Ñañatende porãke Jeremías ojapo haguéicha

‘Apayʼaína oiko hag̃ua upe haʼevaʼekue.’ (JER. 1:12)

1, 2. Mbaʼérepa pe alméndro máta oñembojoja Jehová ojapóvare?

ISRAEL ha Líbanore araroʼy opakuévo pe alméndro máta oñepyrũma ipoty. Enero pahápe térã febrero oñepyrũvo ojehecháma mbaʼéichapa ipoty morotĩmba térã pytãngy. Evréo ñeʼẽme alméndro heʼise “opáyva”.

² Jehová oiporavórõ guare Jeremíaspe iprofetarã, oiporu pe alméndro máta omboʼe hag̃ua chupe peteĩ mbaʼe iñimportánteva. Ohechauka chupe pe yvyra máta ipoty potáva ha upe rire omyesakã mbaʼépa heʼise: ‘Apayʼaína oiko hag̃ua upe haʼevaʼekue’ (Jer. 1:11, 12). Pe alméndro ningo voi ipoty káda áño, upéicha avei Jehová haʼete opáy voíva. Mbaʼépa heʼise upéva? Haʼe, voi reheve omondóma iprofetakuéra omomarandu hag̃ua ipuévlope okastigataha chupekuéra naiñeʼẽrendúi haguére (Jer. 7:25). Ñandejára ndopytuʼumoʼãi okumplipa peve heʼivaʼekue. Áño 607-pe Jesús ou mboyve, Jehová heʼi hagueichaite okastiga umi Judaygua opuʼãvape hese.

3. Mbaʼérepa ikatu jajerovia Jehováre?

³ Ñane tiémpope Jehová ojesareko porã ojapo hag̃ua hembipota ha arakaʼeve nopyrũi iñeʼẽre. Mbaʼéichapa ñanepytyvõ upéva? Jajeroviápa Jehová ojesarekohahína ko áño  2011-pe ha ojapotaha umi mbaʼe oprometéva? Oiméramo ñandepyʼamokõi ha ikangy ñande jerovia tekotevẽma japáy (Rom. 13:11). Jahechamína mbaʼéichapa Jeremías akóinte oñatende porã vaʼekue ojapopaite hag̃ua Jehová heʼíva ha mbaʼépa omomýi chupe upearã. Ñahesaʼỹijóramo koʼã mbaʼe ikatúta ñanembareteve jajapo hag̃ua umi tembiapo Jehová omeʼẽva ñandéve.

Peteĩ marandu iñimportantetereíva

4. Mbaʼe mbaʼépa ombohovaivaʼekue Jeremías, ha mbaʼérepa iñimportantete pe marandu omeʼẽvaʼerã?

⁴ Jeremías oreko 25 áño rupi Jehová oiporavórõ guare chupe iprofetarã (Jer. 1:1, 2). Upéicharamo jepe, oñeñandu peteĩ mitãicha ha oimoʼã ndaikatupyryiha oñeʼẽ hag̃ua umi ansiáno Israelguápe. Umíva ningo iñarandu ha tuicha omanda (Jer. 1:6). Jeremías omeʼẽvaʼerã peteĩ marandu ipohýi ha oporomongyhyjéva. Heʼivaʼerã Jehová okastigataha umi omoakãvape, saserdotekuéra, proféta japu ha “opavave” naiñeʼẽrendúivape (Jer. 6:13; 8:5, 6). Avei omombeʼuvaʼerã oñehunditaha pe témplo Salomón ojapovaʼekue, oĩmava upérõ 400 áño potaite. Hiʼarive Jerusalén ha Judá opytataha itapere ha umi héntegui oikóta tembiguái. Ajépa iñimportantete pe marandu omeʼẽvaʼerã ko proféta!

5, 6. a) Mbaʼéichapa Jehová oiporu umi unhídope? b) Mbaʼépa jahecháta ko artíkulope?

