Salmu 139:1-24
Na anademẹtọ hànjitọ lẹ tọn. Ohàn Davidi tọn.
139 Jehovah E, hiẹ ko dindona mi bo yọ́n mi.+
2 Hiẹ nọ yọ́n whenue yẹn sinai podọ whenue yẹn fọnṣite.+
Hiẹ nọ mọ linlẹn he to ohò ṣie mẹ lẹ hlan sọn olá.+
3 Hiẹ nọ dindona* mi to whenue n’to gbejizọnlinzin podọ whenue n’to aimimlọn;Hiẹ yọ́n aliho ṣie lẹpo.+
4 Ohó depope he to odẹ́ ṣie ji,Jehovah E, pọ́n! Hiẹ ko yọ́n ẹn hezeheze.+
5 Hiẹ lẹdo mi pé, to godo po nukọn po;Hiẹ sọ ze alọ towe do ji e.
6 Oyọnẹn mọnkọtọn zẹ̀ nukunnumọjẹnumẹ ṣie go.*
E yiaga hú mi bọ n’ma gán jẹ e kọ̀n.*+
7 Fie wẹ n’gán họnbẹ do dó gbigbọ towe,Podọ fie wẹ n’gán họnyi sọn nukọn towe?+
8 Eyin yẹn tlẹ hẹji yì olọn mẹ, hiẹ na tin to finẹ,Eyin yẹn tlẹ sọ tẹ́ adọzan ṣie do Yọdò* mẹ, pọ́n! hiẹ nasọ tin to finẹ.+
9 Eyin n’tlẹ yí awà afọnnu fuu tọn lẹ do zlọnNado yì gbọṣi ohù he dẹn hugan lẹ tó,
10 Etlẹ yin to finẹ, alọ towe na deanana miBọ adusilọ towe na hẹn go e.+
11 Eyin yẹn tlẹ dọ dọ: “Zinvlu na whlá mi janwẹ!”
To whenẹnu, zinvlu he lẹdo mi na lẹzun hinhọ́n.
12 Zinvlu lọsu ma tlẹ na dózin gbau na we,Ṣigba, ozán na họ́n kẹdẹdi okle;+Vogbingbọn ma tin to zinvlu po hinhọ́n po ṣẹnṣẹn na we.+
13 Na hiẹ wẹ basi ayi ṣie lẹ;Hiẹ wẹ whlá mi* do ohò onọ̀ ṣie tọn mẹ.+
14 Yẹn nọ pà we, na aliho he jiawu mẹ wẹ n’yin didá te.+
Azọ́n towe lẹ jiawu,+Yẹn* yọ́n ehe ganji.
15 Ohú ṣie lẹ ma yin whiwhla do weTo whenue yẹn yin didá to nuglọ,To whenue yẹn yin linlọ̀n to odò he siso aigba tọn lẹ mẹ.+
16 Nukun towe lẹ tlẹ mọ mi to whenue n’gbẹ́ pò to adọ̀mẹ;Awutugonu ṣie lẹpo wẹ ko yin kinkan do owe towe mẹ,Yèdọ azán he gbè yé yin awuwlena te lẹ,Whẹpo depope to yé mẹ do tin.
17 Enẹwutu, lehe linlẹn towe lẹ họakuẹ na mi do sọ!+
Jiwheyẹwhe E, lehe sọha yetọn sù sọ!+
18 Eyin n’tlẹ tẹnpọn nado hia yé, yé sù hugan tọkẹ́n.+
Eyin n’tlẹ fọ́n to afọnnu, n’na gbẹ́ to yé hia.+
19 Jiwheyẹwhe E, eyin hiẹ sọgan nọ hù mẹylankan sẹ̀ poun!+
Whenẹnu, danuwatọ* lẹ na yì sọn dè e,
20 Yèdọ mẹhe nọ gbọn mẹwhinwhàn ylankan dali* dọho sọta we lẹ;Yewlẹ wẹ kẹntọ towe he nọ yí oyín towe zan to ovọ́ mẹ lẹ.+
21 Jehovah E, be yẹn ma gbẹwanna mẹhe gbẹwanna we lẹ wẹ,+Podọ be mẹhe nọ ṣiatẹ sọta we lẹ ma nọ hiọawu na mi wẹ ya?+
22 Wangbẹna kẹdẹ wẹ n’tindo na yé;+Yé ko lẹzun kẹntọ na mi pete.
23 Dindona mi, Jiwheyẹwhe E, bo yọ́n ahun ṣie.+
Gbeje mi pọ́n bo yọ́n magbọjẹ* ṣie lẹ.+
24 Pọ́n eyin aliho ylankan de ma to ohò ṣie mẹ,+Bosọ plan mi gbọn aliho madopodo lọ ji.+
Nudọnamẹ Odò Tọn
^ To paa mẹ, “jlẹ.”
^ Kavi “hú nuhe n’sọgan mọnukunnujẹemẹ.”
^ Kavi “jiawu gbau na mi.”
^ Kavi vlavo, “lọ̀n mi dopọ.”
^ Kavi “Alindọn ṣie.”
^ Kavi “hùnhọ́dutọ.”
^ Kavi “gbọn linlẹn yetọn titi dali.”
^ Kavi “linlẹn ayimajai tọn.”
