Aníkena ñanderesarái ñane ermanokuéragui

“DIEZ áñore roiko pláta rapykuérinte ha rohupytyvaʼekue heta mbaʼe. Rokakuaáramo jepe rrelihión añeteguápe, roñemomombyry Jehovágui ha ijetuʼu oréve roñemoag̃ui jey hag̃ua hese”, heʼi Jarosław ha hembireko Beata. *

Ambue ermáno hérava Marek heʼi: “Peteĩ tiémpope ijetuʼueterei rupi la situasión Polóniape, pyʼỹinte aperde che traváho ha upéva chemoñeñandu vai. Nañanimái amoñepyrũvo peteĩ negósio ndajeroviapáigui chejehe. Péro amo ipahápe amoñepyrũntema aimoʼãgui péicha amoĩmbataha che famíliape hemikotevẽ ha nañemomombyrymoʼãiha Jehovágui. Aje piko tuichaite ajavy!”.

Koʼág̃a rupi ijetuʼueterei jahupyty hag̃ua ñane remikotevẽ ha ndaiporivéi traváho, upéicha rupi oĩ ermáno ojepyʼapyetereíva ha ojapóva heta mbaʼe opensa porãʼỹre. Oĩ ombaʼapóva hetave óra, ambue katu oguerekómaramo jepe peteĩ traváho ojagarra jey ótro térã omoñepyrũ peteĩ negósio ndaikatupyrýiramo jepe. Haʼekuéra opensa péicha oipytyvõ porãvetaha ifamiliakuérape ha noñemomombyrymoʼãiha Jehovágui. Iporãramo jepe ohupytyséva ikatu nosẽi chupekuéra opensa  haguéicha, tahaʼe oikógui peteĩ mbaʼe nohaʼãrõiva, saʼi rupi pláta térã ambue mbaʼére. Upéi oúma itaryrýi ha pláta rehehápe omboyke Ñandejárape (Ecl. 9:11, 12).

Heta ermáno ha ermána oikógui umi mbaʼeta rapykuéri naitiempovéima ohesaʼỹijo hag̃ua la Biblia haʼeñohápe, opredika ha oho hag̃ua rreunionhápe. Koʼã mbaʼe ndojapói rupi oñemomombyry hikuái Jehovágui ha ndoikovéi iñamígoramo. Haʼekuéra omboyke jepi avei ambue mbaʼe iñimportánteva, ‘umi omoirũvape chupekuéra ijeroviápe’ ha mbeguekatúpe oheja kongregasión (Gál. 6:10). Upévare iporãta ñahesaʼỹijo koʼã mbaʼe.

Jahayhuvaʼerã ñane ermanokuérape

Opavave heta hendáicha jahechaukakuaa jahayhuha ñane ermanokuérape (Rom. 13:8). Ikatu kongregasiónpe oĩ peteĩ ‘ohasa asýva’ (Job 29:12, ÑÑB). Pór ehémplo umi ndaikatúiva ohupyty hemikotevẽ. Apóstol Juan heʼi mbaʼépa jajapovaʼerã upéicha jave: ‘Pe oguereko heta ha ndoiporiahuverekóiva iñermáno oguerekoʼỹvape, mbaʼéicha piko ikatúta heʼi Ñandejára mborayhu oĩha ipype?’ (1 Juan 3:17).

Oimevaʼerã jahechaukáma ñandepojeraha ñameʼẽvo ñane ermanokuérape hemikotevẽ. Péro ndahaʼéi upéva añónte jajapovaʼerã. Oĩ ningo umi oikotevẽva ñaipytyvõ chupekuéra oñeñandúgui haʼeño térã oñedeprimi rupi. Ikatu oime hasy hikuái, omano chuguikuéra peteĩ ohayhúva térã opensa Ñandejára ndoguerohorymoʼãiha chupekuéra. Mbaʼéichapa ikatu ñaipytyvõ umi péicha oñeñandúvape? Ñañemongetávo hendivekuéra ha ñahendu porãvo umi mbaʼe heʼíva ñandéve. Upéicha jahechakuaáta mbaʼépa ikatu jajapo ovyʼa ha imbarete jey hag̃ua ijerovia Jehová rehe (1 Tes. 5:14). Jajapóramo koʼã mbaʼe jajoayhuvéta katuete.

Ansianokuéra kongregasionpegua ningo ikatu oipytyvõ porãve ermanokuérape, haʼekuéra ohendukuaa ha oñehaʼã ontende mbaʼéichapa oñeñandu hikuái, ha la Biblia rupive oñemoñeʼẽ chupekuéra mborayhúpe (Hech. 20:28). Upéicha osegi apóstol Pablo ehémplo, haʼe mborayhúpe otratavaʼekue ermanokuérape (1 Tes. 2:7, 8).

Mbaʼépa oiko jepi peteĩ kristiáno oikóramo mbaʼeta rapykuéri ha oñemomombyry kongregasióngui? Hesarái oipytyvõvaʼerãha iñermanokuérape. Ha opavave ikatu jaʼa ko ñuhãme, tahaʼe jepe umi omoakãva kongregasión. Mbaʼéichapa ikatu oiko upéva?