⁵ Jehová oporohayhueterei rupi omoĩ unhidokuérape ojesareko hag̃ua umi mbaʼe oikóvare koʼã tiémpope, ha omombeʼu hag̃ua opavavépe Ñandejára oporohusga potaitemaha. Heta áñorema koʼã ermáno orrepresentáva Jeremíaspe, omomarandu enterovévape ikatu hag̃uáicha ohechakuaa hiʼag̃uimbaitemaha Jehová ára (Jer. 6:17). La Biblia ohechauka porã Ñandejára naimbegueiha. Hiʼára guasu og̃uahẽta hiʼoraitépe oñehaʼarõʼỹve jave (Sof. 3:8; Mar. 13:33; 2 Ped. 3:9, 10).

⁶ Jehová ojesareko opa mbaʼére oiko hag̃ua hembipota ha katuete oguerúta imúndo pyahu. Koʼã mbaʼe omokyreʼỹ umi unhídope ha umi oikótavape ko yvy ape ári oñatende porã ha ohechakuaa hag̃ua tekotevẽtereiha oporomomarandu oñehunditaha ko múndo aña. Jesús heʼivaʼekue enterovéva odesidivaʼerãha omotenondétapa Ñandejára Rréino. Jahechamína mbohapy mbaʼe oipytyvõvaʼekue Jeremíaspe oñatende porã ha oporomomarandu hag̃ua, ha ñandéve ñanepytyvõta avei jajapo hag̃ua upéicha.

Ohayhu hapichakuérape

7. Mbaʼépa omomýi Jeremíaspe opredika hag̃ua ohasáramo jepe heta mbaʼe ijetuʼúva?

⁷ Mbaʼérepa Jeremías opredikavaʼekue ohasáramo jepe heta mbaʼe ijetuʼúva? Ohayhu rupi iñermanokuérape. Haʼe oikuaa oĩha heta ohasa asýva umi mboʼehára japu káusare (Jer. 23:1, 2). Upévare ombyasy chupekuéra ha mborayhúpe ojapo hembiapo. Chupe g̃uarã hiʼãiterei umi hénte oikuaa Ñandejára rembipota ani hag̃ua oñehundi. Oikuaa porã avei mbaʼépa ohaʼarõ chupekuéra, upévare ojepyʼapyeterei ha hasẽ hesekuéra (elee Jeremías 8:21; 9:1). Pe lívro hérava Lamentaciones haʼe ohaivaʼekue, ohechauka mbaʼeichaitépa ohayhu ha omombaʼe Ñandejára réra ha ipuévlo (Lam. 4:6, 9). Mbaʼépa jajapo jahechávo umi hénte oikoha “ovecha herekuaʼỹvaicha” isarambipáva? Ñamombeʼusépa chupekuéra umi mbaʼe porã Ñandejára Rréino ojapótava? (Mat. 9:36, ÑÑB.)

8. Mbaʼérepa ikatu jaʼe Jeremías nomboguapýi hague ijehe umi mbaʼe vai ojejapóva hese?

⁸ Umi Judaygua heta ombohasa asy Jeremíaspe ha ndohejái oipytyvõ chupekuéra. Péro haʼe nomboguapýi ijehe umi mbaʼe ni noñevengái hesekuéra. Upéva rangue akóinte ipyʼaporã ha ipasiénsia. Pór ehémplo, rréi Sedequías iñañaiterei ha ontrega chupe  iñenemigokuéra pópe. Upe rire Jeremías ojerure asy chupe iñeʼẽrendumínte hag̃ua Jehovápe (Jer. 38:4, 5, 19, 20). Jahayhúpa avei ñande rapichakuérape Jeremías ohayhu haguéicha?

