Nɛreba zo’e zo’e yeti to kan ta’an sirum baŋɛ se’em n gulesɛ Baabule la. Ge Baabule la mea basɛ ti to baŋɛ sɛba n gulesɛ ku. Baabule la bɔba ase’a pɔsɛ yeti, “Nehemia yelesum n wana,” “liligere ti Isaiah nyɛ,” la “Yelesum ti Yehowa tɔɣɛ bo Yoel.”​—Nehemia 1:1; Isaiah 1:1; Yoel 1:1.

 Sɛba n yuun gulesɛ Baabule la pa’alɛ ti ba gulesɛ ku la Yehowa, yelemɛŋɛrɛ Naayinɛ ayina ma’a la yu’urɛ poan. Eŋa mea n soŋɛ ba ti Nɔdɛ’ɛseba la n yuun gulesɛ Hebru Gulesegɔ la yuun tɔɣɛ ti la gaŋɛ sugumnɔɔrɛ kɔbesi sita yeti: “Yehowa n yele se’em n wana.” (Amos 1:3; Mikah 2:3; Nahum 1:12) Basɛba me yuun to’e Naayinɛ yelesum la malesi zɛ’an.​—Zekaria 1:7, 9.

 Nɛreba n paɛ 40 n yuun dekɛ yuuma n gaŋɛ 1,600 gulesɛ Baabule la. Nɛresɛba n yuun gulesɛ Baabule la gulese gaŋɛ gɔnɔ bayi bii batã. Yelemɛŋɛrɛ, Baabule la dela gɔŋɔ zaaleŋa pika n tari gɔnɔ 66. Hebrew Gulesegɔ la tari la gɔnɔ 39 ti nɛreba zo’e zo’e yi’ira ku ti Old Testament. Kristakɔma Greek Gulesegɔ la me tari la gɔnɔ 27 ti ba yi’ira ku ti New Testament.