Ñaipytyvõ umi kuimbaʼépe oñakãrapuʼã hag̃ua

‘Ko ára guive rejagarra rangue pira, rejagarráta kuimbaʼekuéra’ (LUC. 5:10, NM)

1, 2. a) Mbaʼépa ojapo heta kuimbaʼe Jesús opredikárõ guare b) Mbaʼe mbaʼépa jahecháta ko artíkulope?

PETEĨ jey, Jesús ha hemimboʼekuéra opredikárõ guare Galiléape, ojupi peteĩ kanóape ha oho mombyry oĩ hag̃uáme haʼeño. Ha umi hénte osegi chupekuéra yvýrupi, umíva apytépe oĩvaʼekue ‘5 mil kuimbaʼe rupi, ha oĩ avei kuña ha mitãnguéra’ (Mat. 14:21, NM). Ótro día katu hetaiterei hénte oñemboja Jesús rendápe oipotágui oñemonguera chupekuéra ha ohenduségui omboʼéva. Umíva apytépe oĩvaʼekue ‘4 mil kuimbaʼe, ha oĩ avei kuña ha mitãnguéra’ (Mat. 15:38, NM). Jahechaháicha, heta kuimbaʼe ohovaʼekue Jesús rendápe ha ohenduse upe omboʼéva. Ha haʼe oipota hetave voi omoirũ chupe, mbaʼérepa jaʼe upéva? Hemimboʼekuéra oguenohẽrõ guare hetaiterei pira peteĩ milágro rupive, Jesús heʼi Simónpe: ‘Ko ára guive rejagarra rangue pira, rejagarrata kuimbaʼekuéra’ (Luc. 5:10, NM). Péicha ombojoja pe már ko múndore, ha upégui ojagarravaʼerã hemimboʼekuéra heta kuimbaʼe.

² Koʼág̃a rupi avei heta kuimbaʼe ohenduse pe marandu porã ha oikuaaseve Ñandejárape (Mat. 5:3). Péro heta oĩ opytánteva upépe ha noñakãrapuʼãi Jehová servísiope. Mbaʼéichapa ñaipytyvõkuaa umichaguápe? Jesús ndopredikáiramo jepe kuimbaʼekuérapente, oñeʼẽ heta mbaʼe oipyʼapývare chupekuéra. Ñande avei ñañehaʼãvaʼerã jajapo upéicha ha ñaipytyvõ kuimbaʼekuérape ombohovaikuaa hag̃ua umi mbaʼe oipyʼapýva chupekuéra. Mbaʼe mbaʼépa hína umíva? Jahechamína mbohapy mbaʼe: 1) ojepyʼapyeterei hemikotevẽre, 2) ndopytavaiséi hapichakuéra renondépe ha 3) oimoʼã ndovaleiha mbaʼeverã.

Ojepyʼapyeterei hemikotevẽre

3, 4. a) Mbaʼépa oipyʼapyve jepi kuimbaʼekuérape? b) Mbaʼérepa heta kuimbaʼe omotenonde hemikotevẽ Ñandejárape rangue?

³ Ambue árape, peteĩ mboʼehára leipegua opromete Jesúspe: ‘Mboʼehára, romoirũta mamo rehohápe’. Péro Cristo heʼívo chupe ‘yvypóra Raʼy ndorekoiha ni moõpa oñenóta opytuʼumi’, okambiáma opensa lája. Oiméne ko kuimbaʼépe oipyʼapýraʼe moõpa okarúta térã moõpa opytáta oke, ajeve la Bíbliape noñemombeʼúi omoirũ hague Jesúspe (Mat. 8:19, 20, NM).

⁴ Heta kuimbaʼe omotenonde umi mbaʼerepy ha omboyke Ñandejára rembipota. Omombaʼeve umi estúdio ijyvatevéva ha ombaʼapo pohýi ogana porãsevégui. Oimoʼã ideprovechoveha ipláta heta, ostudia rangue Ñandejára Ñeʼẽ ha oñehaʼã rangue oĩ porã Hendive. Ikatu ogusta chupekuéra la Biblia omboʼéva, péro ‘ojepyʼapyetereígui hemikotevẽre térã ambue mbaʼére ha oiko rupi pláta rapykuéri’, hesarái Ñandejáragui (Mar. 4:18, 19, NM). Péro, mbaʼéichapa Jesús oipytyvõraʼe hemimboʼekuérape omotenonde hag̃ua umi mbaʼe iñimportantevéva? Jahechamína.

