1. ¿Mbaʼérepa ñañemoag̃uive hína Jehováre ñañehaʼãramo jajogua Jesúspe?

ÑANDE yvypóra ñamombaʼeterei jave peteĩ persónape, ñahaʼangaséma jepi chupe. Péro, ¿máva ehémplopa iporã jasegi ñande kristiáno? Ñañehaʼã vaʼerã jasegi Jesucristo ehémplo. Haʼe ningo ojoguaiterei Itúvape, ha upévare heʼi vaʼekue: “Upe chéve cherecháva ohecháma avei pe Túvape” (Juan 14:9). Upéva heʼise jaikuaavéramo Jesúspe jaikuaavetaha avei Ñandejárape. Añetehápe, ñahaʼangáramo Jesúspe, ñañemoag̃uive hína Jehováre, pe persóna iñimportantevéva oĩva ko univérsope. ¡Ajépa iporãite ñañehaʼã jajogua Jesúspe!

2, 3. a) ¿Mbaʼérepa Jehová ohaika Itaʼýra rembiasakue? b) ¿Mbaʼépa Jehová oipota jajapo? c) ¿Mbaʼépa ñahesaʼỹijóta ko artíkulope ha pe oúvape?

² ¿Ikatúpa jaikuaa porã Jesúspe? Si, ikatu. Jehová ohaika pe Escrituras Griegas Cristiánaspe Jesús rembiasakue, oipotágui jaikuaa Itaʼýrape ha ñahaʼanga chupe (elee 1 Pedro 2:21). La Biblia heʼi ñañehaʼãramo jasegi Jesús  ehémplo, jaguataha hína “ipyporére”, ha Jehová voi oipota jajapo upéva. ¿Jaʼétapa ojopyetereimaha ñanendive? Nahániri. Jaikuaaháicha, Jesús ningo perfékto, ha Jehová ndojeruremoʼãi ñandéve peteĩ mbaʼe ndaikatumoʼãiva jajapo, upéva rangue oipota ñahaʼanga Itaʼýrape opa ikatuháicha.

³ Jesús ohechauka vaʼekue heta kualida iporãitereíva. Ko artíkulope jahecháta mbaʼéichapa haʼe hekomirĩ ha oiporiahuvereko umi héntepe, ha pe ótro oúvape katu jahecháta mbaʼéichapa ipyʼaguasu ha odesidi porã opa mbaʼe. Mokõive artíkulope ñaaprendéta mbaʼéichapa peteĩ persóna ohechauka koʼã kualida, mbaʼe ehémplopa Jesús omoĩ, ha mbaʼéichapa ñande ikatu ñahaʼanga chupe.

4. ¿Mbaʼéichapa ojekuaa peteĩ persónare hekomirĩha?

⁴ Ko múndope ningo henyhẽte umi oñemombaʼeguasúva, upévare heta persóna oimoʼã umi iñumíldeva ndojeroviaiha ijehe térã ipyʼamirĩetereinteha. Péro añetehápe ndaupéichai hína. Umi hekomirĩva ipyʼaguasu ha noñerrendíri péicha péichante. ¿Mbaʼéichapa ojekuaa peteĩ persónare hekomirĩha? Pe iñumíldeva noñembotuichái ni nopensái iñimportanteveha hapichakuéragui. Peteĩ diksionário vívliko heʼi umi hekomirĩva orrekonoseha Ñandejára ipoderosove ha iñimportanteveha ñandehegui. Ñantende porãramo upéva, katuete ñanepytyvõta jahechakuaa hag̃ua entéro yvypóra peteĩchapanteha Ñandejára renondépe (Rom. 12:3; Filip. 2:3). Péro ñaneimperfékto rupi, heta vése hasy ñandéve ñaneumílde hag̃ua. Upévare iporãta jajepyʼamongeta mbaʼeichaitépa Jehová ipoderóso ha jasegi Itaʼýra ehémplo.

5, 6. a) ¿Mávapa hína pe arkánhel Miguel? b) ¿Mbaʼéichapa arkánhel Miguel ohechauka iñumildeha?