Ñandejára oporombopyʼaguasu

9. Mbaʼéichapa jaikuaa Jeremías ndaipyʼaguasúi hague ijehegui reínte?

⁹ Jeremías heʼivaʼekue ndaikatupyryiha Jehová omeʼẽrõ guare chupe hembiaporã. Upévare ndaikatúi jaʼe iñeʼẽrendu ha ipyʼaguasu hague onase guive. Ojerovia rupi Ñandejárare ipyʼaite guive ndokyhyjeivaʼekue ojapo hag̃ua pe tembiapo Jehová omeʼẽva chupe. Upéicha jahecha Jehová oĩ hague Jeremías ndive ‘ku kuimbaʼe ipyʼaguasuetévaicha’ omombarete ha oipytyvõ hag̃ua chupe hembiapópe (Jer. 20:11, ÑÑB). Heta tiémpo rire, umi hénte imanduʼa gueteri mbaʼeichaitépa Jeremías ombaʼapovaʼekue kyreʼỹ ha pyʼaguasúpe, ha Jesús oúrõ guare ko yvy ape ári heta oĩ oimoʼãva haʼe hague Jeremías oikove jeýva (Mat. 16:13, 14).

10. Mbaʼépa heʼise Ñandejára omoĩha unhidokuéra oĩvape gueteri ko yvy ape ári umi mburuvicha “ha tetã guasukuéra ári”?

¹⁰ Jehová ningo “tetãnguéra Ruvicha Guasu” ha upévare haʼémante ikatuvaʼekue omondo iproféta omomarandu hag̃ua okastigataha tetãnguérape ha umi mburuvichápe (Jer. 10:6, 7, ÑÑB). Ñandejára omoĩ unhidokuéra oĩvape gueteri ko yvy ape ári umi mburuvicha “ha tetã guasukuéra ári” (Jer. 1:10, ÑÑB). Mbaʼépa heʼise upéva? Jehová omeʼẽ chupekuéra hembiaporã Jeremíaspe omeʼẽ haguéicha. Haʼekuéra omomaranduvaʼerã umi goviérno ko yvy ariguápe Ñandejára ohundipataha chupekuéra haʼe oikuaahaichaite ha hiʼaraitépe. Jehová voi omoĩ umi unhídope omoakã ha ojapo hag̃ua ko tembiapo. Upearã omeʼẽ chupekuéra Iñeʼẽ (Jer. 18:7-10; Rev. 11:18). Umi orrepresentáva koʼág̃a Jeremíaspe ombaʼapo jejopy ha arakaʼeve ndohejareimoʼãi hembiapo. Haʼekuéra akóinte omombeʼúta oparupiete umi marandu ipohýiva.

11. Mbaʼépa ñanepytyvõta japredika meme hag̃ua pyʼaguasúpe?

¹¹ Sapyʼánte oĩ heta nohenduséiva pe marandu porã, oñemoĩva ñanderehe térã ikatu ñanembohasa asy (2 Cor. 1:8). Upéicharõ jepe nañanekangýi ha jasegi Jeremías ehémplo. Ñañemboʼe Jehovápe ha jajerure chupe tañanepytyvõ jajapo hag̃ua ñane rembiapo “pyʼaguasúpe” (1 Tes. 2:2). Tekotevẽterei jajesareko porã ikatu hag̃uáicha jajapo pe tembiapo Jehová omeʼẽva ñandéve. Yma Jeremías omomarandu haguéicha Jerusalén oñehunditaha, koʼág̃a avei japredikavaʼerã kaneʼõʼỹre koʼẽrõitéma Jehová ohunditaha entéro rrelihión japu heʼíva ijehe kristianoha. Umi unhído ojedesidi ‘omyerakuã memévo Ñandejára ára ou porãva opavavépe’ ha avei omomarandu og̃uahẽtamaha ‘pe ára Ñandejára omyengoviataha umi hembiapo vaívape’ (Isa. 61:1, 2; 2 Cor. 6:2).

‘Chembopyʼarory’

12. a) Mbaʼérepa jaʼekuaa Jeremías akóinte ovyʼa hague? b) Mbaʼépa oipytyvõ chupe ikyreʼỹ hag̃ua?

