Jahayhuvékena koʼẽ koʼẽre ermanokuérape

“Peiko joayhupápe Cristo ñanderayhu haguéicha.” (EFE. 5:​2, BNP.)

1. Mbaʼe mbaʼérepa ojekuaavaʼerã Jesús remimboʼekuérape?

 TESTIGOS de Jehovápe ningo ojekuaa opárupi opredikágui ogaha rupi. Jesús heʼivaʼekue avei hemimboʼekuérape ojekuaataha ambue mbaʼére. Haʼe heʼi: “Ko tembiapoukapy ipyahúva aheja peẽme: Pejoayhúkena. Ha che pohayhu haguéicha pejoayhu avei peẽ. Peẽ pejoayhúramo, opavave ohechakuaáta peẽ haʼeha che remimboʼe” (Juan 13:​34, 35).

2, 3. Mbaʼépa ojapose avei la hénte ohechávo Jehová siervokuéra ojoayhuha?

² Jehová siervokuéraicha ojoayhúva ningo ndaipóri ko múndope. Pe mborayhu omoag̃ui chupekuéra ojuehe ha la hénte ohechávo upéva oservise avei Jehovápe. Upéva jahechakuaa Marcelino rehe oikovaʼekuére. Haʼe ningo Camerungua ha itravahohápe oñaksidenta ha opyta hesatũ. Upe riremínte oñepyrũma ojeʼe hese opyta hague upéicha espiritísta rupi. Ha okonsolarangue chupe pe pástor ijiglesiapegua ha umi hénte ohóva upépe, omosẽ chupe hikuái upégui. Upéi peteĩ testígo de Jehová oinvita chupe oho hag̃ua rreunionhápe. Péro Marcelino ndohoséi okyhyjégui oñemosẽrõ g̃uarã chupe upeguihaite.

³ Amo ipahápe Marcelino oho Salón del Rréinope ha omombaʼeterei umi ermáno hory ha imbaʼeporã haguére hendive. Ha umi mbaʼe ohenduvaʼekue upépe tuicha ombopyʼaguapy chupe. Upe guive ndofaltáiva rreunionhápe, ojapo Jehová heʼíva ha 2006-pe ojevautisa. Koʼág̃a omombeʼu pe marandu porã ihentekuéra ha ivesinokuérape, ha hetápe omboʼehína la Biblia. Marcelino ningo ohechakuaa ermanokuéra ohayhuha chupe, ha oipota umi ostudiáva hendive oñeñandu avei upéicha.

4. Mbaʼérepa jaikovaʼerã joayhupápe apóstol Pablo heʼi haguéicha?

⁴ Jehová siervokuéra ojoayhúramo jepe, oñatendevaʼerã ani hag̃ua ndojoayhuvéi. Pe mborayhu ikatu ñambojoja peteĩ tatáre. Roʼyeterei jave ningo la hénte oñembojase pe tataypýpe ojepeʼe hag̃ua. Péro pe tata ikatu hína ogue noñemoĩvéiramo pype jepeʼa. Upéicha avei pe mborayhu jarekóva ojuehe, káda uno ñañehaʼãvaʼerã jajapo tekotevẽva ani hag̃ua opa. Mbaʼépa tekotevẽ jajapo upéicharõ? Apóstol Pablo heʼi: ‘Peiko joayhupápe Cristo ñanderayhu haguéicha. Cristo omeʼẽvaʼekue hekove ñanderehehápe peteĩ ovecharaʼy kuaveʼẽmby hyakuã asyetévaicha Ñandejárape g̃uarã’ (Efe. 5:​2, BNP). Mbaʼéichapa ikatu akóinte jaiko joayhupápe? Koʼã párrafo oúvape jahechamíta upéva.

Peñehaʼãkena pehayhu hetavépe

5, 6. Mbaʼérepa apóstol Pablo heʼi umi Corintoyguápe ohayhu hag̃ua hetavépe?

⁵ Apóstol Pablo ningo ohaivaʼekue umi Corintoyguápe: ‘Che pehenguekuéra Corintoygua, haʼe niko peẽme: ore pyʼapýpe oĩma pene rendag̃ua. Ha peẽ katu ndapeporohayhupái. Añeʼẽ niko peẽme che raʼýpe añeʼẽramoguáicha, peẽ avei peñehaʼãkena pehayhu hetavépe’ (2 Cor. 6:​11-13). Mbaʼérepa apóstol Pablo heʼi chupekuéra péicha?