⁵ Jesús ningo peteĩ ánhel ipoderosoitereíva oikóva yvágape, ha oúrõ guare ko yvy ape ári, haʼe vaʼekue peteĩ kuimbaʼe perfékto. Upéicharõ jepe, Jesús noñemombaʼeguasúi. Jahechamína umi mbaʼe ojapo vaʼekue ohechaukáva hekomirĩha.

⁶ Opensa lájare. Judas ohai vaʼekue Ñandejára Ñeʼẽme peteĩ mbaʼe oiko vaʼekue yvágape Jesús ou mboyve ko yvy ape ári (elee Judas 9). Haʼe omombeʼu arkánhel Miguel, térã Jesús, ‘oiko vai hague pe Aña ndive Moisés retekuére’. La Biblia heʼi Jehová voi oñotỹ hague Moisés retekue ha nomombeʼúi avavetépe moõpa omoĩ (Deut. 34:5, 6). Ikatu oime ojapo raʼe upéicha oikuaágui Satanás oipotaha umi isrraelíta oadora Moisés retekue. Péro Jesús pyʼaguasúpe voi oñemoĩ Satanás rehe ojoko hag̃ua chupe. Peteĩ lívro heʼi pe palávra griéga ojetradusíva ‘oiko vai’, ojepuruha avei ojeʼe hag̃ua “pléito”. Upévare ikatu jaʼe upe okasiónpe arkánhel Miguel oakusa hague Satanáspe oĩrõguáicha peteĩ trivunálpe, ohechauka hag̃ua chupe ndorekoiha derécho opytávo Moisés retekuére. Péro Jesús orrekonose iposisión, ha haʼéramo jepe umi anhelkuéra ruvicha, ndohusgái Satanáspe oikuaágui nokorrespondeiha chupe upéva. Upéicha rupi, Satanás ojururekárõ jepe chupe, haʼe ohejánte pe Hués omanda guasuvéva, Jehová, ohusga ko tekove añáme. ¡Ajépa iñumildete raʼe!

7. a) ¿Mbaʼéichapa Jesús ohechauka hekomirĩha oñeʼẽ lájare? b) ¿Mbaʼéichapa Jesús ohechauka hekomirĩha oiko lájare?

⁷ Jesús oĩrõ guare ko yvy ape ári, ohechauka iñumildeha opa mbaʼe heʼi ha ojapóvape. Oñeʼẽ lájare. Haʼe arakaʼeve noñeʼẽi oñemombaʼeguasu hag̃uáicha chupe,  síno heʼi porã oñembotuicha vaʼerãha Itúvape (Mar. 10:17, 18; Juan 7:16). Jesús arakaʼeve ndoapoʼíri ni ndohejavaíri idisipulokuérape. Upéva rangue orrespeta ha oguerohory chupekuéra umi mbaʼe porã ojapóvare, ha ohechauka ojeroviaha hesekuéra (Luc. 22:31, 32; Juan 1:47). Oiko lája. Jesús odesidi oiko sensillomínte ani hag̃ua ostorva chupe umi mbaʼerepy (Mat. 8:20). Naiprovlémai ojapo hag̃ua umi tembiapo ótro ndojaposéiva (Juan 13:3-15). Haʼe siémpre iñeʼẽrendu ha péicha ohechauka hekomirĩha (elee Filipenses 2:5-8). Ndojoguaiete umi persóna ijejapoitévape ha ndojaposéiva oñemandáva chupekuéra. Jesús okumpli Ñandejára rembipota, “ha iñeʼẽrendu omano meve”. Péicha jahecha porãiterei Jesús, pe yvypóra Raʼy, ‘hekomirĩ hague ipyʼaite guive’ (Mat. 11:29).

8, 9. ¿Mbaʼéichapa jahechauka ñanderekomirĩha?

