Lomunu lẹ 10:1-21
10 Mẹmẹsunnu lẹ emi, na nugbo tọn, ojlo dagbe ahun ṣie mẹ tọn podọ ovẹvivẹ ṣie hlan Jiwheyẹwhe do ota yetọn mẹ wẹ yindọ yé ni yin whinwhlẹngán.+
2 Na yẹn dekunnu gando yé go dọ yé tindo zohunhun na Jiwheyẹwhe,+ ṣigba e ma yin sọgbe hẹ oyọnẹn he pegan gba.
3 Na yé ma yọ́n dodowiwa Jiwheyẹwhe tọn+ ṣigba bo nọ to tintẹnpọn nado do yetọn titi ai wutu,+ yé ma litaina dodowiwa Jiwheyẹwhe tọn.+
4 Na Klisti wẹ opodo Osẹ́n lọ tọn,+ na mẹdepope he to yise dohia nido sọgan jẹ dodowiwa kọ̀n.+
5 Na Mose kàn gando dodowiwa he tin to kọndopọ mẹ hẹ Osẹ́n lọ go dọmọ: “Mẹhe nọ wà onú ehelẹ na nọgbẹ̀ gbọn yé dali.”+
6 Ṣigba, e yin didọ gando dodowiwa he nọ dekọtọn sọn yise mẹ go dọmọ: “Hiẹ dọ to ahun towe mẹ blo+ dọ, ‘Mẹnu wẹ na hẹji yì olọn?’+ yèdọ nado hẹn Klisti jẹte wá,
7 kavi, ‘Mẹnu wẹ na jẹte yì odò mapote mẹ?’+ yèdọ nado hẹn Klisti wá sọn oṣiọ lẹ mẹ.”
8 Ṣigba, etẹwẹ Owe-wiwe dọ? E dọ dọ, “Ohó lọ to dè we, yèdọ to onù towe titi mẹ podọ to ahun towe titi mẹ”;+ enẹ wẹ “ohó” yise tọn lọ he mí to yẹwheho etọn dọ.
9 Na eyin hiẹ yí onù towe titi do lá to gbangba dọ Jesu wẹ Oklunọ,+ bọ a sọ tindo yise to ahun towe mẹ dọ Jiwheyẹwhe fọ́n ẹn sọn oṣiọ lẹ mẹ, hiẹ na yin whinwhlẹngán.
10 Na ahun wẹ gbẹtọ nọ yí do dó yise hia na dodowiwa, ṣigba onù wẹ gbẹtọ nọ yí do basi gbeyiyi gbangba tọn+ na whlẹngán.
11 Na adà Owe-wiwe tọn de dọmọ: “Mẹdepope he ze yise etọn sinai do ewọ ji ma na yin hinhẹn jẹflumẹ.”+
12 Na vogbingbọn de ma tin to Ju po Glẹkinu po ṣẹnṣẹn.+ Na Oklunọ dopolọ wẹ yemẹpo tindo, yèdọ ewọ he nọ dona* mẹhe to awhádo ylọ ẹ lẹpo susugege.
13 Na “mẹdepope he dawhá ylọ oyín Jehovah* tọn wẹ na yin whinwhlẹngán.”+
14 Etomọṣo, nawẹ yé na dawhá ylọ ẹ eyin yé ma ko tindo yise to ewọ mẹ gbọn? Podọ nawẹ yé na tindo yise to mẹhe yé ma ko sè ohó etọn mẹ gbọn? Podọ nawẹ yé na sè gbọn eyin mẹde ma dọyẹwheho na yé?
15 Podọ nawẹ yé na dọyẹwheho gbọn eyin yé ma ko yin didohlan?+ Kẹdẹdile e ko yin kinkandai do dọmọ: “Lehe afọ mẹhe to wẹndagbe nudagbe lẹ tọn lá tọn lẹ yọnwhanpẹ do sọ!”+
16 Etomọṣo, e ma yin yemẹpo wẹ setonuna wẹndagbe lọ gba. Na Isaia dọmọ: “Jehovah,* mẹnu wẹ tindo yise to nuhe yin sisè sọn mí dè mẹ?”*+
17 Enẹwutu, yise nọ bọdo nuhe yin sisè lọ go.+ Podọ ohó lọ nọ yin sisè to whenue mẹde dọho gando Klisti go.
18 Ṣigba, yẹn kanse dọ, Yé ma gboawupo nado sè, kavi yé wàmọ wẹ? Eyọn, na nugbo tọn, “ogbè yetọn tọ́nyi aigba lẹpo ji, podọ owẹ̀n yetọn yì opodo aigba fininọ lẹ tọn ji.”+
19 Ṣigba, yẹn kanse dọ, Islaeli ma gboawupo nado yọnẹn, kavi yé wàmọ wẹ?+ Mose dọ jẹnukọn dọmọ: “Yẹn na yí enẹ he ma yin akọta de do fọ́n awuwhàn mìtọn dote; yẹn na yí akọta nulunọ de do fọ́n homẹgble sinsinyẹn mìtọn dote.”+
20 Ṣigba, Isaia yí adọgbigbo do lá dọmọ: “Mẹhe ma to dindin mi lẹ wẹ mọ mi;+ mẹhe ma kàn mi biọ lẹ wẹ yọ́n mi.”+
21 Ṣigba, e dọ gando Islaeli go dọmọ: “Azán lẹpo gbè wẹ n’ko dlẹnalọ ṣie lẹ hlan akọta tolivẹtọ podọ tasinyẹntọ de.”+
