Ikatu ere: “Maʼerã piko añemboʼéta Ñandejárape, haʼe ningo oikuaapáma voi mbaʼépa aikotevẽ, umi mbaʼe apensáva jepe”. Añete upéva, Jesús jepe heʼi vaʼekue Ñandejára oikuaapamaha voi mbaʼépa ñaikotevẽ jajerure mboyve chupe (Mateo 6:8). Rréi David avei ohechakuaa vaʼekue upéva, ha ohai: “Osẽ mboyve peteĩ ñeʼẽ che jurúgui, nde, che Ruete, reikuaapáma voi” (Salmo 139:4, ÑÑB). ¿Maʼerãpa upéicharõ ñañemboʼe? Ñambohovái hag̃ua ko porandu, jahechami mbaʼépa heʼi la Biblia pe ñemboʼére. *

La Biblia heʼi Jehová * oikuaapaiteha opa mbaʼe, péro heʼi avei chupe g̃uarã iñimportanteha umi mbaʼe ñañandúva, ndahaʼéi umi mbaʼe ñaikotevẽvante (Salmo 139:6; Romanos 11:33). Haʼe ningo ndahaʼéi peteĩ komputadóraicha oñongatúnteva umi informasión, síno ojepyʼapy ñanderehe, oikuaase mbaʼépa ñapensa ha oikose ñane amígoramo (Salmo 139:23, 24; Santiago 4:8). Upévare Jesús ñanemokyreʼỹ ñañemboʼe hag̃ua Ñandejárape, haʼe oikuaapáramo jepe mbaʼépa ñaikotevẽ (Mateo 6:6-8). Jajepokuaáramo ñañeʼẽ ñande Apohare ndive, ára ha ára ñañemoag̃uivéta hese ha jarekóta chupe ñane amígoramo.

Sapyʼánte ningo ni ndajaikuaái mbaʼépa jajeruréta Ñandejárape. Upéicha jave haʼe ikatu ohecha mbaʼépa oĩ ñande pyʼapýpe ha mbaʼépa ñaikotevẽ hína omeʼẽ hag̃ua ñandéve (Romanos 8:26, 27; Efesios 3:20). Upe rirénte jahechakuaa mbaʼéichapa haʼe ñanepytyvõ ha upéva ñanemoag̃uive hese.

La Biblia heʼi Ñandejára Ipuʼakapáva ohendu ha ombohovaiha umi hembiguái iñeʼẽrendúva ñemboʼe, ha omombeʼu avei mbaʼérepa nohendúi entéro ñemboʼe. Por ehémplo, umi isrraelíta ojapórõ guare hetaiterei mbaʼe vai, Ñandejára omanda proféta Isaíaspe heʼi hag̃ua chupekuéra: “Peñemboʼe heta hetavéramo jepe, Che napohendumoʼãi; pende po henyhẽgui pende rapicha ruguýgui” (Isaías 1:15, ÑÑB). Jahechaháicha, umi ndojapóiva Ñandejára Léi heʼíva térã umi ojeruréva peteĩ mbaʼe ndogustáiva Ñandejárape, ohaʼarõ reíta haʼe ohendu iñemboʼe (Proverbios 28:9; Santiago 4:3).

La Biblia heʼi: “Oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta” (1 Juan 5:14). ¿Heʼisépa upéva Ñandejára omeʼẽtaha isiervokuérape opa mbaʼe ojeruréva chupe? Nahániri. Por ehémplo, apóstol Pablo ojerure asy vaʼekue tres vése voi Ñandejárape oipeʼamínte hag̃ua chugui peteĩ mbaʼe ombohasa asýva chupe (2 Corintios 12:7, 8). Ikatu oime iprovléma rakaʼe hesápe ha ndokueravéi. Péro Ñandejára nombohováiri chupe iñemboʼe haʼe ohaʼarõ haguéicha. Oime vaʼerã oñeñandu vaieterei raʼe, haʼe ningo ikatu vaʼekue omonguera umi hasývape ha omoingove jey vaʼekue peteĩ omanóvape, péro ndaikatúi ojapo mbaʼeve haʼe okuera hag̃ua (Hechos 19:11, 12; 20:9, 10). Upéicharamo jepe, Pablo oagradese Ñandejárape oipytyvõ haguére chupe ogueropuʼaka hag̃ua upéva (2 Corintios 12:9, 10).