⁸ ¿Mbaʼéichapa ikatu jahechauka ñaneumildeha Jesús iñumílde haguéicha? Ñapensa lájare. Ñaneumílderamo, katuete jahechakuaáta oĩha ijautoridavéva ñandehegui ha ndajarekoiha derécho jahusga hag̃ua avavépe. Avei ndajaikomoʼãi jataky ótrore ojavy haguére ni ñapensa vai ñande rapicháre (Luc. 6:37; Sant. 4:12). Ñanderekomirĩramo ndajaikomoʼãi “ñañembohustoiterei” ñande rapichakuérandi. Por ehémplo, ndajaikomoʼãi jaapoʼi umi ndaikatupyryguasúivape, térã ndorekóiva umi rresponsavilida ñande jarekóva (Ecl. 7:16, NM). Umi ansiáno iñumíldeva nopensái haʼekuéra iñimportanteveha ambue ermanokuéragui. Upéva rangue opensa hikuái “umi ótro tuichaveha” chuguikuéra, ha oiko umi ‘michĩvévaramo’ (Filip. 2:3; Luc. 9:48).

⁹ Jahechamína peteĩ ermáno hérava Walter Thorn ehémplo. Haʼe ningo oñepyrũ oservi de peregríno (superintendénte viahánte) áño 1894-pe. Ojapo rire heta tiémpo ko tembiapo, oñemondo chupe pe Asiénda del Rréinope, Nueva Yórkpe, ha upépe ombaʼapo peteĩ gallinérope. Ermáno Walter heʼi sapyʼánte opensa hague omereseha peteĩ traváho iñimportantemiéva. ¿Mbaʼépa ojapo oñeñandu jave péicha? Haʼe heʼi: “Che voi ojekorrehi ha haʼe chejupe: ‘Mbaʼe piko nde yvytimbomi reñemoimportanteséta’” (elee Isaías 40:12-15). ¡Ajépa iñumildete ko ermáno!

10. a) ¿Mbaʼéichapa jahechauka umi mbaʼe jaʼévare ñaneumildeha? b) ¿Mbaʼéichapa jahechauka jaiko lájare ñaneumildeha?

¹⁰ Ñañeʼẽ lájare. Umi mbaʼe jaʼévare ojekuaa ñaneumíldepa térãpa ñañemombaʼeguasu hína (Luc. 6:45). Pe tapicha hekomirĩva ndoikói oñeʼẽterei umi mbaʼe ohupytývare (Prov. 27:2). Ohechakuaa umi ermanokuéra kualida ha oguerohory chupekuéra umi mbaʼe porã ojapóvare (Prov. 15:23). Jaiko lájare. Umi kristiáno iñumíldeva noñehaʼãi oiko hag̃ua chuguikuéra peteĩ persóna iñimportánteva ko múndope. Upéva rangue, odesidi oiko sensillomínte ha naiprovlémai ojapo hag̃ua umi traváho iñumíldeva, upéicha orekove tiémpo oservi porã hag̃ua Jehovápe (1 Tim. 6:6, 8). Péro opa mbaʼe ári, oñehaʼãmbaite iñeʼẽrendu hikuái. Añetehápe tekotevẽ ñaneumílde ikatu hag̃uáicha ‘ñaneñeʼẽrendu umi ñanemoakãvape’ kongregasiónpe ha jasegi hag̃ua umi instruksión oúva Jehová organisasióngui (Heb. 13:17).

11. ¿Mbaʼépa ojapo pe oporohayhukuaáva?

¹¹ ¿Mbaʼéicha javépa jaʼe peteĩ persóna oporohayhukuaaha? Pe oporohayhukuaáva ningo oñangareko hapicháre,  imbaʼeporã, oiporiahuvereko ótrope ha oporombyasy. La Bíbliape ojepuru jepi umi ñeʼẽ ‘imbaʼeporãiterei’, ‘oporoporiahuvereko’ ha ‘oporohayhueterei’ (Luc. 1:78; 2 Cor. 1:3; Filip. 1:8). Peteĩ diksionário vívliko heʼi pe oiporiahuverekóva hapichápe ndahaʼéi ombyasýnteva chupe oikotevẽ haguére, síno ojepyʼapy voi hese ha oipytyvõ chupe ikatu hag̃uáicha omehora isituasión. Pe oporombyasýva ndopytái ojekuʼako ohechávo hapichakuéra osufri, upéva rangue pyaʼe voi oipytyvõ chupekuéra.

12. a) ¿Mbaʼérepa jaʼekuaa Jesús oiporiahuvereko hague umi héntepe? b)¿Mbaʼépa haʼe ojapo kuri oporombyasýgui?

