Tomam doli la Baabule la n pa’alɛ se’em la nima nima ita “Daana zaanɔɔrɛ dia” la ti ba yi’ira Ki’i Zaanɔɔrɛ Dia bii Yezu Kum Tiirɛ la. (1 Korint 11:20; King James Version) Ge pu’usegɔdoma zo’e zo’e n iti dɛ se’em la ka boi Baabule la poan.

 Sɛla n sɔi ti to ita Daana Zaanɔɔrɛ Dia la dela to tiɛ Yezu yele ge me eŋɛ pa’alɛ ti to puurɛ pee mɛ la eŋa n ki bo to la. (Matu 20:28; 1 Korint 11:24) Tiirɛ wa daɣɛ pu’usegɔ malema n wan basɛ ti nɛra nyɛ zu’usegɔ bii a be’em suguri dia. Baabule la pa’alɛ ti to san bɔta to be’em suguri dia la nari ti to tara sakerɛ Yezu poan ge daɣɛ to ita pu’usegɔ malema.​—Arom 3:25; 1 Yon 2:1, 2.

 Yezu yuun bo a podɔleba la nɔɔrɛ ti ba ita Daana Zaanɔɔrɛ Dia la ge a yuun ka pa’alɛ ba wan ita dɛ sugumnɔɔrɛ se’em wana mɔpi. (Luke 22:19) Nɛreba basɛba ti’isɛ ti la nari ti ba ita dɛ ŋmarega woo ge ti basɛba mɛ ita dɛ bakwai woo, daarewoo, sugumnɔɔrɛ zo’e zo’e daarewoo bii nɛra la n yeen bɔta se’em. Ge la nari ti to geele yele ana wa bisɛ.

 Yezu yuun pɔsɛ eŋɛ Daana Zaanɔɔrɛ Dia la dabese’ere ti Yudadoma yuun ita Azɔɔtole de’eŋo la. Dedaarɛ mea ti a yuun ki. (Matu 26:1, 2) Beni n sɔi ti bala yele pakɛ? Gulesegɔ la dekɛ Yezu kum la makɛ mɛ la Azɔɔtole pebila la kum. (1 Korint 5:7, 8) Ba yuun iti Azɔɔtole la buyina yuunɛ woo poan. (Yɛhega 12:1-6; Malema 23:5) Bala mea nɔɔ ti yia Kristakɔma a la yuun ita Yezu Kum Tiirɛ la buyina yuunɛ woo poan. Yehowa Sɛɛradoma me doli la Baabule la n pa’alɛ se’em la.

 Yezu n yuun eŋɛ dɛ se’em la yeen ka soŋɛ tɔ ti to baŋɛ to wan ita dɛ sugumnɔɔrɛ se’em ge to me le baŋɛ la dabeserɛ la tɛm sebo ti to wan ita Yezu Kum Tiirɛ la. A yuun pɔsɛ tiirɛ wa la Nisan 14, 33 Y.B. wuu Baabule kalanda la n pa’alɛ se’em la. (Matu 26:18-20, 26) Dabeserɛ denɛ mea nɔɔ ti tomam me kelum ita Yezu Kum Tiirɛ la yuunɛ woo, wuu Kristakɔma sɛba n deŋɛ nɛŋa la. b

La boi bim ti Nisan 14, 33 Y.B. yuun dela Azumadaarɛ ge de ta’an lui dabeserɛ  n boi de to’ore yuunɛ woo poan. To ni doose la ba yuun iti se’em Yezu saŋa la ta’an baŋɛ Nisan 14 n wan lui dabese’ere yuunɛ woo poan ge to ka doli yɔɔma beere Yudadoma kalanda la. c

 Yezu yuun dekɛ la boroboro n ka tari mi’isum la daam n mɔ’ɛ n yuun gee Azɔɔtole dia la poan eŋɛ a kum tiirɛ la pa’alɛ tɔ. (Matu 26:26-28) Wuu Yezu n yuun eŋɛ se’em la, tomam me ni dekɛ la boroboro ti ba ka eŋɛ mi’isum bii sɛsɛla eŋɛ bim la daam n mɔ’ɛ ti ba ka dekɛ zã’asum bii sɛla pa’asɛ eŋɛ Yezu Kum Tiirɛ la.