Yma Ñandejára ojapo vaʼekue milágro ombohovái hag̃ua hembiguaikuérape iñemboʼe (2 Reyes 20:1-7). Péro nameméi ojapo upéicha. Oĩ vaʼekue avei Ñandejára siérvo opensáva noñembohovairiha chupe iñemboʼe ha ojepyʼapy upévare. Umíva apytépe rréi David, haʼe heʼi vaʼekue: “Che Jára Jehová, ¿arakaʼe peve piko nderesaráita chehegui? ¿Cherehe piko nanemanduʼamoʼãvéima?” (Salmo 13:1, NM). Péro upéi David imanduʼa mboy vésemapa Jehová oipytyvõ chupe, ha ára ha ára ojeroviave hese. Upéicha rupi upe iñemboʼépe voi heʼi jey: “Che ajerovia nderehe ha avyʼa cherenohẽ haguére jejopy vaígui” (Salmo 13:6 [13:5, NM]). Haʼéicha avei, sapyʼánte tekotevẽta ñañemboʼe heta vése jahecha hag̃ua mbaʼéichapa oñembohovái ñandéve ñane ñemboʼe (Romanos 12:12).

Omeʼẽ ñandéve umi mbaʼe añetehápe ñaikotevẽva.

Peteĩ túva ningo ohayhu ifamíliape, péro upéva ndeʼiséi omeʼẽtaha chupe opa mbaʼe ojeruréva ha oipotaha óra. Upéicha avei Ñandejára, haʼe sapyʼánte nombohováiri ñane ñemboʼe ñandéve ñandegustaháicha ha jaipotaha óra. Péro jaikuaa haʼe ñanderayhuetereiha, ha peteĩ túvaicha omeʼẽtaha ñandéve upe añetehápe ñaikotevẽva, itiempoitépe ha iporãveháicha (Lucas 11:11-13).

Ikatu ombohovái ñahaʼarõʼỹháicha.

Ha oiméramo ñañemboʼe hína ñane provléma hetágui, ¿ñahaʼarõtapa Ñandejára ojapo peteĩ milágro osolusiona hag̃ua ñandéve? Ha ndojapóiramo, ¿heʼisépa upéva nohenduiha ñane ñemboʼe? Nahániri, ikatu ombohováima ñandéve ha ñandénte ndajahechakuaái. Ikatu oime ojevale raʼe peteĩ ñane amígo rehe ñanepytyvõ hag̃ua (Proverbios 17:17). Ikatu avei Ñandejára ombohovái hína ñandéve ñane ñemboʼe la Biblia rupive. Jaleéramo ikatu ñanemoarandu hína ñambohovái porã hag̃ua ñane provlemakuéra (2 Timoteo 3:16, 17).

Osolusionamba rangue ñandéve opa mbaʼe ñandepyʼapýva, Ñandejára sapyʼánte ñanemombareténte jagueropuʼaka hag̃ua umi situasión (2 Corintios 4:7). Peteĩ jey, Jesús okyhyje omongyʼárõ g̃uarã Itúva réra ha ojerure asy chupe onohẽmi hag̃ua chupe upe situasión ijetuʼuetévagui. ¿Mbaʼépa ojapo Ñandejára? Haʼe ombou peteĩ ánhel omombarete hag̃ua Jesúspe (Lucas 22:42, 43). Upéicha avei Ñandejára ikatu ojevale peteĩ ñane amígo rehe ñanemokyreʼỹ hag̃ua ñaikotevẽve jave (Proverbios 12:25). Koʼã mbaʼe sapyʼánte ndajahechakuaái, ha upévare ñañatende vaʼerã jahecha hag̃ua mbaʼéichapa Ñandejára ombohovái hína ñandéve ñane ñemboʼe.

