1, 2. a) ¿Mbaʼépa oiko jepi ñapensa ha ñañeʼẽ meméramo peteĩ jahayhúvare? (Ehecha pe taʼanga oĩva iñepyrũme.) b) ¿Mbaʼe mbaʼépa ñambohováita?

ÑAPENSA ha ñañeʼẽ mantéramo peteĩ jahayhúvare, katuete ñañemoag̃uive hese. Upéicha avei oiko ñanemanduʼa meméramo Jehováre ha ñamombeʼu ótrope mbaʼeichaguápa haʼe. Por ehémplo, David haʼéramo guare peteĩ ovecharerekua, heta vése omaña pe yvágare, ojesareko umi mbyjaitáre ha ojepyʼamongeta Ijapohare ijojahaʼỹvare. Haʼe ohai vaʼekue: “Amañáramo yvagakuéra rehe, nde po rembiapokuére, pe jasy ha umi mbyja rehe nde rejapo vaʼekue, che voi haʼe: ‘¿Mbaʼépa pe kuimbaʼe, nemanduʼa hag̃ua hese ha rejepyʼapy hag̃ua Adán raʼykuéra rehe?’” (Sal. 8:3, 4, ÑÑB). Apóstol Pablo avei ohesaʼỹijo vaʼekue mbaʼéichapa Jehová okumpli porãmbaite hembipota pe Israel Ñandejára mbaʼévape g̃uarã, ha heʼi: “¡Ajépa ipypukuete Ñandejára mbaʼeta, arandu ha mbaʼekuaa!” (Rom. 11:17-26, 33, NM).

² Ñasẽ jave japredika, ñapensa meme Jehováre ha ñañeʼẽ hese. Koʼã mbaʼe tuichaiterei ñanepytyvõ ñaime porã hag̃ua hendive. Heta ermáno oservíva de tiémpo kompléto, ohechakuaa ohayhuveha Jehovápe oñemeʼẽmbaite rupi ombaʼapo hag̃ua pe Rréino rehehápe. Oiméramo nde reservíma voi de tiémpo kompléto, térã reñehaʼã reína rejapo hag̃ua upéva, ejepyʼamongetamína rehecha hag̃ua mbaʼéichapa reime porãta Jehová ndive reiporupaitéramo ne tiémpo reservi hag̃ua chupe. Ha oiméramo nde peteĩ prekursór, eñeporandumi: “¿Mbaʼépa ajapo vaʼerã ani hag̃ua aheja ko tembiapo ñanembovyʼaitéva?”. Ha oiméramo neʼĩra gueteri reñepyrũ, epensami: “¿Mbaʼépa ajapokuaa ikatu hag̃uáicha aservi de tiémpo kompléto?”. Jahechamína koʼág̃a mbaʼéichapa pe prekursorádo ñanepytyvõ ñaime porã hag̃ua Jehová ndive.

3. ¿Mbaʼéichapa ñanepytyvõ ñañeʼẽvo umi mbaʼe porãita ojehupytýtavare pe Rréino poguýpe?

³ Ñañeʼẽvo umi mbaʼe porãita ojehupytýtavare pe Rréino poguýpe, ñañemoag̃uive Jehováre. ¿Mbaʼe téxtopa reiporuseve repredika jave ogahárupi? Ikatu oime ndegustaiterei heʼíva Salmo 37:10, 11; Daniel 2:44; Juan 5:28, 29 térã Revelación 21:3, 4. Ñañeʼẽ jave ñande rapichakuéra ndive koʼã promésa porãitére, ñande voi ñanemanduʼa Ñandejára ipojeraitéva omeʼẽha ñandéve “opa mbaʼe porã ha rregálo hekopeguáva”. Ha upéva koʼýte ñanemoag̃uive hese (Sant. 1:17, NM).

4. ¿Mbaʼérepa ñamombaʼeve pe añetegua jahechávo mbaʼe situasiónpepa oĩ umi hénte?

