JEHOVÁ siervokuéra ovyʼaiterei oiko jave umi asambléa. Péro oĩ avei ótra kósa ombovyʼáva chupekuéra koʼã aty guasúpe: okaru hikuái oñondivepa.

Septiembre de 1919-pe, umi Estudiánte de la Biblia ojapo peteĩ asambléa de 8 día siuda de Cedar Póintpe, Estados Unidos. Ojerreserva kuri heta otél omeʼẽ hag̃ua alohamiénto ha hiʼupy umi hénte oúvape mombyrýgui, péro amo ipahápe ou hetaitereive pe oñehaʼarõ vaʼekuégui. Heta umi ombaʼapóva umi otélpe ohechakuaa ndaikatumoʼãiha ogueropuʼaka pe traváho, ha orrenunsia. Peteĩva umi enkargádo ojedesespera ha oporandu ndaiporichénepa umi oúva apytépe mitãrusu ha mitãkuña oipytyvõmi vaʼerã chupekuéra. Hetaiterei ermáno ojeofrese ombaʼapo hag̃ua, umíva apytépe Sadie Green. Haʼe omombeʼu: “Primera ves ambaʼapo kómo mósa, péro chegustaiterei la traváho”.

Upe guive, heta ermáno oipytyvõ ojeprepara hag̃ua hiʼupy umi asambleahápe. Heta mitãrusu ha mitãkuña ombaʼapo umi ermáno ojerovia mbaretévandi, ha ikyreʼỹve hikuái ojapove hag̃ua Jehová servísiope. Por ehémplo, Gladys Bolton ombaʼapo peteĩ asambléape áño 1937-pe. Haʼe heʼi: “Upépe aikuaa heta ermáno de diferénte lugárpe. Haʼekuéra omombeʼu mbaʼéichapa ombohovái umi provléma, ha upéva chemokyreʼỹ ajapo hag̃ua che prekursorádo”.

Peteĩ ermána hérava Beulah Covey, heʼi: “Umi ombaʼapóva oñeorganisa porã, ha upéicha rupi ipyaʼe hikuái”. Ombaʼapokuaáramo jepe, heta vése ijetuʼu chupekuéra oprepara ha oservi hag̃ua pe tembiʼu. Por ehémplo áño 1969-pe, ojejapo peteĩ asambléa Estádio Dódgerpe, Los Ángeles, Califórniape. Og̃uahẽ rire upépe, pe ermáno Angelo Manera oñentera oñasignaha chupe de enkargádo pe kosináme. Haʼe heʼi: “Tuicha añemondýi”. Ojepreparárõ guare pe lugár ojejapotahápe pe asambléa, ojejoʼo peteĩ kanál de 400 métro ojekoloka hag̃ua pe kañería de gas, ojepurútava kosináme.

Áño 1982-pe Sierra Leónape umi ermáno omopotĩ raẽ peteĩ terréno ha oprepara peteĩ komedór, iñerramiénta saʼíramo jepe hikuái. Frankfurt, Alemániape katu 1951-pe umi ermáno oalkila peteĩ lokomotóra  ha oipuru pe ivaporkue ikatu hag̃uáicha oñekosina 40 óllape. Ha upérõ ojeservi 30.000 pláto por óra. Ikatu hag̃uáicha ivevyive pe traváho umi 576 voluntário ojohéivape tembiporu, umi ohóva pe asambléape oraha voi káda uno hembiporurã. Ha siuda de Yangónpe, Myanmar, umi kosinéro saʼive ombotái hembiʼu, ikatu hag̃uáicha hoʼu avei umi ermáno oúva ótro paísgui.

Áño 1950-pe, peteĩ ermána hérava Annie Poggensee oho peteĩ asambléa Estados Unídospe. Oforma aja fíla pe kuarahy akúpe orretira hag̃ua hembiʼurã, ohendu mokõi ermána oñemongetaha ha omombeʼu mbaʼéichapa Jehová oipytyvõ chupekuéra ou hag̃ua pe asambleahápe. Annie heʼi: “Añatende porã mbaʼéichapa oñemongeta koʼã ermána oúva Európagui várkope. Ni michĩmi ndojekehái hikuái haku térã ohaʼarõ haguére pe fílape. Ndaipóri ovyʼavéva chuguikuéra.”

Umi asambléa tuichahápe oñemoĩ kárpa pe techorã, ha oñemoĩ en fíla umi mesa yvate umi hénte okaru hag̃ua ñemboʼyhápe ha pyaʼemi omeʼẽ hag̃ua lugár ótrope. Peteĩ karai ndahaʼéiva Testígo heʼi: “Iñextrañoiterei ko rrelihión. Haʼekuéra okaru ñemboʼyhápente”.

Umi autorida sivíl ha militár oñesorprende ohechávo mbaʼéichapa Testigokuéra oñeorganisa porã. Peteĩ asambléa ojejapo vaʼekuépe Estádio Yankee, Nueva Yórkpe, oho unos kuánto kuimbaʼe oĩva pe Armada de los Estados Unídospe, orrevisa hag̃ua mbaʼéichapa oñembaʼapo pe kosináme. Upéi haʼekuéra heʼi pe komandánte Fáulknerpe, orekóva ikárgope pe Departaménto de Gérra Británico, ohomi hag̃ua avei ojapo peichagua inspeksión hetãme. Upémarõ pe komandánte ha hembireko oho pe asambléa héravape “Reino Triunfante”, áño 1955-pe, siuda de Twickenham, Inglatérrape. Pe karai heʼi ohecha hague umi Testígo ojoayhuetereiha, ha upévare pe komedór ofunsiona porãha.

Heta tiémpore umi ermáno vyʼapópe oprepara ha oservi tembiʼu umi asambleahápe. Péro upearã oñekotevẽ vaʼekue heta voluntáriore tekotevẽva ombaʼapo heta óra. Upéicha rupi umi ermáno ojeofreséva ombaʼapo hag̃ua ojeperde heta diskúrso. Heta paíspe, ko arréglo osegi áño 1978 peve. Upe rire ndojepreparavéima umi tembiʼu heta itraváhova. Péro 1995 guive ojejeruréma umi ohóvape asambleahápe ogueraha hag̃ua káda uno imatularã. Upéicha noñekotevẽvéima okosina vaʼerã, ha enterovéva ikatu oaprovechapaite pe asambléa. *

Jehová ningo ohayhueterei entéro umi ermáno ha ermánape heta ombaʼapo vaʼekue oporoservi hag̃ua. Katuete koʼág̃a oĩne umi ohechagaʼúva pe tiémpo oñembaʼapórõ guare kosináme. Péro okambiáramo jepe ko arréglo, ojekuaa gueteri umi ermáno ojoayhuetereiha ha ovyʼajoaha umi asambleahápe (Juan 13:34, 35).