Aayi. Ho san dekɛ diimi Baabule la makɛ la Baabule seto n boi zina la, ho wan nyɛ ti la ka tee, la nɔɔ boi bim ti ba dekɛ la yuuma tusa malum gulesa yɛla wa ita lɔɣɔrɔ n sa’ani poan.

 Ba nyɛ diimi Baabule gɔnɔ n paɛ tusa mɛ. Gɔnɔ wa yɛla ase’a ka makɛ taaba ti la pa’alɛ ti ba yuun guleseri tuura mɛ. Ge tuure seto n boi bim la pɔ’ɛ mɛ ge ni ka tee yele la vuurɛ n de sɛla. Ge tuure kãra me boi bim mɛ. Tuure ana wa ase’a basɛ ti la niɛ peelum ti nɛreba n mi ge bɔta ti ba tee yɛla Baabule la poan. Geele yɛla wa ayi bisɛ:

1.     Ge diimi Baabule gɔnɔ ase’a n tari yelemeŋɛrɛ basɛ ti la niɛ peelum ti yetɔɣum ana wa yuun ka pɔsɛ bɔna Baabule la poan ge pooren ti ba tuɣum dekɛ ba pa’asɛ bim. a Bala zuo la, zina beere Baabula n tari yelemeŋerɛ yese yetɔɣum ana basɛ mɛ.

2.   Naayinɛ yumɛŋerɛ la boi diimi Baabula poan paɛ la sugumnɔɔrɛ tusa. Ge Baabula zo’e zo’e yese a yu’urɛ la mɛ ge tee gulesɛ na’asegɔ yu’ura n de wuu “Daana” bii “Naayinɛ.”

 Nananawa, ba nyɛ diimi Baabule gɔnɔ zo’e zo’e mɛ n basɛ ti la dɛna naana zina ti to baŋɛ tuure yɛla n boi zɛ’an. b Ba dekɛ gɔnɔ wa makɛ taaba la, Baabule la sirum tari yelemɛŋerɛ zina wa?

•   Gɔnmi’ila William H. Green n tɔɣɛ Hebru Gulesegɔ la (ti ba yi’ira ti “Old Testament”) yele se’em n wana: “La dela yelemɛŋerɛ ti diimi gɔŋɔ ka boi ti ba malum gulesɛ ku yɛla ti ku kelum tara yelemɛŋerɛ wana.”

•   Baabule gɔnmi’ila F. F. Bruce n gulesɛ Kristakɔma Greek Gulesegɔ bii “New Testament” la yele se’em n wana: “Yelese’a n pa’alɛ ti New Testament gulesegɔ la dela yelemɛŋerɛ la gani nɛreba basɛba n gulesɛ ba gɔnkãra se’em la. Nɛra ka boi n wan ta’an yeti ku daɣɛ yelemɛŋɛrɛ.”

•   Sir Frederic Kenyon n zamesɛ Baabule diimi gɔnɔ soŋa soŋa yeti nɛra “ta’an dekɛ Baabule la zãla ge tɔɣɛ ti dabeem ka bɔna bim ti eŋa zãli la Naayinɛ Yetɔɣum ti dɔɣɛ pa’asɛ se’a n tole la nɛreba dekɛ bo to ti tuure ka bɔna bim yuun kɔbesi n wana.”

•   Yudadoma la Kristakɔma sɛba n malum gulesɛ Baabule yɛla eŋɛ gɔnɔ poan la gulesɛ la yelebe’ero seto ti Naayinɛ mea nɛreba tum. c (Kanlɛ 20:12; 2 Samuel 11:2-4; Galatia 2:​11-​14) Bala mea nɔɔ ti ba le gulesɛ yelese’a n zɛregeri Yudadoma la n ka nam bɔ’ɔra la ge kelum zɛregɛ bamesi n biŋe ba lɔɔ dɔla la. (Hosea 4:2; Malaki 2:8, 9; Matu 23:​8, 9; 1 Yon 5:​21) Nɛreba wa n le malum gulesɛ yɛla wa ma’a ma’a la pa’alɛ ti ba tari la yelemɛŋɛrɛ ge me bɔ’ɔra Naayinɛ zilam Yetɔɣum la gilema.

•   Yɛm ka boi bim ti to sakɛ ti Naayinɛ mea n basɛ ti ba gulesɛ Baabule la wan kelum gu ti ba kan tee Baabule la? d (Isaiah 40:8; 1 Peter 1:​24, 25) Yele la dela, a yuun boti diimi nɛreba la zina nɛreba laɣum nyɛ nyuurɔ de poan. (1 Korint 10:11) Yelemɛŋɛrɛ, “sɛla woo n golehɛ yɛta la, daa golehɛ pa’ala la tomam. Se’ere n sɔe la la dela Yenɛ gɔŋɔ la n golehɛ yɛta se’em la n soŋorɛ tɔ te to din’inha suunre gura ge tara suguru ge me kan’ana tɔ.”​—Arom 15:4.

•   Yezu la a podɔleba yuun tɔɣɛ yelese’a n boi Hebru Gulesegɔ la poan ge ba ka makɛ yeti daaŋɔ n boi gulesegɔ aŋa poan.​—Luke 4:​16-​21; Tooma 17:​1-3.