⁴ Jahechávo mbaʼeichaitépa umi hénte oiko pytũmbýpe, ñamombaʼeve pe añetegua. Umi tapicha ndoservíriva Jehovápe ndoikuaái mbaʼépa ojapo vaʼerã osẽ porã ha ovyʼa hag̃ua. Opavave lénto ojepyʼapy henonderãre ha ndorekói mbaʼeveichagua esperánsa. Oikuaase joa hikuái maʼerãpa jaikove, péro umi irrelihiosovéva jepe saʼi oikuaa Ñandejára Ñeʼẽ omboʼéva. Ojogua hikuái umi hénte oiko vaʼekuépe Nínivepe (elee Jonás 4:11). Ñasẽ meméramo japredika, jahechakuaa mbaʼe situasiónpepa oĩ umi tapicha ndoservíriva Jehovápe ha mbaʼeichaitépa idiferénte chuguikuéra umi oĩva Ñandejára puévlope (Is. 65:13). Ha pe predikasión rupive jahechakuaa ndahaʼeiha ñandévente Jehová ñanepytyvõva ñamombarete hag̃ua ñande jerovia, síno avei oinvita opavavépe osẽ hag̃ua pytũmbýgui ha omeʼẽ chupekuéra esperánsa añetetéva (Rev. 22:17).

5. ¿Mbaʼéichapa jahecha ñane provlemakuéra ñaipytyvõ jave ñande rapichápe ojerovia hag̃ua Jehováre?

⁵ Ñaipytyvõ rupi ñande rapichakuérape ojerovia hag̃ua Ñandejárare, ndajajepyʼapyguasúi ñane provlemakuérare. Peteĩ prekursóra rregulár hérava Trisha ohechakuaa upéva añeteha, ituvakuéra ojedivorsiárõ guare. Haʼe omombeʼu upe situasión ojopyeterei hague chupe. Peteĩ díape haʼe oñembyasyeterei ha ni nosẽséi voi hógagui, upéicharõ jepe oho omboʼe la Biblia mbohapy mitãme. Koʼã mitã ohasa avei peteĩ provléma ijetuʼúva hogapýpe. Itúva oho vaʼekue hógagui ha peteĩ iñermáno tuichavéva ohugapa hesekuéra. Trisha omombeʼu: “Ahechakuaa vyroreiha umi provléma che arekóva ambojojávo umi mbaʼe ohasávare koʼã mitã. Rostudia jave, opuka jepi hikuái ha ahecha hesakuéra mimi ojajaiha ohendúvo umi mbaʼe opokóva ikorasõre. Chéve g̃uarã, koʼã mitã peteĩ jopói oúva Jehovágui, ha tuicha chepytyvõ upe día ijetuʼuetévape”.

6, 7. a) ¿Mbaʼéichapa ñanepytyvõ jajeroviave hag̃ua ñamboʼéramo pe añetegua? b) ¿Mbaʼéichapa ñamombaʼeve Ñandejára arandu jahechávo umi ostudiáva la Biblia okambiaha ohóvo?

⁶ Ñamboʼévo pe añetegua oĩva la Bíbliape ñanepytyvõ jajeroviave hag̃ua. Apóstol Pablo tiémpope oĩ vaʼekue hudío ndojapóiva umi mbaʼe omboʼéva. Upévare haʼe ohai chupekuéra: “Nde reikóva remboʼe ótrope, ¿mbaʼére piko nereñehekomboʼéi ndejupe?” (Rom. 2:21, NM). Ñane tiémpope umi prekursór ohechauka idiferenteha umi hudíogui. Haʼekuéra oreko heta oportunida omboʼe hag̃ua pe añetegua ha ojapo hag̃ua estúdio vívliko. Péro ikatu hag̃uáicha oporomboʼe hekoitépe, tekotevẽ ojeprepara porã ombostudiáta jave peteĩ tapichápe, ha sapyʼánte ohesaʼỹijo pypuku vaʼerã peteĩ téma ikatu hag̃uáicha ombohovái porã umi porandu. Peteĩ prekursóra hérava Janeen heʼi: “La Biblia omboʼéva oike oikeve che akã ha che korasõme amboʼe jave che rapichápe. Ahechakuaa ajerovia mbareteveha ahávo káda día”.

⁷ Ñamombaʼeve Ñandejára arandu jahechávo umi ostudiáva la Biblia okambiaha ohóvo (Is. 48:17, 18). Ha upéva koʼýte ñanemombarete jasegi hag̃ua umi konsého Jehová omeʼẽva. Peteĩ prekursóra hérava Adrianna heʼi voi: “Peteĩ persóna ojeroviáramo ijehénte, osẽ  vaíta katuete, péro oñepyrũramo ojerovia Jehová arandúre, sapyʼaitépe ohechakuaáta ideprovechoha chupe”. Ótro prekursór hérava Phil heʼi: “Pyʼỹinte jahecha jepi Jehová oipytyvõha umi oñehaʼãvape okambia, péro ndaikatúiva okambia ijehegui rei”.