¹² Jeremías ovyʼavaʼekue opredika haguére, upévare heʼi Jehovápe: ‘Nde reñeʼẽramo chéve, umíva chembovyʼa ha chembopyʼarory, che niko hína nembaʼe, che Jára Ndepuʼakapáva’ (Jer. 15:16). Jeremías ombaʼapo Jehová rérape ha omombeʼu hembipota, upéva tuichaiterei mbaʼe chupe g̃uarã. Sapyʼánte oguapy hese umi hénte oñembohory jave hembiapóre, péro ojesareko jeývo pe marandu porã iñimportantetévare, ovyʼa jey (Jer. 20:8, 9).

13. Mbaʼérepa tekotevẽ jastudia umi mbaʼe hypyʼũvéva oĩva Ñandejára Ñeʼẽme?

¹³ Japredika meme ha javyʼa hag̃ua tekotevẽ jastudia umi mbaʼe hypyʼũvéva térã “tembiʼu ipohyivéva” oĩva Ñandejára Ñeʼẽme  (Heb. 5:14, JMP). Ñahesaʼỹijo porãramo la Biblia imbaretevéta ñande jerovia (Col. 2:6, 7). Péicha avei ñanepytyvõta jahechakuaa hag̃ua mbaʼeichaitépa Jehová oguerohory jajapóva. Upévare tekotevẽterei jalee ha ñahesaʼỹijo Ñandejára Ñeʼẽ, ha ijetuʼúramo jepe, ñañemotiempovaʼerã. Jastudia ha jajepyʼamongetáramo sapyʼaite mimi jepe káda día, ñañemoag̃uivéta Jehováre ha upéva ‘ñanembovyʼa ha ñanembopyʼarorýta’.

14, 15. a) Mbaʼépa ojehupyty Jeremías omomarandu haguére Jehová ojapótava? b) Mbaʼéichapa jahechavaʼerã pe tembiapo Jehová omeʼẽva ñandéve?

¹⁴ Jeremías ningo kyreʼỹme omomarandu Jehová ojapótava, péro ndahesaráiri avei oñemondo hague chupe ‘omopuʼã ha oñotỹ hag̃ua’ (Jer. 1:10, ÑÑB). Upéva heʼise oipytyvõ hague hetápe ojesalva hag̃ua Jerusalén oñehundírõ guare áño 607-pe Jesús ou mboyve. Upérõ ojesalva heta Judaygua, umi rrekavíta, Baruc ha Ébed-mélec (Jer. 35:19; 39:15-18; 43:5-7). Mávapepa orrepresenta koʼã Jeremías amigokuéra iñeʼẽrenduvaʼekue? Koʼãva hína enterove kristiáno oikótava ko yvy ape ári ha omoirũva umi orrepresentáva Jeremíaspe. Ovyʼaite umi unhído oĩva ko yvy ape ári omombarete haguére ko “aty guasu” jerovia! (Rev. 7:9.) Upéicha avei,  ko “aty guasu” ovyʼa oipytyvõ haguére hetaitereípe oikuaa hag̃ua Ñandejára rembipota.

¹⁵ Kristianokuéra ohechakuaa opredikaha omombaʼeguasu hag̃ua Jehovápe, ndahaʼéi oipytyvõ hag̃uánte hapichápe. Upévare, oĩramo jepe nañanerenduséiva, javyʼa jaservi haguére Ñandejárape (Sal. 71:23; elee Romanos 1:9).

Ñañatende porãkena ha jajapo hekoitépe ñane rembiapo

16, 17. Mbaʼéichapa Revelación 17:10 ha Habacuc 2:3 ohechauka og̃uahẽmbotaitemaha Jehová ára guasu?

¹⁶ Revelación 17:10 ñanepytyvõ jahechakuaa hag̃ua og̃uahẽmbotaitemaha huʼãme koʼã ára paha. Upépe oñeʼẽ pe séptimo rréi rehe, upéva hína Gran Bretaña ha Estados Unidos. Haʼekuéra omanda guasu tetãnguérare. Péro la Biblia heʼi hesekuéra ‘sapyʼamínte opytataha’, ha upe tiémpo oiméne og̃uahẽmbotaitéma huʼãme. Jehová heʼi proféta Habacúcpe: “Nog̃uahẽi gueteri ára oiko hag̃ua ko rehecháva”. Upéi heʼi avei chupe: “Hiʼarétaramo jepe ojehu hag̃ua, ehaʼarõ, katuete oúta, ndahiʼaretereivéima oiko hag̃ua koʼã mbaʼe” (Hab. 2:3, ÑÑB).

