Efesunu lẹ 6:1-24
6 Mì ovi lẹ emi, mì nọ setonuna mẹjitọ mìtọn+ lẹ to kọndopọ mẹ hẹ Oklunọ, na ehe wẹ dodo.
2 “Gbògbéna otọ́ towe po onọ̀ towe po”+ wẹ yin gbedide tintan he zọnpọ hẹ opagbe de:
3 “Na e nido yin dagbe na we bọ hiẹ nado nọgbẹ̀ dẹn to aigba ji.”
4 Podọ mì otọ́ lẹ emi, mì ma nọ hẹn homẹgble ovi mìtọn+ lẹ blo, ṣigba mì nọ to pinpọn yé go whẹ́n to mẹplọnlọ+ po tudohomẹnamẹ* Jehovah* tọn po mẹ.+
5 Mì afanumẹ lẹ emi, mì nọ setonuna mẹhe yin ogán mìtọn* lẹ,+ to obu po sisi sisosiso ahundoponọ-yinyin tọn po mẹ, taidi na Klisti,
6 e ma yin to whenue yè to mimọ mì kẹdẹ gba, nado hẹn homẹhun gbẹtọ lẹ,*+ ṣigba taidi afanumẹ Klisti tọn lẹ, he nọ to ojlo Jiwheyẹwhe tọn wà po alindọn* lẹpo po.+
7 Mì yin afanumẹ he tindo pọndohlan dagbe lẹ, taidi na Jehovah,*+ e ma yin na gbẹtọ lẹ,
8 na mìwlẹ yọnẹn dọ dagbe depope he mẹdopodopo wà, ewọ na mọ ale etọn yí sọn Jehovah* dè,+ vlavo ewọ yin afanumẹ kavi mẹhe to edekannu.
9 Humọ, mì ogán lẹ emi, mì nọ yinuwa hẹ yé to aliho dopolọ mẹ, e ma yin po nukunvandomẹ po, na mì yọnẹn dọ Ogán yetọn po mìwlẹ tọn po tin to olọn mẹ,+ podọ ewọ ma tindo mẹnukuntahihopọn depope.
10 To popolẹpo mẹ, mì nọ to huhlọn mọyi+ sọn Oklunọ dè podọ sọn huhlọn daho etọn mẹ.
11 Mì ze gbaja+ Jiwheyẹwhe tọn blebu do, na mì nido penugo nado nọte gligli sọta ayiha wintinwintin* Lẹgba tọn lẹ;
12 na ahididi+ he mí tindo ma yin sọta ohùn po agbasalan po, ṣigba sọta gandudu lẹ, sọta aṣẹpipa lẹ, sọta ogán aihọn zinvlu ehe tọn lẹ, sọta huhlọn gbigbọ ylankan+ olọn tọn lẹ.
13 Na ehe wutu, mì ze gbaja Jiwheyẹwhe tọn blebu hẹn,+ na mì nido penugo nado nọavùnte to azán ylankan gbè podọ, to whenue mì ko dotana nulẹpo godo, nado nọte gligli.
14 Enẹwutu, mì nọte gligli bo yí gbànnú nugbo tọn do blagbajana alinkàn+ mìtọn bosọ ze tùnudo dodowiwa tọn do+
15 bo doafọpa na afọ mìtọn lẹ to awuwiwle mẹ nado lá wẹndagbe jijọho tọn.+
16 Gbọnvona ehe lẹpo, mì ze awọ̀yinu daho yise tọn,+ ehe mì sọgan yí do ṣimiyọ́n ogá* miyọ́nnọ mẹylankan lọ tọn lẹpo.+
17 Humọ, mì kẹalọyi ogangbakun whlẹngán tọn,+ podọ ohí gbigbọ tọn, enẹ wẹ ohó Jiwheyẹwhe tọn,+
18 to ninọmẹ gbigbọmẹ tọn lẹpo mẹ, mì nọ gbọṣi odẹ̀+ po ovẹvivẹ wunmẹ lẹpo po mẹ.+ Podọ na ehe wutu, mì nọ gbọṣi nukle bo nọ to ovẹvivẹ basi do ota omẹ wiwe lẹpo tọn mẹ to whepoponu.
19 Mì nọ hodẹ̀ na mi ga, dọ nuhe yẹn na dọ nido nọ yin nina mi to whenue yẹn kẹnù, na yẹn nido penugo nado dọho po adọgbigbo po nado hẹn aṣli wiwe wẹndagbe lọ tọn zun yinyọnẹn,+
20 ehe tamẹ yẹn to nuyiwa te taidi afọzedaitọ+ de to gẹdẹ mẹ, podọ na yẹn nido yí adọgbigbo do dọho etọn, dile yẹn dona dọ do.
21 Todin, na mìwlẹ nido sọgan yọ́n ninọmẹ ṣie po lehe yẹn te do po, Tikiku,+ mẹmẹsunnu mẹyiwanna podọ lizọnyizọnwatọ nugbonọ de to Oklunọ mẹ na hẹn nulẹpo zun yinyọnẹn na mì.+
22 Yẹn to ewọ dohlan mì dè na lẹndai ehe wutu, na mì nido yọ́n ninọmẹ mítọn podọ na ewọ nido sọgan miọnhomẹna mì.
23 Na mẹmẹsunnu lẹ ni tindo jijọho, owanyi po yise po sọn Jiwheyẹwhe Otọ́ podọ Oklunọ Jesu Klisti dè.
24 Na nukundagbe majẹhẹ ni tin hẹ mẹlẹpo he tindo owanyi he ma sọgan gble na Oklunọ mítọn Jesu Klisti.
Nudọnamẹ Odò Tọn
^ Kavi “oplọn; anademẹ.” To paa mẹ, “linlẹn zizedo.”
^ To paa mẹ, “ogán mìtọn to agbasa-liho.”
^ To paa mẹ, “e ma yin po nuyiwa mẹnukunta-zọ́n tọn lẹ po, taidi nukundagbe gbẹtọ tọn dintọ lẹ.”
^ Kavi “ayiha gigẹdẹ.”
^ Kavi “dudlu pẹvi.”