8. ¿Mbaʼéichapa ñanepytyvõ ñasẽvo japredika ñane ermanokuéra ndive?

⁸ Japredikávo ñane ermanokuéra ndive ñanekyreʼỹve jaservi hag̃ua Jehovápe (Prov. 13:20). Umi prekursór ohasa heta tiémpo predikasiónpe ótro maranduharakuéra ndive, ha upérupi ‘oñomokyreʼỹ’ joa hikuái (Rom. 1:12, NM; elee Proverbios 27:17). Peteĩ prekursóra hérava Lisa heʼi: “Ñande travahohápe umi hénte oñogana gana ha iñaña. Káda día ñaaguanta vaʼerã umi oñeʼẽ vaívape ótrore ha iñeʼẽ kyʼávape. Sapyʼánte oĩ opukáva ha oñembohorýva ñanderehe jaiko haguére kristiáno teéicha. Péro ñasẽramo japredika ñane ermanokuéra ndive, tuicha idiferénte, ñanekyreʼỹve rei japytávo. Pyharérõ g̃uarã, chepiroʼy asy chekaneʼõramo jepe”.

9. ¿Mbaʼéichapa ñamombareteve ñane matrimónio jajapóramo ñande prekursorádo oñondive?

⁹ Jajapóramo ñande prekursorádo ñane rembiayhu ndive, ñamombareteve ñane matrimónio (Ecl. 4:12). Peteĩ ermána hérava Madeline ha ojapóva iprekursorádo iména ndive, omombeʼu: “Che ha che ména ikatu roñemongeta umi mbaʼe rohasa vaʼekuére predikasiónpe, térã peteĩ téxto rojuhúvare rolee jave la Biblia ha ikatúva roiporu predikasiónpe. Káda áño rohasáva oñondive roservívo de prekursór, roñemoag̃uive ojuehe”. Trisha heʼi avei: “Mokõivévante rodesidi ndorodevemoʼãiha mbaʼevére. Upéicha rupi ndoroikovaíriva plátare. Rosẽ ropredika oñondive ha rojapo ore rrevisíta ha estúdio vívliko, ha upéva orepytyvõ roikuaa hag̃ua mbaʼéichapa roñeñandu ha mbaʼéichapa oĩ ore jerovia”.

10. ¿Mbaʼépa jahupyty jahechávo Jehová ñanepytyvõha ñamotenonde rupi Irréino?

 ¹⁰ Ñamotenondévo Jehová Rréino haʼe ñanepytyvõ ha ombohovái ñane ñemboʼe, ha upéicha jajeroviave hese. Añetehápe ningo upéva oñandúnte voi entéro ermáno iñeʼẽrendúva. Péro umi oservíva de tiémpo kompléto koʼýte ohechakuaa ikatutaha osegi iprekursorádo ojeroviáramo añoite Jehováre (elee Mateo 6:30-34). Peteĩ prekursór hérava Curt ha oservíva jepi avei de superintendénte de sirkuíto sustitúto, omombeʼu ojejerure hague chupe ovisita hag̃ua peteĩ kongregasión opytáva dos óra imédia hógagui. Haʼe ha hembireko, haʼéva avei prekursóra, oreko kombustívle og̃uahẽ hag̃ua pe kongregasión pevénte, péro ndorekovéima ou jey hag̃ua. Hiʼarive ofalta gueteri una semána okovra hag̃ua itravahohápe. Pe ermáno heʼi ndoikuaái hague mbaʼépa ojapóta. Péro upéi oñemboʼe ha odesidi oho ovisita pe kongregasión. Haʼe ha hembireko ojerovia Jehová omeʼẽtaha chupekuéra umi mbaʼe oikotevẽva. Osẽmbotaitévo hikuái hógagui, ohenói chupekuéra peteĩ ermána ha heʼi orekoha peteĩ rregálo. Omeʼẽ chupekuéra ikombustívle repyrã, kavalete pe oikotevẽ vaʼekue ou jey hag̃ua hikuái. Curt heʼi: “Pyʼỹinte jahasávo koʼã mbaʼe, katuete jahecha Jehová ndaijyvambykyiha”.

11. ¿Mbaʼérepa jaʼekuaa umi prekursór ohupytyha heta mbaʼe porã?

