1, 2. a) ¿Moõpa oadora Jehovápe isiervokuéra yma guare? b) ¿Mbaʼépa Jesús oñandu vaʼekue Jerusalén témplore? c) ¿Mbaʼépa jahecháta ko artíkulope?

YMAITE guive Ñandejára siervokuéra oreko vaʼekue peteĩ lugár oadora hag̃ua chupe. Por ehémplo, Abel oiméne ojapo rakaʼe peteĩ altár oofrese hag̃ua sakrifísio Jehovápe (Gén. 4:3, 4). Noé, Abrahán, Isaac, Jacob ha Moisés ojapo vaʼekue avei altár (Gén. 8:20; 12:7; 26:25; 35:1; Éx. 17:15). Jehová heʼi vaʼekue umi isrraelítape ojapo hag̃ua peteĩ tavernákulo oadora hag̃ua chupe (Éx. 25:8). Ha tiémpo rire, haʼe omopuʼãka peteĩ témplo (1 Rey. 8:27, 29). Umi isrraelíta osẽ rire Babilóniagui oñepyrũ oñerreuni umi sinagógape (Mar. 6:2; Juan 18:20; Hech. 15:21). Kristianokuéra síglo primérope guare katu oñembyaty umi ermáno rógape (Hech. 12:12; 1 Cor. 16:19). Ha ñane tiémpope, entéro testígo de Jehová ñañerreuni jaadora hag̃ua Jehovápe umi Salón del Réinope, oĩva hetaiterei ko yvy tuichakuére.

² Jesús ningo omombaʼeterei vaʼekue pe témplo oĩva Jerusalénpe. Idisipulokuéra ohechakuaárõ guare mbaʼeichaitépa haʼe ohayhu pe témplo, imanduʼa ko Salmo heʼívare:  “Che ahayhueterei nde róga, upe añandúva haʼete peteĩ tatarendy [...] okarúva cherehe” (Sal. 69:9, NM; Juan 2:17). Añetehápe ningo umi Salón del Reino ndahaʼéi “Jehová róga” haʼe haguéicha Jerusalén témplo (2 Crón. 5:13; 33:4). Upéicharamo jepe ñamombaʼe vaʼerã, pórke umi Salónpe ñañembyaty jaadora hag̃ua Ñandejárape. Ko artíkulope jahecháta umi téxto vívliko ñanemboʼéva mbaʼéichapa ñañekomporta vaʼerã Salónpe ha mbaʼéichapa jakuida vaʼerã hese. Avei jahecháta mbaʼéichapa ñaipytyvõkuaa ojejapo hag̃ua hetave Salón del Reino. *

3-5. a) ¿Mbaʼépa hína umi Salón del Reino? b) ¿Mbaʼérepa iñimportantete umi rreunión?

³ Umi Salón del Reino haʼe umi lugár prinsipál oñemombaʼeguasu hag̃ua Jehovápe. Ñandéve g̃uarã umi rreunión haʼe hína peteĩ rregálo oúva Ñandejáragui. ¿Mbaʼérepa jaʼe upéva? Pórke ñanepytyvõ ñañemoag̃uive hag̃ua hese. Avei umi rreunión rupive Jehová organisasión ñanemokyreʼỹ ha ñanerekomboʼe. Umi informasión jarresivíva rreunionhápe haʼete hína aliménto Jehová ha Jesús omeʼẽva káda semána. Añetehápe ningo tuicha priviléhio ñañeinvita haguére jakaru hag̃ua “Jehová meságui” (1 Cor. 10:21).

⁴ Jehová heʼi porã ñandéve jaha vaʼerãha rreunionhápe ikatu hag̃uáicha jaadora chupe ha ñañomokyreʼỹ hag̃ua ñane ermanokuérandi (elee Hebreos 10:24, 25). Ñande ningo jarrespetaiterei Ñandejárape, upévare jajapo ikatúva guive ani hag̃ua jafalta rreunionhápe. ¿Mbaʼéichapa jahechauka ñamombaʼeha umi rreunión? Jastudia porãvo umi informasión oñehesaʼỹijótava ha ñañehaʼãvo ñakomenta (Sal. 22:22).

