Yelemɛŋɛrɛ, Saɣena la sirum boi mɛ. Eŋa n sɔi “teŋa wa zuo behera,” vo’osum nɛresɛka n yuun isige eŋɛ kpenkpesi la Naayinɛ. (Yon 14:30; Epesus 6:11, 12) Baabule la basɛ ti to baŋɛ yuse’a la halese’a ti Saɣena la tara mɛ:

•   Sitaana, vuurɛ dela “Mina N Ka Nani.”​—Yob 1:6.

•   Saɣena, vuurɛ dela “ Munaanfikadaana.”​—Liligere 12:9.

•   Bunsɛla, Baabule la poan la vuurɛ dela “Pumpã’asa.”​—2 Korint 11:3.

•   Gurebisɛdaana.​—Matu 4:3.

•   Pumparema.​—Yon 8:44.

A daɣɛ be’em

 Nɛreba basɛba ti’isɛ ti Sitaana Saɣena la dela be’em bɔna asaala suuren. Ge Baabule la basɛ ti to baŋɛ ti Sitaana la Naayinɛ yuun tabelɛ sɔsɛ mɛ. Nɛreba ti’isɛ ti Naayinɛ yuun tɔɣera bɔ’ɔra la amea ge Naayinɛ n ani kasi la, a zɛ’an zɛ’an daɣɛ be’em ti a yuun wan tɔɣera bɔ’ɔra amea. (Tɛɛnhegɔ 32:4; Yob 2:1-6) Sitaana yuun le gurɛ Yezu n ani kasi ka tara be’em la mɛ bisɛ. (Matu 4:8-10; 1 Yon 3:5) Bala la, Baabule la basɛ ti to baŋɛ ti Saɣena la sirum boi mɛ ge a daɣɛ sɛla n de be’em ti ba tɔɣera a yele.

 La dela sɛla n eŋɛ to pakerɛ la nɛreba zo’e zo’e n ka sakɛ ti Saɣena la sirum boi la? Aayi, sɛla n sɔi la Baabule la yeti Saɣena la pã’aseri la nɛreba ti a ta’an tum a tuuma la. (2 Tesalonika 2:9, 10) Sɛla n de yelekatɛ ti a ita dela a pã’aseri la nɛreba ti ba ti’isa ti a ka boi.​—2 Korint 4:4.

Sɔlema: Lucifer dela Saɣena la yu’urɛ ayima.

 Yelemɛŋɛrɛ: Hebru yelebire la ti Baabule ase’a lerege “Lucifer” la vuurɛ dela “nɛɛsoŋa.” (Isaiah 14:12) Gulesegɔ la poan yelebire la pa’alɛ la Babilon na’am tuusum, na’am sebo ti Naayinɛ wan sa’am ba la ba zɛkɛ n mea la zuo. (Isaiah 14:4, 13-20) Ba yuun tari “nɛɛsoŋa” yelebire wa ɛregera la Babilon na’am la ti ba yuun sa’am bu la.

Sɔlema: Sitaana n “gãkeri nɛreba” bɔ’ɔra Naayinɛ

 Yelemɛŋɛrɛ: Saɣena la daɣɛ Naayinɛ yameŋa ge a dela a dima. Sitaana Saɣena la zɛregeri Naayinɛ yamesi mɛ ge me parena bɔ’ɔra ba.​—1 Peter 5:8; Liligere 12:10.