Omano vove peteĩ jahayhúva, katuete ñanerasẽ jaikuaágui heta jahechagaʼutaha chupe. Añetehápe ningo Jesús ohayhueterei vaʼekue Lázarope, péro omanórõ guare, haʼe nahasẽi upévare, síno ombyasýgui Lázaro hénte ha iñamigokuérape, ohechaukaháicha umi ótro versíkulo (Juan 11:36).

Jesús oikuaárõ guare Lázaro hasyha, ndojagarrái upepete oho omonguera hag̃ua chupe. La Biblia omombeʼu: “[Jesús] oikuaávo Lázaro hasyha, opytavénte dos día upe oĩháme” (Juan 11:6, NM). ¿Mbaʼérepa otarda oho hag̃ua? Haʼe voi heʼi: “Ko mbaʼasy ndahaʼéi haʼe omano hag̃ua, síno oñembotuicha hag̃ua Ñandejárape, ha péicha Ñandejára Raʼy ikatúta oñembotuicha avei” (Juan 11:4, NM). Jesús oikuaa porã Lázaro omanóramo jepe, oikotaha peteĩ mbaʼe tuichavéva. Haʼe ojevaléta upe situasión rehe ‘ombotuicha hag̃ua Ñandejárape’. ¿Mbaʼéichapa ojapóta upéva? Peteĩ milágro rupive Jesús omoingove jeýta iñamígo Lázarope.

Upérõ guare Jesús oñemongeta idisipulokuéra ndive ha ombojoja umi omanóva umi okéva rehe. Upévare heʼi chupekuéra ‘ohotaha omombáy chupe’ (Juan 11:11, NM). Jesúspe g̃uarã ndahasyiete omoingove jey hag̃ua Lázarope, ku túva omombayrõguáicha itaʼýra okévape. Upévare ikatu jaʼe haʼe noñembyasýi hague iñamígo omano haguére.

¿Mbaʼérepa upéicharõ Jesús hasẽ raʼe? La Biblia omyesakã ñandéve upéva. Jesús ojuhúrõ guare Lázaro ermána hérava María, ha umi ótro iñamigokuéra hasẽ joa, “upéva oguapyeterei hese, oñeñandu vaieterei”. Ohechávo haʼekuéra oñembyasyha “Jesús hasẽ” avei. Jahechaháicha, haʼe ombyasy ohechávo iñamigokuéra oñeñandu vaiha (Juan 11:33, 35, NM).

Ko rreláto ohechauka Jesús ikatupyry ha orekoha podér omoingove ha omohesãi jey hag̃ua umi jahayhúva omano vaʼekuépe. Avei ohechauka Jesús ontendeha mbaʼéichapa oñeñandu umi ihénte manóva. Ñaaprende avei tekotevẽha jaiporiahuvereko ñande rapicha oñembyasývape omano haguére peteĩ ohayhúva.

Jesús oikuaa porã omoingove jeytaha Lázarope. Upéicharõ jepe, hasẽ ohayhuetereígui iñamigokuérape ha oiporiahuvereko rupi chupekuéra. Péicha avei ñañemoĩramo ñande rapichakuéra lugárpe ‘ñanerasẽta umi hasẽva ndive’ (Rom. 12:15, NM). Jahechaukáramo ñañembyasyha ndeʼiséi ndajarekoiha esperánsa umi omano vaʼekue oikove jeytaha. Jesús oñemoĩ hapichakuéra lugárpe hasẽvo Lázaro omanórõ guare, oikuaáramo jepe omoingove jeytaha chupe. Péicha ohechauka ñandéve tekotevẽha jaiporiahuvereko umi ihénte manóvape.