Ombohovái itiempoitépe.

La Biblia heʼi Ñandejára itiempoitépe ombohovaiha iñemboʼe umi iñumíldevape (1 Pedro 5:6). Upéicharõ, ñapensa jave otardaha ombohovái hag̃ua ñane ñemboʼe, ñanemanduʼa vaʼerã ndahaʼeiha ndojepyʼapýigui ñanderehe. Haʼe ningo upe oĩha guive ohechapaite opa mbaʼe ha oikuaa mbaʼépa iporãve ñandéve g̃uarã. Upéicha rupi Ñandejára ikatu odesidi mbaʼéicha ha arakaʼépa ombohováita ñandéve ñane ñemboʼe.

Ñamoĩ chupe erekoha peteĩ ne família michĩva, ha heʼi ndéve oipotaha ivisikletarã. ¿Rejoguátapa chupe ensegída? Nde reikuaa ne família michĩha gueteri ha iporãvetaha rehaʼarõmiénte rejogua hag̃ua chupe. Upéicha avei ñande jajeruréramo Ñandejárape peteĩ mbaʼe jaipotáva ha ñañemboʼe meméramo upévare, oĩ porãma guive, ñande Ru yvagapegua omeʼẽta ñandéve itiempoitépe (Salmo 37:4).

La Biblia ñanemokyreʼỹ siémpre jahechakuaa hag̃ua iñimportanteha pe ñemboʼe ha añetehápe ñanepytyvõha upéva. Ikatu nde repensa: “Ndahasýi jaʼe hag̃ua upéva, jajapo hag̃uánte hasy”. Ikatu oime heta tiémporema resufri peteĩ provléma káusare térã peteĩ mbaʼe ojejapóvare nderehe, ha upéicha rupi ijetuʼu ndéve reguerovia hag̃ua Ñandejára ohenduha ne ñemboʼe. Upéicharõ jepe, iporã nemanduʼa Jesús heʼi hague iporãha jajerure meme oñemeʼẽ hag̃ua ñandéve ha ani ñanekaneʼõ.

Jesús omombeʼu vaʼekue peteĩ ehémplo ha heʼi peteĩ viúda mboriahumi oho jey jey hague peteĩ  hués rendápe ojerure hag̃ua chupe toipytyvõmi chupe (Lucas 18:1-3). Péro ko hués ndokyhyjéi Ñandejáragui ha ñepyrũrã noipytyvõséi chupe, péro amo ipahápe heʼi: “Ahecháta tojejapo chupe hustísia. Upéichamante ndoumoʼãvéima manterei ojerure chéve hustísia chemonguerái peve” (Lucas 18:4, 5). Peteĩ ñeʼẽ griégo oiporu vaʼekue pe hués, ohechauka haʼe “ndopytavaiséi hague umi hénte renondépe” ha upévare ojapo hustísia. * Péicha jahecha mbaʼéichapa peteĩ hués hekojojaʼỹva jepe oipytyvõ hague peteĩ viúdape, ani hag̃ua oñemongyʼa héra térã opyta vai umi hénte renondépe. Upéicharõ, koʼýte Ñandejára ñanderayhuetéva oipytyvõta umi ‘ojerure asývape chupe ára ha pyhare’. Jesús heʼi voi: ‘Haʼe pyaʼeterei ohecháta ojejapo hag̃ua hustísia’ (Lucas 18:6-8).

Sapyʼánte ñanekaneʼõma jajerure hague Ñandejárape ñanepytyvõmi hag̃ua, péro aníkena ñañedesanima. Jasegi vaʼerã katu ñañemboʼe, upéicha jahechaukáta jaipotaha haʼe ombohovái ñandéve. Ha ñañatendéramo, katuete jahechakuaáta mbaʼéichapa haʼe ombohovái ñandéve ñane ñemboʼe ha ñañemoag̃uivéta hese. Añetehápe, ñañemboʼéramo Jehovápe haʼe oipotaháicha ha jajeroviáramo hese, katuete ombohováita ñandéve ñane ñemboʼe (Lucas 11:9).