kuánto día Jesús omano mboyve, Jehová oñeʼẽ jey Itaʼýrape yvága guive (Juan 12:28).

16, 17. ¿Mbaʼéichapa Jehová orrekompensa Jesúspe oñeimoʼãʼỹháicha?

 ¹⁶ Jesús ningo oikuaa kuri ojeʼetaha hese otakyha Ñandejárare, ha ojejukataha chupe haʼerõguáicha peteĩ mbaʼe vai apoha. Upéicharõ jepe ojerure Itúape oiko hag̃ua hembipota, oiko rangue umi mbaʼe haʼe oipotáva (Mat. 26:39, 42). Jesús “oaguanta pe jehasa asy oñemosaingóvo chupe pe yvyra pohýire, [ha] notĩri upe haguére”. Chupe g̃uarã iñimportanteve Itúa oguerohory la ojapóva, ko múndo omombaʼe rangue chupe (Heb. 12:2). ¿Mbaʼéichapa Jehová omombaʼe Itaʼýrape?

¹⁷ Jesús oĩrõ guare ko yvy ape ári oñemboʼe kuri Itúape ha ojerure omeʼẽ jey hag̃ua chupe la oreko vaʼekue ymave yvágape (Juan 17:5). La Biblia ndeʼíri Jesús ohaʼarõ hague peteĩ mbaʼe tuichavéva upévagui. Haʼe nohaʼarõi oñepremia chupe ojapo haguére Jehová rembipota ko yvy ape ári. ¿Péro mbaʼépa ojapo Jehová? Haʼe orrekompensa Jesúspe oñeimoʼãʼỹháicha. Jehová orresusita rire chupe omeʼẽ Itaʼýrape “peteĩ puésto ijyvatevéva” yvágape. Avei omeʼẽ chupe pe jeikove ikatuʼỹva oñehundi, ha upéva avave neʼĩra kuri orresivi (Filip. 2:9; 1 Tim. 6:16). * Añetehápe Jehová orrekompensa Jesúspe oñeimoʼãʼỹháicha ifiél haguére chupe.

18. ¿Mbaʼépa ñanepytyvõta ani hag̃ua jaipotaiterei ko múndo ñandeguerohory?

¹⁸ Ñande jaipota vaʼerã Jehová ñandeguerohory, ndahaʼéi ko múndo. ¿Mbaʼépa ñanepytyvõta upearã? Ani ñanderesarái Jehová siémpre orrekompensaha isiervokuéra ifiélvape, ha heta vése ojapoha upéva oñehaʼarõʼỹháicha. Añetehápe ndaikatúi ni ñañeimahina mbaʼeichaitépa Jehová ñanevendesíta koʼẽrõite. Péro upe aja jasegi vaʼerã ñaaguanta umi situasión ijetuʼúva, ha ani ñanderesarái ko múndo aña ohasaha ohóvo. Upévare, amo ipahápe ndovalemoʼãi mbaʼeverã ko múndo ñanembotuicháramo peteĩ mbaʼe jajapóvare (1 Juan 2:17). Péro ñande Ru ñanderayhuetéva ningo “hekojoja”, ha núnka ndahesaraimoʼãi umi mbaʼe jajapóva hesehápe ha mbaʼéichapa jahayhu héra (Heb. 6:10). Jehová ohechaukáta ñandeguerohoryha, ha ikatu voi ojapo upéva avave oimoʼãʼỹháicha.