Oñeporandúva jepi

Jesús omondórõ guare umi doce apóstolpe opredika hag̃ua, heʼípa rakaʼe chupekuéra ogueraha hag̃ua vastón ha sandália?

Oĩ heʼíva umi lívro ohaivaʼekue Mateo, Marcos ha Lucas ojoavyha omombeʼuhápe umi mbaʼe Jesús heʼivaʼekue ijapostolkuérape omondótarõ guare opredika. Péro ñambojojávo ojuehe koʼã lívro heʼíva jahechakuaáta peteĩ mbaʼe iñimportánteva. Ñahesaʼỹijomína ñepyrũrã ohaivaʼekue Marcos ha Lucas. Marcos omombeʼu Jesús heʼi hague ijapostolkuérape ‘ani hag̃ua ogueraha mbaʼeve ohokuévo g̃uarã: pán ni vosa, térã viru ipláta ryrúpe. Peteĩ vastón añoite ikatu ogueraha hikuái. Heʼi avei toñapytĩ isandália ha ani hag̃ua ogueraha mokõi ao’ (Mar. 6:7-9, NM). Lucas katu heʼi: ‘Ani pegueraha mbaʼeve pehokuévo tahaʼe vastón, vosa, pán, térã pláta, ni mokõi ao’ (Luc. 9:1-3, NM). Koʼápe haʼetévaicha ojoavýva koʼã téysto. Marcos heʼi umi apóstol oguerahavaʼerãha vastón ha oñapytĩvaʼerãha isandália, péro Lucas heʼi ndoguerahaivaʼerãha hikuái mbaʼevete, ni vastón, ha sandáliare katu noñeʼẽiete voi.

Ñantende porãve hag̃ua Jesucristo omboʼesevaʼekue ijapostolkuérape, ñahesaʼỹijomi peteĩ mbaʼe ohaivaʼekue umi mbohapy kuimbaʼe. Marcos ha Lucas, upéicha avei Mateo 10: 5-10-pe, jahechakuaa Jesús heʼi hague chupekuéra ani hag̃ua ogueraha ‘mokõi ao’. Katuete ningo enterovéva oguerekóma voi peteĩ ao ijehe. Haʼekuéra ndohekaintevaʼerã ambue ao ogueraha hag̃ua. Marcos katu ohai Jesús heʼi hague chupekuéra ‘toñapytĩ isandália’, umi oguerekómava voi hikuái ijehe. Péro mbaʼépa ikatu jaʼe pe vastón rehe? Peteĩ Encyclopedia heʼi: “Yma umi evréo ojepokuaámi ogueraha peteĩ vastón ohohápe” (Gén. 32:10). Marcos omombeʼu ojeʼe hague umi apóstolpe ‘ani hag̃ua ogueraha mbaʼeve ohokuévo g̃uarã’, péro ikatuha ogueraha hikuái pe vastón oguerekómava voi Jesús omondórõ guare chupekuéra opredika hag̃ua. Añetehápe Mateo, Marcos ha Lucas ohechaukasénte Jesús heʼi hague ijapostolkuérape ani hag̃ua operde itiémpo ohóvo oheka ambue mbaʼe ogueraha hag̃ua.

Ko mbaʼe hesakãve jahechávo Mateo ohaivaʼekue. Haʼe oĩ Jesús heʼírõ guare ijapostolkuérape: ‘Ani pegueraha pende pláta ryrúpe óro, pláta ni kóvre. Ha ani avei pegueraha vosa, sandália, vastón ni mokõi ao. Pe ombaʼapóvape ningo oñemongaruntevaʼerã voi’ (Mat. 10:9, 10, NM). Heʼisépa upéicharõ Jesús umi apóstolpe oheja hag̃ua umi sandália ha vastón oguerekómava voi hikuái? Nahániri. Haʼe heʼínte chupekuéra ani hag̃ua oho ohekave ambue ogueraha hag̃ua. Mbaʼérepa heʼi chupekuéra upéicha? ‘Pe ombaʼapóvape ningo oñemongaruntevaʼerã voi.’ Koʼápe jahecha mbaʼépa Jesús omboʼesevaʼekue hemimboʼekuérape. Pe Sermón del Móntepe Jesús heʼimavaʼekue chupekuéra ani hag̃ua ojepyʼapy hembiʼurãre, omboyʼuvaʼerãre ha ijaorãre (Mat. 6:25-32).

