Akakuaa vaʼekue Santiago de Chílepe. Aiko vaʼekue peteĩ várrio oĩháme heta patotéro ha drogadíkto. Arekórõ guare cinco áño ojejuka che túvape. Upe rire che sy oñakompaña peteĩ karai arhél ndive, oikóva orenupã mokõivévape. Umi mbaʼe chereja vai ha koʼág̃a peve ndaikatúi cheresaraipa ahasa vaʼekuégui.

Chemitãrusúpe cheviolentoiterei vaʼekue oĩramo chembopochýva. Añepyrũ ahendu músika vai, por ehémplo heavy metal, avei haʼu rasa vevída ha sapyʼánte ajedroga. Pyʼỹinte añorairõ umi dróga vendehándi ha haʼekuéra heta vése haimetemete chejuka. Peteĩ jey unos kuánto patotéro opaga peteĩ kuimbaʼépe chejuka hag̃ua, péro una vénte chekutu ha adipara chugui. Ótro díape katu umi dróga vendeha oapunta cheakãre peteĩ pistóla ha chemosaingosemoʼã che ajúragui.

Áño 1996-pe, ajegusta peteĩ mitãkuña héravare Carolina, ha 1998-pe romenda. Upéi onase che raʼy ypykue ha upépe añepyrũ ajepyʼapy ahechakuaa rupi cheviolentoitereiha. Ha akyhyje ajoguárõ g̃uarã che tuvangápe ha amaltrata che famíliape. Upémarõ aha peteĩ lugárpe oĩháme umi doktór ha sikólogo oipytyvõva cheichaguápe. Péro mbaʼevépe nakambiái. Chepochypa rei ha arrenegaháre aiko. Ha pono ambohasa asyve che famíliape atantea ajesuisida, péro haʼetépe nosẽi chéve.

Heta áñore ndaroviái Ñandejára oexistiha, ha akambiase upéva. Upévare añepyrũ añembyaty evanhelikokuérandi. Upe tiémpope che rembireko oñepyrũ ostudia la Biblia umi testígo de Jehová ndive. Che ndachaʼéi hesekuéra ha sapyʼánte aguerosapukái ha chejurutieʼỹ chupekuéra. Péro umi Testígo arakaʼeve ndaipochýi chendive ha ahecharamoiterei upéva.

Peteĩ jey, Carolina heʼi chéve aheka hag̃ua che Bíbliape Salmo 83:18, upépe ohechauka porã Ñandejára heraha Jehová. Pe rrelihión ahahápe aaprende Ñandejáragui, péro che ndaikuaáiva heraha Jehová. Oñepyrũmírente  áño 2000, che avei añepyrũ astudia la Biblia umi Testígondi.

Astudiavévo ahávo ahechakuaa Jehová otrata porãha opavavépe ha ñaneperdonaha. Por ehémplo, Éxodo 34:6, 7 heʼi: ‘Jehová oiporiahuvereko opavavépe, ipyʼaporã, hasy ipochy hag̃ua, oporohayhu añete, nopyrũi iñeʼẽre, ohayhu enterovépe ha operdona ojavývape ha hembiapo vaívape’. Ko téxto opokoiterei cherehe.

Péro ijetuʼu chéve ajapo hag̃ua umi mbaʼe aaprendéva. Apensa voi nakambiaveimaha. Ajavy jave añeñandu vaieterei, péro Carolina akóinte chemokyreʼỹ ha chemomanduʼa Jehová ohechaha mbaʼeichaitépa añehaʼã. Heta vése apensa voi nachepohãveimaha, péro che rembireko chepytyvõ rupi añehaʼãmbaite jey ajapo hag̃ua Jehovápe ogustáva.

Peteĩ jey pe Testígo chemboʼéva la Biblia hérava Alejandro, ojerure chéve alee hag̃ua Gálatas 5:22, 23. Upépe heʼi umi mbaʼe porã oúva Ñandejára espíritugui haʼeha “mborayhu, vyʼa, pyʼaguapy, pasiénsia, pyʼaporã, mbaʼeporã, jerovia, pochyʼỹ ha jejokokuaa”. Alejandro heʼi chéve ahechaukasérõ koʼã mbaʼe porã tekotevẽha ajerovia Ñandejára espíriture ha ndahaʼéi chejehénte. Upéva tuicha cheresapeʼa.

Upe riremínte aha peteĩ aty guasúpe ojapóva umi testígo de Jehová. Upépe mbaʼeve ndojejapói sarambikuépe, amañahápente ipotĩ asy ha enterovénte oñoermánoicha ojotrata. Upéicha ahechakuaa atopaha pe rrelihión añetegua (Juan 13:34, 35). Ha febrero 2001-pe ajevautisa.

Jehová chepytyvõ akambia hag̃ua. Yma cheviolénto péro koʼág̃a ndaupeichavéima. Haʼete voi ku Jehová cheguenohẽva peteĩ yvykuágui ha upéicha rupi nañehundíri. Heta oĩ ndochaʼéi vaʼekue cherehe, ha ndareíri ningo. Koʼág̃a katu pyʼaguapýpe aservi Jehovápe che rembireko ha mokõi che família ndive.

Che hentekuéra ha umi che amígo yma guare ni ndoroviaséi mbaʼeichaitépa akambia. Ijapytepekuéra oĩma oaprendéva la Biblia omboʼéva. Che avyʼa aipytyvõvo chupekuéra ha hetave che rapichápe oikuaa hag̃ua Jehovápe, ha koʼýte avyʼa ahechávo la Biblia rupive okambiaha hikuái.