5, 6. Mbaʼépa oipytyvõ Andrés, Pedro, Santiago ha Juánpe omotenonde hag̃ua predikasión?

⁵ Andrés, iñermáno Simón Pedro ndive ombaʼapovaʼekue péskape. Upéicha avei Juan, iñermáno Santiago ha itúva Zebedeo; ha amalisia oho porã chupekuéra, ajeve oreko ombaʼapóva hendivekuéra (Mar. 1:16-20). Andrés ha Juan oikuaa ñepyrũrõ guare Jesúspe,  Juan el Bautista rupive, ohechakuaa Jesús haʼeha pe Mesías. Upémarõ Andrés oho omombeʼu iñermáno Simón Pédrope, ha oiméne Juan avei oho omombeʼu iñermáno Santiágope (Juan 1:29, 35-41). Upe guive koʼã cuatro kuimbaʼe omoirũ Jesúspe opredika hag̃ua Galilea, Judea ha Samaria tuichakuére, péro upéi oho jey ombaʼapo hikuái péskape. Omombaʼéramo jepe Ñandejára rembipota nomotenondéi pe predikasión.

⁶ Tiémpo rire Jesús ojerure Pedro ha Andréspe omoirũ hag̃ua chupe ha heʼi: ‘Poipytyvõta pejagarra hag̃ua kuimbaʼe, pira pejagarraháicha’. Mbaʼépa ojapo upémarõ hikuái? ‘Upepete oheja irréd ha oho hendive.’ Péicha avei Santiago ha Juan ‘pyaʼe porã oguejy pe kanóagui, oheja itúvape ha oho Jesúsndi’ (Mat. 4:18-22, NM). Mbaʼépa oipytyvõ chupekuéra odesidi hag̃ua oiporupa itiémpo predikasiónpe? Ojapópa upéva akãrakúgui reínte? Nahániri. Haʼekuéra upe mboyve ohendúma voi Jesúspe ha ohecha ojapo hague heta milágro, hekojojaha ha heta hénte ohendu porã hague chupe opredikárõ guare. Upéicha rupi ojerovia mbareteve hikuái Jehováre.

7. Mbaʼéichapa ñaipytyvõkuaa ñane estudiántepe ojeroviave hag̃ua Jehová oñangarekotaha hese?

⁷ Ojapo haguéicha Jesús, mbaʼéichapa ikatu ñaipytyvõ ñane estudiántepe ojeroviave hag̃ua Jehováre? (Pro. 3:5, 6.) Upearã tekotevẽ ñaporomboʼekuaa. Pór ehémplo, ñamyesakã jave peteĩ mbaʼe jahechaukavaʼerã chupe Ñandejára katuete ñanderovasataha ñamotenondéramo Irréino (elee Malaquías 3:10 ha Mateo 6:33). Ikatu ningo jahechauka chupe heta téysto omombeʼúva Jehová oñangarekoha isiervokuérare, péro ñane ehémplo ikatu avei oipytyvõ chupe. Ñamombeʼukuaa mbaʼéichapa Jehová ñanepytyvõ ha péicha ojeroviavéta Hese. Avei iporãta ñamombeʼúramo chupe umi ermáno rembiasakue osẽva jepi ñane puvlikasiónpe. *

8. a) Mbaʼérepa tekotevẽ ñane estudiánte ‘otantea ha ohecha Jehová imbaʼeporãha’? b) Mbaʼéichapa ñaipytyvõkuaa ñane estudiántepe haʼe voi ohechakuaa hag̃ua Jehová imbaʼeporãha?

