UMI oipotáva rrelihionkuéra ojeheʼa ojuehe katu opensa diferénte. Por ehémplo, peteĩ karai hérava Eboo Patel ha ofunda vaʼekue pe movimiénto interrelihióso Interfaith Youth Core, heʼi: “Pejemína chéve oĩpa rrelihión nañanemokyreʼỹiva japoroporiahuvereko hag̃ua [...] ñañangareko hag̃ua ko yvýre [...] ha ñanembaʼeporã hag̃ua enterovéndi”.

Añetehápe, umi vudísta, katóliko, protestánte, indu ha musulmán heta vése oñomoirũ odefende hag̃ua yvypóra derécho, oipytyvõ hag̃ua umi imboriahúvape, anive hag̃ua oñembaʼapo mínape, ha oporomokyreʼỹ oñeñangareko hag̃ua ko yvýre. Koʼã rrelihión omoakãva oñembyaty jepi avei oñemongeta hag̃ua umi mbaʼe ojaposévare ha og̃uahẽ hag̃ua hikuái peteĩ ñeʼẽme. Umi oĩva koʼã rrelihiónpe, ojapo jepi festivál, omyendy tataindy, ombopu músika térã oñemboʼe, ofesteha hag̃ua ojeheʼa haguére hikuái ojuehe.

¿Ikatúpa umi rrelihión ojeheʼáramo ojuehe osolusiona umi provléma orekóva hikuái oñondive? ¿Ojevalétapa Ñandejára umívare omoĩ hag̃ua peteĩ múndo iporãvéva?

Peteĩ organisasión interrelihiósa tuichavéva heʼi orekoha irrepresentánte 76 paíspe ha 200 rasa rrelihión ombaʼapoha hendivekuéra. Ko organisasión oipytyvõse umi rrelihiónpe “og̃uahẽ hag̃ua peteĩ ñeʼẽme ha oñopytyvõmba hag̃ua hikuái”, péro koʼag̃aite peve ndaikatúi gueteri ohupyty hikuái upéva. Por ehémplo, umi omoñepyrũva ko organisasión heʼi omoĩtarõ guare hikuái umi léi upe organisasiónpe g̃uarã, heta oñembaʼapo hague ani hag̃ua ombopochy ni peteĩ rrelihiónpe ni umi grúpo indíhena omoirũvape chupekuéra. ¿Mbaʼérepa? Oĩgui ijapytepekuéra ndoipotáiva oñeñeʼẽ Ñandejárare umi dokuméntope. Ha osolusiona hag̃ua hikuái upe provléma, noñeʼẽieténtema Ñandejárare.

Péro ¿maʼerãpa upéicharõ oĩ umi rrelihión ndaikatumoʼãiramo oñeñeʼẽ Ñandejárare? ¿Mbaʼépepa upéicharõ idiferénte pe organisasión interrelihiósa, umi organisasión oipytyvõvagui umi oikotevẽvape? Pe organisasión interrelihiósa ndeʼíri voi operteneseha peteĩ rrelihiónpe, síno haʼeha peteĩ organisasión omokyreʼỹva umi héntepe oiko hag̃ua peteĩ ñeʼẽme.

Peteĩ karai odefende mbaretéva pe organisasión interrelihiósa hérava Dalai Lama, heʼi: “Entéro rrelihión omboʼe japorohayhu, japoroporiahuvereko ha ñaporoperdona hag̃ua. Ha iñimportantevéva hína jahechauka koʼã mbaʼe ñande rekovépe káda día”.

Enterove ningo jaikuaa iporãha japorohayhu, japoroporiahuvereko ha ñaporoperdona. Opárupi voi ojekuaa pe konsého porãite Jesús omeʼẽ vaʼekue: “Opa mbaʼe peẽ peipotáva ojapo penderehe pende  rapichakuéra, peẽ pejapo vaʼerã avei hesekuéra” (Mateo 7:12). Péro, ¿upévante piko oñehaʼarõ pe rrelihión añeteguágui? ¿Oñehaʼarõpa omokyreʼỹnte hikuái umi héntepe ojapo hag̃ua iporãva?

Apóstol Pablo heʼi haʼe oikoha tiémpope oĩ hague heta tapicha oserviséva Ñandejárape ipyʼaite guive, “péro ndoikuaaporãi chupe”. Pablo heʼive: “Haʼekuéra ndoikuaái Ñandejára hustísia, ha ijeheguínte odesidise mbaʼépa iporã ha ivai” (Romanos 10:2, 3). Haʼekuéra ojeroviáramo jepe Ñandejárare ha oserviséramo jepe chupe ipyʼaite guive, ndaikatúi ojapo upéva, ndoikuaáigui mbaʼépa Ñandejára ohaʼarõ chuguikuéra (Mateo 7:21-23).