⁶ Ñanemanduʼavaʼerã mbaʼéichapa oñepyrũvaʼekue pe kongregasión Coríntope. Apóstol Pablo ningo áño 50 opakuetévo ohovaʼekue Coríntope ha iñepyrũrã ombohováiramo  jepe heta mbaʼe ijetuʼúva, haʼe ndohejareíri chupekuéra. Sapyʼaitérõ g̃uarã hetaitereíma oĩ ogueroviáva pe marandu porã. Apóstol Pablo ningo un áño seis mése oikovaʼekue Coríntope ha oñehaʼãmbaite omboʼe ha omombarete upe kongregasión pyahúpe. Upévare haʼe ohayhueterei umi kristiáno Corintoyguápe (Hech. 18:​5, 6, 9-11). Upéicha rupi haʼekuéra ohayhuvaʼerã avei apóstol Páblope. Péro oĩvaʼekue ipyʼaróva Pablo heʼi haguére chupekuéra derechoite ojapovaʼerã ha upéva ndogustái chupekuéra (1 Cor. 5:​1-5; 6:​1-10). Ha oĩvaʼekue avei ipyʼaróva hese oguerovia rupi ‘umi apóstol oñemombaʼeguasuetereívape’ (2 Cor. 11:​5, 6). Upéicharõ jepe apóstol Pablo oipotavaʼekue ohayhu chupe umi kristianokuéra. Upévare ojerure chupekuéra ohayhu hag̃ua hetavépe ha oñemoag̃uive hag̃ua hese ha ambue kristianokuérare.

7. Mbaʼépa ikatu jajapo jajeheʼa ha jahayhu hag̃ua hetave ermánope?

⁷ Ha ñande, mbaʼépa ikatu jajapo? Mbaʼéichapa ikatu jahayhu hetave ermánope? Jajepokuaave voínte ningo umi ñande avegua ha ñane retãygua rehe. Ha javyʼave voi umi ñandejoguávandi heta mbaʼépe. Péro heta vése upévare ndajajeheʼavéima ambue ñande rapicháre. Ha ani hag̃ua oiko upéva tekotevẽ ñañehaʼã jajeheʼa hetave ñande rapicháre. Iporã ñañeporandumi: “Chépa apredika umi che angirũndi añónte? Hasýpa chéve ainvita hag̃ua ambue ermánope ndahaʼéiva che angirũ? Chépa nañemoag̃uíri voi umi oúramovare rreunionhápe, ha haʼe amo gotyovémante ikatuha oiko chuguikuéra che amígo? Asaludápa enterovépe kongregasiónpe, tahaʼe imitãva térã ijedávape?”.

8, 9. Mbaʼéichapa Romanos 15:7 ñanepytyvõta jahayhu ha ñamombaʼe hag̃ua ñane ermanokuérape?

⁸ Apóstol Pablo ohaivaʼekue umi kristiáno Romayguápe ñanepytyvõta jahayhu ha ñamombaʼe hag̃ua ñane ermanokuérape (jaleemína Romanos 15:7). Pe ñeʼẽ “pejoguerohory” heʼise “ñanderory ha ñanembaʼeporãvaʼerãha ñande rapicha ndive, ha jareko chupe ñane amígoramo”. Yma ningo peteĩ tapicha oporoinvitáramo heʼivaʼerã pe hapichápe ovyaitereiha oho haguére hógape. Ha upéicha avei Jesucristo ovyʼa ñandereheve ñaime haguére kongregasiónpe, ha ñanemokyreʼỹ javyʼa hag̃ua avei ñane ermanokuéra reheve.

⁹ Ñañehaʼãvaʼerã ñañemongeta umi ermáno aréma ndajahechavéiva ndive. Ñamomaitei jave chupekuéra Salón del Rréinope térã ambue hendápe, ikatu ñañemongeta hendivekuéra sapyʼami jepe. Ha upéi ótro rreuniónpe jajapóramo upéicha, hetave ermánondima ñañemongetáta. Péro aníkena jajepyʼapy ndaikatúiramo jasaluda enterove ermánope peteĩ rreuniónpe. Avave ningo ndaipochyichéne ñanendive upévare.

