Internet: Mbaʼérepa jaiporuvaʼerã hekoitépe?

OJEJAPO ñepyrũ guive Internet heta kámbio ogueru, ha upéva oñembojoja pe imprénta ojejapo ypýrõ guare rehe. Hetaiterei tapicha oiporu Internet oñekomunika hag̃ua opárupi, ojeʼe voi hese informasión raity. Ha ndojeʼereíri ningo hese upéicha, Internet rupive ikatu jaheka informasión oñeʼẽva oimeraẽ mbaʼére.

Jehová ningo ñandeapo ikatu hag̃uáicha ñañemongeta ha ñamombeʼu umi mbaʼe ñapensáva. Haʼe voi oñepyrũvaʼekue oñekomunika yvyporakuéra ndive heʼírõ guare Adán ha Évape mbaʼépa ojapovaʼerã ovyʼa hag̃ua (Gén. 1:28-30). Upe riremínte ojehecháma ikatuha ojeporu vai ko mbaʼe. Pór ehémplo Satanás ijapu Évape omombeʼúvo peteĩ informasión noĩporãiva. Haʼe oguerovia upéva ha omombeʼu Adánpe. Upévare opavave yvypóra ohasa asy (Gén. 3:1-6; Rom. 5:12).

Upéicharõ, mbaʼépa ikatu jaʼe Internet rehe? Ikatu ojapo porã ñanderehe ha ikatu avei ñanembyai. Añetehápe ningo ñanepytyvõ jatopa hag̃ua umi informasión iñimportánteva, ndajaperdehetái ñane tiémpo ha jajapo pyaʼeve ñane rembiapo. Péro ikatu avei jatopa umi informasión noĩporãiva, japerde heta ñane tiémpo ha ombyai ñandepyʼapy. Upéicharõ, mbaʼéichapa Internet ikatu ñanepytyvõ jaʼaʼỹre iñuhãme?

Ikatúpa jaguerovia umi informasión?

Aníkena ñapensa umi sítio ohekáva informasión omeʼẽtaha ñandéve umi iporãva ha ñanepytyvõtavante. Ñambojojakuaa umi tapicha ombyatývare pohã ñana. Haʼekuéra ikatu oikuaveʼẽ ñandéve opaichagua pohã, péro ñande jaiporavovaʼerã pe ou porãtava ñandéve ha ñamboyke umi ñanembyaítava. Upéicha avei ñañatende porã vaʼerã jaiporu jave Internet. Mbaʼérepa? Umi sítio ohekáva informasión nomboykéi avei umi informasión ivaíva iporãvagui. Upévare ani hag̃ua Internet ñanembyai, jaiporavo porã vaʼerã.

Áño 1993-pe, peteĩ rrevísta oguenohẽ peteĩ divúho ojehecharamoitereíva. Mokõi jagua oguapy peteĩ komputadóra renondépe, ha peteĩ heʼi pe ótrope: “Internétpe, avave ndoikuaái nde haʼeha peteĩ jagua”. Upeichaite ningo, Internétpe ndahasyiete ñamokañy hag̃ua mávapa ñande. Péro ko mbaʼe ndaipyahúi. Yma Satanás  oiporu peteĩ mbói heʼi hag̃ua Évape ikatuha oiko Ñandejáraicha. Koʼág̃a avei oimeraẽ oiporúva Internet ikatu ontendeuka ikatupyryetereiha peteĩ mbaʼépe. Upéicha avei opavave ikatu omoĩ Internétpe umi mbaʼe opensáva, konsého, informasión térã taʼanga.

Upévare, jaiporúta jave Internet, ñañehaʼãkena jahechakuaa iporãva. Aníkena ñandevýro Évaicha. Jarovia mboyve umi informasión jatopáva iporã ñañeporandu: 1) Mávapa omoĩ ko informasión ha mbaʼérepa ikatu jajerovia hese? 2) Mbaʼépa ohupytyse ha maʼerãpa omoĩ upépe? 3) Oñemombeʼúpa moõguipa oñeguenohẽ umi informasion? 4) Oñembopyahu memépa umi informasión? Koʼag̃aite peve ñanepytyvõ Pablo heʼivaʼekue Timotéope: ‘Eñangareko porãke pe ojehejavaʼekuére ndéve. Ani rehendu ñeʼẽ rei ha vyrorei opoíva umi heʼíva ijehe aipo iñaranduha’ (1 Tim. 6:20).

Aiporu porãpa che tiémpo?

Jaiporu porãramo Internet katuete hembyvéta ñandéve tiémpo, pláta ha nañanekaneʼõitereimoʼãi. Ñande rogaite guive ikatu jaheka peteĩ mbaʼe ivaratovéva ha ñambaʼejogua, ikatu jajapo umi trámite vankopegua oimeraẽ órape; jaheka ha jajogua umi pasáhe ivaratovéva, jaheka direksión ha teléfono número, jahaséramo peteĩ hendápe ha ndajaikuaaporãi, Internétpe ikatu jahecha moõ rupípa pyaʼeve ha varatovéta ñandéve. Umi sukursál orekóva umi testigos de Jehová ojevale koʼã mbaʼére oiporu porãve hag̃ua itiémpo, pláta ha ombaʼapo porãve hag̃ua.

