Mbaʼépa omboʼe la Biblia

Mbaʼérepa Ñandejára oheja oĩ jehasa asy ha ojejapo mbaʼe vai?

Ko artíkulo nepytyvõta rembohovái hag̃ua la Biblia rupive umi mbaʼe reikuaaséva. Peteĩ testígo de Jehová ikatu ohesaʼỹijo nendive koʼã porandu.

1. Mbaʼéichapa oñepyrũrakaʼe ojejapo umi mbaʼe vai?

Ko yvy ape ári ojejapo ñepyrũ ivaíva Satanás ijapu ypýrõ guare. Ñandejára ojapórõ guare ko ánhelpe iperfékto ha ipyʼaporãvaʼekue, péro upéi oheja Ñandejára rape (Juan 8:44). Upe rire mbeguekatúpe oipotáma oñemombaʼeguasu chupe, péicha oipeʼase pe derécho ñande Apohare añoite orekóva. Upearã ombotavy Évape (pe kuña ypykue) omombaʼeguasu hag̃ua chupe Ñandejárape rangue. Adán omoirũ hembirekópe naiñeʼẽrendúivo Ñandejárape. Odesidi vai rupi enterove iñemoñarekuéra ohasa asy ha omano. (Elee Génesis 3:1-6, 17-19.)

Satanás opuʼã Jehová sãmbyhy rehe ombotavýrõ guare Évape ani hag̃ua iñeʼẽrendu. Ha koʼág̃a yvyporakuéra omboyke avei Ñandejárape Mburuvicháramo, Satanás ojapo haguéicha. Upévare Satanásgui oikóma ko ‘múndo ruvicha’. (Elee Juan 14:30; Revelación [Apocalipsis] 12:9.)

2. Osẽ vaípa rakaʼe Ñandejára rembiapokue?

Ñandejára ojapovaʼekue umi ánhel ha yvyporakuérape ikatu hag̃uáicha iñeʼẽrendu chupe (Deuteronomio 32:4, 5). Ñandejára ningo ojapo chupekuéra odesidi hag̃ua ijehegui ojapótapa iporãva térãpa ivaíva. Upéicha rupi ñande ikatu avei jahechauka jahayhuha Chupe. (Elee Santiago 1:13-15; 1 Juan 5:3.)

3. Mbaʼérepa Ñandejára oheja ojehasa asy?

Peteĩ tiémponte Jehová oheja oñepuʼã hese. Maʼerãpa ojapo upéicha? Ohechauka hag̃ua heseʼỹ ni peteĩ goviérno ndaikatuiha oipytyvõ yvyporakuérape (Jeremías 10:23). Upéva ojehechakuaa umi mbaʼe oikovaʼekuére umi seis míl áño pukukuépe. Umi mburuvicha ndaikatúi oipeʼa ko yvy ape árigui mbaʼasy, inhustísia, ñorairõ ni gérra. (Elee Eclesiastés 7:29; 8:9; Romanos 9:17.)

Péro umi ohejáva Ñandejára oisãmbyhy hekove oñevenefisia ijupe voi (Isaías 48:17, 18). Koʼẽrõitéma Jehová ohundipáta yvypóra goviérno, péro umi ojepytasóva Jehová goviérno ykére opytáta ko yvy ape ári (Isaías 2:3, 4; 11:9; elee Daniel 2:44).

 4. Mbaʼe oportunidápa jareko Ñandejára ipasiénsia rupi?

Satanás heʼivaʼekue ndaiporimoʼãiha ni peteĩ yvypóra iñeʼẽrendúva Ñandejárape. Péro Ñandejára ipasiénsia rupi enterovetépe omeʼẽ oportunida jahechauka hag̃ua jaiko lájare jajepytasópa Igoviérno ykére térãpa yvypóra goviérno ykére. (Elee Job 1:8-11; Proverbios 27:11.)

5. Mbaʼéichapa ikatu jajepytaso Ñandejára ykére?

Jahekávo pe rrelihión añetegua omboʼéva la Biblia, ha jajapóvo upépe heʼiháicha (Juan 4:23). Ha Jesús ojapo haguéicha, ndajaikéivo polítikape ni umi mbaʼe vai ko múndope ojejapóvape. (Elee Juan 17:14.)

Satanás oiporu ipodér ojapouka hag̃ua la héntepe ivaíva ha hekovai hag̃ua. Péro ñamboykéramo umi mbaʼe vai, ikatu ñane amígo ha ñane hentekuéra oñembohory ñanderehe térã ñanembohasa asy (1 Pedro 4:3, 4). Upéicha jave tekotevẽta jadesidi: Ñamoirũtapa umi ohayhúvape Ñandejárape? Ñaneñeʼẽrendútapa Ñandejára léipe? Jajapóramo upéicha, jahechaukáta Satanás ijapu hague heʼírõ guare ni peteĩ yvypóra ndaikatumoʼãiha iñeʼẽrendu Ñandejárape. (Elee 1 Corintios 6:9, 10; 15:33.)

Reikuaasevéramo koʼã mbaʼe ikatu rehecha ko lívro, Mbaʼépa añetehápe omboʼe la Biblia?, ojapóva testigos de Jehová, kapítulo 11-pe.

[Nóta oĩva taʼanga ndive páhina 16]

Adán odesidi vai vaʼekue

[Nóta oĩva taʼanga ndive páhina 17]

Jadesidívare ojekuaa jaipotápa Ñandejára ñanesãmbyhy