⁵ Jahechauka avei jarrespetaha Jehovápe, ñanekondúkta porãvo rreunionhápe ha jakuidávo pe Salón. Haimete entéro Salón del Reino oreko peteĩ letréro oñemoĩháme Jehová réra, upévare ñañekomporta porãse. Péicha umi hénte katuete oñeʼẽ porãta Jehová rérare (embojoja 1 Reyes 8:17 heʼívare).

6. ¿Mbaʼépa heʼi heta persóna ovisita rire pe Salón del Reino? (Ehecha pe taʼanga oĩva iñepyrũme.)

⁶ Heta persóna ohechakuaa ñande jarrespetaha ñane Salón del Reino. Por ehémplo, peteĩ karai oikóva Turquíape omombeʼu oguerohoryeterei hague ohechávo mbaʼeichaitépa pe Salón ipotĩ ha entéro mbaʼénte oĩha ordenádo. Avei ohecharamoiterei mbaʼéichapa umi ohóva guive upépe oñemonde porã ha torýpe osaluda chupe. Ko karai oñepyrũ oho káda rreunionhápe ha tiémpo riremi ojevautisa. Indonésiape katu ojejapo peteĩ Salón pyahu. Umi ermáno upepegua oinvita umi vesínope, pe intendéntepe ha unos kuánto funsionáriope oho hag̃ua ohecha pe Salón. Pe intendénte ohecha pe Salón ojejapo porãitereiha ha avei ogustaiterei chupe pe hardín. Haʼe heʼi: “Ahechávo mbaʼeichaitépa ipotĩ pene Salón, ikatu haʼe añetehápe peserviha Ñandejárape”.

7, 8. ¿Mbaʼéichapa jahechauka jarrespetaha Jehovápe ñaime jave Salónpe?

⁷ Jehová ningo hína upe ñaneinvitáva jaha hag̃ua rreunionhápe. Upévare ñañatende vaʼerã ñañemonde ha ñañekomporta  lájare. Ndovaléi avei jaiko ñamoĩ rrégla ha jaʼe mbaʼépa oĩ porã térã mbaʼépa oĩ vai. Jehová oipota ñañesenti porã ñaime aja rreunionhápe, péro upéva ndeʼiséi ñañekomportataha ñaimerõguáicha ñande rógape. Opa mbaʼe jajapóvape jahechauka vaʼerã jarrespetaha Jehovápe. Upévare ñañehaʼãmbaite vaʼerã ñañemonde desénte porã. Avei rreunión aja ndajaikói ñamondo mensáhe, ñañemongeta ótra persónandi, ni jaʼu algúna kósa. Ha tuvakuéra omboʼe vaʼerã ifamíliape ani hag̃ua oiko ohuga ni odipara pe Salónpe (Ecl. 3:1).

⁸ Jesús ohechárõ guare pe témplope oĩha ombaʼevendéva, ipochyeterei ha omosẽmba chupekuéra (Juan 2:13-17). Ñande ningo jaha Salónpe jaadora hag̃ua Jehovápe ha ñaaprende hag̃ua chugui. Upévare ndajaikói jajapo negósio ñaime aja upépe (embojoja Nehemías 13:7, 8 heʼívare).

9, 10. a) ¿Mbaʼéichapa oipytyvõ heta ermáno ojejapo hag̃ua Salón del Reino? b) ¿Mbaʼépa ojehupytýma koʼág̃a peve? c) ¿Mbaʼépa ojejapo umi kongregasión irrekursoʼivéva oreko hag̃ua isalonrã?

⁹ Heta ñane ermáno ombaʼapo pohýi ojapo hag̃ua umi Salón del Reino ko yvy tuichakuére. Haʼekuéra odiseña, omopuʼã térã orremodela okovraʼỹre mbaʼeve. ¿Mbaʼépa ojehupytýma koʼág̃a peve? Noviembre de 1999 guive ojejapóma 28.000 Salón del Reino. Upéicharõ, koʼã 15 áño ohasa vaʼekuépe, kómo promédio ojejapo cinco Salón káda día.

¹⁰ La Biblia omokyreʼỹ umi oĩ porãvévape ekonómikamente oipytyvõ hag̃ua umi ‘saʼive orekóvape’ (elee 2 Corintios 8:13-15). Upévare Jehová organisasión oipuru porã umi kontrivusión voluntária oñemeʼẽva, ha avei oorganisa porã umi ermáno ha ermána ojeofresévape ombaʼapo hag̃ua. Péicha umi kongregasión irrekursoʼivéva orekóma peteĩ lugár porã oadora hag̃ua Jehovápe.