Aníkena jajepyʼapyeterei ñane remikotevẽre

Jahecháma haguéicha, jajepyʼapyetereíramo ñamoĩ hag̃ua ñane famíliape hemikotevẽ  ikatu ñanemoñeñandu vai ha ndajahechakuaavéi umi mbaʼe iñimportantevéva (Mat. 13:22). Marek omombeʼu mbaʼépa oiko hese: “Nosẽporãimarõ chéve che negósio aha ambue tetãme aheka che travahorã ojepaga porãvetahápe chéve. Ñepyrũrã aha tres mése, upe rire tres mése jey ha upéicha aha hese. Upévare sapyʼa mimíntema apyta ógape, upéicha rupi che rembireko ndahaʼéiva Testígo oñeñandu vaieterei”.

Péro ndahaʼéi ifamília añónte ohasa asýva. Marek heʼive: “Upérõ ambaʼapovaʼerã heta óra hakuetereihápe ha aimevaʼerã umi hénte ijurutieʼỹ, oporoʼapoʼi ha oñemombaʼeguasúva ndive. Añandu ojeaprovechaha cherehe hikuái ha aju añedeprimi. Che ningo nachetiémpoi ni chejehe añangareko porã hag̃ua, upévare apensa ndaikatumoʼãiha añangareko porã avavére”.

Jahechávo mbaʼéichapa ohasa asy heta tapicha ohóva ombaʼapo tetã ambuépe Marek rehe oiko haguéicha, ñapensa porã vaʼerã jajapo mboyve upéva. Ikatu ningo ñaimoʼã péicha ñasẽtaha jejopy vaígui, péro añetehápe ikatu ñandegueraha vaive. Upévare iporã ñañeporandu: “Mbaʼéichapa oñeñandúta che família? Akóintepa ikyreʼỹta oservi hag̃ua Jehovápe? Chemomombyrýtapa Jehová organisasióngui? Ikatútapa aipytyvõ che ermanokuérape?” (1 Tim. 3:2-5).

Añetehápe, natekotevẽi jaha ambue tetãme ñande traváho ñandegueraha vai hag̃ua. Péicha oiko Jarosław ha Beata rehe. Pe ermáno heʼi: “Ñepyrũrã ore noropensaivaʼekue rohupytývo heta mbaʼe. Romenda ramóme romoĩ peteĩ kasílla ojeguataitereihápe rovende hag̃ua hiʼupy. Oho porãitereígui oréve, rombotuichave ore negósio. Upéi saʼivéma oretiémpo ha roñepyrũ rofalta rreunionhápe. Upe riremi che ndahaʼevéima prekursór ni siérvo ministeriál. Rovyʼaiterei roganávare ha romoĩ peteĩ negósio tuichavéva, upe rire roñomoirũ peteĩ tapicha ndahaʼéivare testígo de Jehová rombaʼapo tuichave hag̃ua. Sapyʼaitérõ g̃uarã aviaháma aikóvo ambue tetãme ajapo hag̃ua kontráto oremoganátava hetaitereive. Che ningo ndapytaguasúi voi che rógape, ha ndoroikoporãvéi che rembireko ha che rajy ndive. Jaʼe porãséramo g̃uarã, oho porãitereígui oréve ore negósiope, mbeguekatúpe ndoroservivéima Jehovápe. Roñemomombyry kongregasióngui ha noropensavéima voi ermanokuérare”.

Mbaʼépa ñanemboʼe ko mbaʼe? Jaipotaitereíramo ko múndo aña oikuaveʼẽva ha ñapensáramo upéicha jaiko porãvetaha, ikatu ñanemoñuhã ha ‘nañañangarekovéi ñande ao rehe’ térã ndajaikovéi kristiáno teéicha (Rev. 16:15, ÑÑB). Ha ipahápe ñañemomombyry ñane ermanokuéragui ha nañaipytyvõvéi chupekuéra.

Jajepyʼamongetákena

Ikatu jaʼe: “Cherehe arakaʼeve ndoikomoʼãi upéva”. Péro enterove jahechakuaavaʼerã mbaʼépa añetehápe ñaikotevẽ. Ñanemanduʼavaʼerã apóstol Pablo heʼivaʼekuére: ‘Mbaʼeve ningo ndajaguerúi ko yvy ape ári, ha mbaʼevete ndajaguerahamoʼãi. Upévare jaguerekóramo ñane rembiʼurã ha ñande aorã, javyʼamavaʼerã koʼã mbaʼére’ (1 Tim. 6:7, 8, ÑÑB). Oĩ tetã ojeiko porãveha, ha upérupi umi mbaʼe ojejoguáva oñekotevẽgui, ikatu ambue tetãme peteĩ lúhoma.

Jaikóramo jepe peteĩ tetã ipláta térã imboriahúvape, ñanemanduʼavaʼerã Pablo heʼivaʼekuére: ‘Umi imbaʼeretaséva katu hoʼa peteĩ ñuhãme ha ojecha heta mbaʼe vaípe oitýva chupekuéra pyʼatarova ha ñehundípe’ (1 Tim. 6:9). Mbaʼépa ikatu jajapo ani hag̃ua jaʼa ko ñuhãme?

