Baabule la bo’ori to la pa’alegɔ n wan ta’an soŋɛ tɔ ti to kɔ’ɛ to puti’irɛ soŋa. Ku wan ta’an soŋɛ tɔ ti to “ɛ yɛm la bɔkerɛ.” (Magaha 4:5) Saŋa ase’a, Baabule la ni kɔ’ɔn yele to mɛ to wan kɔ’ɛ to puti’irɛ se’em ti la ana soŋa. Saŋa ase’a me, ku ni bo la ka’aŋɔ n wan ta’an soŋɛ tɔ ti to kɔ’ɛ to puti’irɛ soŋa.

Yelese’a n boi zaseŋɔ yele wa poan

•  Yelese’a n wan soŋɛ tɔ ti to kɔ’ɛ to puti’irɛ soŋa

•  La nari ti n tee mam puɣum kɔ’ɛ n puti’irɛ ti n tum sɛla la?

•  Ho wan eŋɛ la wani ho san kɔ’ɛ ho puti’irɛ ti la ka ana soŋa ge ti ho me kan ta’an tee?

•   Da kabela ti ho kɔ’ɛ ho puti’irɛ. Baabule la yeti: “Yɛmdaana ni ma’ɛ la amea ti’isɛ sɛla woo ti a ita.” (Magaha 14:15) Ho san kabelɛ kɔ’ɛ ho puti’irɛ, la kan basɛ ti ho baŋɛ yelese’a woo n pakɛ la. Ma’ɛ homea ge loe sɛla n ani soŋɛ.​—1 Tesalonika 5:21.

•   Da kɔ’ɛ ho puti’irɛ doose la, lan ani ho se’em. Baabule la kaɣɛ to ti, la ka nari ti to dɔla to suure la n boti sɛla. (Magaha 28:26; Yeremia 17:9) Makerɛ, to kan ta’an kɔ’ɛ to puti’irɛ soŋa se’em ma’a ti to sunsɔa nyie bii to suure n sa’am bii to giila n kɔ’ɔsɛ bii to inya n kiti bii to ba’ɛ taregɛ mɛ.​—Magaha 24:10; 29:22.

•   Zusa ɛɛra yɛm. (Yames 1:5) Naayinɛ puurɛ ni pee mɛ ti a lebese zusega ana taaba. A dela Sɔ sɛka n fabeli a kɔma yele ge me bɔta ti ba gu ba daaŋɔ yɛla poan. “Yehowa mea n bo’ori yɛm; mi’ilum la baŋerɛ ze’eti la a nɔɔren na.” a (Magaha 2:6) A bo’ori yɛm buna wan doose la a Yelesum la n de Baabule la poan.​—2 Timoti 3:16, 17.

•   Viisɛ yɛla soŋa. Ho san wan kɔ’ɛ ho puti’irɛ soŋa, ho nari ti ho nyɛ yelese’a n de yelemɛŋɛrɛ. Wuu Baabule la n yele se’em la, “yɛmdaana keleseri mɛ ge baŋera yɛla pa’asa.” (Magaha 1:5) Bɛsa ti ho wan nyɛ yelese’a n de yelemɛŋɛrɛ n wan ta’an soŋɛ hɔ?

   Yia, bisɛ Baabule la n tɔɣɛ ho yeledaaŋɔ la yele se’em. Se’ere n sɔi la to Naaŋɔdaana la mi yelese’a n wan soŋɛ to mɛ, bala la, a Yelesum la tari la ka’aŋɔ soŋɔ. (Yooma 25:12) Yɛla ase’a poan, Baabule la ni bo to la ka’aŋɔ wana mɔpi ti la dɛna lɔɔ bii nɔya. (Isaiah 48:17, 18) Yɛla zo’e zo’e poan me, Baabule la ni ka bo to ka’aŋɔ wana mɔpi. Ge ku bo’ori to la naresum yɛla ti la dɛna gu’a bɔ’ɔra tɔ. Wana wa wan ta’an soŋɛ hɔ ti ho kɔ’ɛ ho puti’irɛ soŋa ge me kelum bo ho yɔ’ɔ ti ho loe hon boti sɛla. Ho san bɔta ti ho nyɛ Baabule yelese’a n wan soŋɛ hɔ, bisɛ Baabule gɔnɔ bii magazines n boi jw.org poan. Ba dela zaŋa. b

   Ho san bɔta ti ho kɔ’ɛ ho puti’irɛ yɛla ase’a poan, la nari ti ho viisɛ baŋɛ zɛse’esi n tari yelemɛŋɛrɛ lasebaarɛ. Makerɛ, ge ti ho nyaa da lɔkɔ n eŋɛ laɣehɔ, yɛm wan bɔna bim ti ho viisɛ baŋɛ lɔkɔ la n ani se’em la nɛresɛba n maalɛ ku. Ho me wan bisɛ hon wan eŋɛ se’em ta’an tari lɔkɔ la lebe, ku san sa’am. Yelemɛŋɛrɛ, ho nari ti ho baŋɛ nyaa ku sirum dela lɔɣɔseko ti ho bɔta la.