11. a) ¿Mbaʼépa heʼi umi ermáno isalón pyahúva? b) ¿Mbaʼéichapa nde reñeñandu repensávo koʼã ermánore?

¹¹ Costa Rícape oñemopuʼã peteĩ Salón del Reino ha ocho díape oĩmbáma. Umi ermáno upepegua heʼi: “Ni ndorogueroviaséi ningo la ore Salón oĩmbamaha. Péina roguerekóma upe roipotaite vaʼekue. Ko Salón ndaikatumoʼãi kuri ojejapo naorepytyvõirire Jehová, iñorganisasión ha umi ermáno. Añetehápe, kóva haʼe peteĩ rregálo iporãitereíva Jehová omeʼẽva oréve. ¡Rovyʼaiterei ningo!”. Ajépa javyʼaite avei ñane ermanokuéra oreko haguére  peteĩ Salón oñerreuni hag̃ua. Ojekuaa porãiterei Jehová ovendesiha umi traváho oñemopuʼã hag̃ua umi Salón del Reino. Hiʼarive ojejapo jave peteĩ Salón pyahu, hetave persóna oñepyrũ oho rreuniónpe oaprendeve hag̃ua Jehovágui (Sal. 127:1).

12. ¿Mbaʼéichapa ikatu ñaipytyvõ ojejapo hag̃ua hetave Salón del Reino?

¹² Káda uno ikatu ñaipytyvõ ojejapo hag̃ua hetave Salón del Reino. Por ehémplo, oĩramo ñande posivilidápe, ikatu jajeofrese ñambaʼapo hag̃ua pe konstruksiónpe. Avei enterovéva ikatu ñameʼẽ ñane kontrivusión voluntária ojepaga hag̃ua umi gásto. Jajapóramo opa ikatúva ñaipytyvõ hag̃ua, katuete javyʼavéta. Ha iñimportanteveha katu, ñambotuicháta Jehovápe. Jasegíkena Ñandejára siervokuéra yma guare ehémplo. Haʼekuéra kyreʼỹme omeʼẽ vaʼekue ikontrivusión ikatu hag̃uáicha ojejapo umi lugár ojeadora hag̃ua Jehovápe (Éx. 25:2; 2 Cor. 9:7).

13, 14. Heʼiháicha la Biblia, ¿mbaʼérepa ñamantene vaʼerã potĩ asy ñane Salón?

¹³ Jehová ningo ipotĩ ha ohaʼarõ ñande avei jajapo opa mbaʼe hekoitépe. Upévare oipota siémpre pe Salón ipotĩ ha iñordenádo (elee 1 Corintios 14:33, 40). Jehová oipota ipotĩ pe adorasión ñameʼẽva chupe ha umi mbaʼe ñapensáva. Avei oipota ñanekondúkta porã ha ñanepotĩ físikamente (Apoc. 19:8).

¹⁴ Ñamantenéramo potĩ asy ñane Salón, nañatĩmoʼãi ñainvita hag̃ua umi héntepe. Ha haʼekuéra ou vove Salónpe, ohechakuaáta ñande jaikoseha peteĩ múndo pyahu ipotĩvape. Avei ohechakuaáta hikuái ñamombaʼeguasuha peteĩ Dios ipotĩvape,  ojapótava ko yvýgui peteĩ paraíso neporãva (Is. 6:1-3; Apoc. 11:18).

15, 16. a) ¿Mbaʼérepa sapyʼánte ijetuʼu ñamantene hag̃ua potĩ asy ñane Salón? b) ¿Mbaʼérepa siémpre ñamopotĩ vaʼerã ñane Salón? c) ¿Mbaʼe priviléhiopa jareko enterovéva?