10. Mbaʼe oportunidápa opavave jareko Jehová kongregasiónpe ha mbaʼépa jajapovaʼerã?

¹⁰ Japorosaludárõmante ikatúta ñañemongeta kyreʼỹ ha ñakonsegi ñane amigoiterã.  Pór ehémplo, peteĩ aty guasuhápe ñañembojáramo ñañemongeta ermanokuéra ndive, ikatúta ñakonsegi ñane amigorã ha jajotopase jeýta hendive upe rire. Umi ombaʼapóva construcción de Salón del Rréinope térã umi oporopytyvõva oiko jave sarambi heta mbaʼe porã ohasa oñondive. Oikuaa hikuái hetave ermánope ha ojuhu avei iñamigorã. Jehová kongregasiónpe ningo añetehápe heta oportunida jareko jajuhu hag̃ua ñane amigorã. Ñañehaʼãramo jahayhu hetave ñande rapichápe ha jajeheʼa hetavére, opavave ñamombaʼeguasúva Jehovápe jajoayhuvéta.

Ñañemotiémpokena ñande rapichakuérape g̃uarã

11. Mbaʼépa jahechakuaa Jesús rehe Marcos 10:​13-16-pe heʼívare?

¹¹ Enterovénte ningo ñanderoryvaʼerã, Jesús ojapo haguéicha. Peteĩ árape heta oĩ oguerahaséva itaʼyrakuéra Jesús rendápe, péro hemimboʼekuéra ojokose umívape. Ha mbaʼépa ojapo Jesús? Haʼe heʼi chupekuéra: ‘Peheja mitãnguéra tou cherendápe ha ani pejoko, umi ojoguáva chupekuéra niko hína umi oikétava Ñandejára Rréinope. Upéi ohupi ijyva ári mitãnguérape ha ovendesi omoĩvo ipo hiʼarikuéra’ (Mar. 10:​13-16). Mbaʼeichaitépa oiméne ovyʼarakaʼe umi mitã ohechávo mbaʼéichapa pe Mboʼehára Guasu ohayhu chupekuéra.

12. Mbaʼe jajapóramopa ñande rapichakuéra oimoʼãta nañañemongetaseiha hendivekuéra?

¹² Iporã ningo ñañeporãndumi: “Oñembojasépa che rapichakuéra oñemongeta hag̃ua chendive terãpa oimoʼã hikuái nachetiempoiha voi?”. Oĩ ningo umi mbaʼe ndaivaíriva jajapo, péro ikatu umi mbaʼére ñande rapichakuéra ndaikatúi oñemongeta ñanendive. Pór ehémplo ñaime jave ñande rapichakuéra ndive ñañemoĩramo jaiporu celular térã ñamoĩ auricular ha ñahendu músika, haʼekuéra oimoʼãta ndajajeheʼaseiha hesekuéra. Ha ohechakuaáramo hikuái ñane rembiaporãrente voi ñapensaha, oimoʼãta nañañeʼẽseiha hendivekuéra. Oĩ ningo añete ‘ára ñakirirĩ hag̃ua’. Péro heta vésengo ñaime jave ñande rapichakuéra ndive haʼe hína pe ‘ára ñañeʼẽ hag̃ua’ (Ecl. 3:7). Ikatu oĩ heʼíva: “Che ningo chekirirĩeterei voi” térã “Nañeʼẽséi voi avavéndi”. Péro iporã ningo ñañehaʼã ñañemongeta ñande rapichakuérandi. Upéicha jahechaukáta japorohayhuha, pórke japorohayhúramo niko nañapensamoʼãi ñandejehénte (1 Cor. 13:5).

13. Mbaʼe ojapo hag̃uápa Pablo omokyreʼỹ Timotéope?

¹³ Pablo ningo omokyreʼỹ Timotéope orrespeta hag̃ua enterovépe kongregasiónpe (jaleemína 1 Timoteo 5:​1, 2). Ñande avei jajapovaʼerã upéicha: jatrata umi ijedavévape ñande sy térã ñande rúicha ha umi imitãvévape katu ñane ermáno ha ñane ermána teéicha. Jajapóramo upéicha, enterovénte oñeñandu porãta ñanendive.