⁸ Péro ñane estudiánte jerovia arakaʼeve naimbaretemoʼãi olee térã ohendúnterõ Ñandejára ohovasaha hembiguaikuérape, tekotevẽ haʼe voi oñandu Jehová imbaʼeporãha. Pe salmísta heʼivaʼekue: ‘Petanteána ha pehecháta Jehová imbaʼeporãha, ovyʼaite upe kuimbaʼe ojeroviáva hese’ (Sal. 34:8, ÑÑB). Mbaʼéichapa ñaipytyvõkuaa ñane estudiántepe ohechakuaa hag̃ua Jehová imbaʼeporãha? Ikatu peteĩ ñane estudiánte ohasa asy ivai rupi isituasión ha ohejase avei peteĩ vísio, ikatu oime opita, ihugadór térã omokõiterei (Pro. 23:20, 21; 2 Cor. 7:1; 1 Tim. 6:10). Umícha jave ñamboʼevaʼerã ñane estudiántepe ojerure hag̃ua Jehovápe toipytyvõ chupe oheja hag̃ua umi vísio vai. Avei ñamokyreʼỹvaʼerã chupe tomotenonde Ñandejára rembipota ha toñemotiémpo káda semána ostudia hag̃ua la Biblia, tojeprepara rreunionrã ha oho hag̃ua Salónpe. Haʼe voi ohechakuaávo Jehová ohovasaha chupe, ijerovia imbaretevéta ha ohechakuaáta imbaʼeporãha.

 Ndopytavaiséi hapichakuéra renondépe

9, 10. a) Mbaʼérepa Nicodemo ha José de Arimatea nomombeʼuivaʼekue avavépe ojeroviaha Jesús rehe? b) Mbaʼéicha rupípa heta kuimbaʼe okyhyje omoirũ hag̃ua Jesúspe?

⁹ Oĩ heta kuimbaʼe nomoirũiva Jesúspe ndopytavaiséi rupi hapichakuéra renondépe. Pór ehémplo, yma Nicodemo ha José de Arimatea nomombeʼúi avavépe ojeroviaha Jesús rehe okyhyje rupi umi hudío heʼi ha ojapótavagui (Juan 3:1, 2; 19:38). Ha ndareíri ningo okyhyje hikuái. Umi omoakãva hudiokuéra rrelihión ndaijaʼeietereivaʼekue Jesús rehe ha omosẽ voi umi sinagógagui opavave ojeroviávape hese (Juan 9:22).

¹⁰ Koʼág̃a rupi heta lugárpe oiko avei upéicha. Peteĩ kuimbaʼe oserviséramo Ñandejárape térã omombaʼéramo la Biblia ỹrõ peteĩ rrelihión, oñembohory hese ikompañéro de traváho, iñamígo térã ihentekuéra. Ambue hendápe ojeapeligra voi heʼi haguérente okambiaseha irrelihión. Ha koʼýte ojejopy chupe oĩramo ehérsitope, ombaʼapóramo polítikape térã ambue grúpope. Peteĩ karai Alemaniaygua heʼi voi: “Aikuaa peẽ Testígo pemboʼéva siertoha. Péro oikóramo chehegui Testígo koestedía, koʼẽrõ oikuaapátama opavave. Mbaʼe piko heʼíta cherehe che kompañéro de traváho, che vesinokuéra térã umi oĩva pe klúb rohohápe che famíliandi? Ndaikatumoʼãi ningo agueropuʼaka”.

11. Mbaʼéichapa Jesús oipytyvõ hemimboʼekuérape okyhyjérõ guare hikuái yvypóragui?

¹¹ Jesús apostolkuéra ningo ndaipyʼajuivaʼekue, upéicharõ jepe enterovéva oñehaʼã ani hag̃ua okyhyje yvypóragui (Mar. 14:50, 66-72). Mbaʼéichapa Jesús oipytyvõ hemimboʼekuérape oñakãrapuʼã hag̃ua Jehová servísiope oĩramo jepe ojopýva chupekuéra? Haʼe omombeʼúma voi hemimboʼekuérape oĩtaha heta ombohasa asýtava chupekuéra. Ñepyrũrã heʼi: ‘Pevyʼa umi hénte ndaijaʼéiramo penderehe, ojeguarúramo pendehegui, otakýramo penderehe, ha penemoherakuã vai yvypóra Raʼy rehehápe’ (Luc. 6:22, NM). Péicha ohechauka porã oĩtaha heta opuʼãva hesekuéra, péro avei heʼi ikyreʼỹ ha imbarete jeytaha hikuái ojeruréramo Ñandejárape (Luc. 12:4-12). Upéi heʼi umi omoirũ ramóvape chupe ojeheʼa hag̃ua hemimboʼekuérare ha péicha oñoamígo hag̃ua hikuái (Mar. 10:29, 30).