   Baabule la yeti: “Ka’aŋɔ san ka bɔna, yɛla sa’ani mɛ.” (Magaha 15:22) Bala, ge ti ho ta’an kɔ’ɛ ho puti’irɛ eŋɛ sɛla la, soke nɛresɛba n mi yele la soŋa. Makerɛ, yɛm wan bɔna bim ti ho soke dɔgeta hon wan tibɛ homea se’em. (Matu 9:12) Yɛla ase’a poan, ho ta’an tɔɣɛ bo nɛresɛba ti ho mina ti ba me tabelɛ nyɛ ho yele la taaba. Ge tɛ̃ra ti la dela hon n wan kɔ’ɛ puti’irɛ la ge dekɛ de tum tuuma, daɣɛ nɛra la ti ho soke la.​—Galatia 6:4, 5.

•   Geele yɛla la za’a. Ho san viisɛ baŋɛ yɛla, nyaa gulesɛ hon boti ho eŋɛ sɛla la biŋe. Kelum gulesɛ nyuurɔ seto la daaŋɔ seto n boi bim. La nari ti ho geele bisɛ ho san kɔ’ɛ ho puti’irɛ ti ho eŋɛ sɛla, yelese’a n wan paɛ hɔ. (Tɛɛnhegɔ 32:29) Makerɛ, hon kɔ’ɛ ho puti’irɛ se’em la ta’an tee hon, ho deodoma la nɛreba basɛba bɔŋa zɛ’an la wani? (Magaha 22:3; Arom 14:19) Ho san ti’isɛ sokere ana wa ge gɛɛla Baabule la n pa’alɛ sɛla la, la wan soŋɛ hɔ ti ho ta’an kɔ’ɛ ho puti’irɛ soŋa.

•   Kɔ’ɛ ho puti’irɛ. Saŋa ase’a to ta’an ni gu’una ti to kɔ’ɛ to puti’irɛ se’ere n sɔi to tara la puti’irɛ ayi ayi. Ge to san ka kɔ’ɛ to puti’irɛ yele poan, to ta’an basɛ ti yɔ’ɔ soŋa piɛ to nu’usin bii to suure ta sa’am la ton ka ta’an kɔ’ɛ to puti’irɛ la. Nɛra san ka nyaŋɛ kɔ’ɛ a puti’irɛ tum tuunɛ la nɛra n kɔ’ɛ puti’irɛ n ka ani soŋa, ba za’a dela buyina. Baabule la dekɛ kɔa yele eŋɛ la makerɛ ti: “Nɛrese’em n biseri kusebego la kan burɛ, ti se’em me n biseri sangbana la kan malum kɛ dia.”​—Pa’ala 11:4, Good News Translation.

 Nɛra san puɣum kɔ’ɛ a puti’irɛ soŋa, a puti’irɛ la kelum ka di mi’a. Saŋa zo’e zo’e, la nari ti to ni basɛ yɛla ase’a ge ta’an kɔ’ɛ to puti’irɛ tum tuunɛ. (Pa’ala 9:11) Bala la, geele yelese’a woo n ani soŋa la ge nyaa loe yelese’ere n wan soŋɛ hɔ.

 Ho ta’an tee hon kɔ’ɛ ho puti’irɛ ti ho tum sɛla mɛ saŋa ase’a. Ho bɔŋa zɛ’an san tee, ho nyaa ta’an baŋɛ ti hon daa kɔ’ɛ ho puti’irɛ se’em la basɛ ti daaŋɔ n paɛ hɔ. Bala la, yɛm ta’an bɔna bim ti ho malum geele yɛla la ge loe loore n wan soŋɛ hɔ.

 Ge yɛla ase’a poan, ho kan ta’an tee hon kɔ’ɛ ho puti’irɛ se’em la. (Yooma 15:4) Makerɛ, Naayinɛ yeti nɛreba la ba pɔɣeba kɔ’ɔn bɔna ba pɔɣedire poan wuu ban daa biŋe nɔɔrɛ se’em la. c (Malaki 2:16; Matu 19:6) Yeledaaŋɔ san ta bɔna pɔɣedire la poan, la nari ti nɛra la a pɔɣa la maalɛ yele la ge da basɛ taaba.

 Saŋa ase’a, to ta’an ni kɔ’ɛ to puti’irɛ mɛ ti la ka ana soŋa. (Yames 3:2, tiŋanɔɔrɛ yelesum) To ta’an yeti, to daa san baŋɛ ni to kan kɔ’ɛ ni to puti’irɛ bala. To ta’an ni ti’isa bala mɛ. (Yooma 69:5) La san ana to bala, la ta’an soŋɛ tɔ ti to nyɔkɛ tomea ge kan le tue yelekaŋa taaba poan! (Magaha 14:9) Baabule la ka’am tɔ ti yɛla san ba’ɛ daam to gaŋɛ, la ta’an sa’am to puti’irɛ la to itigɔ. (2 Korint 2:7) d Baabule la yeti: ‘Yehowa dela nimbɔzɔta la zu’usegɔ daana.’ (Yooma 103:8-13) Bala la, ho san kɔ’ɛ ho puti’irɛ ti la ka ana soŋa ge ti ho me kan ta’an tee, zamesɛ yɛm yele la poan ge tiregɛ maalɛ yele la.