14. Mbaʼérepa ñañemongetavaʼerã umi mbaʼe porãre?

¹⁴ Jajepokuaáramo ñañemongeta ermanokuérandi umi mbaʼe porãre, ñambovyʼa ha ñamokyreʼỹta chupekuéra oñemoag̃uive hag̃ua Jehováre. Peteĩ ermáno ombaʼapóva Betélpe omombeʼu heta betelita oñemongeta hague hendive oñepyrũrõ guare ombaʼapo Betélpe. Upéicha rupi haʼe hogapeguáicha oñeñandu hendivekuéra. Koʼág̃a haʼe oñehaʼã avei otrata upéicha umi ou ramóvape Betélpe.

Ñaneumílderamo jaiko porã jeýta oñondive

15. Mbaʼépa ohechauka ermanokuéra jepe ikatuha ojoavy?

¹⁵ Filípospe oikovaʼekue mokõi kristiána hérava Evodia ha Síntique. Haʼekuéra ningo orekovaʼekue peteĩ provléma oñondive ha oiméne ijetuʼurakaʼe chupekuéra osolusiona hag̃ua upéva (Fili. 4:​2, 3). Apóstol Pablo ha Bernabé katu oikovai kangue oñondive ha upéi oñemomombyry ojuehegui. Ha enterovete  oikuaa upe oikovaʼekue (Hech. 15:​37-39). Péicha jahecha ermanokuéra jepe ikatuha ojoavy. Ha Jehová ningo ñanepytyvõta katuete jaiko porã jey hag̃ua, péro ñande avei ñañehaʼãvaʼerã upearã.

16, 17. a) Mbaʼépa ñaikotevẽ ñasolusiona hag̃ua peteĩ provléma? b) Mbaʼéichapa Jacob ha Esaú ehémplo ohechauka tekotevẽha ñaneumílde?

¹⁶ Peteĩ kamión ñamoarranka hag̃ua ningo ñaikotevẽ illáve rehe. Ha ñasolusiona hag̃ua peteĩ provléma ñaikotevẽ avei peteĩ lláve rehe: tekotevẽ ñaneumílde (jaleemína Santiago 4:10). Koʼág̃a jahechamíta peteĩ ehémplo oñemombeʼúva la Bíbliape, ha ohechaukáva tekotevẽha ñaneumílde jajapo hag̃ua Jehová heʼíva ha péicha jaiko porã jey ñande rapichándi.

¹⁷ Yma ningo Jacob oho itúva rendápe ovendesi hag̃ua chupe iñermáno Esaú vése. Upévare Esaú ipochyeterei ha ojukase iñermánope. Upémaramo Jacob okañy upégui. Ha veinte áño haguépe ojotopa jeýtarõ guare hikuái, ‘Jacob okyhyje ha ojepyʼapy’ iñermáno ojukárõ g̃uarã chupe. Upémaramo ojapo peteĩ mbaʼe Esaú nohaʼarõietéva: ‘ojayvy jayvy siete vése og̃uahẽ meve iñermáno rendápe’. Mbaʼépa oiko upe rire? ‘Esaú oñani iñermáno rug̃uaitĩvo, oañuãvo ohetũ chupe ha mokõivéva hasẽ.’ Oimérõ jepe Esaú ipyʼaro gueteri, Jacob iñumílde rupi Esaú okambia ha upéva mediánte ndoikói mbaʼeve ivaíva (Gén. 27:41; 32:​3-8; 33:​3, 4).

18, 19. a) Mbaʼépa ñanepytyvõta ñasolusiona hag̃ua ñane provléma? b) Mbaʼérepa nañanekangyivaʼerã ndaikatúiramo ñasolusiona pyaʼe peteĩ provléma?

¹⁸ La Bíbliape ningo oĩ heta konsého ñanepytyvõtava ñasolusiona hag̃ua ñane provléma (Mat. 5:​23, 24; 18:​15-17; Efe. 4:​26, 27). a Ha ñaneumildevaʼerã jasegi hag̃ua umi konsého, pórke ndajajapóiramo upéicha hasyvéta jaiko porã jey hag̃ua ñande rapichándi. Nañasolusionamoʼãi avei mbaʼeve ñahaʼarõramo ñande rapicha raẽ ohechauka iñumildeha, jaikuaa porã ningo ñande pópe jarekoha upe “lláve”.