Jesús heʼi: “Ovyʼa vaʼerã umi ombaʼapóva oĩ hag̃ua pyʼaguapy” (Mateo 5:9, Jesucristo Marandu Porã). Jesús ojapo vaʼekue upéva, haʼe ohechauka idisipulokuérape naiporãiha oñorairõ, ha omombeʼu entéro rrelihionguápe pe marandu ombopyʼaguapýtava chupekuéra (Mateo 26:52). Umi ojapóva guive Jesús omboʼéva, oiko pyʼaguapýpe oñondivepa oñoermánoicha ha ojoayhu hikuái ipyʼaite guive (Colosenses 3:14). ¿Péro upévantepa ojapo vaʼekue Jesús? ¿Oiképa rakaʼe haʼe umi ótra rrelihiónpe ombaʼapo hag̃ua hendivekuéra?

Umi fariséo ha saduséo ningo oforma vaʼekue peteĩ sékta, ha umi omoakãva chupekuéra opersegi mbarete vaʼekue Jesúspe ha ojukase voi chupe hikuái. ¿Mbaʼépa ojapo Jesús upérõ? Haʼe heʼi idisipulokuérape: “Pehejána chupekuéra. Haʼekuéra ndohechái mbaʼeve, ha upéicharamo jepe ohechauka haperã ótrope” (Mateo 15:14). Péicha jahecha Jesús ndohekái hague oñemoĩ porã umi ótro rrelihiongua ndive ha ndojeheʼái hague hesekuéra.

Heta tiémpo rire oñepyrũ peteĩ kongregasión kristiána Coríntope. Upe siudápe oiko héta hénte ótro tetãygua ha oĩ avei opaichagua rrelihión. ¿Mbaʼépa ojapóta upe situasiónpe umi omoirũ añetéva Crístope? Apóstol Pablo ohai chupekuéra: “Ani peñemoĩ peteĩ júgo guýpe umi ojeroviaʼỹva ndive”. Ha upéi omombeʼu mbaʼérepa: “¿Mbaʼéicha piko oiko porãta Cristo ha Satanás? Térã, ¿mbaʼépepa ojojogua peteĩ ojeroviáva ha peteĩ ojeroviaʼỹva?”. Avei heʼi porã umi kristiáno teépe: “Pesẽke ijapyteguikuéra, ha pejeíke chuguikuéra” (2 Corintios 6:14, 15, 17).

Jahechaháicha, la Biblia ndeʼiriete iporãha ojeheʼa ojuehe umi rrelihión. Ikatu oime nde reñeporandu: “¿Mbaʼéichapa upéicharõ yvyporakuéra ikatúta oiko peteĩ ñeʼẽme oñondivepa?”.

Pe Estación Espacial Internacional oĩva yvate ha ojeréva ko yvýre, oguereko ha oiporu umi aparáto ijojahaʼỹva. Ha 15 paísrupi oñomoirũ vaʼekue ojapo hag̃ua upéva. Péro, ¿ndépa ere ojejapóne hague upe Estación Espacial umi tetã nog̃uahẽirire peteĩ ñeʼẽme mbaʼéichapa ojapóta hikuái upéva? Nahániri ajépa.

Upe situasiónpe avei oĩ umi organisasión interrelihiósa koʼag̃agua. Haʼekuéra heʼi jajorrespeta ha ñañopytyvõmba vaʼerãha, péro haʼekuéra voi ndaikatúi og̃uahẽ peteĩ ñeʼẽme odesidi hag̃ua mbaʼépa ojapóta ohupyty hag̃ua hikuái peteĩ jerovia imbaretéva ha iporãva enterovépe g̃uarã. Upéicha rupi, koʼag̃aite peve ojoavypa umi rrelihión omboʼéva, ndaikatúi heʼi hikuái mbaʼépa añetehápe iporã ha mbaʼépa ivai.

La Biblia haʼete peteĩ “pláno” ohechaukáva ñandéve mbaʼéichapa Ñandejára oipota jaiko, ha jasegíramo umi konsého omeʼẽva ikatúta javyʼa. Umi ojapóva la Biblia heʼíva oiko porã hapichakuéra ndive, ohayhu umi ipire kolór diferéntevape, ha ombaʼapo oñondivepa peteĩ ñeʼẽme. Ñandejára heʼi voi: ‘Upérõ amboʼéta opa tetãme oñeʼẽ hag̃ua peteĩ ñeʼẽ ipotĩva, ikatu hag̃uáicha oñondivepa oiporu Jehová réra ha oservi chupe’. Oñeñeʼẽ rupi pe “ñeʼẽ ipotĩva” térã ojejapo rupi Ñandejára heʼíva, heta yvypóra oiko peteĩ ñeʼẽme oñondivepa (Sofonías 3:9, NM; Isaías 2:2-4).

Testígo de Jehová neinvita reho hag̃ua pe Salón del Reino hiʼag̃uivévape nde rógagui, ikatu hag̃uáicha ndete rehecha mbaʼéichapa oiko hikuái pyʼaguapy ha peteĩ ñeʼẽme oñondivepa (Salmo 133:1).