¹² ¿Mbaʼéichapa Jesús ohechauka ombyasyha umi héntepe? Oñandúva ha ojapóvare. Jesús ohechárõ guare iñamíga María ha umi ótra persóna hasẽjoaha Lázaro omano haguére, haʼe avei oñepyrũ “hasẽ” (elee Juan 11:32-35). Jesús oporombyasýgui omoingove jey Lázarope. Ha upe mboyve voi, oiporiahuverekógui peteĩ viudamíme, orresusita vaʼekue imembykariaʼýpe (Luc. 7:11-15; Juan 11:38-44). Omoingovévo Lázarope, Jesús omeʼẽ chupe peteĩ esperánsa pyahu: ikatúta oikove yvágape. Ótra okasiónpe katu, Jesús “oiporiahuverekoiterei” peteĩ hénte atýpe “ha oñepyrũ omboʼe chupekuéra heta mbaʼe” (Mar. 6:34). Oime vaʼerã heta persóna ndahesaraivéi umi mbaʼe omboʼévagui. Jahechaháicha, Jesús ndahaʼéi oiporiahuverekónteva umi héntepe, síno oipytyvõ voi chupekuéra (Mat. 15:32-38; 20:29-34; Mar. 1:40-42).

13. ¿Mbaʼéichapa Jesús oñeʼẽ vaʼekue umi héntepe? (Ehecha pe taʼanga oĩva iñepyrũme.)

¹³ Oñeʼẽ lájare. Jesús ningo omokyreʼỹkuaa vaʼekue umi imboriahúva ha ojetrata vaívape. Imanduʼávo proféta Isaías ohai vaʼekuére, apóstol Mateo heʼi Jesús rehe: “Nomopẽmoʼãi ni peteĩ takuára ojepepýmava ha nomboguemoʼãi ni peteĩ lámpara oguepotáva” (Mat. 12:20; Is. 42:3). Jesús oanima vaʼekue umi persóna naikyreʼỹivape oñekomparáva peteĩ takuára ojepepývare, térã peteĩ lámpara oguepotávare. Omeʼẽ peteĩ mensáhe de esperánsa ‘ombopyʼaguapy hag̃ua umi ojepyʼapývape’ (Is. 61:1). Oinvita umi hénte oñekevrantávape oñemoag̃ui hag̃ua hese ikatu hag̃uáicha ‘ipiroʼy’ jey (Mat. 11:28-30). Hiʼarive oasegura isegidorkuérape Ñandejára oñeinteresaha hesekuéra, jepe ko múndope ojeapoʼi ha ojehecha chupekuéra ku ‘michĩvévaicha’ (Mat. 18:12-14; Luc. 12:6, 7).

14. ¿Mbaʼéichapa jahechaukáta jaiporiahuverekoha ñande rapichápe?

¹⁴ ¿Mbaʼéichapa ikatu jahechauka jaiporiahuverekoha ñande rapichápe Jesús ojapo haguéicha? Ñañandúvare. Sapyʼánte ijetuʼu ñandéve jahechauka hag̃ua jahayhuha ñande rapichápe, péro la Biblia ñanemokyreʼỹ ñakumpli hag̃ua upéva. Por ehémplo heʼi kristianokuéra ‘oiporiahuvereko vaʼerãha hapichápe ipyʼaite guive’. Jasegíramo ko konsého, jahechauka avei ñañemondeha pe teko pyahúgui (elee Colosenses 3:9, 10, 12). ¿Mbaʼéichapa jahechauka hína jaiporiahuverekoha ótrope? Jaavri vaʼerã ñane korasõ (2 Cor. 6:11-13). Jajapysaka porã vaʼerã umi omombeʼúvare ñandéve iprovléma (Sant. 1:19). Ha ñañeporandu: “¿Mbaʼéichapa añeñandúta aiméramo ilugárpe? ¿Mbaʼépa ojapo porãta cherehe?” (1 Ped. 3:8).

15. ¿Mbaʼéichapa ikatu ñaipytyvõ umi naikyreʼỹivape, oñekomparáva peteĩ takuára ojepepývare térã peteĩ lámpara oguepotávare?