¹⁹ Sapyʼánte ningo ñañehaʼãramo jepe ñasolusiona hag̃ua ñane provléma haʼetévaicha ndaipóriva solusión. Mbaʼérepa nañanekangyivaʼerã upéicha jave? Ikatúgui pe ñande rapicha oikotevẽve tiémpo ipochypoi hag̃ua. Upearã iporã ñanemanduʼa José ermanokuéra ohasavaʼekuére. Haʼekuéra ningo  heta tiémpo rire ojevyvaʼekue hembiapo vaikuégui. Ha José ningo faraón jeroviaháma vaʼekue orresivírõ guare iñermanokuérape. Upérõ haʼe ohendu ha operdona chupekuéra. Upe rire José ha iñermanokuéragui oiko pe tetã Jehová oiporavovaʼekue imbaʼerã (Gén. 50:​15-21). Akóintekena ñanemanduʼa jaiko porãramo ñane ermanokuérandi, kongregasiónpe avei ojevyʼa ha ojeiko porãtaha (jaleemína Colosenses 3:​12-14).

Jahechauka japorohayhu añeteha

20, 21. Mbaʼépa Jesús ñanemboʼe ombojepyhéirõ guare ijapostolkuérape?

²⁰ Jesús ningo omano mboyvemi heʼi ijapostolkuérape: “Che ahechauka peẽme mbaʼépa pejapovaʼerã, peẽ pejapo hag̃ua avei che ajapo haguéicha penderehe” (Juan 13:15). Jesús ningo upérõ ombojepyheipa ramo chupekuéra, péro upéva haʼe ndojapoivaʼekue ohechauka hag̃ua imbaʼeporãhánte. Apóstol Juan ningo omombeʼu mboyve upe oikovaʼekue, heʼi: ‘Jesús akóinte ohayhuvaʼekue umi chupe omoirũvape ko yvy ape ári, ha péicha ohayhu chupekuéra ipahaite peve’ (Juan 13:1). Péicha jahecha Jesús ohayhúgui ijapostolkuérape ombojepyhéi hague chupekuéra. Upéva ningo yma peteĩ tembiguái rembiapónte. Ha upe rire umi ijapostolháma ohechaukavaʼerã ojoayhuha hikuái. Upéicharõ, jahayhu añetéramo ñane ermanokuérape jajepyʼapýta hesekuéra.

²¹ Apóstol Pedro ningo ontende mbaʼépa Jesús omboʼesevaʼekue ombojepyhéirõ guare chupekuéra. Upévare ohai: ‘Koʼág̃a peẽ, espíritu sánto rupive peneñeʼẽrendu pe ñeʼẽ añetetévape ha upéicha pemopotĩ pene ánga ha peju pehayhu tovamokõiʼỹre pene ermanokuérape. Pejoayhúkena aipóramo pende pyʼaite guive ha opa ikatuháicha’ (1 Ped. 1:22). Apóstol Juan avei imanduʼávo upe Jesús ojapovaʼekuére heʼi kristianokuérape: ‘Che raʼykuéra pohayhuetéva, ani japorohayhu ñande jurúpente, jahechauka uvei ñane mborayhu añeteha ñane rembiapokue rupi’ (1 Juan 3:18). Upéicharõ akóintekena opa mbaʼe jajapóva rupive jahechauka jahayhuha ñane ermanokuérape.

[Nóta]

Nemanduʼápa koʼã mbaʼére?

• Mbaʼépa ikatu jajapo jajeheʼa ha jahayhu hag̃ua hetave ermánope?

• Mbaʼépa ikatu jajapo ñanetiempove hag̃ua ñande rapichakuérape g̃uarã?

• Mbaʼéichapa ñaneumílderamo ñanepytyvõ jaiko porã jey hag̃ua ñande rapichándi?

• Mbaʼéicha rupípa jajepyʼapy ñane ermanokuérare?

[Porandu ñahesaʼỹijóva]

[Nóta oĩva taʼanga ndive páhina 21]

Jaguerohorýkena ñane ermanokuérape

[Nóta oĩva taʼanga ndive páhina 23]

Ñañemotiempopañaína ñande rapichakuérape g̃uarã?