Péro ikatu avei ñanembyai. Pór ehémplo oĩ oiporúva Internet vyʼarãnte ha upéicha hoʼupa itiémpo oiporu rangue oñekomunika hag̃ua. Heta óra ningo oiporu Internet, pór ehémplo ohuga, ombaʼejogua, oñemongeta, oguerahauka mensáhe ha ojapo hag̃ua oimeraẽ mbaʼe. Upéicha omboyke umi mbaʼe iñimportantevéva, umíva apytépe ifamília, iñamigokuéra ha kongregasión. Péicha Internet peteĩ vísioma chupekuéra g̃uarã. Pór ehémplo peteĩ estúdio ojejapovaʼekue 2010-pe ohechauka 18,4% umi mitãrusu Coreaygua ndaikatuveimaha oiko Internet reheʼỹ. Peteĩ grúpo de investigadór Alemaniaygua omombeʼu “káda día hetaveha umi tembireko heʼíva imenakuéra oñenvisiaha Internet rehe”. Umíva apytégui peteĩ tembireko heʼi Internet tuicha okambia hague iménape ha upéva ombyai jepe hague hogapy.

Peteĩ kuimbaʼe oguerahauka kárta peteĩ sukursál de los testigos de Jehovápe, upépe omombeʼu ndaikatuveimaha oiko Internet reheʼỹ. Haʼe heʼi sapyʼánte diez óra pukukue oiporuha Internet. Ñepyrurã haʼetévaicha vyroreínteva, péro mbeguekatúpe oñepyrũma ofalta rreunionhápe ha ni noñemboʼevéima. Haʼe sapyʼapyʼa ojeprepara rreunionrã ha oĩ jave upépe oipotaitereíma opa oho hag̃uáicha hógape oiporu jey Internet. Péro upéi ohechakuaa tuicha iprovlemaha ha ojapo tekotevẽva okambia  hag̃ua. Mbaʼépa ñanemboʼe ko mbaʼe? Ñañatendevaʼerãha mboy tiémpopa jaiporu Internet ani hag̃ua ñanembyai.

Añetehápepa ideprovécho?

1 Tesalonicenses 5:21, 22-pe heʼi: ‘Pehesaʼỹijo opa mbaʼe ha pejepytaso mbarete pe iporãva rehe. Pejei opaichagua mbaʼe vaígui’. Ñañatendevaʼerã ani hag̃ua jahecha umi mbaʼe Jehová ndoguerohorýiva. Aníkena jaavri Internétpe umi sítio oĩháme umi mbaʼe naiporãiva kristiánope g̃uarã. Internétpe ningo henyhẽte pornografía ha nañañatendéiramo ikatu jaʼa ko ñuhãme.

Ñañeporanduvaʼerã: “Atĩnepa che rembireko térã che ména, che túva térã peteĩ ermáno oike sapyʼáramo che kotýpe ha ohecha pe oĩva che komputadórape aiporu jave Internet?”. Oiméramo upéicha, iporãvéta ndajaiporúi Internet ñaneaño jave. Añetehápe Internet rupive heta mbaʼe ikatu jajapo, pór ehémplo ñambaʼejogua ha ñañemongeta ñande rapichándi, péro ikatu avei ñandereity tekovaípe (Mat. 5:27, 28).

Tekotevẽpa jaguerahauka jey umi mensáhe?

Internet rupive ikatu jaheka ha ñambohasa informasión ñande rapichakuérape. Péro jahechavaʼerã añetépa umi informasión jaguerahaukáva ha noporombyaimoʼãipa. Iporã ñañeporandu: “Mbaʼéichapa ikatu aikuaa añeteha umi informasión? Arekópa permíso ambohasa hag̃ua che rapichakuérape? * Iporã ha oporomokyreʼỹtapa? Mbaʼérepa aguerahaukase ko informasión? Ajechauka hag̃uántepa che amigokuérape?”.

Pe correo electrónico ikatu ñanepytyvõ heta mbaʼépe, péro ikatu avei ñandejahoʼi informasiónpe. Oĩ omondóva hetaiterei notísia ha mensáhe naiñimportánteiva umi direksión oikuaávape guive ha upéicha oipeʼa rei hapichakuéragui itiémpo. Ani hag̃ua jajapo upéicha, ñapensa porã vaʼerã ñamondo mboyve umichagua mensáhe. Ñapensamína: Maʼerãpa oĩ umi korréo? Yma oĩ oguerahaukáva kárta iñamígo ha ihentekuérape omombeʼu hag̃ua chupekuéra umi mbaʼe ohasáva ha oikóva hesekuéra. Ndaupeichaivaʼerãpa avei umi mensáhe jaguerahaukáva correo electrónico rupive? Iporãpa jaguerahauka umi informasión ndajaikuaaporãiva añeteha?

Upéicharõ, heʼisépa umi mbaʼe jaʼevaʼekue ndajaiporuveimavaʼerãha Internet? Sapyʼánte tekotevẽta ojejapo upéicha, pór ehémplo upe kuimbaʼe ñañeʼẽ hague, ndaikatuivaʼekue oiko Internet reheʼỹ. Péro upéva ndeʼiséi ndovaleiha jaiporu Internet. ‘Ñanearandúramo ha ñañangareko ñandejehe’ jaiporu jave Internet, jahechakuaáta ikatuha tuicha ñanepytyvõ (Pro. 2:10, 11).

[Nóta]

[Nóta oĩva taʼanga ndive páhina 4]

Mbaʼérepa ñañatende porã vaʼerã jaheka jave umi informasión Internétpe?

[Nóta oĩva taʼanga ndive páhina 5]

Ñapensa porãpa ñamondo mboyve peteĩ mensáhe?