12. Mbaʼéichapa ikatu ñaipytyvõ umi ostudiávape la Biblia anive hag̃ua okyhyje yvypóragui?

¹² Ñande avei ñaipytyvõvaʼerã umi ostudiávape la Biblia anive hag̃ua okyhyje yvypóragui ha oñemotenonde hag̃ua umi provlémare. Péicharõ añoite ikatúta ojepytaso mbarete ojapo hag̃ua Ñandejára rembipota (Juan 15:19). Ikatu ñaipytyvõ chupekuéra oprepara hag̃ua umi téysto ndahasýiva oiporu hag̃ua ombaʼeporandúramo chupe ikompañéro de traváho térã ambue tapicha. Ñañehaʼãvaʼerã jaiko iñamígoramo ha avei ñaipytyvõ chupe oikuaa hag̃ua ambue ermáno ñane kongregasionguápe, koʼýte umi ombohováiva iprovlemaichagua. Avei tekotevẽterei ñamokyreʼỹ chupekuéra oñemboʼe meme hag̃ua ipyʼaite guive, ha  péicha oñemoag̃ui ha ojeroviavéta Jehováre (elee Salmo 94:21-23 ha Santiago 4:8).

Oimoʼã ndovaleiha mbaʼeverã

13. Mbaʼérepa heta kuimbaʼe oimoʼã ndaikatuiha oñakãrapuʼã kongregasiónpe?

¹³ Oĩ kuimbaʼe oimoʼãva ndaikatumoʼãiha oñakãrapuʼã kongregasiónpe ndoleeporãi, noñeʼẽkuaái térã hiʼotĩetereígui. Oĩ avei noñeñanduporãiva oñeʼẽ hag̃ua umi mbaʼe opensa ha ogueroviávare hapichakuéra renondépe, térã ijetuʼueterei chupe ostudia, okomenta ha opredika hag̃ua. Peteĩ ermáno heʼi: “Chemitãʼípe ag̃uahẽvo peteĩ ógape ambopu guaʼúnte pe tímbre ha mbeguekatu ajei upégui pono avave cherecha térã cherendu”. Upéi omombeʼuve: “Apensa haguénte ahataha apredika ogahárupi chembohasyetéma voi”.

14. Mbaʼérepa Jesús remimboʼekuéra ndaikatúikuri omonguera pe mitãrusu endemoniádope?

¹⁴ Ñapensamíntena mbaʼéichapa oiméne oñeñandu vai rakaʼe Jesús remimboʼekuéra ndaikatúirõ guare omonguera peteĩ mitãrusu endemoniádope. Upérõ pe mitãrusu túva heʼi Jesúspe: ‘Che raʼy ningo oĩ vaieterei, oreko epilépsia ha pyʼỹinte hoʼa tatápe, ha hoʼa jepi avei ýpe. Aguerúkuri ne remimboʼekuérape, péro ndaikatúi omonguera chupe’. Upémarõ, Jesús omosẽ pe demóniope ha péicha omonguera pe mitãrusúpe. Upe rire hemimboʼekuéra oporandu chupe: ‘Mbaʼégui piko ore ndaikatúiraʼe romosẽ pe demóniope?’. Haʼe heʼi chupekuéra: ‘Pejeroviaʼietereígui. Añetehápe haʼe peẽme: Pende jerovia tuicháramo peteĩ mostása raʼỹicha, pejéta ko sérrope: ‘Tereho koʼágui amoite’, ha ohóta, ndaiporimoʼãi ikatuʼỹvaʼerã pejapo’ (Mat. 17:14-20, NM). Jahechaháicha, tekotevẽterei jajerovia Jehováre jagueropuʼaka hag̃ua umi provléma tuicháramo jepe sérroicha. Péro mbaʼépa oikóta nañapenáiramo ko mbaʼére ha ñandejeheguínte ñasolusionase umi provléma? Ñasẽ vaíta katuete ha ñapensáta ndajavaleiha mbaʼeverã.

15, 16. Mbaʼéichapa ikatu ñaipytyvõ ñane estudiántepe anive hag̃ua opensa ndovaleiha mbaʼeverã?