Haʼetéramo jepe ojoavýva Mateo, Marcos ha Lucas ohaivaʼekue, mbohapyvéva omboʼese peteĩ mbaʼénte: umi apóstol ohovaʼerã opredika oguerekomívarente, ha ndoperdeivaʼerã itiémpo ohóvo oheka ambue mbaʼe. Mbaʼérepa? Jehová ningo katuete omeʼẽta chupekuéra hemikotevẽ.

 Mávarepa oñeʼẽrakaʼe Salomón heʼívo ‘kuña ha kuñanguéra’? (Ecl. 2:8.)

Ndajaikuaaporãiramo jepe, ikatu jaʼe oñeʼẽ hague umi kuña ikatupyry ha iñarandúvare haʼe oikuaavaʼekue ipalásiope.

Eclesiastés kapítulo 2-pe, Salomón omombeʼu umi mbaʼeta ohupytyvaʼekue, umíva apytépe umi óga tuichaicha ojapovaʼekue, ha upe rire heʼive: ‘Ambyaty avei pláta ha óro, ha mbaʼerepyeta tetã ruvicha ha tavakuéra mbaʼéva, ha aguereko kuimbaʼe ha kuña opurahéiva ha yvy arigua raʼykuérape ombohorýva guive, kuña ha kuñanguéra’ (Ecl. 2:8, ÑÑB).

Heta oĩ opensáva Salomón heʼívo ‘kuñanguéra’, oñeʼẽ hague umi tembireko ha konkuvína ambue tetãygua orekovaʼekue rehe, umi oguerahavaʼekue chupe rrelihión japúpe ituja rire (1 Rey. 11:1-4). Péro noĩporãi ko oñepensaháicha. Mbaʼérepa? Salomón heʼírõ guare oikuaa hague ‘kuña ha kuñanguéra’, oñeʼẽ peteĩ mbaʼe oikomavaʼekuére. Ha ohaírõ guare ko mbaʼe, Salomón oĩ porã gueteri Jehová ndive, upévare haʼe omeʼẽ chupe ijespíritu sánto ohai hag̃ua la Biblia. Upe riréma Salomón ou oñemomombyry Jehovágui, umi tembireko ha konkuvína orekovaʼekue omboyke chupe Ñandejára rapégui.

Eclesiastéspe, Salomón heʼi ‘oñehaʼãmbaite hague ojuhu hag̃ua ñeʼẽ oporombopyʼarorýva ha ohai hag̃ua hekoitépe koʼã ñeʼẽ añeteguáva’ (Ecl. 12:10, ÑÑB). Añetehápe haʼe oikuaa porã umi ñeʼẽ ‘tembireko’, ‘rréina’ ha ‘konkuvína’, upévare oiporuvaʼekue koʼãva ohaírõ guare la Biblia (Pro. 5:18; 12:4; 18:22; Ecl. 9:9; Cant. de Cant. 6:8, 9). Evréope koʼã ñeʼẽ ojeporuetereivaʼekue péro Eclesiastés 2:8-pe Salomón ndoiporúi.

Pe ñeʼẽ evréo ojetradusíva ‘kuña ha kuñanguéra’ ndojeporuguasuivaʼekue, ha la Bíbliape oĩ ko versíkulope añoite. Umi karai arandu heʼi ko ñeʼẽ evréo ndojekuaaporãiha mbaʼépa heʼise, upéicharõ jepe heta otradusivaʼekue la Biblia heʼi Eclesiastés 2:8 oñeʼẽha kuñanguérare. Pe ñeʼẽ ‘kuña ha kuñanguéra’ ikatu ñantende upéicha.

Salomónpe ningo opárupi ojekuaavaʼekue. Upéicha rupi pe rréina Sebaygua ohendu ojeʼevaʼekue Salomón rehe, oho ovisita chupe ha ohecharamoiterei opytávo (1 Rey. 10:1, 2). Péicha jahecha, Salomón heʼívo ‘kuña ha kuñanguéra’ oiméne hague oñeʼẽ umi kuña ikatupyry ha iñarandúvare haʼe oikuaavaʼekue ipalásiope oĩ porã tiémpope Jehová ndive.