¹⁷ Upévare iporã ñañeporandu: “Ojekuaápa aiko lájare ajerovia ha ahechakuaaha Jehová ára guasu og̃uahẽmbotaitemaha? Térãpa ahechauka umi mbaʼe adesidi ha amotenondévare ndajeroviaguasuiha og̃uahẽne hag̃ua upe ára?”.

18, 19. Mbaʼérepa ndovaléi ñambotapykue pe tembiapo Jehová omeʼẽvaʼekue ñandéve?

¹⁸ Umi kristiáno ohótava yvágape koʼág̃a peve omomarandu Jehová ára guasu hiʼag̃uimbaitemaha (elee Jeremías 1:17-19). Ajépa javyʼaite jaikuaávo koʼã ermáno oĩ porãha Jehová renondépe peteĩ kolúmna de ‘iérroicha’ térã peteĩ ‘táva imbaretévaicha’. Haʼekuéra ‘oreko ijehe añetegua ikuʼajokuaháramo’. Upéva heʼise omombareteha ijerovia Ñandejára Ñeʼẽ rupive ojapopa hag̃ua hembiapo (Efe. 6:14). Upeichaite avei umi kristiáno ‘aty guasupegua’ ombaʼapo kyreʼỹ hendivekuéra omohuʼã hag̃ua pe tembiapo.

¹⁹ Koʼág̃a tekotevẽterei jajepyʼamongeta Jeremías 12:5 heʼívare (elee) ha ani ñambotapykue pe tembiapo Jehová omeʼẽvaʼekue ñandéve. Enterove ningo ñambohovái heta mbaʼe ikatúva omokangy ñande jerovia. Haʼete voi ñahaʼãva karréra ‘yvýrupi umi kuimbaʼe oñanikuaávandi’. Péro og̃uahẽmbotávo pe ‘jehasa asy guasu’ hetaitereive mbaʼe ñambohováita (Mat. 24:21, ÑÑB). Upéva oiko vove ijetuʼuetereíta, haʼetéta ‘ñahaʼãva karréra kavajúndi’. Ñañaníramo peteĩ kavajúndi, tekotevẽ ñaneakuã ha ñanembareteve, ndahaʼeiete ñahaʼãrõguáicha karréra peteĩ yvypóra ñandeichaguándi. Upéicha avei umi mbaʼe ijetuʼúva ñambohováiva koʼág̃a rupi, ñandeprepara ikatu hag̃uáicha jagueropuʼaka umi oútava.

20. Mbaʼépa tekotevẽ jajapo osẽ porã hag̃ua ñandéve ñane rembiapo?

²⁰ Ñandéve osẽ porãta avei ñane rembiapo Jeremíaspe osẽ porã haguéicha. Haʼe opredika 67 áño pukukue ha ogueropuʼaka heta mbaʼe oporohayhu, ipyʼaguasu ha ovyʼakuaa rupi. Jahecháma haguéicha pe alméndro máta ipotypáva heʼise Jehová ‘opayha’ térã ojesareko porãha ojapo hag̃ua hembipota. Upéicha avei ñande jajesareko porã vaʼerã Jeremías ojapo haguéicha.

Nemanduʼápa?

• Mbaʼéichapa pe mborayhu oipytyvõ Jeremíaspe opredika hag̃ua?

• Mbaʼérepa tekotevẽ Jehová ñanembopyʼaguasu?

• Mbaʼépa oipytyvõ Jeremíaspe ovyʼakuaa hag̃ua?

• Mbaʼérepa tekotevẽ ñañatende porã koʼág̃a?

[Porandu ñahesaʼỹijóva]

[Nóta oĩva taʼanga ndive páhina 31]

Jasegítapa japredika ijetuʼúramo jepe?