¹⁵ Anive hag̃ua ñane estudiánte opensa ndovaleiha mbaʼeverã ñamokyreʼỹvaʼerã chupe ojerovia hag̃ua Jehováre ha ani ijehénte. Upéva Pedro oipotavaʼekue ojejapo ohaírõ guare: ‘Ñandejára puʼaka poguýpe peñemomirĩ, upéicharõ Haʼe penemopuʼãne opyta porãveha ára. Pemoĩ opa mbaʼe pendepyʼapýva ipópe’ (1 Ped. 5:6, 7, JMP). Jaipotáramo ñane estudiánte ohupyty upéva ñamboʼevaʼerã chupe omombarete hag̃ua ijerovia. Péicha omombaʼéta Ñandejára rembipota, ohayhúta Iñeʼẽ ha omoheñóita hekovépe umi mbaʼe porã oúva espíritu sántogui (Gál. 5:22, 23). Avei akóinte oñemboʼéta (Fili. 4:6, 7). Ha ojeruréta Jehovápe tombopyʼaguasu ha tomombarete chupe ombohovái hag̃ua umi provléma térã ojapo porã hag̃ua umi tembiapo oñemeʼẽva chupe (elee 2 Timoteo 1:7, 8).

¹⁶ Oĩ ningo estudiánte ikatupyryvevaʼerã olee, oñemongeta térã oñeʼẽ hag̃ua hapichakuéra renondépe. Oĩ katu opensáva nomereseiha oservi Ñandejárape ojapo rupi heta mbaʼe vai oikuaa mboyve Jehovápe. Tahaʼe haʼeháicha, ovyʼáta hikuái ñanepasiénsia ha ñaipytyvõramo chupekuéra mborayhúpe. Jesús heʼivaʼekue voi: ‘Hesãiva noikotevẽi oñepohãno, umi hasýva ningo la oikotevẽva’ (Mat. 9:12, NM).

 Ñamog̃uahẽkena pe marandu porã kuimbaʼekuérape

17, 18. a) Mbaʼéichapa ikatu japredika hetave kuimbaʼépe? b) Mbaʼépa jahecháta pe ótro artíkulope?

¹⁷ Ñande ningo jaipotaiterei umi kuimbaʼe ohendu pe marandu porã, jaikuaágui upéva añoite ikatuha omoag̃ui chupekuéra Ñandejárare (2 Tim. 3:16, 17). Upéicharõ, mbaʼéichapa ikatu ñaipytyvõ hetave kuimbaʼépe? Ñasẽ jave japredika, opyta porãramo, ikatu ñaporandu pe karai omoakãvare ogapy. Térã jaha oĩha órape hikuái hógape, pór ehémplo kaʼarupytũ, sábado térã domingo kaʼaru ỹrõ arete jave. Avei japredikavaʼerã chupekuéra mamo oĩhápe hikuái ha ani ñanderesarái umi ermána ména ndahaʼéivagui Testígo.

¹⁸ Jasegíkena japredika opaichagua héntepe, jaikuaágui oĩha gueteri heta ipyʼaporãva ohenduséva pe marandu porã. Ha ñanepasiénsiakena ñaipytyvõ hag̃ua umi ohendu porãvape. Péro, mbaʼépa ikatu jaʼe umi kuimbaʼe ojevautisamavaʼekuére? Mbaʼéichapa ñaipytyvõkuaa chupekuéra oñakãrapuʼãve hag̃ua? Upéva jahecháta pe ótro artíkulope.

[Nóta]

Mbaʼépa rembohováita?

• Mbaʼépa oipytyvõta umi kuimbaʼépe omotenonde hag̃ua Ñandejára rembipota?

• Mbaʼéichapa ñaipytyvõkuaa ñane estudiántepe anive hag̃ua okyhyje yvypóragui?

• Mbaʼépa oipytyvõta umi kuimbaʼépe anive hag̃ua opensa ndovaleiha mbaʼeverã?

[Porandu ñahesaʼỹijóva]

[Nóta oĩva taʼanga ndive páhina 25]

Ñañehaʼãpa ñamog̃uahẽ pe marandu porã kuimbaʼekuérape mamo oĩhápe hikuái?

[Nóta oĩva taʼanga ndive páhina 26]

Mbaʼéichapa ikatu ñaipytyvõ ñane estudiántepe ombohovaikuaa hag̃ua iprovlemakuéra?