La Bíbliape oĩ heta istória ohechaukáva mbaʼéichapa umi omanda guasuvéva ojaprovecha hapicháre. Por ehémplo rréi Acab. Haʼe ogoverna vaʼekue Israel síglo 10-pe a.C., ha upérõ haʼe oipeʼase vaʼekue Nabot ha itaʼyrakuéragui iparralty. Rréina Jezabel oikuaávo iména oipotáva, ojukauka chupekuéra opyta hag̃ua Acábpe pe parralty. Haʼe oikuaávo hembireko ojaposéva, ndojokói chupe (1 Reyes 21:1-16; 2 Reyes 9:26). * ¿Mbaʼérepa Ñandejára opermiti ojejapo koʼã mbaʼe?

Ñepyrũrã, ñanemanduʼa vaʼerã Ñandejára ndaikatuiha ijapu (Tito 1:2). Péro, ¿mbaʼérepa ko situasiónpe iporã ñanemanduʼa upévare? Ñandejára ningo heʼi porã vaʼekue Adán ha Évape opuʼãramo hese omanotaha, ha upeichaite oiko. Haʼekuéra opuʼã guive Ñandejárare hardín de Edénpe, ñande ndaikatuvéima ñasẽ ñemano poguýgui. Ha pe primera persóna omano vaʼekue haʼe Abel, chupe ningo iñermáno ypykue ojuka vaʼekue oikuaágui ikatuha ipuʼaka hese (Génesis 2:16, 17; 4:8).

La Biblia heʼi upe guive ‘umi tetã ruvicha oiporu vaiha ipodér ombyai hag̃ua hapicha rekove’ (Eclesiastés 8:9, ÑÑB). Jehová heʼi vaʼekue voi ipuévlope, pe tetã Israélpe, ogovernataha chupekuéra umi rréi ipyʼahatãva ha ojopy asýtava chupekuéra, ha upépe ae haʼekuéra imanduʼataha hese (1 Samuel 8:11-18). Rréi Salomón jepe okovra hepy vaʼekue chupekuéra umi impuésto (1 Reyes 11:43; 12:3, 4). Ha oĩ heta rréi iñañaitevéva, umíva apytépe Acab. Epensamíntena, Ñandejára ojokórire umi hénte añáme ani hag̃ua ojaprovecha hapicháre, ¿nopyrũi vaʼerãmoʼã piko upéicha iñeʼẽre ha ijapu?

Péro ndahaʼéi upéva añónte, Satanás heʼi avei yvyporakuéra oserviha Ñandejárape oñevenefisiáta rupínte (Job 1:9, 10; 2:4). Ha Ñandejára oprotehéramo umi iñeʼẽrendúvape opa mbaʼe vaígui, oñekumplíta Satanás heʼíva. Ha oprotehéramo enterovetépe katu, oñepensáta yvyporakuéra añetehápe oiko porãveha Ñandejára reheʼỹ. Péro la Biblia heʼi porã yvypóra hekove jepe ndaikatuiha oisãmbyhy porã (Jeremías 10:23). Añetehápe ñaikotevẽtereíma ou Ñandejára Rréino, upépe aémante japytuʼúta umi inhustísiagui.

¿Heʼisépa upéva Ñandejára omañanteha ñanderehe ha ndojapoiha mbaʼeve? Nahániri, jahechamína mokõi mbaʼe ojapóva hína. Primero, oikuaauka enterovépe mbaʼérepa heta oĩ ojaprovecháva hapicháre omandave haguére ha ombosufri chupekuéra. Por ehémplo, Iñeʼẽme oskrivika mbaʼe mbaʼépa ojapo vaʼekue Jezabel Nabot rehe, ojukauka hag̃ua chupe. Ha omombeʼu oĩha peteĩ ipoderósova ojapoukáva hína koʼã héntepe umi mbaʼe vaieta (Juan 14:30; 2 Corintios 11:14). ¿Mávapa hína upéva? Satanás el Diablo. Ñandejára oikuaaukávo ñandéve mbaʼéichapa oñembosufri umi héntepe ha mávapa omomýi chupekuéra upearã, ñanepytyvõ jajehekýi hag̃ua umívagui ha péicha jaikove hag̃ua opa árare.

Segundo, Ñandejára opromete ñandéve katuete ohunditaha umi ojaprovechávape hapicháre. Ha haʼe ohechauka porã ikatuha ojapo upéva. Por ehémplo omotĩ, ohusga ha okastiga Acab, Jezabel ha hetave tapicha haʼekueraichaguápe. Ñandejára ndohejamoʼãi osegi upéicha umi iñañáva ha hembiapo vaíva (Salmo 52:1-5). Ha umi ohayhúvape chupe katu haʼe opromete koʼẽrõitéma oipeʼapataha opa mbaʼe vai oikóva. * Ikatu jajerovia Nabot ha itaʼyrakuéra oikove jeytaha ohecha hag̃ua ko yvýgui oiko vove peteĩ hardín neporãva ha ndaiporimoʼãvéima mbaʼeveichagua inhustísia (Salmo 37:34).