¹¹ Jahechaháicha, umi prekursór oñemeʼẽmbaitéva oservi hag̃ua Jehovápe ha ojapóva ikatúva guive oñemoĩ porã hag̃ua hendive, pyʼỹinte ohechakuaa ohupytyha heta hetave mbaʼe porã (Deut. 28:2). Upéicharõ jepe, umi ermáno ojapóva iprekursorádo ohasa jepi heta mbaʼe ijetuʼúva. Opavave Ñandejára rembiguái ohupyty avei Adán rembiapo vai repykue. Por ehémplo, oĩ ermáno ohejáva iprekursorádo peteĩ tiémpore. Péro heta vése ikatu oñesolusionánte upe provléma, térã sapyʼánte ikatu voi odesidi porã ani hag̃ua oike akãrasýpe. ¿Mbaʼépa ojapo vaʼerã umi prekursór osegi hag̃ua vyʼapópe iservísio?

12, 13. a) ¿Mbaʼépa ojapo vaʼerã peteĩ prekursór ndaikatúiramo okompleta hiʼóra? b) ¿Mbaʼérepa umi prekursór tekotevẽ olee la Biblia káda día, ostudia haʼeñoháme ha ojepyʼamongeta?

¹² Opavave lénto umi prekursór hembiapo heta. Ha ikatu hag̃uáicha okumpli umi rresponsavilida orekóva, tekotevẽ omohenda porã itiémpo (1 Cor. 14:33, 40). Peteĩ prekursór ndaikatúiramo okompleta hiʼóra, ohecha vaʼerã mbaʼépepa oiporu oikóvo itiémpo (Efes. 5:15, 16). Por ehémplo, ikatu oñeporandu: “¿Mboy órapa aiporu ajediverti hag̃ua? ¿Tekotevẽpa ajejokokuaave? ¿Ikatúpa amohenda porãve pe tiémpo aiporúva ambaʼapo hag̃ua?”. Entéro kristiáno jaikuaa ikatuha sapyʼaitépe jaiporupa ñane tiémpo umi mbaʼe naiñimportanteguasúivape. Upévare umi oservíva de tiémpo kompléto ohecha vaʼerã mbaʼéichapa ojapo oikóvo hembiapo ha okambia tekotevẽhápe.

¹³ Umi prekursór tekotevẽ olee la Biblia káda día, ostudia haʼeñoháme ha ojepyʼamongeta umi mbaʼe oaprendévare. Upévare oñatende vaʼerã hikuái ani hag̃ua mbaʼeve naiñimportánteiva oipeʼa chuguikuéra pe tiémpo oiporu vaʼerã umi mbaʼe tekotevẽvévape (Filip. 1:10). Por ehémplo, ñamoĩ chupe peteĩ prekursór og̃uahẽha hógape opredika rire un diaite ha odesidi ojepreparataha rreunionrã. Péro ñepyrũrã omyendy ikomputadóra, olee ikorréo ha omondo mensáhe. Upe jave ohecha avei Internétpe ndaivaratovéimapa peteĩ mbaʼe ojoguaséva oikóvo. Oimoʼãʼỹre ohasáma haimete dos óra pe komputadóra renondépe ha neʼĩra gueteri ni oñepyrũ ostudia. ¿Mbaʼépa hína pe provléma? Por ehémplo, umi deportísta profesionál oñangareko vaʼerã ijehe ikatu hag̃uáicha osegi ohuga heta  tiémpore. Péicha avei pe prekursór omombarete vaʼerã ijerovia ostudia meme rupi haʼeñohápe ikatu hag̃uáicha osegi iservísio de tiémpo kompléto (1 Tim. 4:16).

14, 15. a) ¿Mbaʼérepa umi prekursór oñekontenta vaʼerã umi mbaʼe orekomívarente? b) ¿Mbaʼépa ojapo vaʼerã peteĩ prekursór orekóramo provléma?

¹⁴ Umi prekursór ikatupyrýva oñehaʼãmbaite oñekontenta umi mbaʼe orekomívarente. Jesús omokyreʼỹ vaʼekue hemimboʼekuérape ojesareko hag̃ua peteĩ mbaʼérente (Mat. 6:22). Haʼe voi oiko vaʼekue upéicha ani hag̃ua mbaʼeve ohesarea chupe hembiapógui. Upévare ikatu kuri heʼi: “Umi aguara oreko haity ha guyrakuéra yvagapegua oreko hupa. Pe Yvypóra Raʼy katu ndorekói ni moõpa oñenóta oke” (Mat. 8:20, NM). Peteĩ prekursór osegiséva Jesús ehémplo, ohechakuaa vaʼerã orekóramo heta mbaʼerepy tekotevẽtaha hetave ombaʼapo ikatu hag̃uáicha omantene, omyatyrõ térã okambia umi mbaʼe orekóva.

