2 Pita 1:1-21
1 Simọni Pita, afanumẹ podọ apọsteli Jesu Klisti tọn de, hlan mẹlọ lẹ he ko mọ yise de yí, he họakuẹ taidi míwlẹ tọn,* gbọn dodowiwa Jiwheyẹwhe mítọn po Mẹwhlẹngántọ lọ Jesu Klisti po tọn gblamẹ:
2 Na nukundagbe majẹhẹ po jijọho po ni yin hinhẹn sudeji hlan mì gbọn oyọnẹn he pegan+ Jiwheyẹwhe po Jesu Oklunọ mítọn po tọn dali,
3 na gbọn huhlọn etọn he wá sọn Jiwheyẹwhe dè gblamẹ, nuhe nọ hẹn ogbẹ̀ po mẹdezejo na Jiwheyẹwhe po yọnbasi lẹpo ko yin nina mí* gbọn oyọnẹn he pegan Mẹlọ he yí gigo po jijọ dagbe etọn titi po do ylọ mí+ tọn gblamẹ.
4 Gbọn onú ehelẹ gblamẹ, e ko na mí* opagbe họakuẹ he klo tlala lẹ,+ na mì nido sọgan gbọn ehelẹ dali tindo mimá to ninọmẹ Jiwheyẹwhe tọn mẹ,+ to whenuena e yindọ mì ko họ̀ngán sọn walọ gblezọn aihọn tọn he yin hinhẹnwa gbọn ojlo ylankan dali mẹ.
5 Na whẹwhinwhẹ́n ehe taun wutu, mì dovivẹnu vẹkuvẹku+ nado yí jijọ dagbe dogọ yise mìtọn,+ oyọnẹn dogọ jijọ dagbe mìtọn,+
6 mawazẹjlẹgo dogọ oyọnẹn mìtọn, akọndonanu dogọ mawazẹjlẹgo mìtọn,+ mẹdezejo na Jiwheyẹwhe dogọ akọndonanu mìtọn,+
7 owanyi mẹmẹsunnu tọn dogọ mẹdezejo na Jiwheyẹwhe mìtọn, owanyi dogọ owanyi mẹmẹsunnu tọn mìtọn.+
8 Na eyin onú ehelẹ tin to mì mẹ bo gọfla, yé na glọnalina mì ma nado gbọjọ kavi yin mẹhe ma tindo sinsẹ́n+ gando oyọnẹn he pegan Oklunọ mítọn Jesu Klisti tọn go.
9 Na mẹdepope he mẹ onú ehelẹ ma tin te ko tọ́nnukun bo miọn nukun etọn lẹ do hinhọ́n*+ bosọ wọn dọ emi ko yin kiklọ́we sọn ylando+ hoho emitọn lẹ mẹ.
10 Mẹmẹsunnu lẹ emi, na whẹwhinwhẹ́n ehe wutu, mì wà nuhe go mì pé lẹpo pete nado hẹn oylọ+ po mẹdide mìtọn po họnwun na mìde, na eyin mì to onú ehelẹ wà zọnmii, mì ma na gboawupo to aliho depope mẹ gbede.+
11 Gbọnmọ dali, na nugbo tọn, aliho lọ na yin hunhundonuvo na mì petepete nado biọ Ahọluduta madopodo+ Oklunọ po Mẹwhlẹngántọ mítọn Jesu Klisti po tọn mẹ.+
12 Na ehe wutu, yẹn ma na wọn nado nọ flinnu mì to whepoponu gando onú ehelẹ go, dile etlẹ yindọ mì ko yọ́n yé bo ko yin hinhẹn lodo gligli to nugbo he tin to mì mẹ lọ mẹ.
13 Ṣigba, yẹn mọdọ e sọgbe, dile e na dẹnsọ bọ yẹn na tin to gòhọtúntún* ehe mẹ,+ nado nọ dozolanmẹna mì gbọn nuflinmẹ lẹ dali,+
14 dile yẹn yọnẹn do dọ gòhọtúntún ṣie na yin dide dai to madẹnmẹ, kẹdẹdile Oklunọ mítọn Jesu Klisti ko hẹn ẹn họnwun na mi do ga.+
15 Yẹn na nọ wà nuhe go yẹn pé lẹpo to whepoponu, na mìwlẹ nido penugo nado nọ vọ́ onú ehelẹ flin* na mìde to yìyì ṣie godo.
16 Lala, mí ma gbọn otàn lalo he yè yí ayikinkan gigẹdẹ do doai lẹ hihodo dali hẹn huhlọn po tintin tofi Oklunọ mítọn Jesu Klisti tọn po zun yinyọnẹn na mì gba, kakatimọ mí yin kunnudetọ he yí nukun do mọ gigo daho etọn.+
17 Na e mọ gbégbò po gigo po yí sọn Jiwheyẹwhe Otọ́ dè, to whenuena hogbe taidi ehelẹ yin didọ hlan ẹn gbọn gigo jiawu lọ dali dọmọ: “Ehe wẹ Visunnu ṣie, mẹyiwanna ṣie, mẹhe yẹnlọsu ko kẹalọyi.”+
18 Mọwẹ, mí sè hogbe ehelẹ yin didọ sọn olọn mẹ to whenuena mí tin po e po to osó wiwe lọ ji.
19 Enẹwutu, jidide mítọn to ohó dọdai tọn lọ mẹ yin hinhẹn lodo dogọ, podọ mì to dagbe wà nado nọ payi e go taidi hlan miyọ́ngbán de+ he to wunhọ́n to ofi dózin de (kaka owùn do kẹ̀n bọ sunwhlẹvu afọnnu tọn+ do zẹ̀) to ahun mìtọn lẹ mẹ.
20 Na mì yọ́n ehe whẹ́, dọ dọdai Owe-wiwe tọn depope ma nọ wá sọn tadena mẹdetiti tọn de mẹ gba.
21 Na dọdai ma ko gbọn ojlo gbẹtọ tọn dali+ wá to ojlẹ depope mẹ gba, ṣigba gbẹtọ lẹ dọho sọn Jiwheyẹwhe dè dile yé yin anadena gbọn gbigbọ wiwe dali do.+
Nudọnamẹ Odò Tọn
^ Kavi “he yin lẹblanulọkẹyi he sọzẹn hẹ míwlẹ tọn.”
^ Kavi “ko yin nina mí vọnu.”
^ Kavi “ko na mí vọnu.”
^ Kavi vlavo, “ko tọ́nnukun bo ma nọ mọnú hlan nukọn.”
^ Kavi “gòhọ,” enẹ wẹ, agbasa gbẹtọvi tọn etọn.
^ Kavi “nado nọ donù onú ehelẹ go.”
