Ñandejára Jehová imarangatu
Ñañemoag̃uíkena Ñandejárare
Ñandejára Jehová imarangatu
“IMARANGATU, imarangatu, imarangatu Ñandejára [Jehová].” (Apocalipsis [Revelación] 4:8.) Péicha la Biblia ohechauka Jehová imarangatu ha ipotĩetereiha, ndaipóri ótro haʼeichagua. Mombyry oĩ chugui opa mbaʼe vai ha upévare mbaʼeveichavérõ ndaikatúi ikyʼa. Upéicharõ, ikatúnepa ñañemoag̃ui Jehováre? La Biblia tuicha ñanembopyʼaguapy ohechaukávo ñandéve ikatuha. Jahechamína upéva Levítico kapítulo 19-pe.
Ñepyrũrã Jehová heʼivaʼekue Moiséspe: “Ere Israelguápe koʼã mbaʼe: ‘Penderekomarangatuvaʼerã che chemarangatúgui’” (versíkulo 2). Upéva ohechauka ñandéve umi Israelgua hekomarangatuvaʼerãha haʼégui peteĩ léi. Péro ojerurépa Jehová chupekuéra peteĩ mbaʼe ikatuʼỹva ojapo?
Nahániri. Jehová ningo ohechaukánte chupekuéra mbaʼérepa hekomarangatuvaʼerã, ndahaʼéi ku oipotáva hekomarangatu haʼeichaite. Haʼe añoite ningo pe ‘imarangatuetéva’ ha oikuaa porã avave ndaikatuimoʼãiha ohupyty upéva (Proverbios 30:3). Upéicharamo jepe haʼe oipota isiervokuéra oñehaʼãmbaite hekopotĩ. Péro mbaʼéichapa ikatu ojapo upéva?
Ñañeʼẽmi jeýna umi Israelguáre. Jehová ningo heʼivaʼekue hekomarangatuvaʼerãha hikuái ha omeʼẽ avei heta léi oipytyvõva chupekuéra ohupyty hag̃ua upéva. Pór ehémplo, heʼi omombaʼevaʼerãha isy, itúva ha umi ijedávape (versíkulo 3 ha 32); ohechakuaavaʼerãha umi nohendúiva, imboriahumíva ha ohechaʼỹvape (versíkulo 9, 10 ha 14). Heʼi avei noporombotavyivaʼerãha, hekojoja ha otratavaʼerãha hapichakuérape peteĩchapánte (versíkulo 11-13, 15, 35 ha 36) ha ohayhuvaʼerãha hapichakuérape ojehayhuháicha ijupe voi (versíkulo 18). Péicha ojapórõ umi Israelgua hekomarangatúta Ñandejára renondépe (Números 15:40).
Ko léi ñanepytyvõ ñantende porãve hag̃ua mbaʼéichapa opensa Ñandejára. Pór ehémplo, jaikuaa ñambovyʼa hag̃ua chupe jajapovaʼerã iñeʼẽ heʼíva ha ñañehaʼãmbaite ñanderekomarangatu (1 Pedro 1:15, 16). Péicha jajapóramo, javyʼavéta (Isaías 48:17).
Ohechauka avei Jehová ojeroviaha ñanderehe ha nohaʼarõiha ñandehegui ikatuʼỹva jajapo (Salmo 103:13, 14). Péro ñanemanduʼavaʼerã ñandeapo hague ijoguaháramo ha upévare ikatu ñanderekomarangatu ndahaʼéiramo jepe haʼeichaite (Génesis 1:26). Ajépa ñanembovyʼaite jaikuaávo koʼã mbaʼe! Upévare, ñañemoag̃uivékena Ñandejára imarangatuetévare.
[Nóta oĩva taʼanga ndive páhina 9]
Ikatu ñanderekomarangatu