¹⁵ Pe prekursór ohechakuaa ndahaʼeiha ikatupyry térã ivaleterei haguére oservíva de tiémpo kompléto, síno imanduʼa vaʼerã entéro priviléhio jahupytyha Ñandejára imbaʼeporã rupínte. Upévare ojerovia vaʼerã Jehováre ikatu hag̃uáicha osegi iprekursorádo (Filip. 4:13). Katuete oĩta provléma ha heta mbaʼe ijetuʼúva (Sal. 34:19). Péro oñepresenta jave koʼã mbaʼe, ani pejapura peheja hag̃ua pende priviléhio. Upéva rangue, pejerure Jehovápe tapenepytyvõ ha peheja haʼe tapenesãmbyhy (elee Salmo 37:5). Pehechávo mbaʼeichaitépa ñande Ru yvagaygua penepytyvõ, peñandúta peneag̃uiveha hese koʼẽ koʼẽre (Is. 41:10).

16. ¿Mbaʼépa nepytyvõta rejaposéramo nde prekursorádo?

¹⁶ Oiméramo revyʼase avei umi ermáno oservívaicha de tiémpo kompléto, remombeʼu vaʼerã Jehovápe upe reñandúva (1 Juan 5:14, 15). Eñemongeta umi prekursór ndive. Ehecha umi mbaʼe ikatúva rehupyty saʼi saʼípe ha péicha mbeguekatúpe reimétama reñepyrũ hag̃uáicha nde prekursorádo. Upéicha ojapo vaʼekue Keith ha Erika. Haʼekuéra ningo mokõivéva ombaʼapo un diaite, ha omenda ramóme ojogua hikuái hogarã ha peteĩ áuto pyahu, ojapoháicha heta paréha ijavegua. Haʼekuéra omombeʼu: “Roimoʼã rorekóramo koʼã mbaʼe roikotaha pyʼaguapýpe ha orembovyʼataha, péro ndaupéichai raʼe”. Upéi Keith oñemosẽ itraváhogui ha ojapo iprekursorádo auxiliár. Haʼe heʼi: “Pe prekursorádo chemomanduʼa javyʼaha japredika jave”. Avei ojeheʼa meme hikuái peteĩ matrimónio ojapóvandi iprekursorádo. Koʼã ermáno oipytyvõ chupekuéra ohechakuaa hag̃ua ovyʼavetaha ojapóramo iprekursorádo ha oñekontenta umi mbaʼe orekomívarente. ¿Mbaʼépa ojapo Keith ha Erika? Haʼekuéra heʼi: “Rohai peteĩ kuatiáre mbaʼe mbaʼépa rohupytyse Jehová servísiope ha romoĩ pe eladérare. Upéi rokumplívo peteĩ mbaʼe rovorra upéva.” Tiémpo rire mokõivévagui oiko prekursór.

17. ¿Mbaʼépa rehechakuaáta reiporu porãvéramo ne tiémpo térã rekambiáramo reiko lája?

¹⁷ ¿Ikatúpa nde avei rejapo nde prekursorádo? Oiméramo koʼag̃aite haʼete ndéve ndaikatumoʼãiha, reñehaʼã vaʼerã rejapo opa ikatúva repredikave hag̃ua. Péicha reñemoag̃uivéta Jehováre. Rejerure vaʼerã chupe tanesãmbyhy ha ehecha mbaʼe situasiónpepa reime. Ikatu rehechakuaa ijataha ndéve rejapo nde prekursorádo reiporu porãvéramo ne tiémpo térã rekambiáramo reiko lája. Oiméramo tekotevẽta rejesakrifikaʼimi, umíva hekoviapáta ndéve. Revyʼaitereíta ningo remotenondévo Ñandejára Rréino (Mat. 6:33). Revyʼáta avei reñemeʼẽ rupi nde rapicha rehehápe. Hiʼarive reguerekovéta oportunida repensa hag̃ua Jehováre, reñeʼẽta chugui, rehayhuvéta ha rembopyʼarorýta chupe.