 Pu’usegɔdoma basɛba ni dekɛ la boroboro n tari mi’isum ge Baabule la dekɛ mi’isum makɛ mɛ la be’em la ŋmɛlema tuuma. (Luke 12:1; 1 Korint 5:6-8; Galatia 5:7-9) Bala, boroboro n ka tari mi’isum ge ti ba ka dekɛ sɛla pa’asɛ ma’a n wan ta’an ze’ele bo Krista inya la n ka tari be’em la. (1 Peter 2:22) Nɛreba basɛba me ni dekɛ la tiwɔla daam n ka kele ge Baabule la ka pa’alɛ bala. Sɛla n sɔi ti pu’usegɔdoma basɛba ita bala dela ba yeti daam nyua dela kisego la ge Baabule la ka yele bala.​—1 Timoti 5:23.

 Boroboro n ka tari mi’isum la daam n mɔ’ɛ la ti to tara ita Yezu Kum Tiirɛ la ze’ele bo la a inya la a ziim. Boroboro la daam la ni ka tee bii gɛ̃regɛ la Yezu mea inya la a ziim nyalema sore poan wuu nɛreba basɛba n ti’isɛ se’em la. Geele Baabule la n pa’alɛ se’em bisɛ.

•   Yezu yuun san yele ni a podɔleba ti ba nyu a ziim, la wan pa’alɛ ti a yuun boti la ba eŋɛ sɛla n giisɛ Naayinɛ lɔɔ la n yeti ba da nyu ziim la. (Pin’ileŋɔ 9:4; Tooma 15:28, 29) Ge bala yuun kan ta’an eŋɛ se’ere n sɔi la, Yezu kan makɛ pa’alɛ nɛreba ti ba zaɣesɛ Naayinɛ lɔɔ la n pa’alɛ ziim n tari tuulum se’em la.​—Yon 8:28, 29.

•   Tuuntuneba la yuun san nyuuri ni la Yezu ziim, a yuun kan yele ni ti a “wan ka’ɛ” a ziim la ti la pa’alɛ ti a yuun nan ka ka’ɛ a ziim la.​—Matu 26:28.

•   Yezu yuun ki la “boyena.” (Hebru 9:25, 26) Ge, boroboro la daam la yuun san lebege la a inya la a ziim Daana Zaanɔɔrɛ Dia la poan, la yi pa’alɛ ti sɛba n oberi ge nyuura la kuuri en mɛ taɣesa.

•   Yezu yuun yeti: “Ete ya dɛ la ya tɛnra n yele” ge daɣɛ “ya kuura mam.”​—1 Korint 11:24.

 Baabule ase’a n lerege yelesum la se’em la n sɔi ti nɛreba basɛba ti’isɛ ti boroboro la daam la ni lebege la Yezu inya la a ziim. Makerɛ, Baabule zo’e zo’e poan, ba yeti Yezu yuun tɔɣɛ daam la yele ti: “Mam . . . ziim n wana.” (Matu 26:28) Ge to ta’an lerege Yezu n yele sɛla la ti: “La ze’ele bo la mam ziim.” d Wuu eŋa n yuun puɣum ni ita se’em la, Yezu yuun tari la maɣesa pa’ala.​—Matu 13:34, 35.

 Yehowa Sɛɛradoma san ita Daana Zaanɔɔrɛ Dia la, to fii wa n ni obe boroboro la ge nyu daam la. Beni n sɔi ti la dɛna bala?

 Yezu ziim la yuun maalɛ la “nɔbiŋere paalɛ” n tee soe nɔɔrɛ sɛka ti Yehowa Naayinɛ yuun biŋe la daami Israeldoma la. (Hebru 8:10-13) Nɛresɛba n pa’asɛ nɔbiŋere paalɛ wa poan la n oberi boroboro la ge nyuura daam la Yezu Kum Tiirɛ la poan. La daɣɛ Kristakɔma za’a ge “nɛresɛba te Na’ayenɛ yi” ba sarɔseko n boi de to’ore poan la ma’a. (Hebru 9:15; Luke 22:20) Nɛrebana wan naɛ la Krista saazuo bisa. Baabule la yeti nɛreba 144,000 ma’a n wan nyɛ yɔ’ɔ kuna.​—Luke 22:28-30; Liligere 5:9, 10; 14:1, 3.

 To zo’e zo’e n ka pa’asɛ ‘nɛreba fii’ la n wan ta naɛ la Krista bisa la poan la, tari puti’irɛ ti to wan pa’asɛ “nɛrekooŋɔ” la n wan vɔna daarewoo tingɔŋɔ wa zuo la. (Luke 12:32; Liligere 7:9, 10) La boi bim ti tomam sɛba n tari puti’irɛ ti to wan ta bɔna tingɔŋɔ wa zuo la ka oberi boroboro la ge nyuura daam la Yezu Kum Tiirɛ la poan ge to me ni keŋɛ mɛ ta’an eŋɛ pa’alɛ ti to puurɛ pee mɛ la Yezu n yuun ki bo to la.​—1 Yon 2:2.