1 Ahọlu lẹ 9:1-28
9 Tlolo he Sọlomọni ko dotana ohọ̀ Jehovah tọn po owhé* ahọlu tọn+ po gbigbá, gọna nuhe Sọlomọni jlo na basi lẹpo,+
2 Jehovah sọawuhia Sọlomọni whla awetọ, kẹdẹdile e ko sọawuhia ẹ to Gibeọni do.+
3 Jehovah dọna ẹn dọmọ: “Yẹn ko sè odẹ̀ towe podọ obiọ towe na nukundagbe, ehe a basi to nukọn ṣie. Yẹn ko klan ohọ̀ he a gbá ehe do wiwe gbọn oyín ṣie zizedo e ji kakadoi dali,+ nukun ṣie po ahun ṣie po nasọ tin to finẹ tẹgbẹ.+
4 Podọ hiẹ, eyin a nọ yí ahun he madoblọ+ po ahunjijlọ+ po do zinzọnlin to nukọn ṣie dile Davidi otọ́ towe wà do,+ gbọn nuhe yẹn degbena we lẹpo wiwà dali,+ bọ hiẹ nọ setonuna aṣẹdai ṣie lẹ po whẹdida ṣie lẹ po,+
5 whenẹnu yẹn na hẹn ofìn ahọluduta towe tọn lodo do Islaeli ji kakadoi, kẹdẹdile yẹn ko dopagbe etọn na Davidi otọ́ towe do dọ, ‘Sunnu he na wá sọn kúnkan towe mẹ nado sinai to ofìn Islaeli tọn ji ma na hán gbede.’+
6 Ṣigba, eyin mìwlẹ po visunnu mìtọn lẹ po lẹkọ sọn hihodo mi mẹ bo ma yìn gbedide ṣie lẹ po osẹ́ndoai ṣie lẹ po he yẹn zedo nukọn mìtọn, bọ mì yì sẹ̀n yẹwhe devo lẹ bo dẹ́ do odò na yé,+
7 yẹn na sán Islaeli sẹ̀ sọn aigba he yẹn ko na yé lọ ji,+ yẹn nasọ de ohọ̀ he n’ko klandowiwe na oyín ṣie lọ sẹ̀ sọn nukọn ṣie,+ bọ Islaeli na lẹzun aṣagbọ́nu* bo na nọ yin ṣinṣanko to akọta lẹpo ṣẹnṣẹn.+
8 Ohọ̀ ehe nasọ lẹzun okiti gbakija tọn lẹ.+ Aligbọntọ lẹpo wẹ na nọ pọ́n ẹn po nupaṣamẹ po bo na nọ deafu do e bo nasọ nọ dọmọ, ‘Naegbọn Jehovah do wàmọ na aigba ehe po ohọ̀ ehe po?’+
9 Whenẹnu, yé na nọ dọmọ, ‘Na yé gbẹ́ Jehovah Jiwheyẹwhe yetọn dai wutu wẹ, yèdọ mẹhe plan tọgbo yetọn lẹ tọ́njẹgbonu sọn aigba Egipti tọn ji, yé sọ kẹalọyi yẹwhe devo lẹ bo nọ dẹ́ do odò na yé bosọ nọ sẹ̀n yé. Enẹ wẹ zọ́n bọ Jehovah do hẹn nugbajẹmẹji ehe lẹpo wá yé ji.’”+
10 To owhe 20 godo, ehe gblamẹ Sọlomọni gbá ohọ̀ awe lọ lẹ, yèdọ ohọ̀ Jehovah tọn po owhé* ahọlu tọn po,+
11 Hilami+ ahọlu Tile tọn ko do owhlẹ kedali po junipeli po tọn lẹ gọna sika susugege hlan Sọlomọni dile ewọ jlo do,+ bọ Ahọlu Sọlomọni na Hilami tòdaho 20 to aigba Galili tọn ji.
12 Enẹwutu, Hilami tọ́n sọn Tile nado pọ́n tòdaho he Sọlomọni ko na ẹn lọ lẹ, amọ́ homẹ etọn ma hùn do yé go.*
13 E dọmọ: “Nọvisunnu ṣie, tòdaho tẹlẹ wẹ yin ehelẹ he a na mi?” Enẹ wẹ zọ́n bọ yé do nọ yin yiylọdọ Aigba Kabuli* tọn kakajẹ egbé.