¹⁵ Sapyʼánte ningo ijetuʼu ñamantene hag̃ua potĩ asy ñane Salón. ¿Mbaʼérepa? Por ehémplo, oĩ heta oikóva umi lugár oĩháme yvytimbo ha tuju. Ambue lugárpe katu ndaiporiguasúi y ha umi mbaʼe oñekotevẽva ojejapo hag̃ua limpiésa. Avei odepende jajepokuaa lájare ñande rogapýpe ñapensa hag̃ua mbaʼéichapa ojejapo vaʼerã pe limpiésa. Péro tahaʼe haʼéva pe lugár jaikoha, térã mbaʼépa opensa umi hénte upepegua, ñande ñamopotĩ porã vaʼerã ñane Salón ha entéro mbaʼe oĩ vaʼerã ordenádo. ¿Mbaʼérepa upéva iñimportantete? Pórke upépe ñamombaʼeguasu Jehovápe (Deut. 23:14).

¹⁶ Jaipotáramo ñane Salón siémpre ipotĩ, ojesegi vaʼerã peteĩ prográma de limpiésa. Umi ansiáno oprograma umi traváho ha oñenkarga ani hag̃ua ofalta umi mbaʼe oñekotevẽva oñemopotĩ hag̃ua pe Salón. Avei oorganisa hikuái umi ermánope ikatu hag̃uáicha entéro mbaʼe oñemopotĩ porã. Oĩ kósa ñamopotĩ vaʼerã káda rreunión rire, péro ótra kósa ñamopotĩ vaʼerã sapyʼapyʼánte. Entéronte jareko pe priviléhio japartisipávo pe limpiésape.

17, 18. a) ¿Mbaʼépa ikatu ñaaprende Jehová siervokuéra yma guarégui? b) ¿Mbaʼérepa ñamantene porã vaʼerã umi Salón del Reino?

¹⁷ Jehová siervokuéra yma guare omantene porã vaʼekue pe témplo. Por ehémplo, rréi Jehoás omanda vaʼekue umi saserdóte Judaguápe oipuru hag̃ua pe pláta okontrivui vaʼekue pe puévlo, ikatu hag̃uáicha omyatyrõ pe témplo (2 Rey. 12:4, 5). Mas de 200 áño upe rire, rréi Josías oipuru avei umi donasión omeʼẽva pe puévlo omyatyrõ hag̃ua pe témplo (elee 2 Crónicas 34:9-11). ¿Mbaʼépa ikatu ñaaprende koʼã ehémplogui? Ñande avei ñamantene porã vaʼerãha ñane Salón del Reino ha ñamyatyrõ vaʼerã oñembyai jave álgo.

¹⁸ Oĩ sukursál ohechakuaáva ipaíspe tekotevẽha ojejapo porãve pe mantenimiénto umi Salónpe, ha avei ojekuida porãve vaʼerãha umi mbaʼe oĩvare pype. ¿Mbaʼérepa ndojejapoporãi jepi pe mantenimiénto? Pórke sapyʼánte ndaiporiguasúi umi ermáno ojapokuaáva umi traváho, térã saʼi oĩ pláta oñemyatyrõ hag̃ua. Péro ndajarreparáiramo ñane Salón tekotevẽ jave, pyaʼeterei oñembyaipáta, ha hiʼarive umi héntepe oñeʼẽ vaíta Testigokuérare. Upévare, ñañehaʼãkena ñamantene porã ñane Salón. Upéicha ñambotuicháta Jehovápe ha jaipuru porãta ñane ermanokuéra kontrivusión.

19. ¿Mbaʼépa nde rejapóta rehechauka hag̃ua remombaʼeha pe Salón del Reino?

¹⁹ Ani ñanderesarái umi Salón del Reino Jehová mbaʼeha hína, ha ndahaʼéi peteĩ persóna térã peteĩ kongregasión mbaʼe. Ko artíkulope jahecha heta konsého ñanepytyvõva jarrespeta hag̃ua umi Salón del Reino. Ñamombaʼéramo Jehovápe, javaloráta ñane rreunionkuéra ha pe Salón del Reino. Avei ñandepojeráta ñameʼẽ hag̃ua ñane kontrivusión ikatu hag̃uáicha ojejapo hetave Salón. Hiʼarive, siémpre ñañehaʼãta ñamopotĩ porã ha jajapo chupe pe mantenimiénto oikotevẽva. Upéicharõ, jasegíkena Jesús ehémplo ha jahechauka ñamombaʼeha pe lugár jaipurúva jaadora hag̃ua Jehovápe (Juan 2:17).