1 Timoti 1:1-20
1 Paulu, apọsteli Klisti Jesu tọn de gbọn gbedide Jiwheyẹwhe Mẹwhlẹngántọ mítọn po Klisti Jesu, todido mítọn+ po tọn dali,
2 to wekanhlan Timoti,+ ovi nugbo+ de to yise mẹ:
Na hiẹ ni tindo nukundagbe majẹhẹ, lẹblanu po jijọho po sọn Jiwheyẹwhe Otọ́ po Klisti Jesu Oklunọ mítọn po dè.
3 Kẹdẹdile yẹn ko na we tuli nado gbọṣi Efesu to whenue yẹn jlo na yì Makedonia do, mọ wẹ yẹn basi do todin, na hiẹ nido gbẹ́ na mẹdelẹ ma nado plọnmẹ nuplọnmẹ he gbọnvo,
4 kavi na ayidonugo otàn lalo+ lẹ podọ otàn kúnkan whẹndo tọn lẹ. Onú mọnkọtọn lẹ nọ dekọtọn do ovọ́+ mẹ bo nọ fọ́n kanbiọ dodinnanu tọn lẹ dote poun kakati nado wleawuna nudepope he nọ hẹn yise lodo sọn Jiwheyẹwhe dè.
5 Na nugbo tọn, yanwle anademẹ* ehe tọn wẹ owanyi+ sọn ahun wiwe de mẹ podọ sọn ayihadawhẹnamẹnu dagbe de mẹ podọ sọn yise+ matin yẹnuwiwa mẹ.
6 Gbọn kinklan sọn onú ehelẹ kọ̀n dali, mẹdelẹ ko lẹhlan hogblo lẹ didọ.+
7 Yé jlo nado yin osẹ́n plọnmẹtọ+ lẹ, ṣigba yé ma mọnukunnujẹ nuhe yé to didọ lẹ kavi nuhe ji yé tẹkudo sinsinyẹn lẹ mẹ.
8 Todin, mí yọnẹn dọ Osẹ́n lọ yọ́n eyin yè yìn in to aliho he sọgbe mẹ,*
9 to yinyọnẹn mẹ dọ osẹ́n yin didoai, e ma yin na dodonọ lẹ gba, ṣigba na sẹ́nhẹngbatọ+ lẹ po atẹṣitọ lẹ po, mẹhe tindo jijọ-madi-Jiwheyẹwhe po ylandonọ lẹ po, mẹhe ma nọ yin nugbonọ* po mẹhe ma nọ do sisi hia na onú wiwe lẹ po, ovi he nọ hù otọ́ po ovi he nọ hù onọ̀ lẹ po, hlọnhutọ lẹ,
10 mẹhe nọ doalọ to fẹnnuwiwa zanhẹmẹ tọn* mẹ lẹ, sunnu he nọ zanhẹ sunnu lẹ,* mẹfintọ lẹ, lalonọ lẹ, mẹhe nọ yí lalo do whlé lẹ, podọ nudevo depope he jẹagọdo oplọn he sọgbe*+
11 to kọndopọ mẹ hẹ wẹndagbe gigonọ Jiwheyẹwhe ayajẹnọ lọ tọn, ehe yin zizedo alọmẹ na mi.+
12 Yẹn dopẹna Klisti Jesu Oklunọ mítọn, mẹhe na mi huhlọn, na ewọ mọ mi di nugbonọ gbọn lizọnyizọn de zizedo alọmẹ na mi dali,+
13 dile etlẹ yindọ nùzantọ, homẹkẹndomẹtọ po kanylantọ de po wẹ yẹn yin dai.+ Etomọṣo, lẹblanu yin didohia mi, na wunvi po yise matindo po mẹ wẹ yẹn yinuwa te wutu.
14 Ṣigba, nukundagbe majẹhẹ Oklunọ mítọn tọn sù tlala to pọmẹ hẹ yise po owanyi po gbọn Klisti Jesu gblamẹ.
15 Nugbo wẹ ohó lọ bosọ jẹna alọkẹyi mlẹnmlẹn dọ: Klisti Jesu wá aihọn mẹ nado whlẹn ylandonọ lẹ gán.+ Yẹn yin tọ́ntlọ́ngbọ́n+ to omẹ ehelẹ mẹ.
16 Etomọṣo, lẹblanu yin didohia mi, na Klisti Jesu nido sọgan do homẹfa etọn lẹpo hia gbọn yẹn gblamẹ taidi omẹ tọ́ntlọ́ngbọ́n lọ bo yí mi do basi apajlẹ de na mẹhe jlo na ze yise yetọn sinai do ewọ ji na ogbẹ̀ madopodo lẹ.+
17 Todin, gbégbò po gigo po ni tin hlan Ahọlu madopodo,+ he ma sọgan gble,+ mayinukundomọ+ lọ, yèdọ Jiwheyẹwhe dopo kẹdẹ+ lọ kakadoi podọ doidoi. Niṣẹ.*
18 Anademẹ* ehe wẹ yẹn zedo alọmẹ na we, hiẹ Timoti, ovi ṣie, to kọndopọ mẹ hẹ dọdai he yin didọ gando gowe lẹ, dọ gbọn ehelẹ dali hiẹ nido sọgan zindonukọn to awhàn dagbe lọ fùnfùn mẹ+
19 bo tẹdo yise po ayihadawhẹnamẹnu dagbe de po go,+ ehe mẹdelẹ ko sisẹ́ do apadopo bọ yise yetọn ko siọ taidi tọjihun de.
20 Himeneu+ po Alẹkzandle po tin to omẹ ehelẹ mẹ, podọ yẹn ko ze yé do alọmẹ na Satani,*+ na yé nido sọgan yin pinplọn gbọn mẹplọnlọdomẹgo dali ma nado nọ zánnu.
Nudọnamẹ Odò Tọn
^ Kavi “gbedide.”
^ To paa mẹ, “to osẹ́n-liho.”
^ Kavi “ma tindo owanyi nugbo.”
^ Kavi “he pegan; he nọ hẹn ale wá.”
^ To paa mẹ, “sunnu he nọ mlọnai hẹ sunnu lẹ.”
^ Kavi “Amẹn” to Glẹkigbe mẹ.
^ Kavi “Gbedide.”
^ Enẹ wẹ, yé yin didesẹ sọn agun mẹ.
