Baabule la ka dekɛ yelebire la n de “puka’asegɔ” tum tuuma pa’alɛ nɛra n ka’ɛ puurɛ basɛ. Ge Baabule kaalegɔ zɛ’ɛsi zo’e zo’e tɔɣɛ pa’alɛ Naayinɛ n geele asaala vom se’em mɛ hali la bisɛka ti ba nan ka dɔɣɛ.

 Vom dela bo’olum n ze’ele Naayinɛ zɛ’an na. (Pin’ileŋɔ 9:6; Yooma 36:9) A geele vom woo ti la tari tuulum mɛ hali la bisɛka n nan boi puuren. Bala, nɛra san mina fii ge ku bia ti ba nan ka dɔɣɛ, a ku la nɛra.

 Naayinɛ yuun bo Israeldoma la Lɔɔ yeti: “Buraasi san zabera, ta sɔ̃’ɛ pɔɣepuadaana basɛ ti a dɔɣɛ kãsa ti ge ti kum ka ku, mina n ta’asɛ la nari ti a yɔ sanse’ere ti pɔka la sira wan kɛɛ en ti a yɔ la; a me nari ti a doose la gãkerɛdoma la poan yɔ. Ge daaŋɔ san bɔna bim, ti ba se’em ki dekɛ ya vom yɔ vom.”​—Yɛhega 21:22, 23. a

•  Nɛresaala vom pɔsera la wani ma’a?

•  Naayinɛ wan di sugeri bo mina n tabelɛ ka’ɛ puurɛ basɛ?

•  Ma la bii bia la vom san bɔna dɛŋa poan, la dela be’em ti ho ka’ɛ puurɛ la basɛ?

 Naayinɛ geele ti asaala vom ni pɔsɛ la se’em ma’a ti pɔka nyɔɣɛ puurɛ. Naayinɛ ni basɛ ti la niɛ peelum Baabule la poan ti bia ti ba nan ka dɔɣɛ dela nɛra n bo a to’ore. Geele yɛla ase’a n pa’alɛ ti Naayinɛ nɛŋa, bia n nan boi puuren ka boi a tɔka la ba dɔɣɛ bisɛka bisɛ.

•   Vo’osum la yuun basɛ ti Naba David yele Naayinɛ yeti: “Hali ho nini nyɛ mam n daa de bia bɔna puuren la mɛ.” (Yooma 139:16) Naayinɛ yuun geele David ti a dela nɛra ge ti ba nyaa ta dɔɣɛ en.

•   Leyɛ’ɛsa, Naayinɛ yuun mi ti a wan dekɛ Yeremia tum tuunɛ n boi de to’ore ge ti ba nyaa ta dɔɣɛ en. Naayinɛ yuun yele en yeti: “Yeremia, se’em ma’a ti mam naam hon ho ma pooren la, ti mam mi ho mɛ. Ba ta dɔɣera ho la, ti mam pon yese ho ze’ele la ho tɔka. Mam n loe ho, ti ho dɛna n nɔtɔɣɔsa bo tisi.”​—Yeremia 1:5.

•   Baabule gɔngulesa Luke n yuun de dɔgeta la yuun dekɛ la Greek yelebire kayima tɔɣɛ bia ti ba nan ka dɔɣɛ la bilia ti ba nan dɔɣɛ yele.​—Luke 1:41; 2:12, 16.

 Naayinɛ wan di sugeri bo nɛresɛba n tabelɛ ka’ɛ puurɛ basɛ. Ba san nam Naayinɛ n geele vom se’em la, la ka nari ti ba basɛ ti ba be’em la daana ba. “Naayinɛ dela nimbɔzɔta, la zo’osegɔ daana . . . A dekɛ tomam be’em lobe zaɛ mɛ wo dapoore bɔba n zaɛ la zanyɔrɛ bɔba se’em la.” b (Yooma 103:8-12) Yehowa wan di sugeri bo nɛresɛba n yese ba suuren basɛ be’em n de wuu puka’asegɔ la.​—Yooma 86:5.

 Baabule la n tɔɣɛ bia ti ba nan ka dɔɣɛ yele se’em la pa’alɛ ti nɛra san ka’ɛ puurɛ basɛ ti la dɛna la ma la bii bia la vom n wan ta’an ta bɔna dɛŋa poan la zuo, a ka tari buurɔ.

 Ge pɔka san virege ti sɛla ta eŋɛ ti la dɛna pɛregerɛ ti ba faaɛ bia la bii ma la vom basɛ? Yele kaŋa taaba poan, la dela nɛra woo kɔ’ɛ a puti’irɛ la eŋa n wan bɔta ti ba faaɛ ba mina vom basɛ.