14 To ojlẹ enẹlẹ gblamẹ, Hilami do talẹnti* sika tọn 120 hlan ahọlu.+
15 Ehe wẹ otàn mẹhe Ahọlu Sọlomọni de nado wazọ́n sinsinyẹn lẹ tọn,+ yèdọ nado do ohọ̀ Jehovah tọn,+ owhé* etọn titi, Pópló* lọ,+ adó Jelusalẹm tọn, Hazọli,+ Mẹgido+ po Gezẹli+ po.
16 (Falo ahọlu Egipti tọn ko hẹji wá bo gbawhàn Gezẹli tọn bosọ yí miyọ́n do mẹ̀ ẹn, e sọ hù Kenaninu+ he nọ nọ̀ tòdaho lọ mẹ lẹ. E sọ yí i na viyọnnu etọn+ he yin asi Sọlomọni tọn taidi nunina e yì whedenu tọn.*)
17 Sọlomọni sọ do* Gezẹli, Dowaji Bẹti-holọni tọn,+
18 Baalati+ podọ Tamali to danfafa ji, to aigba lọ ji,
19 gọna tòdaho agbànhọ tọn Sọlomọni tọn lẹpo, tòdaho osọ́-kẹkẹ lẹ tọn lẹ,+ tòdaho osọ́nọ lẹ tọn lẹ podọ nudepope he Sọlomọni jlo nado gbá do Jelusalẹm, Lẹbanọni po aigba he to aṣẹ etọn glọ lẹpo po.
20 Na nuhe dù omẹ Amolinu lẹ, Hetinu lẹ, Pelizinu lẹ, Hivinu lẹ po Jẹbusinu lẹ po+ tọn he pò lẹ he ma yin apadewhe omẹ Islaeli tọn lẹ tọn,+
21 yèdọ kúnkan yetọn he pò to aigba lọ ji lẹ—mẹhe Islaelivi lẹ ma penugo nado vasudo mlẹnmlẹn lẹ—Sọlomọni de yé nado nọ wazọ́n sinsinyẹn taidi afanumẹ lẹ kakajẹ egbé.+
22 Ṣigba, Sọlomọni ma hẹn Islaelivi depope zun afanumẹ,+ na yewlẹ wẹ awhànfuntọ, devizọnwatọ, ahọvi, ahọluzọnwatọ alọgọtọ gọna ogán osọ́-kẹkẹ kùntọ po osọ́nọ etọn lẹ po tọn.
23 Ogán nukunpedonugotọ lẹ tọn 550 wẹ to anadena azọ́n Sọlomọni tọn, yèdọ azọ́ngán he yin dide do mẹhe to azọ́nwa lẹ ji.+
24 Ṣigba, viyọnnu Falo tọn+ hẹji sọn Tòdaho Davidi tọn+ mẹ wá owhé ewọ lọsu tọn he Sọlomọni ko gbá na ẹn lọ gbè; e sọ do Pópló* lọ.+
25 Whla atọ̀n to owhe dopo mẹ,+ Sọlomọni nọ basi avọ́sinsan mimẹ̀ lẹ po avọ́sinsan jijọho tọn lẹ po to agbà he ewọ do na Jehovah lọ ji,+ e sọ nọ basi avọ́sinsan mimẹ̀ to agbà he to Jehovah nukọn lọ ji, mọ wẹ ewọ dotana ohọ̀ lọ do.+
26 Ahọlu Sọlomọni sọ basi tọjihun daho lẹ to Ezioni-gebeli+ he tin to Elọti pá to Ohù Vẹẹ tó to aigba Edomi tọn ji.+
27 Hilami sọ do devizọnwatọ etọn titi lẹ, yèdọ azọ́nwatọ hùji tọn numimọnọ lẹ hlan po tọjihun daho lọ lẹ po+ nado wazọ́n hẹ devizọnwatọ Sọlomọni tọn lẹ.
28 Yé yì Ofili+ bo bẹ talẹnti sika tọn 420 sọn finẹ bosọ hẹn yé wá na Ahọlu Sọlomọni.
Nudọnamẹ Odò Tọn
^ Kavi “họ̀nmẹ.”
^ To paa mẹ, “howhinwhẹn de.”
^ Kavi “họ̀nmẹ.”
^ To paa mẹ, “amọ́ yé ma yọ́n to nukun etọn mẹ.”
^ Kavi vlavo, “Aigba He Ma Yọ́n Na Nude.”
^ Kavi “Milo.” Hogbe Heblugbe tọn de he zẹẹmẹdo “gọ́.”
^ Kavi “họ̀nmẹ.”
^ Kavi “taidi nunina alọwle tọn; asigbàn.”
^ Kavi “do adó gángán lẹdo.”
^ Kavi “Milo.” Hogbe Heblugbe tọn de he zẹẹmẹdo “gọ́.”