Jaikuaa porãramo mbaʼépa ñamotenondevaʼerã ñande rekovépe ñanemokyreʼỹta jaiporuve hag̃ua ñane tiémpo Jehovápe g̃uarã, pór ehémplo ñañemboʼe ha jastudia hag̃ua ñaneañohápe. Koʼã mbaʼe ñanepytyvõta ‘jaiko hag̃ua hekópe ha ñanembokatupyrýta’ ñaipytyvõ hag̃ua ñande rapichápe  (2 Tim. 2:15; 3:17, ÑÑB).

Heta tiémpore umi ansiáno pyʼaporãme oipytyvõ ha omokyreʼỹ Jarosłáwpe ijerovia imbarete jey hag̃ua, upéva omomýi chupe okambia hag̃ua. Haʼe heʼi: “Peteĩ árape umi ansiáno oñemongetávo chendive, omombeʼu peteĩ ehémplo oĩva la Bíbliape, peteĩ mitãkariaʼy oikovesevaʼekue opa árare, péro ndohejaséiva umi mbaʼeta orekóva. Upéi oporandu chéve hikuái mbaʼépepa ikatu chepytyvõ upe istória, ha upéva cheresapeʼa” (Pro. 11:28; Mar. 10:17-22).

Jarosław ojepyʼamongeta isituasión rehe ha odesidi oheja umi negósio tuicháva ojapovaʼekue. Dos áño haguépe haʼe ha ifamília oĩ porã jey Jehová ndive. Koʼág̃a Jarosław oservi ansiánoramo ikongregasiónpe. Haʼe heʼi: “Oĩ ermáno oikoitereígui negósio rapykuéri ombotapykuéva Jehovápe. Upéicha jave amombeʼu chupekuéra umi mbaʼe oikovaʼekue cherehe ohechakuaa hag̃ua naiporãiha ñamoĩ negósio umi ndahaʼéivandi testígo. Haʼekuéra ikatu voi ñanemoñuhã umi negósio tuicha ojaposévape térã oipota ñandepokarẽ, ha ndahasýi jaʼa hag̃ua pype” (2 Cor. 6:14).

Marek avei heta ohasa asy raẽ ohechakuaa hag̃ua ojavy hague. Haʼe ogana porã rupi ambue tetãme oguerahaukavaʼekue heta pláta ifamíliape, péro oñemomombyry Jehovágui ha ermanokuéragui. Upe rire ojepyʼamongeta ohecha hag̃ua mbaʼépa omotenonde hekovépe, ha heʼi: “Heta áñore aiko Baruc oiko haguéicha. Hese ningo la Biblia heʼi ‘oheka hague umi mbaʼe tuichávante’ ijupe g̃uarã. Upéi añemboʼe Jehovápe che pyʼaite guive, amombeʼu chupe umi mbaʼe chepyʼapýva ha ikatu haʼe koʼág̃a aime porã jeymaha” (Jer. 45:1-5, ÑÑB). Marek oñehaʼãmbaitehína ohupyty hag̃ua peteĩ “mbaʼe porã”: oservi ansiánoramo ikongregasiónpe (1 Tim. 3:1).

Umi opensávape oho tetã ambuépe ogana porãve hag̃ua, Marek heʼi: “Ñaiméramo ambue tetãme ndahasyive jaʼa hag̃ua ko múndo ñuhãme. Ha nañantendeporãiramo pe idióma upepegua katu ijetuʼueterei ñañemongeta hag̃ua. Ikatu ningo jaju jey ñane retãme heta pláta reheve, péro ñañemomombyrýma Jehovágui ha hasy ñandéve ñaime porã jey hag̃ua hendive”.

Katuete ñambovyʼáta Jehovápe ñambaʼapóramo jahupyty hag̃ua ñane remikotevẽnte ha ñaipytyvõramo ermanokuérape. Upéicha jahechaukáta ñaneakãguapyha ha ñamoĩta ehémplo iporãva enterovépe g̃uarã. Umi ojepyʼapyetereíva ningo oikotevẽ ñaipytyvõ, jaiporiahuvereko ha ñamoĩ chupekuéra ehémplo. Ansianokuéra ha ambue kristiáno ikatupyrýva oipytyvõvaʼerã ermanokuérape ani hag̃ua ombotapykue Jehová servísio ha ojepyʼapyeterei hemikotevẽre (Heb. 13:7).

Aníkena arakaʼeve ñanderesarái ñane ermanokuéragui ñambaʼapoiterei rupi (Fili. 1:10). Upéva rangue, enterove ñañehaʼãvaʼerã jajapo iporãva Jehová renondépe ñamotenondévo hembipota ñande rekovépe (Luc. 12:21).

[Nóta]

[Nóta oĩva taʼanga ndive páhina 21]

Ñamboyképa ñane rreunionkuéra traváho rehehápe?

[Nóta oĩva taʼanga ndive páhina 23]

Javyʼápa ikatu haguére ñaipytyvõ ñane ermanokuérape?