¹⁵ Jajapóvare. Jaiporiahuverekóramo  ñande rapicha naikyreʼỹivape, oñekomparáva peteĩ takuára ojepepývare térã peteĩ lámpara oguepotávare, katuete ñaipytyvõséta chupe. ¿Mbaʼéichapa ikatu ñaipytyvõ koʼãichagua persónape? Romanos 12:15 heʼi: “Penerasẽ umi hasẽva ndive”. Sapyʼánte ningo umi oñedesanimáva oikotevẽnte peteĩ ohendumi ha ontende vaʼerã chupe. Peteĩ ermánagui omanórõ guare imembykuña, orresivi tuicha konsuélo umi ermáno ha ermánagui. Haʼe omombeʼu: “Umi ermáno ou cherendápe ha hasẽ chendive. Upéva ningo tuichaiterei mbaʼe chéve g̃uarã”. Jahechauka hag̃ua japoroporiahuverekoha, iñimportánte avei jajapo umi mbaʼe iporãva ñande rapichakuéra rehehápe. ¿Oĩpa algúna ermána viúda ñane kongregasiónpe oikotevẽva oñemyatyrõʼimi chupe hóga? ¿Oĩpa peteĩ ermáno ijedáva oikotevẽva hína ojegueraha chupe doktórpe, ojegueru rreunionhápe, térã oñepytyvõ oho hag̃ua predikasiónpe? Jajapóramo koʼã mbaʼe haʼetéva sonserami, ñane ermanokuéra rehehápe, ikatu tuichaitereíma ñaipytyvõ chupekuéra (1 Juan 3:17, 18). Péro oĩ peteĩ mbaʼe iñimportantevéva ikatúva jajapo jahechauka hag̃ua jaiporiahuverekoha ñande rapichápe: ñamboʼe chupekuéra pe mensáhe oĩva la Bíbliape.

16. ¿Mbaʼéichapa ikatu ñaipytyvõ umi oñedeprimívape?

¹⁶ Ñañeʼẽ lájare. Jaiporiahuverekóramo ñande rapichápe, katuete ‘ñamokyreʼỹta chupe ñane ñeʼẽ rupive’ (1 Tes. 5:14). ¿Mbaʼéichapa ikatu ñaipytyvõ peteĩ oñedeprimívape? Jaʼe vaʼerã jajepyʼapyha hese ha jaguerohory chupe ñande pyʼaite guive umi mbaʼe porã ojapóvare. Avei ikatu jaʼe haʼe iñimportantetereiha Jehová renondépe, pórke omeʼẽ chupe oportunida oñemoag̃ui hag̃ua Jesucrístore (Juan 6:44). Ikatu avei jaasegura chupe Ñandejára oñeinteresaha enterove “ohasa asývare” ha ‘ikangývare’ (Sal. 34:18). Ñaporomokyreʼỹramo ikatu ñambopyʼaguapy umi oikotevẽvape konsuélo (Prov. 16:24).

17, 18. a) ¿Mbaʼépa Jehová ohaʼarõ ansianokuéragui? b) ¿Mbaʼépa jahecháta pe artíkulo oúvape?

¹⁷ Umi ansiáno ohayhu ha oiporiahuvereko vaʼerã Jehová ovechakuéra mimíme (Hech. 20:28, 29). Haʼe omeʼẽ umi ansiánope pe rresponsavilida omongaru, omokyreʼỹ ha okonsola hag̃ua chupekuéra (Is. 32:1, 2; 1 Ped. 5:2-4). Ansianokuéra oiporiahuverekóva ótrope ndoikói okontrola ermanokuérape, ndojopýi hendivekuéra, ni nomoĩri chupekuéra rrégla. Upéva rangue, oñehaʼãmbaite hikuái umi ovecha oñeñandu porã ha ovyʼa hag̃ua. Haʼekuéra oikuaa umi ermáno ohayhuha Jehovápe ha upévare oserviha chupe ipyʼaite guive (Mat. 22:37).

¹⁸ Jajepyʼamongetáramo Jesús ehémplore, katuete ñanderekomirĩta ha jaiporiahuverekóta ñande rapichakuérape. Pe artíkulo oúvape jahecháta mbaʼéichapa ikatu ñandepyʼaguasu ha jadesidi porã Jesús ojapo haguéicha.