Ko artíkulo nepytyvõta rembohovái hag̃ua la Biblia rupive umi mbaʼe reikuaaséva. Peteĩ testígo de Jehová ikatu ohesaʼỹijo nendive koʼã porandu.

1. ¿Mávapa umi ánhel?

Umi ánhel ningo espíritu ha oiko yvágape. Haʼekuéra ipoderosoiteve yvyporakuéragui. Ñandejára Añetegua haʼe avei espíritu ha ojapovaʼekue chupekuéra ojapo mboyve ko yvy (Job 38:4, 7; Mateo 18:10). Ñandejára Jehová oguereko ijerére hetaiterei ánhel iñeʼẽrendúva chupe. (Elee Salmo 103:20, 21 ha Revelación [Apocalipsis] 5:11.)

2. ¿Ikatúpa ñanepytyvõ umi ánhel?

Yma, umi ánhel oipytyvõvaʼekue Lótpe. Haʼe ningo peteĩ kuimbaʼe hekojojáva oikovaʼekue peteĩ siuda oĩháme heta hénte iñañaitereíva. Upévare Ñandejára odesidi ohundi upe siuda ha omondo mokõi ánhel heʼi hag̃ua Lot ha ifamíliape osẽ hag̃ua upe siudágui. Upérõ oĩ ndogueroviáiva Ñandejára ojapótava ha nopenaiete voi hese. Péro Lot ha itajyrakuéra ojapo Ñandejára heʼíva chupekuéra umi ánhel rupive ha ojesalva. (Elee Génesis 19: 1, 13-17, 26.)

La Biblia ohechauka umi ánhel ñanepytyvõha avei koʼág̃a rupi. ¿Mbaʼéichapa ojapo upéva? Oisãmbyhy umi kyreʼỹme omombeʼúvape pe marandu porã oñeʼẽva Ñandejára Rréinore (Mateo 24:14). Ko marandu porã apytépe ojeʼe avei umi héntepe ko múndo aña oñehunditaha. Aníkena ñapensa ojeʼe reinteha umíva, síno Lot ojapo haguéicha, jajapo Ñandejára heʼíva hiʼanhelkuéra rupive. (Elee Revelación 1:1 ha 14:6, 7.)

Jesúspe omombarete haguéicha, Ñandejára ojevale avei hiʼánhel rehe ñanemombarete hag̃ua jahasa jave peteĩ mbaʼe ijetuʼúva. (Elee Lucas 22:41-43.)

Koʼẽrõitéma, Jehová ojevaléta umi ánhel rehe ohundiete hag̃ua umi hénte aña oporombohasa asývape. ¡Ajépa igustoitéta oiko vove upéva! (Elee 2 Tesalonicenses 1:6-8.)

 3. ¿Mávapa umi demónio ha mbaʼépa ojapo hikuái?

Oĩháicha heta yvypóra naiñeʼẽrendúiva Ñandejárape, oĩ avei heta ánhel opuʼãvaʼekue hese yvágape (2 Pedro 2:4). Koʼã ánhel naiñeʼẽrendúivape oñehenói demónio térã ánhel aña. Chupekuéra omoakã Satanás, pe Diablo. Haʼekuéra heta héntepe ombotavy ha ojapo opa ikatúva ani hag̃ua oservi Ñandejárape. (Elee Revelación 12:9.)

Pe Aña oiporu umi komersiantekuéra, yvypóra goviérno ha rrelihión japu ani hag̃ua umi hénte oservi Ñandejárape. Péicha Satanás káusare oĩ inhustísia, ñorairõ ha jehasa asy ko yvy ape ári. (Elee 1 Juan 5:19.)

4. ¿Mbaʼéichapa oporombotavy umi ánhel aña?

Satanás ogueroviauka umi héntepe umi omanóvagui oikoha espíritu ha ikatuha oñeñeʼẽ hendivekuéra. Péro la Biblia heʼi porã umi omanóva ndojapoveimaha mbaʼevete (Eclesiastés 9:5). Upéicha rupi, umi ánhel aña oporombotavy hag̃ua pyʼỹinte oñembohasa umi omanovaʼekuéramo ha oñeʼẽ haʼekuéraicha (Isaías 8:19). Oiporu avei espiritísta, umi heʼíva mbaʼépa oikóta tenonderãme, astrólogo ha opaichagua espiritísmo. La Biblia heʼi porã ñandéve ñamboykevaʼerãha koʼã mbaʼe ha jahejapaite hag̃ua umi mbaʼe ikatúva Satanás oiporu ñanembotavy hag̃ua. (Elee Deuteronomio 18:10, 11 ha Hechos 19:19.)

Jahayhúramo Ñandejárape ndajakyhyjemoʼãi Satanás ha umi ánhel añágui. Jastudiávo la Biblia ha jajapo umi heʼíva pype, ñañemomombyrýta pe Añágui ha ñañemoag̃uivéta Ñandejárare. Ha jahasa jave umi mbaʼe ijetuʼúva, Jehová ñanemombaretéta hiʼanhelkuéra rupive. Haʼe ningo imbaretetereive umi ánhel añágui. (Elee Salmo 34:7 ha Santiago 4:7, 8.)

Reikuaasevéramo koʼã mbaʼe, ikatu rehecha ko lívro, Mbaʼépa añetehápe omboʼe la Biblia?, ojapóva testigos de Jehová, kapítulo 10.