KOʼAG̃AITE peve ningo iñimportánte jaikuaa Jesús oñemoingove jey hague. ¿Mbaʼérepa? Apóstol Pablo heʼi: “Añetehápe Crístope oñemopuʼã omanóva apytégui, chupe raẽve oñemoingove jey vaʼekue. Pe ñemano ningo ou peteĩ kuimbaʼe rupive, upévare umi omanóvape oñemoingove jey peteĩ kuimbaʼe rupive. Adán káusare enterove omano, upéicha avei Cristo rupive enterovépe oñemoingove jeýta” (1 Corintios 15:20-22, NM).

Jesúspe oñemoingove jey vaʼekue 16 de nisán áño 33-pe. Upe díape umi hudío oho vaʼekue oikuaveʼẽ Ñandejára Jehovápe Jerusalén témplope umi hemitỹngue iporãvéva, pe oĩmba raẽvéva. Upéicha rupi, Pablo heʼívo “chupe raẽve oñemoingove jey vaʼekue”, ontendeka oĩvetaha oñemoingove jeýva.

Pablo ohechauka porã mbaʼépa ojehupyty oñemoingove jey rupi Jesúspe. Haʼe heʼi: “Pe ñemano ningo ou peteĩ kuimbaʼe rupive, upévare umi omanóvape oñemoingove jey peteĩ kuimbaʼe rupive”. Adán opeka haguére ningo ñanase imperfékto, japeka ha ñamano. Péro Jesús omeʼẽgui hekove perfékto ha oikove jey rupi, ñanemosãso pekádo ha ñemano poguýgui. Romanos 6:23-pe Pablo heʼi: “Ñamanóvo japaga ñande pekádore, péro Ñandejára orregala ñandéve jeikove opaveʼỹva ñande Ruvicha Cristo Jesús rupive”.

Jesús voi omombeʼu mbaʼérepa iñimportánte ñandéve g̃uarã omano ha oñemoingove jey hague. Haʼe heʼi omano ha opuʼã jey vaʼerãha “ikatu hag̃uáicha opavave ogueroviáva chupe ohupyty jeikove opaveʼỹva. Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:14-16, NM).

¡Epensamíntena! Ikatúta jaikove opa árare ha ndaiporivéima ñanembohasa asy vaʼerã (Revelación 21:3, 4.) ¡Aje piko iporãite ko promésa! Peteĩ karai heʼi: “Pe sepultúra ñanemomanduʼa mbykyha ñande rekove, pe ñemoingove jey katu ñanemomanduʼa sapyʼaiténte ñamanoha”. Añetehápe Jesúspe oñemoingove jey rupi, ikatu jaikove opa árare.